As 10 parábolas mais importantes de Jesus

3 येशू उ मनैनहे बहुत्ते चिज दृष्टान्तमे बतैलाँ, और कलाँ, "एकथो किसान अपन खेट्वामे कौनो बिया बुई निक्रल। 4 जब किसान बिया बुइतेहे, ओम्नेमेसे कौनो बिया डग्रिम गिरगिलाँ, और उ बियाहे चिरैँ खादेलाँ। 5 कौनो बिया पठराहा जमिनमे परलाँ, जहाँ धेउर माटी नै रहे। यी झत्तेहेँ जामगिलाँ, काकरेकी यम्ने माटी धेउर गहिँर नै रहे। 6 पर यी बोँट दिनके धेउर घामके कारण कुल्मुलागिल, और गहिँर जर नै हुइलक कारणसे यी सुखाके मुगिल। 7 कौनो आकुर बिया असिन ठाउँमे परल, जहाँ झर्कत्ती जामल रहे। और उ झर्कत्ती बोँटहे दाबदेहल। 8 आकुर बिया मल्गर जमिनमे परलाँ। और ओइने कौनो सौ, कौनो साठी और कौनो तीस गुणा फारा फरैलाँ। 9 यदि तुहुरे बुझे चहथो कलेसे, यी बातमे ध्यान देऊ कि मै अब्बे तुहुरिन्से का कनु।"

मजा सामरीक दृष्टान्त

25 एक दिन जब येशू मनैनहे शिक्षा देहतिहिँत। तब एकथो यहूदी कानुनके गुरु हुँकार परीक्षा करे ठरह्यागिल, और यी प्रश्न पुँछल, "गुरुजी, सदाकालके जीवन पाइक लग महिन्हे का करे परी?" 26 येशू उहिहे कलाँ, "मोशक नियम कानुनमे का लिखल बा? ओम्नेसे तैँ का बुझ्ले?" 27 ऊ कहल, "तैँ परमप्रभु, अपन परमेश्वरहे अपन पूरा मनसे, अपन पूरा प्राणसे, अपन पूरा शक्तिसे और अपन पूरा बुद्धिसे प्रेम कर और अपन परोसीहे फेन ओस्तेके प्रेम कर, जसिके तैँ अपनहे प्रेम करथे।" 28 ऊ उहिहे कलाँ, "तैँ ठिक जवाफ देले। तैँ फेन ओस्तेहेँके कर, तब तुहिहे सदाकालके जीवन मिली।" 29 पर ऊ कौनो-कौनो मनैनहे* प्रेम नै करे, यहे बातहे सही ठहराइक लग येशूहे पुँछल, "मोरिक परोसी के हो ते?" 30 येशू एकथो कहानी सुनाके उहिहे जवाफ देलाँ, "एकथो मनैया यरुशलेम शहरमेसे यरिहो नगर ओहोँर जाइतेहे। ऊ डाँकनके फेला परगिल। ओइने उहिहे नंग्ते बनाके ओकर घल्लक लुग्गा और ओकर थेन रहल सक्कु चिज लूटके उहिहे पिट्लाँ, और उहिहे अरघताहा पारके छोरके चलगिलाँ। 31 संयोगसे एकथो यहूदी पुजारी उ डगर ओहोँरसे जाइतेहे और अरघताहा मनैयाहे देखल ते उहिहे बिना सहायता कर्ले ऊ दोसुर ओहोँरसे खरकके चलगिल। 32 ओस्तेहेँके एकथो लेवी फेन उ ठाउँमे आपुगल, जे मन्दिरमे काम करे, अरघताहा मनैयाहे देखल ते ऊ फेन उहिहे बिना सहायता कर्ले दोसुर ओहोँरसे खरकके चलगिल। 33 पर सामरिया प्रदेशके एकथो मनैया वहे डगर अपन यात्रामे जाइतेहे, तब अरघताहा मनैयाहे देख्के उहिहे सोग लग्लिस। 34 और ओकर थेन जाके तेल और अंगुरके रस लगाके ओकर खतरामे पट्टी बहान देहल। और अपन गडहकमे चहुँराके उहिहे एकथो पौवामे लैजाके ओकर सेवा करल। 35 दोसुर दिन ऊ दुईथो चाँदीक सिक्का निकारके पौवक मलिक्वाहे देके कहल, ‘यिहिहे सहेरदेहो, आकुर धेउर खर्च लागी कलेसे मै घुमके आइबेर तुहिन्हे तिरदेहम।’" 36 तब येशू उहिहे पुँछ्लाँ, "तोरिक विचारमे यी तीन जहनमेसे डाँकनके हमलामे परल मनैयक परोसी के ठहरल?" 37 ऊ कहल, "जे अरघताहा मनैयकमे सोगाइल।" तब येशू उहिहे कलाँ, "जा, तैँ फेन ओस्तेहेँके करिस।"

