As 10 parábolas mais importantes de Jesus

3 አሳዉ ሌምሱዋን ዳሮባ ሀዋዳን ያጊደ ኦዴዳ፤ "እት ብታኒ ዘረ ዘራናዉ ከሴዳ። 4 እ ዘርሽን፥ እት እት ዘረይ ኦግያ ዶናን ዎዳ፤ ያትና ካፉ ዪደ ሜዳ። 5 ቃይ እት እት ዘረይ አንጮ ግዴዳ ቢታ ቦላ ዎዳ፤ ዳሮ ቢታይ ባይና ድራዉ፥ ሄ ዘረይ ኤለካ ዶሌዳ። 6 ሽን አዋይ ከሴዳ ዎደ ጫርሻይ ሹሌዳ፤ አዱሳ ጻጱዋ የድቤና ድራዉ መል አጌዳ። 7 እት እት ዘረይ አጉን ግዶን ዎዳ፤ ሄዋን ዶሌዳዋ አጉንይ ድጪደ ጩሌዳ። 8 እት እት ዘረይ ቱኤ ቢታን ዎደ ዶሌዳ፤ እቱ ጼቱ አይፍያ፥ እቱ ኡሱፑን ታሙዋ፥ እቱ ሀታሙዋ አይፌዳ። 9 ስስያ ሀይይ ደእያ ኡራይ ስሶ!" ያጌዳ።

አሳዉ ቃረትያ ሳማርያ ብታንያ

25 እት ጋላስ ህግያ ኤርያዌ እቱ የሱሳ ፓጫናዉ አኮ ዪደ፥ "ታማርስያዎ፥ መና ደኡዋ ላታናዉ፥ ታን አያ ኦ?" ያግ ኦቼዳ።

26 የሱስ ዛሪደ፥ "ሙሴ ህግያ ማጻፋን ጻፈቶዌ አዬ? ኔን አያ ጋደ ብላይ?" ያጌዳ።

27 ብታኒካ፥ "ሙሴ ህግያ ማጻፋይ፥ ‘ጾሳ ነ ጎዳ ፖሎ ነ ዎዛናፐ፥ ፖሎ ነ ሸምፑዋፐ፥ ፖሎ ነ ዎልቃፐነ ፖሎ ነ ቆፋፐ ሲቃ፤ ሄዋዳንካ ነ ላገካ ነ ሁጲያዳን ዶሳ’ ጌ" ያጌዳ።✝

28 የሱስ አ፥ "ልከ፥ ቱሙዋ ጋዳ፤ ስም ኔንካ ሀዋ ኦ፤ ደኡዋን ደአናሳ" ያጌዳ።

29 ሙሴ ህግያ ታማርስያ ብታኒ ቃይ ባረና ጽሎ ኦናዉ ኮዪደ የሱሳ፥ "ሀኖሽን፥ ታ ላገይ ኦኔ?" ያጊደ ኦቼዳ።

30 የሱስ ዛሪደ፥ "እት ብታኒ የሩሳላመፐ እያርኮ ቢደ ደእሽን፥ ኦግያ ቦላን ፓናቱ አ ደሚደ፥ አ ማዩዋ ቃሮዋፐ ጉየ ሾጪደ፥ ሀይቃናዉ ፖሉ ጎደ ኦሊደ ቤድኖ። 31 ቆፐናን እት ቄሳይ ሄ ኦግያና ብደእያዌ፥ ሾጨቲደ ኩንዴዳ ብታንያ በኤዳ ዎደ፥ አያነ ኦናን ምይያና አደ ቤዳ። 32 ሄዋዳንካ እት ሌዊ ሄ ኦግያና ብደኤ። እካ ብታንያ በኢደ፥ ምየት አዳ። 33 ሽን ሳማርያ አሳ ግዴዳ እት ብታኒ፥ ሄ ባጋና አደ፥ ሀ ብታንያኮ ዬዳ። አ በኤዳ ዎደ አዉ ቃረቴዳ።✝ 34 አኮካ ሺቂደ፥ ዛይትያነ ዎይንያ ኤሳ* አ ማይን ትጊደ፥ ቃቼዳ። ሄዋፐ ጉየ ባረ ሀርያ ቶግሲደ፥ እማይ አቅያ ጎልያ አክ ቤዳ፤ ሄዋን ብዪደ ናጌዳ። 35 ዎንተ ጋላስ ጉ ብራ ባረ ኪስያፐ ከሲደ፥ እማይ አቅያ ጎልያ ጎዳዉ እሚደ፥ ‘ሀ ብታንያ ታዉ ሎይ ብያ፤ ሀዋፐ ዳሩዋ ኔን ከሶፐካ፥ ታን ስምያ ዎደ ነዉ ጭጋና’ ያጌዳ።

