1 नका बेला येशु सनर आ सिइयाङ शबाथ* छिम्क अन लेन्या खेएलन ताइस्यु राहिनज्याऔक। करेस्यु लेवाङ ओटन पलीमाल बाला पलेटौयन हामौ तअसिवाङ।✝ 2 तर फरिसीयाङै आका रङस्यु ओलजन ऐराढोव, "खिम्ते न सिइयाङ शबाथ छिम्क जो ढान्या ठिक माले ओइ ढाज्यारा।"

3 तर येशुले नकाङजन जबाक आयोवाङ, "दाऊद सनर आन्हाएयाङ राकरेज्याऔक नै रांढोव, नैति जे परीस्यु जेमाल्चिऊ?✝ 4 दाऊदले कैलेस्यु परमेस्वरलं झिम भितरलं पसिस्यु चराइसिन्या पबित्र भरेई ओल सनर आन्हाएयाङै रांकयौ? जो भरेई कैन्या ब्यबस्थाला नियाम अनुसार पुजाउरोयाङजन याएज कैन्या अनुमति लेऊ।✝ 5 अथाबा नैति ब्यबस्थालं नियाम परीस्यु जेमाल्चिऊ, कैलेस्यु शबाथल पुजाउरोयाङै मन्दिरलं ब्यबस्थाजन भङ्ग रांजाटौ, ओटन बै दोस मालन्या ताइरा?✝ 6 तर ङा जेजन ऐढाच्या, आल मन्दिरतन बै घिन्या तोलोअ लिज्याया। 7 तर पबित्रशास्त्रले ऐलेया ‘ङा बलि माचिहिङडी,’ दया चाहिङा ऐङालन्याल अर्थ नैति ना जे जेसनन्या ताहकन जे निर्दोसयाङजन दोस लाइन्यामाल्चिदी।✝ 8 दानाङभन्या रुल ज़ा शबाथ दिनल बै प्रभु ज्या।"

9 नङंन पलिईस्यु येशु नकाङल बैठअझिमल हिनौ। 10 नल तोलोअ आकुई राङन्या रु लिज्याऔ। फरिसीयाङ दोस लाइन्या यिङले ओलजन रांगिनौ, "नैति शबाथ छिम्क काङ्काङजन सबेलन्या ठिक लेऊ?"

11 येशुले नकाङजन आढोवाङ, "जे मध्य तोलोअ जोल भेडा लेऊ, ओटन शबाथ छिम्क ना भेडा खादाल तेहकन, नैति जे नकाजन कोलोअस्यु पाखाल जेमापलिईचिऊ का?✝ 12 भेडातन रु ख्वाए भ्याई येएला लेऊ? नैताइस्यु ब्यबस्था अनुसार शबाथ छिम्क तोलोअले छुट्टैजन भलाई ढान्या चान्याई ताहा।" 13 तब ओले ना रुजन ऐआढोव, "न कुई पसारते।" नकाले कुई आपसारिऊ, ओटन ना कुई छुट्टै मन्जै ताइदा। 14 तर फरिसीयाङ बाहेर हिनस्यु इकाजन कैलेस्यु सएन्या लेस्यु ओलं बिरोदत सल्ला ढाऔ तअसिवाङ।

15 तब ना छेन सनस्यु येशु नलन हिनौ, ओटन तबर जना नाएबोरन्याङ आछिनछिन लागिवाङ, ओटन ओले नकाङ सोगलैजन आसबेल्वाङ। 16 तर इकाल बारेल ङा काङ्का आका काङ्काईजन तापानस्योचिर ऐलेस्यु नकाङजन आथाअवाङ। 17 परमेस्वरले आपानन्या बचन यशैया अगमबक्ताङन पुरा ग्याताइत्या लेस्यु ऐताहौ। 18 "खिम्चिते ङा ङाछेलन्या ङायिङ्का सेबक लेया, जोजन ङा मया ङाढोङु, ङा ङाआत्मा नका ल्योङ परिङ्ङा, ओटन नकाले गैरयहूदीयाङ खार्ल नियाल प्रचार ढान्यालेया।✝ 19 नका न त यिसी, न भ्याई कलिऊक, न त काङ्काईले नकाल ग़ा द्वाहा जिऊल थएर। 20 पाअन्या सरा नकाले कलाएन्या माल्दा, ओटन ज़ुइ-ज़ुइ लिज्यान्या लसए नकाले सएन्यामाल्दी, ओटन आसापङा नियाल झ्योङ समन सतापन्यालेया। 21 नकालै मिनत गैरयहूदीयाङ आस नाएन्या लेरा।"

