येशुल बिरोदत सड्यन्त्र
मर्कुस १४:१-२; लूका २२:१-२; यहुन्ना ११:४५-५३
1 येशुले ईका सोगलै छेन आपानस्याऔ छिन्ट आ सिइयाङजन ऐआढोवाङ, 2 "जे ऐसनच्या, आबका नेंयोअ छिन्ट निस्तार26:2 (उनध्यालि-उभ्याली) =निस्तार पर्ब मोशाले मिस्र देसङन इस्राएलीयाङजन स्वर्गदुत जेजन बिपत्तितन ग्याबचाइचिरत्या-पर्ब रांन्यालेया, ओटन रुल ज़ा क्रूसतं केप्सिऊ नाल्ट कोलोअसिन्यालेया।"26:2 प्रस्थान १२:१-२७ 3 तब कैयाफा मिनला प्रधान पुजाउरोल दरबारल मुख्या पुजाउरोयाङ सनर सेरयाङ दुउसिवाङ। 4 ओटन नकाङै येशुजन कढाई झुकाइस्यु कोलोअस्यु सएन्या सल्ला रांढोव। 5 तर नकाङै ऐलेवाङ, "पर्बल बेलाक सएन्यामाङदी। मानकन्ता रुयाङल खैलाबैला ऐताह।"
येशुले बेथानियाल अबिसेकलं तीइ ङएल आठिइन्या
मर्कुस १४:३-९; यहुन्ना १२:१-८
6 येशु बेथानियाला सिमोन कुरील झिमल आलिज्याऔक, 7 तोलोअ मेएमा26:7 ईका मेएमा=लाजरसं सनर मार्थाल दिदी मरियम हो सिङ्गमरमरल तोलोअ चुन्थिल26:7 लुङल चुन्थि बअकरन्या अत्तर होनस्यु येशु ल्योङ रांऔ, ओटन ओले ज्यान्यालेस्यु आचुङज्याऔक नकाले ना आङएल आटुईस्यौ।26:7 लूका ७:३७-३८ 8 ओटन ना रङस्यु सिइयाङ रायिङचोस्यु, ऐलेवाङ, "नैकाम आवाए खेर नजाएनु? 9 दानाङभन्या ईका अत्तर भ्याई येएल यईन्या लेऊ इकाजन यएस्यु नका रुप्या गरिबयाङजन यांऔ दुदुसिया।"
10 तर येशुले नका सनस्यु नकाङजन ऐआढोवाङ, "जे ईका मेएमाजन दानाङ दोस लाइज्याच्यो? इकाले ता ङा नाल्ट चान्या काम ढास्यु लेया। 11 दानाङभन्या गरिबयाङ ता जेसकाए दिनकाई लिज्यारा। तर ङा ता जेसकाए सदाई मालिज्याङदी।26:11 ब्यबस्था १५:११ 12 इकाले ङाकलाङल ईका अत्तर टुईस्यु रींनौ नाल्ट ङाजन तयार आजाएङु हो। 13 ङा जेजन मछ्यु ऐढाच्या, स्वाट्टै सङ्सारलं आका चान्याथाई जोङ प्रचार ढासी, ईका मेएमाले आढान्या काम नकाल यांकाल नाल्ट चर्चा ढान्यालेसिरा।"
यहूदाले येशुजन धोखा आयांन्या
मर्कुस १४:१०-११; लूका २२:३-६
14 तब बारं गोटा सिइयाङ मध्य तोलोअ यहूदा इस्करियोत ऐढासिन्या मुख्या पुजाउरोयाङ ल्योङ हिनौ, 15 ओटन नकाले ऐआढोवाङ, "यदि ङा येशुजन जे कुईत सकोलोकङकन, ङाजन नै यांङच्यो?" नकाङै ओलजन नका कामल नाल्ट चान्दील तिस सिक्का रांयोव।26:15 जकरिया ११:१२ 16 नवाए बेलाकन यहूदाले येशुजन कोलोअन्या मौका रोंकौ तअसिऊ।
येशुले आसिइयाङसं निस्तार भोस आज्यान्या
मर्कुस १४:१२-२६; लूका २२:७-२३; यहुन्ना १३:२१-३०