36 "ስም ሀ ሄዙ አሳቱዋፐ፥ ፓናቱዋ ኩሽያን ሾጨቲደ ኩንዴዳ ብታነዉ፥ ላገ ግዴዳዌ ሀቃዋ ማላቲ?" ያጌዳ።

37 ህግያ ታማርስያዌካ፥ "ሄ አዉ ቃረቶዋ" ያጌዳ።

የሱስካ አ፥ "ስም ባደ ኔንካ ሄዋዳን ኦ" ያጌዳ።

4 "ጼቱ ዶርሳይ ደእያ ኡራይ ህንተንቱ ግዶፐ ደእንቶ ሄዋፐ እቱ ባይንቶ ኡዱፑ ታማነ ኡዱፑኑዋ ደንባን አጊደ ባዬዳዋ ቤታና ጋካናዉ ኮየናዌ ኦኔ? 5 ደሜዳ ዎደ ናሸቻን ባረ ሀሽያ ቦላን ዶርሳ ቶክ፥ 6 ባረ ጎለ ስሚደ፥ ባረ ዶስያዋንታነ ሾራቱዋ እትፐ ጼሲደ፥ ‘ባዬዳ ታ ዶርሳ ደሞ ድራዉ፥ ታናና እትፐ ናሸትተ’ ያጊደ ኦዴ። 7 ሄዋዳንካ ናጋራ ፓጸ ኮሸና ኡዱፑ ታማነ ኡዱፑ ጽላቱዋፐ አደ ናጋራ ፓጽያ እት ናጋራንቻን ሳሉዋን ዳሮ ናሸቻይ ግዳናዋ።

ባያ ናኣ

11 ጉጂደ የሱስ፥ "ላኡ ናናይ ደእያ እት ብታኒ ደኤ፤ 12 ኡንቱንቱፐካ ቴፋ ናአይ፥ ‘ነ ማጹዋፐ ታና ጋክያዋ እማ’ ጌዳ። አዉካ ባረ ማጹዋፐ ናናቶ ግሼዳ። 13 ጉ ዎድያፐ ጉይያን ቴፋ ናአይ ባረና ጋኬዳዋ ኡባ ሺሽ አኪደ ህን ሃኮ ጋደ ቤዳ፤ ሄዋን ባረ አኬዳ ሚሻ ኡባ ላል ዉርስ አጌዳ። 14 እካ ደእያዋ ኡባ ዉርሴዳዋፐ ጉይያን ሄ ጋደን ዎልቃማ ኮሻይ ገሌዳ፤ እካ መቱዋን ኡንኤቱሳ ዶሜዳ። 15 ሀዋ ድራዉ ሄ ጋደን ደእያዋንቱፐ እቱዋኮ ሺቂደ፥ ‘ታና ነዉ ቆማ ኦርኪ?’ ያግና፥ ብታኒካ ባረ ጉዱን ዉድያ ሄማና ማላ አ ደምባ የዴዳ። 16 ጉዱን ዉዲ ምያ ሀልኡዋ ማናዉ አሞቴዳ፤ ሽን ሄዌንቶካ አዉ እምያዌ ቤትቤና።