22 तब येशु ल्योङ तोलोअ भूत लागिन्या रु जो अन्ढला सनर लाटा लेऊ। ओले नकाजन आसबेलौ, आवाए समन कि, ना लाटा रु छ्योङन्या सनर रङौ तअसिऊ। 23 ओटन सोगल रुयाङ हुलले अचम्म मानिस्यु ऐलेवाङ, "नैति ईका दाऊदल सन्तान जै का?"

24 तर आका थएस्यु फरिसीयाङै ऐलेवाङ, "ईका रुले भूतल खसम बालजिबुलङन याएज भूतयाङजन पलिटौरा।"✝

25 तर येशुले नकाङल यिङला बिचार सनस्यु नकाङजन ऐआढोवाङ, "रारांल पाअस्यु सोगल राज्य हरहर जाएन्यालेसिया, ओटन सोगल झिम सनर सहरल रारांल भर्काइसिइ ताहकन तनन्या मालरदी।" 26 यदि सैतानले सैतानजन पलिटौकन, ना आमिई बिरोदत भाअभाअ ताहा, ओटन नैताहकन नकाल राज्य कैलेस्यु तनौ ढुदुऊ? 27 यदि ङा बालजिबुलङन भूतयाङ धपाहङरकन, जे ज़ायाङै काङ्काङन रापलिइवाङ वन? नैताइस्यु नकाङ जै जेमि नियादिस ताइन्यालेया। 28 तर यदि ङा परमेस्वरलं आत्माङन भूतयाङ धपाहङ कन परमेस्वरलं राज्य जेल्योङ रा:स्युईलेया। 29 हादेए "बलल्या रुजन मापोअस्यु नकाल झिम भितरलं पसिस्यु काङ्काले नकाल धनसम्पत लाङस्यु हिनौ आढुदुऊ?" ना बलल्या रुजन पोकौकन याएज नकाल झिम लुटिऊ ढुदुवा। 30 "जो ङा सकाए माले नका ङा बिरोदल लेया, ओटन जोले ङा सकाए मादुकौ नकाले सेरासेट्ट जाएवा।✝ 31 नैताइस्यु ङा जेजन पानस्याच्या, रुयाङै राढान्या सोगल पाप सनर ईस्वर-निन्दा छेमा ताहा, तर पबित्र आत्माल बिरोदत ढासिन्या निन्दा छेमा ताइन्यामाल्दी। 32 काङ्काङै रुल ज़ाल बिरोदल कोबाअ पान्दा भन्या नकाजन छेमा ताहा, तर काङ्काङै पबित्र आत्माल बिरोदत छ्योङरकन नकाङजन ईका जिबनल सनर रांन्या जिबनल बै छेमा ताइन्यामाल्दी।✝

33 "कि टुङजन चान्या जाएचिते, ओटन नकाल शई चान्याई ताहा। कि टुङजन माचान्या जाएच्योकन शई बै माचान्याई ताहा। दानाङभन्या शईङन जै टुङ शईसिया।✝ 34 ऐ डाङल पुङयाङ! जे जेईज घुर्बी लेच्या, ओटन कढाई चान्या छेन छ्योङौ ढुदुच्यो? दानाङभन्या यिङ भितरलं लेन्या छेनयाङ जै याह्‌लन पलिइरा।✝ 35 चान्या रुले आभितरल लेन्या चान्या जन्तुलन चान्याई पलिइवा, तर घुर्बी रुले आल्योङ लेन्या कपटङन्जै कपट जन्तुजै पलिइवा। 36 ङा जेजन ऐढाच्या, जो रुयाङै बेकारला छेन छ्योङर, नियाल छिम्क नकाङै नकाल लेखा यांन्याताहा। 37 दानाङभन्या जे बचनले जे निर्दोस ठहरिन्या लेच्या, ओटन जे बचनले जे दोसी ठहरिन्या लेच्या।"