17 आब अखमिरी भरेईल पर्बल पैला दिन आसिइयाङै येशु ल्योङ रा:स्यु ऐलेवाङ, "न नाल्ट निस्तार-पर्बल भोस ज्यान्या बन्दबस्त गे काङ ढोई?" 18 ओले ऐआढोवाङ, "बजारल तोलोअ रु ल्योङ हिन्चिते, ओटन नकाजन ऐढोचिते, ‘गुरुज्यूले ऐलेऊ, ङा बेला नेरा रांदा। ङा सिइयाङस न झिमल निस्तार-पर्ब मानिङा।’"
19 तब येशुल आदेस अनुसार आ सिइयाङ हिन्वाङ ओटन नकाङै निस्तार-पर्बल बन्दबस्त रांढोव।
20 ओइ ताहापाइना येशु बारं गोटा आसिइयाङसं ज्याऔ नाल्ट चुङौ। 21 जब ओलं सनर आ सिइयाङ ज्याज्यावाङ तब नवाए बेला येशुले ऐलेऊ, "ङा जेजन मछ्यु ऐढाच्या, जेमध्य तोलोअले ङाजन शत्तुरयाङल कुईत कोलोकौ परिङन्या लेया।" 22 तब नकाङ भ्याईज दुखी ताइस्यु स्वाट्टैले तो-तोलोअङन गिनौ तअसिवाङ, "प्रभु, ङा ता माङडी?"
23 ओटन येशुले ऐआढोवाङ, "जोले ङासकाए थालल भरेई छोएज्याऊ, नकाले ङाजन कोलोकौपरिङन्या लेया।26:23 भजनसङ्ग्रह ४१:९ 24 ओलं बारेल पबित्रशास्त्रलं आसरसिन्या अनुसार रुल ज़ा ता हिनन्याई लेया। तर आक्याई ना रु, जोङन रुल ज़ा कोलोअसि। नका रु ता माजर्मिऊ भन्या आ नाल्ट चान्या ताइन्यालेऊ।"
25 तब येशुजन कोलोकौपरिङन्या यहूदाले आगिनौ, "गुरुज्यू, नैति ङा ओइज रों?" येशुले नकाजन ऐआढोव, "नङ नङजै ऐलिज्याना।"
प्रभु भोस
मर्कुस १४:२२-२६; लूका २२:१४-२०; १कोरिन्थी ११:२३-२५
26 नकाङै भोस रांज्याज्याऔ बेला येशुले भरेई आहोनौ ओटन आशिर्बाद योंवापाइना ओले ना आकलाटौ ओटन सिइयाङजन आयोवाङ ओटन ऐआढोवाङ, "हअ कैचिते, ईका ङा बुल हो।"
27 तब कटौरा बै होनस्यु परमेस्वरजन धन्याबाद यांस्यु ओले नकाङजन ऐलेस्यु आयोवाङ, "जे सोगलैले इकालन ओचिते। 28 दानाङभन्या आका छार बाचाल ङा जी हो, जो तबरल पापल छेमाल नाल्ट बगाइसिया।26:28 प्रस्थान २४:८; यर्मिया ३१:३१-३४ 29 तर ङा जेजन ऐढाच्या, कि अङ्गुरल ईका शईतन ङा तब समन ओन्या मालेङदी, जब समन ङा बौल राज्यल जेसकाए छार रस माओङ।"
30 येशु सनर आ सिइयाङ तोलोअ भजन रेएसिरा पाइना पलिईस्यु जैतुन डान्डा देए हिन्वाङ।
येशुले पत्रुसलं बारेङन भबिस्यबानी आढान्या
मर्कुस १४:२७-३१; लूका २२:३१-३४; यहुन्ना १३:३६-३८
31 तब येशुले नकाङजन ऐआढोवाङ, "आछिम रिउल ङागर्दाले जे छिनदेए हटिन्यालेच्या। दानाङभन्या ईका पबित्रशास्त्रलं ऐटाइन्या सरसिन्या लेया, ‘परमेस्वरले ग्वालाजन सएन्यालेया, ओटन बगालला भेडाङ हुदेएअदेए तत्तर बित्तर ताइन्यालेरा।’26:31 जकरिया १३:७ 32 तर ङा सिस्यु जिङदा ताइङापाइना जेतन हादेए गालील इलाकाल हिन्ङा।"26:32 मत्ती २८:१६