17 "ባረ ባይዙዋ ኤሮ ዎደ፥ ‘ቁማይ ጾኒደ ሳኣን አትያ ታ አቦ ኦያዋንቱ አፑኔ፤ ሽን ታን ሀዋን ኮሻን ሀይቃና ማታይታ? 18 ደንዳደ ታ አቡኮ ባኔ’ ሀዋዳን ያጋና፤ ‘ታ አቦ፥ ጾሳካ ኔናካ ናቃድ፤ 19 ሀንፐ ጉየ ነ ናኣ ያገታደ ጼሰታናዉ በስከ፤ ነዉ ኪተትያዋንቱፐ እቱዋዳን ታና ዎርኪ ጋና’ ጌዳ። 20 ሄ ማንእያን ደንዲደ ባረ አቡኮ ዬዳ።

"እ ብሮ ሃኩዋን ደእሽን፥ አዉ በኢደ፥ አዉ ቃረቴዳ፤ አኮ ዎጽ ቢደ፥ አ እድም የሬዳ።

21 "ናአይካ፥ ‘ታ አቦ፥ ታን ጾሳካ ኔናካ ናቃድ፤ ሀንፐ ጉየ ነ ናኣ ጌተታደ ጼሰታናዉ በስከ’ ያጌዳ።

22 "ሽን አዉ ባረ ኦሳንቻቱዋ፥ ‘ኤሌል ቢደ፥ ኡባፐ ዶረቴዳ ሎኦ ማዩዋ አሂደ፥ አ ማይዝተ፤ አ ብራያን ምግዱዋ፥ አ ገድያንካ ጫማ* ዎተ። 23 ሞዳ ኮሩማ አሂደ ሹክተ፤ ሞይተ፥ ናሸቶይተ። 24 አያዉ ጎፐ፥ ሀዌ ታ ናአይ ሀይቄዳ፤ ሽን ሀእ ፓጼዳ፤ ባዬዳ፤ ሽን ሀእ ቤቴዳ’ ያግና፥ ናሸቻ ዶሜድኖ።

25 "ሄ ዎድያን፥ ባይራ ናአይ ጋደን ደእያዌ ዪደ ጎለኮ ማትያ ዎደ፥ የነ ዱሩዋ ኮሹንቻ ስሴዳ። 26 እካ የዉ አየንቶ ኤራናዉ ኮዪደ፥ ቆማቱዋፐ እቱዋ ጼሲደ፥ ‘ሀዌ አዬ?’ ጊደ ኦቼዳ። 27 ቆማቱካ፥ ‘ነ እሻይ ሳሮ ዬዳ ድራዉ፥ ነ አቡ ሞ ኮሩማ አዉ ሹኬዳ’ ያግ ኦዴድኖ።

28 "ባይራ ናአይ ሀንቀቲደ ጎለ ገልከ ያግ እጽና፥ አዉ ካረዉ ከሲደ፥ ገላናዳ ዎሴዳ። 29 ሽን እ ዛሪደ ባረ አባ፥ ‘ሄኮ ሀዋ ኬና ዎድያ ቆማዳን ነዉ ኪተታድ፤ ነ አዛዞዋፐ እቱዋነካ ፓጭሳ በይከ፤ ታ ላገቱዋና እትፐ ናሸታና ማላ ሀራይ አቶ እት ዴሻ ቡልኡዋነ ታዉ እማ በይካ፤ 30 ሽን ሀዌ ነ ናአይ ነ ሚሻ ጫራቱዋና እትፐ ዲፍሲደ ዪና፥ ኮ ቦራ ሹካዳ’ ያጌዳ።

31 "አዉካ አ፥ ‘ታ ናአዉ፥ ኔን ኡባ ጋላሳ ታናና እትፐ ደኣ፤ ታሳ ግዴዳባይ ኡባይካ ነዋ። 32 ሽን ሀዌ ነ እሻይ፥ ሀይቄዳዌ ፓጾ ድራዉነ ባዬዳዌ ቤቶ ድራዉ፥ ኑን ሚድነ ኡሺደ ናሸታናዉ በሴ’ ያጌዳ" ጊደ ኦዴዳ።

