1 येशु ओलं छिन्ट डोङ्गाल चरिस्यु दह हुदिन्त हिनौ, ओटन आसहरलं रांऔ। 2 ओटन रुयाङै चारपाईत वङज्यान्या तोलोअ लुलाजन आल्योङ राहोनौ। येशु नकाङल बिस्वास रङस्यु लुलाजन ऐआढोव, "ऐ ज़ा, साहस ढोते। न पाप छेमा ताइदा।" 3 ब्यबस्थाला शास्त्रीयाङ मध्य* ख्वाएले रारांल ऐलेवाङ, "इकाले परमेस्वरलं अपमान ढाज्याया।" 4 येशुले नकाङल बिचार सनस्यु ऐआढोवाङ, "जे दानाङ जे यिङल माचान्या बिचार ढाज्याच्यो? 5 नैताहकन कै ढान्या सजिलो लेऊ, ‘न पाप छेमा ताइदा’ ऐलेन्या सन् ‘सोन्ते ओटन बान्ते’ ऐढान्या? 6 तर रुल ज़ाल पिरथ्बील पाप छेमा ढान्या अढिकार लेया ऐलेस्यु जे सनौ ढुदुचिते।" तब ओले ना लुलाजन ऐआढोव, "सोन्ते, न चारपाई वुरते, ओटन नझिम देए हिनन्ते।" 7 ओटन ना सोव, ओटन आझिमदेए लागिऊ। 8 जब रुयाङल हुलले ईका रांरङौ, तब नकाङ छ्याएछ्याए ताइवाङ, ओटन रुयाङजन ऐटाइन्या सक्ति आयांऔकाले परमेस्वरलं प्रसम्सा रांढोव।

9 येशु नङंन आहिनज्याऔक मत्ती ऐराढान्या तोलोअ रुजन तिरो उठाइन्या अड्डाल आचुङज्यान्या आरङौ, ओटन नकाजन ऐआढोव, "ङा छिन्ट लागिन्ते।" ना च्याङौ ओटन ओलं छिन्ट लागिऊ।

10 येशु मत्तीलं झिमल ज्यान्या आज्याज्याऔक, तबर जना तिरो उठाइन्याङ सनर बिरोद ढान्याङ रा:स्यु ओल सनर आसिइयाङसं ज्यान्या लेस्यु चुङवाङ।✝ 11 जब फरिसीयाङ ना रांरङौ, तब ओलं सिइयाङजन रांगिन्वाङ, "दानाङ जे गुर तिरो उठाइन्याङ सनर पापीयाङस ज्यौ?"

12 ईका थएस्यु येशुले ऐआढोवाङ, "नाएमाबोरन्याङजन गुनील आबस्यक माल्दी, तर रोगियाङजन लेया। 13 तर हिनस्यु इकाल अर्थ नैति जे ह्युउसिचिते, ‘ङा बलि माचाहिङडी, दया चाहिङा।’ दानाङभन्या ङा सोझाङजन माङडी, तर पापीयाङजन ङाखुलराङु हो।"✝

14 तब बप्तिस्मा यांन्या यहुन्नाल सिइयाङ आल्योङ रा:स्यु रांगिनौ, "दानाङ गे सनर फरिसीयाङ बर्त चुङै, तर न सिइयाङ बर्त माचुङर?" 15 येशुले नकाङजन ऐआढोवाङ, "जैकसमन दुलाहा जन्तियाङसं कोठाल लिज्या, नैति नकाङ शोक रामनाहौ का? तर ना दिन रांन्यालेया जब दुलाहा नकाङ्ङन लाङसी, तब नकाङ बर्त चुङन्या लेरा।

16 "तर काङ्काईले पुरानो क्वात छार क्वाल टालाले मापएरदी। दानाङभन्या छार टालाले पुरानोजन झन्जै भ्या चिइवा। 17 तर काङ्काईले पुरानो छालाल मशकलं छार अङ्गुरल रस मानाटौदी, मानकन्ता मशक पाअसिस्यु यिईस्यु खेमा। तर छार अङ्गुरल रसजन छारजै छालाल मशकलं नाएसिकन, नेंलोअजै जोगिन्या।"

18 जब येशुले नकाङजन ईका छेन पानस्याज्याऔ, तब बैठअझिमला तोलोअ शासक रांऔ, ओटन ओलजन धोक यांस्यु ऐआढोव, "औ गुरु मेएमा ङाज़ा भाबाअ सिस्यु लेऊ, नङ रा:स्यु नकाल यर्त नकुई नाएते, ओटन नका बान्चिन्या लेया।"

