3 ዮሃንሳ ኪታ 1

1 ታን አማንያዋንታ ካለያ ጭማይ፥ ቱሙ ሲቅያ ታ ሲቁዋ ጋዮሳዉ ሀ ዳብዳቢያ ጻፋይ።✝1 ኪታ 19:29፤ ሮመ 16:23፤ 1 ቆሮ. 1:14 2 ታ ሲቆ፥ ኔን ጾሳና ደእያ ደኡ ሎአ ግድያዋ ታን ኤርያዋዳን፥ ኔና አያይነ ዋይሰና ማላነ ቃይ ነ አሳተይ ፓጻ ግዳና ማላ፥ ጾሳ ዎሳይ። 3 አያዉ ጎፐ፥ አማሬዳ እሻቱ ዪደ፥ ኡባ ዎደ ኔን ቱማተን ደእያዋነ ነ ቱማተባ ማርካቴዳ ዎደ፥ ታን ዳሮ ናሸታድ። 4 ታ ናናይ*4 ታ ናናይ፦ ጎዳ አማኒደ ካልያዋንታ ጉሳ። ቱማተን ደእያዋ ስስያዋፐ አደ፥ ታና ናሸችያባይ ባዋ።

ጋዮሳባ አሳይ ማርካቴ

5 ታ ሲቆ፥ ኑ እሻቱ እማ ግዶፐካ፥ ኔን ኡንቱንቶ ኦያ ኦሱዋ ኡባን አማነቴዳ ኦሱዋ ኦዳ። 6 ቃይ ኡንቱንቱ ነ ሲቁዋባ አማንያ አሳቶ ማርካቴድኖ፤ ኡንቱንቱ ቃንጸናን ባረ ኦግያ ባና ማላ ጾሳይ ዶስያዋዳን፥ ኔን ሎኦባ ኦደ ኡንቱንታ ማዳርኪ። 7 አያዉ ጎፐ፥ ጾሳ አማነናዉንቱፐ አይነ አከናን፥ ክርስቶሳ ሱን ድራዉ ከሴድኖ። 8 ሄዋ ድራዉ፥ ኑን ቱማተ ኡንቱንቱና እትፐ ኦና ማላ፥ ሀዋንቱ ማላ አሳቱዋ ማዳናዉ በሴ።

ድዮትራፍሰ ሴረቴዳ፤ ድመጽሮስ ሳበቴዳ

9 ታን አማንያዋንቶ፥ ዳብዳቢያ ጻፋድ፤ ሽን ኡንቱንቱ ካፑዋ ግዳናዉ ኮይያ ድዮትራፍሰ ኑን ግያዋ አከና። 10 ሄዋ ድራዉ፥ ታን ያ ብያ ዎደ፥ እ ኑ ቦላን ሃሳይያ ኢታ ሃሳያነ እ ኦዳ ኦሱዋ ህንተንቶ ኦዳና፤ ቃይ እ ሄዌ ጉጼዳ ጊደ፥ ኑ እሻቱ ይያ ዎደ ሞከና፤ ሀራይ አቶ ኡንቱንታ ሞካናዉ ኮይያዋንታካ ድጊደ፥ አማንያዋንቱ ግዶፐ ከሴ።

11 ታ ሲቆ፥ ሎኦባፐ አትን፥ ኢታባ ማላቶፓ። ሎኦባ ኦያ ኦንነ ጾሳ አሳ፤ ሽን ኢታባ ኦያ ኦንነ ጾሳ ኤረና።

12 ድመጽሮስ ሎአ ግድያዋ አሳይ ኡባይ ማርካቴ፤ ቱማተይ ባረ ሁጲያንካ አባ ማርካቴ። ኑንካ ቃይ አባ ማርካቴቶ፤ ኑ ማርካተይ ቱማ ግድያዋ ህንተካ ኤሪታ።

ዉርሰ ሳሮታ

13 ታን ነዉ ጻፋናዉ ኮዬዳ ዳሮባይ ደኤ፤ ሽን ዋራቃታንነ ቃላምያን ጻፋናዉ ኮይከ። 14 ሽን ታን ማታን ኔናና ጋከታናዉ ቆፓይ፤ ሄ ዎደ ኑን ጋከቲደ ሃሳያና።

15 ሳሮተይ ኔናና ግዶ።

ነ ዳባቱ ኔና ሳሮ ሳሮ ያጊኖ። ኑ ዳባቱዋ ኡባ ኡንቱንቱ ሱን ሱን ጼሳደ፥ ታና ሳሮ ሳሮ ጌዳ ያጋ።