እንቁዋ ጌተትያ ዳሮ አልኦ ሹቻ ሌምሱዋ

45 "ቃይ ሳሉዋ ካዉተይ እንቁዋ ጌተትያ ዳሮ አልኦ ሹቻ ሻማናዉ ኮይያ ዛልአንቻ ማላቴ። 46 ሄ ዛልአንቻይ ዳሮ አልኦ እንቁዋ ደሚደ፥ ቢደ ባረዉ ደእያዋ ኡባ ዛልኢደ፥ አ ሻሜዳ።

ኦቶረትያ ፓርሳዊያነ ባረና ካዉሽሴዳ ቃራጻ ቃንጽያ ብታንያ

9 ባረንታ ጌሻ ጊደ አማነትያዋንቶነ ሀራ ኡባ ዳሪ ካያዋንቶ፥ የሱስ ሀ ሌምሱዋ ኦዴዳ: 10 "ላኡ አሳቱ ዎሳናዉ ጌሻ ጎልያ* ገሌድኖ። ሄዋንቱፐ እቱ ፓርሳዊያ፤ እቱ ቃይ ቃራጻ ቃንጽያዋ። 11 ፓርሳዊ ደንድ ኤቂደ ባረ ዎዛናን ዎሲደ፥ ‘ጾሳዉ፥ ታን ሀራ አሳዳን: ቦንቂያዋንቱዳን፥ ማካልያዋንቱዳን፥ ዎሹምያዋንቱዳን፥ ዎይ ሀዋዳን ቃራጻ ሺሸና ድራዉ ኔና ጋላታይ። 12 ሳምንታን ላኡ ካላ ጾማይ፤ ታን ደምያ ኡባፐ ታሙ ኩሽያፐ እቱዋ እማይ’ ያጌዳ።

13 "ሽን ቃራጽያ ብታኒ ሃኩዋን ኤቂደ፥ ባረ አይፍያን ፑደ ሳሉዋ ቁ ጊደ ጼላናዉካ ኮይቤና። ሽን ባረ ትራ ባቂደ፥ ‘ጾሳዉ፥ ታን ናጋራንቻ፤ ታና ማራ’ ያጌዳ። 14 ታን ህንተንቶ ኦድያዌ አዬ ጎፐ፥ ካሰ ብታንያፐ አደ ሀ ብታኒ ጽሎ ግዲደ ባረ ጎለ ስሜዳ፤ ባረና ቁ ኦያ ኡባይ ካዉሻና፤ ባረና ቃይ ካዉሽስያ ኡራይ ቁ ጋና" ያጌዳ።

ሄዙ ቆማቱዋ ሌምሱዋ

14 "አያዉ ጎፐ፥ ሳሉዋ ካዉተይ ባረ ቆማቱዋ ጼሲደ፥ ባረዉ ደእያዋ ኡንቱንቶ ሼደ፥ ኦግያ ባና ሀንያ ብታንያ በሴ። 15 ኡንቱንቱ ሁጲያን ሁጲያን ኡንቱንቱ ዎልቃ ኬና እቶ እቼሹ ሻአ ብራ፥ እቶ ላኡ ሻአ ብራ፥ ቃይ እቶ እት ሻአ ብራ እሚደ፥ ባረ ኦግያ ቤዳ። 16 እቼሹ ሻአ ብራ አኬዳ ቆማይ ኤለካ ቢደ ዛልኢደ፥ ሀራ እቼሹ ሻአ ብራ ዎሴዳ። 17 ሄዋዳንካ፥ ቃይ ላኡ ሻአ ብራ አኬዳ ቆማይ ሀራ ላኡ ሻአ ብራ ዎሴዳ። 18 ሽን እት ሻአ ብራ አኬዳዌ ቢደ፥ ኦላ ቦኪደ፥ ባረ ጎዳ ሚሻ ሞግ አጌዳ።

