1 "नका बेला स्वर्गला राज्य दस कनन्याङस दान्जिऊ दुदुसिया। नकाङै अपङ्गी रा: बत्ति होनस्यु दुलाहासं डोएसिया लेस्यु पलिइवाङ।✝ 2 नकाङ मध्य पास गोटाङ निर्बुद्दि सनर पास गोटाङ बुद्दिमती लेवाङ। 3 दानाङभन्या जब निर्बुद्दियाङै रा: बत्ति ता रालाङौ, तर नकाङै रा:सामा तीइ मालाङदुरा। 4 तर बुद्दिमतीयाङै रा: बत्ति सकाए तीइल जा बै रालाङौ। 5 दुलाहाले ढिलो आढाऔक नकाङ सोगलै मिऊरुइले लठ्ठै ताइस्यु म्वाईवाङ।" 6 "तर आधारिउल ‘खिम्चिते दुलाहासं डोएसिराचिते ऐलेन्या ग़ा थहौ’।"

7 "तब नका सोगलै कनन्याङ सोवाङ, ओटन अपङ्गी रा: बत्ति रादुउज्याऔक। 8 निर्बुद्दि कनन्याङै बुद्दिमतीयाङजन ऐराढोव, ‘गेजन तचिठक्क जे तीइ यांसिन्ते, दानाङभन्या गे बत्ति ता सिङाई लेदा।’" 9 "तर बुद्दिमतीयाङै बुद्दिमतीयाङजन ऐराढोव, ‘गे सनर झेन नेंलोअजन योअन्यायाए तीइ माल्दी, बरु दोकानदाऱ्या ल्योङ हिन्चिते ओटन जे नाल्ट लङचिते।’" 10 नैताइस्यु मुर्खयाङ तीइ लङनावाङ जब नकाङ हिन्वाङ दुलाहा ताप्‌रा:औ, पास गोटा दुउसिस्यु लिज्यान्याङ ओलसं भितरला ब्याहा भोसलं पसिवाङ तब झलाप रूफ्सिऊ।

11 "छिन्ट ना अपुर कनन्याङ ढिलो रांवाङ ओटन ऐलेऊ तअसिवाङ, ‘प्रभु, प्रभु, गे पसिया झलाप फएस्यासिन्ते!’✝ 12 तर नकाले जबाक यांस्यु ऐआढोवाङ, ‘मछ्यु ङा, जेजन ऐढाच्या, कि ङा जेजन माशईचिदी।’" 13 "नैताइस्यु येशुले ऐलेऊ सन्सिस्यु लिज्याचिते, दानाङभन्या ना दिन सनर ना बेला ख्वाए बेला रा: जे मासन्चिदी।"

14 नका बेला "स्वर्ग राज्य ऐटाइन्या लेया, तोलोअ रु जोले परदेस हिन्ङाआल्यौक आनोक्करयाङजन खुल्स्यु आधन-पैसालं जिम्मा आयोवाङ।✝ 15 ओले नकाङजन रांमि छेमता अनुसार तोलोअजन पास हजार सुनल सिक्का, छुट्टैजन नें हजार सुनल सिक्का ओटन छुट्टैजन त हजार सुनल सिक्का यांनिइस्यु ओल परदेस देए हिनौ।" 16 तब पास सुनल सिक्का लाङन्याले हटपट हिनस्यु नकाले ब्यापार ढास्यु अपुर पास गोटा सिक्का आकमाहौ। 17 नैलेस्युई नेंलोअ सिक्का लाङन्याले बै अपुर नेंलोअ आकमाहौ। 18 तर तोलोअ सिक्का लाङन्याले हिनस्यु नामल वोस्यु आ साहूल धन मोअस्यु आनाटौ।

19 "तबर समाय छिन्ट ना नोक्करयाङल साहू रांऔ, ओटन नकाङसं हिसाप नीऊ। 20 तब पास सुनल सिक्का लाङन्या नोक्करले अपुर पास हजार सिक्का होनस्यु आहाक रा:स्यु ऐआढोव, ‘साहू ज्यू, नङ ङाजन पास हजार सिक्काल जिम्मा नयांङनु। खिम्तेवन, ङा अपुर पास हजार सिक्का ङाकमाइङु।’" 21 "साहूले नकाजन ऐआढोव, ‘स्याबास, चान्या सनर बिस्वास लायकला नोक्कर! नङ तचिइठक्क छेनत बिस्वास लायकला नताइनु, आब ङा नङजन तबर छेनल जिम्मा यांना। नङ नसाहूलं आनन्दत सहभागि ताहन्ते।’" 22 "नें हजार सिक्का लाङन्याले बै रा:स्यु ऐलेऊ, ‘साहू ज्यू, नङ ङाजन नें हजार सिक्का नयांङनु। ब्याएते, ङा अपुर नें हजार सिक्का ङाकमाइङु।’"