38 तब शास्त्रीयाङ सनर फरिसीयाङ मध्य काङ्का-काङ्काङै येशुजन ऐराढोव, "गुरुज्यू, गे नङ्ङन तोलोअ चिन्न ब्याएन्या गेलेयिउ।"✝

39 येशुले नकाङजन जबाक आयोवाङ, "ईका जुगला पुस्ताङ ख्वाए दुस्ट सनर ब्यबिचारी लेवाङ, ओले ऐलेऊ जे ङासं चिन्न नीच्या। माङडी जेजन अगमबक्ता योनाल चिन्न याएज यांन्यालेसिया।✝ 40 दानाङभन्या जोमनलेस्यु योना घिन्या ङा:स्याल भन्दिउल तिन दिन सनर तिन रिउ लिज्याऔ, नैलेस्यु जै रुल ज़ा बै पिरथ्बील गर्भल तिन दिन सनर तिन रिउ लिज्याया।✝ 41 निनबेला रुयाङ परमेस्वरलं नियाल दिन छिम्क ईका पुस्ता सकाए च्याङन्या लेरा, ओटन आकाङजन दोसी ठहराइन्या लेरा, दानाङभन्या नकाङै योनाल प्रचारत पस्चाताप रांढोव, तर खिम्चिते, योनातन घिन्या आल तोलोअ लेया।✝ 42 नियाल दिन छिम्क दच्छिनला माहारयनी आका पुस्तासं च्याङन्या लेया, ओटन इकाजन दोसी ठहऱ्याइन्या लेया, दानाङभन्या रय सोलोमनल बुद्दिला छेन थटौ नाल्ट ओ पिरथ्बील हुङन्ता वङ्ङन रा:स्यु लेऊ। तर खिम्चिते, रय सोलोमनतन घिन्या आल तोलोअ लेया।✝

43 "जब अशुद्दआत्मा रुतन पलिईस्यु हिन, तब नानसिङा लेस्यु फोएन्या पो रोंकौयन डुलिस्यु बारिया, तर नकाले काङै माडोटौदी। 44 तब नकाले ऐलेया, ‘जोङन ङा पलिईस्यु ङारांङु, ङा ओइ झिमल वलस्यु हिन्ङा।’ ना वलस्यु आरांऔक नाले झिम ढाङ्गिल सनर सिइस्यु सजाईसिन्या डोएवा। 45 तब ना हिना ओटन ओलतन अझै साट वटा दुस्टआत्मा ओलसं होनौरा, ओटन भितरलं पसिस्यु नकाङ ओलै बाई चुङरा, ओटन नका रुल छिन्टा दशा हाकातन झनभ्याई माचान्या ताहा। ईका दुस्ट पुस्ताजन बै नैजै ताइन्यालेया।"

46 येशु रुयाङस आछ्योङज्याऔक, आअमा सनर आभाईयाङ पाखाल च्याङज्यास्यु, तोलोअजन छ्योङया लेस्यु थाई रांपरिङौ। 47 तब तोलोअले येशुजन ऐआढोव, "खिम्ते, नाअमा सनर नभाईयाङ पाखाल च्याङज्यारा, ओटन नङसं छ्योङौ रोअज्यावाङ।" 48 तर ओलसं छ्योङन्याजन येशुले ऐआढोव, "ङाअमा काङ्का हो? ङा भाईयाङ काङ्काङ हो?" 49 तब आ सिइयाङ ल्यौदेए आकुईसै पएस्यु येशुले ऐआढोव, "खिम्ते ङाअमा सनर ङा भाईयाङ। 50 दानाङभन्या जोजोले स्वर्गल लिज्यान्या ङा बौल इच्छ्या पालन ढोर, नकाङ ज्या ङा भाई बैनाङ ओटन ङाअमाङ।"