33 पत्रुसले येशुजन जबाक आयोव, "न कारनले सोगलै छिन्देए हाएसिरकन बै ङा खकै नङजन माराहन्दी।"
34 येशुले नकाजन ऐआढोव, "ङा मछ्यु, नङजन ऐढाना, आछिम रिउल भाल्या आकोव हादेए नङ ङाजन तिन पाला मासहङदी ऐलेस्यु राहङना।"
35 पत्रुसले ओलजन ऐआढोव, "ङा नङसं सिऊज परिकन्बै ङा नङजन राइन्या मालेङदी।" अपुर सोगलै सिइयाङ बै नैज रांढोव।
गेतसमनी बारील येशुल प्रार्थना
मर्कुस १४:३२-४२; लूका २२:३९-४६
36 तब येशु गेतसमनी राढान्या बारील नकाङसं हिनौ, ओटन सिइयाङजन आढोवाङ, "जे आलै चुङचिते, ङा हुकठक्क हिनस्यु प्रार्थना ढोङा।" 37 ओटन ओलसं पत्रुस सनर जब्दियाल नेंलोअ आज़ाने आलाङौने ओटन ओल भ्याई सोकले सनर आतिऊ तअसिऊ। 38 तब ओले नकाङजन आढोवाङ, "ङा भ्याई आतिस्यु सिङालेन्यामन ताइज्याङा। जे आलै चुङज्याचिते, ओटन ङासै सन्सिज्याचिते।" 39 ओटन ओल हुदिन्क ठक्क हिनस्यु घुन्डा टेकिस्यु प्रार्थना ढाऔ तअसिऊ, "औ ङा बौ, ताहौ ढुदुउकन आका दुखल कटौरा ङातन हताइस्याङते, तर बै ङा इच्छ्या अनुसार माङडी, नङ इच्छ्या नढाऔमन ग्याताइत्या।" 40 जब वलस्यु आसिइयाङ ल्योङ आरांऔक नकाङजन रांम्वाईज्यान्या आडोएरिइवाङ, ओटन पत्रुसजन ऐआढोव, "नैति जे ङासं त घन्टा बै सनसिज्याऔ जेमाढुदुचिऊ? 41 सनसिस्यु लिज्याचिते, प्रार्थना ढोचिते, ओटन परिक्छ्याल तापरिच्यो। आत्मा ता तयारज लेया, तर बुल दुर्बल लेया।"
42 फरि छुट्टैपाला हिनस्यु येशुले प्रार्थना ढाऔ तअसिऊ, "औ ङा बौ, ङा ईका दुखल कटौरा माओस्युई माताहकन नमीई इच्छ्या पुरा ग्याताईत्या।" 43 फरि आरांऔक नकाङजन रांम्वाईज्यान्या आडोएरिइवाङ, दानाङभन्या नकाङ मिऊरुइले लठ्ठै ताइस्यु लेवाङ।
44 नैताइस्यु येशुले नकाङजन फरि बनाएस्यु, हिनस्यु फरि नकाई छेन दोहोऱ्याइस्यु तिस्रा पाला प्रार्थना आढोव। 45 तब सिइयाङ ल्योङ रा:स्यु ओले नकाङजन ऐआढोवाङ, "जे अझ बै जेरुउज्याचिऊ ओटन जेनानसिज्याचिऊ? खिम्चिते, समाय नेराक ताप्रा:स्यु लेया। रुल ज़ा पापीयाङल कुईत परिङा लेदा। 46 सोचिते, हिन्या। खिम्चिते ङाजन कोलोअन्या रु नेराकै लिज्याया।"
येशुजन राकोलोअन्या
मर्कुस १४:४३-५०; लूका २२:४७-५३; यहुन्ना १८:३-१२
47 येशु आछ्योङज्याऔ बेलाकै, बारं जना मध्यला तोलोअ, अथाबा यहूदा ऐढासिन्या सिइ रांऔ। नका सकाए मुख्या पुजाउरोयाङ सनर जन्ताङल नेताङै रापरिङन्या तोलोअ घिन्या हुल तरवाल सनर झुई छेन्स्यु रांवाङ। 48 ओलजन कोलोकौपरिङन्याले नकाङजन तोलोअ चिन्न यांस्यु आनाएवाङ, "ङा जो रुजन म्वाहङ, नकाई ज्या, ओजन कोलोअच्यो।"