19 येशु सोस्यु च्याङस्यु आसिइयाङसं शासकलं छिनछिन हिनौ। 20 नवाए बेला बारं बर्सकन जी बगिन्या बेथा लेन्या तोलोअ मेएमा छिन्ङन रा:स्यु ओलं क्वाल टुप्पा आछुउ।✝ 21 दानाङभन्या नकाले आयिङयिङल यिङसिस्यु ऐलिज्याऊ, "इकाल क्वा याएज छुङकन बै ङा ऐबेल्ङा।" 22 येशुले फरअ वलस्यु आब्याटौक ना मेएमाजन आरङौ, ओटन ऐआढोव, "ऐ ज़ा, साहस ढोते, न बिस्वासले नङजन सबेल्दुन्वा।" ना मेएमा नवाए बेलाई बेलौ।

23 ओटन जब येशु शासकलं झिमल ताप्‌रा:औ, ओले बाङसुली तपन्याङ सनर रुयाङ हुलले चिचच्याबास रालज्यान्या आरङवाङ। 24 येशुले नकाङजन ऐआढोवाङ, "जे बाहेर हिन्चिते, दानाङभन्या किटी सिस्यु माल्दी, रुउज्याऔ दी।" ऐआलेऊक नकाङ शाईवाङ। 25 रुयाङजन बाहेर देए पलिटौरा पाइना ओलं भितरलं पसिऊ, ओटन ना किटील कुई आकोलोकौ, ओटन ना जरू सोव। 26 तब ईका छेनल बाए ना देसभरि फैलिऊ।

27 येशु नङंन आहिनज्याऔक नेंलोअ अन्ढलानेले "ऐ दाऊदल ज़ा, घेनजन दया ढासिन्ते" ऐलेस्यु कलिकौयन आछिनछिन लागिऊने। 28 ओ झिमल पसियापाइना ना अन्ढलाने आल्योङ रांऔने। ओटन येशु नकानेजन ऐआढोवने, "ङा आका ऐढुदुङा ऐलेस्यु झेन बिस्वास माढोचिनच्यो?" नकाने ओलजन ऐनेढोव, "औ, प्रभु।" 29 तब येशुले नकानेल म्युउ छुस्यास्यु ऐआढोवने, "झेन बिस्वास अनुसार झेनजन नैजै ग्याताइत्या।" 30 ओटन नकानेल म्युउ रंनौ। येशुले ऐढास्यु नकानेजन कडा चेताउनी आयोवने, "ईका छेन काङ्काईले तासनरत्या।" 31 तर नकाने हिनौने, ओटन नका देसला इलाकाभरि आबाए नेंफैलाहौ।

32 जब ओयाङ पलिईस्यु हिनज्यावाङ, तब दुस्टआत्मा लागिन्या तोलोअ छ्योङौ माढुदुन्या रुजन येशु ल्योङ होन्सिऊ। 33 भूत पलिइवापाइना नका लाटा छ्योङौ। ओटन "इस्राएलतं ऐटाइन्या खकै मारङसिदी" ऐलेस्यु रुयाङ हुल अचम्मै ताइवाङ। 34 तर फरिसीयाङ ऐलेऊ तअसिवाङ, "दुस्टआत्माङलं खसमङन्जै नकाले दुस्टआत्माङ पलिटौरा।"✝

35 येशु सोगल सहरल सनर नङ्गरल यहूदीयाङल आराधना झिमजिऊल सिक्छ्या यांऔयन, परमेस्वरलं राज्यल चान्याथाई प्रचार ढाऔयन सनर सोगलै किसिमला नाएबोर सनर दुर्बलताङ सबेलौयन बाज्याऔ।✝ 36 तर रुयाङल हुलजन रङस्यु येशुल यिङ नकाङ नाल्ट दयाले भरिसिऊ। दानाङभन्या नकाङ बिनाग्वालाला भेडाङमन्जै हलाअ सनर बाठए ताइस्यु लेवाङ।✝ 37 तब ओले आ सिइयाङजन ऐआढोवाङ, "बाली ता खाटखाट जै लेया, तर कामदारयाङ भन्या थोरैज लेरा।✝ 38 नैताइस्यु बाली खानौ नाल्ट खेएल न कामदारयाङ परिङस्यासिन ऐलेस्यु प्रभुजन प्रार्थना ढोचिते।"