1 तब येशुजन पबित्र आत्माले दियाबलसङन परिक्छ्या ढाऔ नाल्ट हरहरताइन्या पोल आलाङौ।✝ 2 ओटन चालिस दिन, चालिस रिउ समन बर्त चुङापाइना येशु करेव।✝ 3 तब सैतान आल्योङ रा:स्यु ऐआढोव, "यदि नङ परमेस्वरलं ज़ा ताहनकन ईका लुङयाङजन भरेई ताइचिते ऐलेस्यु आग्या योंवरते।"

4 तर येशुले जबाक आयोव, "सरसिन्या लेया, ‘रु भरेईले याएज माङडी, तर परमेस्वरलं याह्‌लन पलिईन्या सोगल बचनले जिङदा लिज्याया’।"✝

5 तब दियाबलसले येशुजन पबित्र सहर यरुशलेमला सोगलैतन झेनन्या मन्दिरलं यर्त लाङस्यु आसच्यानौ।✝

6 ओटन ऐआढोव, "नङ परमेस्वरलं ज़ा ताहनकन, आटन मित जोकन्ते, दानाङभन्या ऐटाइन्या सरसिन्या लेया। ‘परमेस्वरले आदुतयाङजन आग्या योंवरा, ओटन नकाङै नङजन राकुई-कुईतै थामिनरा, ओटन नखङ लुङत ढुईसिऊ मायोरदी’।"✝

7 येशुले नकाजन ऐआढोव, "तर सरसिन्या लेया, ‘नङ परमप्रभु नमी परमेस्वरलं परिक्छ्या ताढो’।"✝

8 फरि येशुजन दियाबलसले तोलोअ झेनन्या डान्डात लाङस्यु सङ्सारला सोगलै राज्ययाङ सनर नकाङल सक्तियाङ ओलजन आथनस्यौ। 9 नकाले ऐआढोव, "यदि नङ ङाजन घुन्डा टिकिस्यु धोक यांङकन, ङा नका सोगलै जन्तु नङजन ऐयाना।"

10 तब येशुले नकाजन ऐआढोव, "ऐ सैतान, नङ लोए ताहन्ते, दानाङभन्या सरसिन्या लेया, कि ‘नङ परमप्रभु न परमेस्वरजन धोक यों, ओटन ओलं सेवा ढो’।"✝

11 तब दियाबलसले येशुजन राइस्यु हिनौ, ओटन स्वर्गदुतयाङ रा:स्यु आसेवा ढाऔ तअसिवाङ।

12 बप्तिस्मा यांन्या यहुन्ना हुलिसिदा ऐलेन्या थएस्यु, येशु गालील प्रदेस देए हिनौ।✝ 13 ओटन नासरतलं माचुङस्यु गालील दहल वङला जबुलुन सनर नप्ताली इलाकाल, लेन्या कफर्नहुम सहरल चुङनाऊ।✝ 14 यशैया अगमबक्ताले आपानन्या बचन ऐलेस्यु पुरा ताहौ।

15 "जबुलुनला मलुउ सनर नप्तालीला मलुउ यर्दन भईल हुदिन्ता यम, गैरयहूदीयाङ चुङन्या पो गालील,✝

16 चिऊन्याल चुङन्या रुयाङै तोलोअ घिन्या ज्योति रङस्यु लेरा।

सिइकालल जिरिऊला पोल चुङन्याङयर्त तोलोअ ज्योति चम्काईस्यु लेसिया।"

17 नवाए बेलाकन येशुले ऐलेस्यु प्रचार ढाऔ तअसिऊ "पस्चाताप ढोचिते, दानाङभन्या स्वर्गल राज्य नेराकै ताप्‌रा:स्यु लेया।"✝

18 गालील-दह वङवङ आबाज्याऔक येशुले पत्रुस ऐराढान्या सिमोन सनर आभाई अन्द्रियास, दुईभाईनेंजन दहल जाल नेंहोरज्यान्या आरङौने। दानाङभन्या नकाने ङा:स्या कोलोअज्याऊने। 19 येशुले नकानेजन आढोवने, "ङा छिन्ट लागिचिन्ते, ओटन ङा झेनजन रुयाङ कोलोअन्या जाएचिना।" 20 तब नकाने ओचोएटै जालयाङ राइनिइस्यु आछिन्ट लागिऊने।

21 ओटन नलन राहिनज्याऔक येशुले छुट्टै दुईभाई, अथाबा जब्दियाल ज़ानें याकूब सनर नकाल आभाई यहुन्नाजन नेंबौ जब्दियास डोङ्गाल जाल नेंपएज्यान्या आरङौने, ओटन ओले नकानेजन आखुलौने। 22 तब ओचोएटै डोङ्गा सनर नें बौजन नकाने बनाएस्यु येशुल छिन्ट लागिऊने।

23 जब येशुले परमेस्वरलं राज्यल चान्याथाई प्रचार ढास्यु-ढास्यु यहूदीयाङ बैठअझिम जिऊल सिक्छ्या ह्युउकौयन, सनर रुयाङत लेन्या स्वाट्टै किसिमला नाएबोर सनर बुलला हूर सबेलौयन सोगल गालील प्रदेस भरिल दुलिऊ।✝ 24 तब सिरियाभरि ओलं बाए फैलिऊ, ओटन तबर खालला नाएबोरले स्या हूरस्यु हलाअ ताइन्याङ, भूत लागिन्याङ, सनर चरिफाई लागिन्याङ, लुलाङ, सोगलैजन रुयाङै आल्योङ राहोनौ। ओले नकाङजन आसबेल्वाङ। 25 ओटन गालील प्रदेस, डेकापोलिस, यरुशलेम सहर, यहूदिया सनर यर्दन भई हुदिन्ता रुयाङल घिन्या हुल येशुल छिनछिन रांज्यावाङ।