19 "ዳሮ ዎድያፐ ጉይያን፥ ሄ ቆማቱዋ ጎዳይ ዪደ፥ ባረ ሚሻ ኡንቱንቱና ሄተቴዳ። 20 እቼሹ ሻአ ብራ አኬዳ ቆማይ ዪደ፥ ሀራ እቼሹ ሻአ ብራ ሼደ፥ ‘ታ ጎዳዉ፥ ኔን ታዉ እቼሹ ሻአ ብራ እማዳ፤ በአ፥ ሀራ እቼሹ ሻአ ብራ ዎሳድ’ ያጌዳ። 21 አ ጎዳይ አ፥ ‘ሀያናሾ! ኔን ሎአነ አማነትያ ቆማ፤ ኔን ጉባን አማነታዳ። ታን ኔና ዳሮባዉ ካፖ ኦና፤ ሃ ገላደ ነ ጎዳና ናሸታ’ ያጌዳ።

22 "ቃይ ላኡ ሻአ ብራ አኬዳዌካ ዪደ፥ ‘ታ ጎዳዉ፥ ኔን ታዉ ላኡ ሻአ ብራ እማዳ፤ በአ፥ ታን ሀራ ላኡ ሻአ ብራ ዎሳድ’ ያጌዳ። 23 አ ጎዳይ አ፥ ‘ሀያናሾ! ኔን ሎአነ አማነትያ ቆማ፤ ኔን ጉባን አማነታዳ። ታን ኔና ዳሮባዉ ካፖ ኦና፤ ሃ ገላደ ነ ጎዳና ናሸታ’ ያጌዳ።

24 "እት ሻአ ብራ አኬዳዌ ቃይ ዪደ፥ ‘ታ ጎዳዉ፥ ኔን ዘራቤናሳፐ ቆይጭያ አሳ ግድያዋነ ካ ላላቤናሳፐ ማጽያ መቀ ባይና አሳ ግድያዋ ታን ኤራይ። 25 ታን ያያድ፤ ያታደ ባደ ነ ብራ ቢታን ሞጋድ፤ በአ፥ ነ ብራይ ሀዌኩ’ ያጌዳ።

26 "አ ጎዳይ ዛሪደ፥ አ ሀዋዳን ያጌዳ፤ ‘ሀ ኢታ አዛላ ቆማዉ፥ ታን ዘራቤናሳፐ ቆይጭያ አሳ ግድያዋነ ካ ላላቤናሳፐ ማጽያ አሳ ግድያዋ ኤራዲ? 27 ያትና፥ ኔን ታ ሚሻ ዎስያዋንቱ ማታን ዎዳዋ ግድንቶ፥ ታን ስምያ ዎደ ታ ሚሻ ዎያና አካናዋሽን አቴዳ። 28 ሄዋ ድራዉ፥ ሄ ሚሻ አፐ ዎ አኪደ፥ ታሙ ሻአ ብራይ ደእያዎ እምተ። 29 አያዉ ጎፐ፥ ደእያ ኡባዉ ሀራይ ጉጀታና፤ እ ባረዉ ግድያዋፐ ዳርሲደ አካና፤ ሽን ባይናዎ ሀራይ አቶ፥ ሄ አዉ ደእያ ጉይካ አፐ አከታናዋ። 30 ጎኤና ቆማ ካረ ማ ከስ ኦልተ፤ ሄዋን እ ዬካናነ ባረ አቻ ቃና’ ያጌዳ።

ዱረ ብታንያባነ ማንቆ ግዴዳ አልኣዛራባ

19 "ጋቲ ሎይደ አልኦ ግዴዳ ማዩዋ ማዪድነ ጋላሳን ጋላሳን ኦቶሩዋን ናሸቲደ ደእያ እት ዱረ ብታኒ ደኤ። 20 ቃይካ ኩመን አሳተን ማይይ ደእያ እት አልኣዛራ ጌተትያ ህዬሳይ፥ ሀ ዱረ ብታንያ ካርያን ግሴዳ። 21 ሀ ዱረ ብታንያ ሳምፓፐ ላለቴዳ ሱፓ ማናዉ አሞቴ፤ ሀራይ አቶ ካናቱካ ዪደ አ ማይ ላጪኖ።