23 "नकाल साहूले नकाजन ऐआढोव, ‘स्याबास, चान्या सनर बिस्वास लायकला नोक्कर, नङ तचिइठक्क छेनत बिस्वास लायक नताइनु, आब ङा नङजन तबर छेनल जिम्मा यांना। नङ नसाहूलं आनन्दत सहभागि ताहन्ते।’" 24 "तोलोअ सुनल सिक्का लाङन्याले बै रा:स्यु ऐलेऊ, ‘साहू ज्यू, मावाइसिन्या येङलन खानन्या सनर माच्यापसिन्या पोलन दुउन्या नङ कठोर रु हो, ईका ङाजन थाहैलेऊ ज्या। 25 नैताइस्यु ङा ङाछ्याएङु, ओटन हिनस्यु न सिक्का ङा व्मजिङल मोअस्यु ङानाएङु। खिम्ते, न सिक्का।’" 26 "नकाल साहूले नकाजन जबाक आयोव, ‘ऐ घुर्बी, अल्सि नोक्कर, मावाइसिन्या पोलन खान्वा, ओटन माच्यापसिन्या पोलन दुउवा ऐलेस्यु नङ नसन्न्या ताहकन, 27 नङ ङा धन साहूल्योङ नाटौ परिन्या, ओटाहकन ङा रा:स्यु ङाधन ब्यास समेत होल्ङा होला। 28 नैताइस्यु नका ल्योङन नका तोलोअ सिक्का न्हानचिते, ओटन जोल्योङ दसगोटा सिक्का लिज्या ओजन योंचिते। 29 दानाङभन्या जोसकाए ले नकाजन अपुर बै यांन्यालेसिया, ओटन ओसकाए खाटखाट ताइन्यालेया। तर जोसकाए माले नका ल्योङन लिज्यान्या बै न्हानसिया।✝ 30 नका बिकामी नोक्करजन बाहेरला चिऊन्याल क्याइचिते, जोल रुयाङ व्‌रन्यालेरा ओटन ह्वा ज़िङ कैन्यालेरा।’"✝

31 "जब रुल ज़ा सोगलै स्वर्गदुतयाङ सकाए आमहिमात रा:, तब ओ आमहिमामय सिहासनत चुङन्या लेया।✝ 32 ओटन ओलं सामन्दी पिरथ्बीला सोगल रुयाङ दुउसिन्या लेरा, ओटन जोमनलेस्यु ग्वालाले भेडा सनर बाख्राजन छुटाहौ, ओमनलेस्युजै ओले नकाङजन तोलोअजन छुट्टैतन अलक जाएन्यालेया। 33 ओले भेडाङजन आदाइन्या देए सनर बाख्राङजन दाबऱ्या देए नाएन्या लेया।"

34 "तब रयले आदाइन्या देएङाङजन ऐढान्या लेया, ‘रांचिते, ङा बौ बअचान्या हो! सङ्सारलं उत्पटीतन जे नाल्ट तयार जाएसिन्या राज्यजन अढिकार ढोचिते। 35 दानाङभन्या ङा ङाकरेऊक, जे ङाजन ज्यान्या जेयाङचिऊ। ङा री ङाओहौक जे ङाजन री ओव जेयाङचिऊ। ङा परदेसी ङाल्ङु, जे ङाजन बाई जेयाङचिऊ।✝ 36 जब बिनाक्वा ङाल्ङु, जे ङाजन क्वा जेक्वाटङचिऊ। नाएबोरस्यु ङाल्ङु, जे ङाजन जेखिमराङचिऊ। कैदल ङालेङु, जे ङाल्योङ जेरांचिऊ।’" 37 "तब धर्मियाङै ओलजन जबाक यांन्या लेरा, ‘औ प्रभु, खक गे नङजन नकरेन्या गेरङसिनु, ओटन ज्यान्या गेया:सिनु? अथाबा नओइन्या गेरङसिनु, ओटन ओव गेया:सिनु? 38 खक गे नङजन परदेसी गेरङसिनु, ओटन नङजन गेझिमल बाई गेया:सिनु? अथाबा बिनाक्वा गेरङसिनु ओटन क्वा गेक्वाएसिनु? 39 ओटन खक गे नङजन ननाएबोरन्या अथाबा कैदी गेरङसिनु, ओटन नल्योङ गेडोएसिरायिउ?’"

40 "तब रयले नकाङजन जबाक आयोवाङ, ‘ङा मछ्यु, जेजन ऐढाच्या, जे आका ङा भाईयाङ मध्य सोगलैभन्या इङन्याङतन तोलोअजन ज्वाए सम्भार जेढोचिऊ, ना जे ङाजन जै जेढाङन्या हो।’"

41 "नकाल छिन्ट ओले दाबऱ्याङनता रुयाङजन ऐढोरा, ‘सरापित रुयाङ! ङातन लोए ताइचिते, ओटन दियाबलस सनर नाल दुतयाङल नाल्ट तयार जाएसिन्या अनन्तल मील हिन्चिते। 42 दानाङभन्या ङा करेस्यु ङाल्ङु, जे ङाजन ज्यान्या मायांदुङच्या। री ओइस्यु ङाल्ङु, जे ङाजन री ओव जेमायाङचिऊ। 43 ङा परदेसी ङालेङु, जे झिमल ङाजन बाई मायांदुङच्या। बिनाक्वा ङाल्ङु ओटन जे ङाजन क्वा माक्वाएदुङच्या, ङानाए बोरस्यु कैदल ङालज्याऔक जे ङाजन माखिमरादुङच्या।’"

44 "नकाङ बै ऐलेस्यु जबाक यांन्या लेरा, ‘प्रभु, खक गे नङजन नकरेन्या सनर री नओइन्या गेरङसिनु, परदेसी सनर बिनाक्वा अथाबा नाएबोरन्या गेरङसिनु, अथाबा कैदल गेरङसिनु, ओटन न सेवा गेमाढोयिउ?’" 45 "तब ओले नकाङजन जबाक यांन्या लेया, ‘ङा मछ्यु, जेजन ऐढाच्या, आका सोगलैतन इङन्याङ मध्य तोलोअजन ज्वाए जे सम्भार जेमाढोचिऊ, ना ङाजन जेमाढाङचिऊ हो।’" 46 "तब इकाङ अनन्त सजाईल भागेदार ताइन्यालेरा, तर धर्मियाङ अनन्त जिबनल पसिन्या लेरा।"✝