49 ओचोएटै येशु ल्योङ हिनस्यु नकाले ऐआढोव, "औ गुरु, जडौ!" ओटन नकाले येशुजन आम्वाहौ।
50 येशुले नकाजन ऐआढोव, "ऐ न्हाए, नङ जो नढारानु, ना परेए ढोते।" तब नकाङै हाक रा:स्यु येशुजन राकोलोकौ। 51 येशु सकाए लिज्यान्या मध्य तोलोअले आतरवाल आहाटौ, ओटन मुख्या पुजाउरोल सेवाऱ्याजन आराइस्याऔक, नकाल नां आछटकाइस्योव। 52 तब येशुले नकाजन ऐआढोव, "न तरवाल आसिपलं झोअते, दानाङभन्या जोयाङै तरवाल चलाइर, ओयाङ सोगलै तरवाललेई सएन्या लेसिरा। 53 नङ नै नयिङनु, नैति ङा ङा बौजन गोहारिऊ ङामाढुदुङु, ओले ङा नाल्ट बारं पल्टनतन भ्या स्वर्गदुतयाङ ओचोएटै आमापरिदुउ का? 54 तर नैताहकन ईका छेन ऐलेस्यु ताहौजपरिया ऐलेस्यु पबित्रशास्त्रलं सरसिन्या छेन कढाई पुरा ताह?"
55 नकाई बेला येशुले रुयाङल हुलजन ऐआढोवाङ, "जे ङाजन दानाङ गोएयाङल बिरोदत रांऔमन तरवाल सनर झुईयाङ होनस्यु कोलोअ राच्यो? ङा दिनकाई मन्दिरलं चुङस्यु सिक्छ्या यांज्याङा, तर जे ऐकता ङाजन माकोलोअदुङच्या।26:55 लूका १९:४७; २१:३७ 56 तर पबित्रशास्त्र अनुसार अगमबक्ताङल बचन पुरा ग्याताईत्या लेस्यु ईका सोगलै ताइरा:औ हो।" तब सोगलै सिइयाङ येशुजन बनाएस्यु ढोङवाङ।
महासभालं सामन्दी येशु
मर्कुस १४:५३-६५; लूका २२:५४-५५,६३-७१; यहुन्ना १८:१३-१४,१९-२४
57 येशुजन कोलोअन्याङै ओलजन प्रधान पुजाउरो कैयाफा ल्योङ रालाङौ। नङं शास्त्रीयाङ सनर नेताङ दुउसिस्यु लेवाङ। 58 तर पत्रुस लोएङन्जै प्रधान पुजाउरोल झिमल ठरबाङ समन जै येशुल छिनछिन लागिऊ, ओटन आब कैताइन्या होला, ना ब्याटौ नाल्ट भितरलं पसिस्यु पाल्याङ सकाए चुङौ। 59 आब मुख्या पुजाउरो सनर सोगलै महासभाले येशुजन सएन्या सजाई यांऔज परिया लेस्यु आमि बिरोदत ग्वारस्यु आरोप लाहौ नाल्ट साचीयाङ रोंकौ तअसिवाङ। 60 ओलं भ्याई ग्वारस्यु आरोप लाइन्याङ रांवाङ, तर नकाङै नैज प्रमान माडोएदुरा। आसापट नेंलोअ साचीने हाक रांऔने, 61 ओटन ऐलेऊने, "ईका रुले ‘ङा परमेस्वरलं मन्दिर थाएस्यु आकाजन तिन दिनक निब्जाहौ ढुदुङा’ ऐलेऊ।"26:61 यहुन्ना २:१९
62 तब प्रधान पुजाउरोले च्याङस्यु येशुजन आगिनौ, "नैति नङ नैज जबाक मायोना? ईका रुयाङै न बिरोदत रायांन्या बयन नैति हो?" 63 तर येशु छपक्कै दिङज्याऔ। प्रधान पुजाउरोले ओलजन ऐआढोव, "जिङदा परमेस्वरलं मिनत किऱ्या ज्यास्यु, गेजन पानस्यासिन्ते, नैति नङ परमेस्वरलं ज़ा ख्रीस्ट रों?"