22 "ሀ ህዬሳ ብታኒ ሀይቂና፥ ኪታንቻቱ አ አብራሃሞ ባጋ ቦንቾሳ አፌድኖ፤ ዱረ ብታኒካ ቃይ ሀይቂደ ሞገቴዳ። 23 ስኦልያን ዳሮ ሴለቲደ ደእሽን፥ ቁ ጊደ ሃኩዋን አልኣዛራ፥ አብራሃሞ ባጋን ደእያዋ በኤዳ።

24 "እካ ባረ ኮሻ ቁ ኦደ፥ ‘አብራሃሞ፥ ታ አቦ፥ ታዉ ቃረታ። ሀ ታማ ሴላን መቶታ ደእያ ድራዉ፥ አልኣዛር ባረ ብራያ ጼራ ሃን ቦቺደ፥ ታ እንጻርሳ እርጽሳናዳን ሀያና ታኮ ኪታርኪ’ ያጌዳ።

25 "አብራሃሞ ቃይ፥ ‘ታ ናአዉ፥ ኔን ፓጻ ደኣደ፥ ሎኦ ደኡዋ ደእና፥ አልኣዛር ሎኤና መቶ ደኡዋ ደኤዳዋ ቆፓ። ሀእ ቃይ እ ሀዋን ናሸትያ ዎደ፥ ኔን መቱዋ ቦላ ደኣ።

26 " ‘ሀዋፐ ሀራይ ቃይ፥ ሀዋፐ ያ ህንተንቱኮ አናዉ ኮይያዋንቱ አናዳን፥ ያን ደእያዋንቱካ ቃይ ሃ ኑኮ ፕነናዳን፥ ኑ ግዶንነ ህንተንቱ ግዶን ዎጋ አፉ መቴዳ’ ያጌዳ።

27 "ዱረ ብታኒካ፥ ‘አብራሃሞ፥ ስም ሄዋ ግዶፐ፥ ኔን አልኣዛራ ታ አቡ ጎለ የዳና ማላ፥ ኔና ዎሳይ። 28 አያዉ ጎፐ፥ ታዉ እቼሹ እሻቱ ደእያ ድራዉ፥ ኡንቱንቱ ቃይ ሀ መቱዋሳ ዬና ማላ፥ ኡንቱንቶ አልኣዛር ቢደ ማርካቶ’ ያጌዳ።

29 "አብራሃሞ ቃይ፥ ‘ሙሴነ ናባቱ ጻፌዳ ማጻፋይ ኡንቱንቶ ደኤ፤ ሄ ማጻፋይ ግያዋ ኡንቱንቱ ስሲኖ’ ያጌዳ።

30 "ዱረ ብታኒ፥ ‘ህኢ፤ አብራሃሞ፥ ታ አቦ፥ ሄዋ ግደና፤ ሽን እት ብታኒ ሀይቁዋፐ ደንዲደ፥ ኡንቱንቱኮ ብንቶ፥ ኡንቱንቱ ባረንቱ ናጋራ ፓጺደ፥ ስማናዋንታ’ ያጌዳ።

31 "አብራሃሞካ፥ ‘ኡንቱንቱ ሙሴነ ናባቱ ጻፌዳ ማጻፋ ስሰናዋ ግዶፐ፥ ሀራይ አቶ እት ኡራይ ሀይቁዋፐ ደንድ ይንቶካ አማንክኖ’ ጌዳ" ያጌዳ።

ዛርንግያ ሌምሱዋ

24 የሱስ ኡንቱንቶ ሀራ ሌምሱዋ ሀዋዳን ያጊደ ኦዴዳ፤ "ሳሉዋ ካዉተይ ባረ ጎሻን ሎኦ ዘረ ዘሬዳ ብታንያ ማላቴ። 25 ሽን ቃማ አሳይ ገምእሽድግና፥ አ ሞርኪ ዪደ፥ ዛርጋ ዘሬዳዋ ቦላ ዛርንግያ ዘሪደ ቤዳ። 26 ሽን ዛርጋይ ዶል አይፌዳ ዎደ፥ ዛርንጊ ሄ ዎደ ቤቴዳ።

