1 हेरोद रयल पालाक यहूदिया प्रदेसला बेथलेहेम सहरल येशु जर्मिया पाइना, पुर्ब देसङन ज्योतिसीयाङ यरुशलेम सहरल ताप्‌रावाङ, 2 ओटन ऐलेस्यु रांगिन्वाङ "यहूदीयाङल रय ताइस्यु जर्मिस्यु काङ लिज्याऔ? दानाङभन्या गे ओलं हरवए पुर्बङन पलिईस्यु आरांज्यान्या गेरङयिउ ओटन ओजन ढोक गे योरायिउ।"✝

3 जब ईका थएवापाइना हेरोद रय भ्याईज आतिऊ, ओटन नका सकाए सोगल यरुशलेम सहरला रुयाङ बै आतिवाङ। 4 ओटन नकाले सोगलै मुख्या पुजाउरोयाङ सनर जन्ताङल शास्त्रीयाङजन आदुउवाङ, ओटन ख्रीस्टल जन्म काङ ताइन्यारैस लेस्यु ग्यानगिन आढोवाङ।

5 ओयाङै नकाजन ऐराढोव, यहूदियाला बेथलेहेम सहर। दानाङभन्या अगमबक्ताङ्ङन ऐटाइन्या सरसिन्या लेया:

6 "ऐ बेथलेहेम, ‘यहूदा प्रदेसला नङ्गर’

नङ यहूदाला शासकयाङ खार्ल काङ्काईतन बै क्याइसिन्या मालेन्दी,

दानाङभन्या नङ्ङन तोलोअ शासक पलिईस्यु रांन्यालेया,

ओले इस्राएलला ङा रुयाङजन डोऱ्याहौरा।"✝

7 तब हेरोदले पुर्बङन रांन्या ज्योतिसीयाङजन गोप्यल खुल्स्यु हरवए ख्वाएबेला रंनौ, ना नकाङल्योङन पत्ता आलाहौ। 8 नकाले ओयाङजन ऐढास्यु बेथलेहेमल आपरिङवाङ, "हिन्चिते, ओटन चान्यासं नका बालअजन रोअचिते। नकाजन डोएच्योकन ङाजन पानस्याङच्यो, ओटन ङा बै हिनस्यु नाजन ढोक योंङा।"

9 तब रयल छेन थएस्यु नकाङ रा:यम लागिवाङ। जो हरवए नकाङै पुर्ब देए रांरङौ, नका हरवए नकाङल हा-हा हिनौ ओटन बालअ आलन्या पोल ताप्‌रा पाइनाई ना हरवए नलै अद्दिउ। 10 जब ओयाङै ना हरवए रांरङौ, तब नकाङ भ्याई आनन्द ताइवाङ।✝ 11 ओटन झिम भितरलं रा:हिनौक नकाङै बालअ येशुजन आअमा मरियम सकाए आलिज्यान्या रा:रङौ, ओटन गोम लेस्यु येशुजन ढोक रा:योव। तब झिली पलाअस्यु येशुजन सुन, आस्युउनमन्या धुप सनर मुर्रल* भिटी रांचराहौ।

12 ओटन हेरोद ल्योङ वलस्यु ताहिनच्यो ऐलेन्या रा: मङलं चेताउनी डोएस्यु नकाङ छुट्टै यम ताइस्यु रा: देसलं वल्वाङ।

13 नकाङ रांहिनौ छिन्ट परमप्रभुल तोलोअ दुत योसेफल मङलं रंनौ, ओटन ओले ऐआढोव, "ऐ, सोन्ते इङन्या बालअ सनर आअमाजन लाङस्यु मिस्र देसदेए ढोङचिते, ओटन जब समन ङा मापानस्यान तब समन नङै चुङचिते। दानाङभन्या हेरोदले बालअजन सटौ नाल्ट रोअज्याऔ।"

14 ओटन योसेफ सोस्यु बालअ सनर आअमाजन ओलसं लाङस्यु ओइ रिउ मिस्र देसलं हिन्वाङ, 15 ओटन हेरोद आमासिऊ समन नङै चुङवाङ। अगमबक्ताङ्ङन परमप्रभुले आपानन्या बचन ऐलेस्यु पुरा ताहा, "ङा ङाज़ाजन मिस्र देसङन ङाखुल्ङु।"✝

16 तब ज्योतिसीयाङै ओलजन धोखा रायांन्या हेरोदले आसनौ, ओटन नका रिईले चिरिऊ ताहौ। ओटन ज्योतिसीयाङ रापानन्या बेला अनुसार बेथलेहेम सनर नका पो भितरला नें बर्सतन वान्देएङा सोगलै बालअयाङजन सटौ आपरिङवाङ।

17 ऐलेस्यु यर्मिया अगमबक्ताले आपानन्या बचन पुरा ताहौ।

18 "रामाल तोलोअ ग़ा थहौ, जोरसै आव्‌रन्या सनर आतिइस चिचच्याइस्यु, राहेल आलुलल्याङल नाल्ट आव्‌रज्यान्या, सानत्वना नकाले आमासुइकारिऊ, दानाङभन्या नकाल लुलल्याङ आब मालज्यादुरा।"✝

19 हेरोद आसिऊ छिन्ट, परमप्रभुल तोलोअ स्वर्गदुत योसेफल मङलं मिस्रल रंनौ, 20 ओटन ऐआढोव, "सोन्ते, बालअ सनर आअमाजन इस्राएल देसलं लाङस्यु हिनन्ते, दानाङभन्या जोयाङै बालअल परान होनौ रारोकौ नकाङ सिदुरा।"✝

21 योसेफ सोस्यु बालअ सनर आअमाजन ओलसं रएस्यु इस्राएल देसलं वलस्यु रांवाङ।

22 तर जब ईका आथटौ कि यहूदियाल अर्खिलाउसले आबौ हेरोदल पोल राज्य चलाइज्याऊ नैताइस्यु योसेफ ओदेए हिनन्या छ्याटौ, ओटन मङलं चेताउनी डोएस्यु नकाङ गालील प्रदेसलं हिन्वाङ। 23 नकाङ नासरत ऐढासिन्या सहरल हिनस्यु चुङवाङ। ऐलेस्यु अगमबक्ताङ रांछ्योङन्या बचन पुरा ताहौ: "ओजन नासरी ऐढान्या लेसिया।"✝