64 येशुले नकाजन ऐआढोव, "नङजै ऐलिज्याना। फरि बै ङा जेजन ऐढाच्या, आबकन जे रुल ज़ाजन सर्बसक्तिमान परमेस्वरलं दाइन्या कुईङन आचुङज्यान्या, सनर नमता बादलल आरांज्यान्या रङन्या लेच्या।"26:64 दानियल ७:१३
65 तब प्रधान पुजाउरोले आक्वा चिइस्यु ऐलेऊ, "इकाले ता ईस्वरलं-बिरोदत छ्योङदा। आब गेजन अपुर साचीयाङल नैज आबस्यक मापरिदी? आकअ इकाले ईस्वरलं-बिरोदत आछ्योङन्या ता जे थएदुच्या।"26:65 लेवी २४:१६
66 पान्चिते जे बिचार नै लेऊ? नकाङै जबाक रांयोव, "आका अपरादि ता परान झोअस्यान्या लायकला लेया।"
67 तब नकाङै आहांल ठिल्स्यास्यु ओलजन गुस्सा रा:राइस्योव, ओटन काङ्का-काङ्काङै ऐलेस्यु लप्टा रा:राइस्योव,26:67 यशैया ५०:६ 68 "औ ख्रीस्ट, लंह नङ अगमबक्ता ताहकन पान्ते! नङजन तुपन्या काङ्का?"
पत्रुसले येशुजन आराइन्या
मर्कुस १४:६६-७२; लूका २२:५६-६२; यहुन्ना १८:१५-१८,२५-२७
69 पत्रुस बाहेर ठरबाङल आचुङज्याऔक। तोलोअ नोक्कर्निले आल्यौक रा:स्यु ऐआढोव, "नङ बै गालीलल-चुङन्या येशुसं नलिज्यानु ऱ्वाए?"
70 तर पत्रुसले ओयाङ सोगलैल सामन्दी माभनस्यु ऐलेऊ, "नङ नै नपानज्यानु, ङा मासनङदी।" 71 नका बाहेर पलिईन्या झलाप ल्योङ आहिनौक छुट्टैले नकाजन आरङौ, ओटन ओलं लिज्यान्याङजन ऐआढोवाङ, "ईका रु बै नासरी येशु सकाए जै लिज्याऔ।"
72 नकाले फरि बाचा ढास्यु माभनौ, "ङा नका रुजन मासहङदी।"
73 तचिइ छिनठक्क ओक जिऊक लिज्यान्याङ बै नेराक रा:स्यु पत्रुसजन ऐराढोव, "मछ्यु, नङ बै नकाङ मध्यला तोलोअ ज्या, दानाङभन्या न छेनलेई नङजन आशई जाएज्यान्वा।"
74 तब पत्रुसले ओलझन्जै थलस्यु ऐलेऊ, "ङा नका रुजन सहौजै मासहङदी ऐलेस्यु परमेस्वर मिनत किऱ्या ज्याऔ तअसिऊ।" ओटन ओचोएटै भाल्या कोव। 75 तब येशुले "भाल्या आकोव हादेए नङ ङाजन तिन पाला राहङना।" ऐआढान्या छेन पत्रुसले आयिङौ, ओटन बाहेरङ हिनस्यु भ्याई व्आंव्आं लेस्यु व्रौ।