27 "አ ቆማቱ አኮ ዪደ፥ ‘ጎዳዉ፥ ኔን ነ ጎሻን ሎኦ ዘረ ዘራበይኪ? ያትና፥ ዛርንጊ ሀቃፐ ዬዴ?’ ያጌድኖ።

28 "ሄዋፐ ጉይያን ጎዳይ፥ ‘ሄዋ ሞርኪ ኦዳ’ ያጌዳ።

ቆማቱ፥ ‘ኑን ቢደ ሾዳናዳን ዶሳይ?’ ያጌድኖ።

29 "ሽን እ፥ ‘አግተ፥ ዛርንግያ ህንተንቱ ሾዲደ፥ ዛርጋና ሾዳንታ። 30 ቦቾፕተ፤ ቆይጭያ ዎዲ ጋካናዉ፥ እትፐ ድጭኖ። ቆይጭያ ዎዲ ጋኮደ፥ ታን ቆይጭያዋንታ፥ ካሰቲደ ዛርንግያ ማጽተ፤ ታማን ጉዳናዉ ፖችያን ፖችያን ቃችተ፤ ሽን ዛርጋ ሺሺደ ድይያን ቆልተ’ ጋና" ያጌዳ።

ታሙ ዎዶራቱዋ ሌምሱዋ

1 "ሄ ዎደ ሳሉዋ ካዉተይ ባረንቱ ኩራዝያ ኦይቂደ፥ ማቻቶ አክያዋ ሞካናዉ ካረ ከሴዳ ታሙ ዎዶራቱዋ ማላታና። 2 ኡንቱንቱፐ እቼሻቱ ቦዛቱዋ፤ ቃይ እቼሻቱ ጭንጫ። 3 ቦዛቱ ባረንቱ ኩራዝያ ኦይቄድኖ፤ ሽን ላምባ ኦይቂበይክኖ። 4 ሽን ጭንጫቱ ባረንቱ ኩራዝያነ ጻራሙስያን ላምባ ኦይቄድኖ። 5 ማቻቶ አክያዌ ዬናን ጋምእና፥ ሄ ዎዶራቱ ባረንታ ገምእሽስና ግስ አጌድኖ።

6 "ብላሄ ግዴዳ ዎደ፥ ‘በእተ፥ ማቻቶ አክያዌ ጋኬዳ፤ አ ሞካናዉ ካረ ከስተ’ ያግያ ዎልቃማ ጫቡ ደንዴዳ።

7 "ሄ ዎደ ሄ ዎዶራቱ ኡባቱ ቤጎቲደ፥ ባረንቱ ኩራዝያ ጊግሴድኖ። 8 ቦዛቱ ጭንጫቱዋ፥ ‘ኑ ኩራዝ ቶአና ሀንያ ድራዉ፥ ህንተንቱ ላምባፐ ኑዉ እሜርክቴ’ ያጌድኖ።

9 "ሽን ጭንጫቱ ዛሪደ ኡንቱንታ፥ ‘አግተ፥ ኑዉነ ህንተንቶ ግደና፤ ሄዋ ድራ ህንተዉ ዛልእያዋንቱኮ ቢደ ሻም አክተ’ ያጌድኖ። 10 ሄዋፐ ጉየ ቦዛ ዎዶራቱ ላምባ ሻማናዉ ብድግና፥ ማቻቶ አክያዌ ፑቱ ጊና፥ ጊግ ኡቴዳ እቼሹ ዎዶራቱ አናና እትፐ ቡላቻ ጎልያ ገሌድኖ፤ እፍይካ ጎርደት አጌዳ።

11 "ጉየፐ ቃይ የኮ ዎዶራቱ ዪደ፥ ‘ጎዳዉ፥ ጎዳዉ፥ ኑዉ ዶያርኪ’ ያጌድኖ።

12 "ሽን ማቻቶ አክያዌ ዛሪደ፥ ‘ታን ህንተንቶ ቱሙዋ ኦዳይ፤ ታን ህንተንታ ኤርከ’ ያጌዳ።

13 "ስም ታን፥ አሳ ናአይ፥ ያና ጋላሳ ዎይ ሳትያ ህንተንቱ ኤረና ድራዉ፥ ናግ ኡትተ።