4 "तुहुरिन्मेसे कोन मनैया हुई, जेकर सौथो भेँरीनमेसे एकथो भेँरवा भुलागिल कलेसे, ऊ उनान्सौ भेँरीनहे हरियर डँरवामे चह्रत छोरके भुलाइल एकथो भेँरवाहे नै भेटाइतसम खोज्ती नै रहत का? 5 जब ऊ हेराइल भेँरवाहे भेटाके सेकत ते खुशी हुइती उहिहे अपन कन्धामे उठालेहत। 6 और अपन घरे जाके ऊ अपन संघरियन और परोसीनहे बलाके जमा करत, और ओइन्हे कहत, ‘मोरिक संग रमाऊ, काकरेकी मै अपन हेराइल भेँरवाहे भेटागिल बतुँ।’ 7 मै तुहुरिन्हे यी कहतुँ: असिके जब एकथो पापी मनैया अपन मन बदलके पाप करना छोरत, और परमेश्वरके ओहोँर घुमत। यी एकथो पापी मनैयक कारण परमेश्वर और हुँकार स्वर्गदूतनके बहुत खुशी हुइहीँ, जे अपन पाप करना जीवनहे छोरदेहत। ऊ और हुँकार स्वर्गदूतनके उ उनान्सौ धर्मी मनैनके कारण अतरा खुशी नै हुइहीँ, जेनहे अपन पाप करना जीवन छोरना जरुरी नै हुइतिन।"

हेराइल छावक दृष्टान्त

11 फेनदोस्रे येशू एकथो दृष्टान्त कलाँ, "कौनो एकथो मनैयक दुईथो छावा रहिस। 12 छोट्का छावा अपन बाबाहे कहल, ‘बाबा, मोरिक भागमे परना धन-सम्पतिक हिस्सा महिन्हे अब्बेहेँ दैदे।’ तब् ओइन्के बाबा अपन सम्पति अपन दुनु छावनहे बाँटदेहल। 13 थोरिक दिन पाछे छोट्का छावा अपन सक्कु धन-सम्पति बिटोरके दूरिक देशमे चलगिलस। और वहाँ ऐसआराम और अपन मनपर्दी जिन्गी जिके अपन सारा सम्पति उरादारल। 14 जब ओकर सक्कु धन-सम्पति खर्च होसेकल रहिस। तब ठिक्केपर वहे बेला उ देशमे बरवार अनिकाल परल। और खाइक लग ओकर थेन कुछु नै रहिगिलिस। 15 और ऊ एकथो वहे देशके नागरिक रहल मनैयक थेन काम करे गैल। और उ नागरिक उहिहे अपन खेट्वामे सुरिनहे चह्राई पठादेलिस्। 16 और ऊ अतरा जोरसे भुँखाइल रहे, कि ऊ सुरिनके खैना चाह्रा खाके फेन महा खुश रहे। काकरेकी उहिहे केऊ फेन कुछु खाई नै दिस। 17 जब उहिहे अपन अवस्थक बारेमे अक्किल अइलिस, ते ऊ सोँचे लागल कि: ‘मोरिक बाबक सक्कु कामदारनके लग पेट भरके खाके फेन उब्रना खाना बतिस, और यहाँ मै भुँखे मुअतुँ। 18 मै उठ्के अपन बाबक थेन जैम, और उहिहे कहम कि, बाबा, मै परमेश्वरके विरोधमे और तोरिक नजरमे पाप करल बतुँ। 19 आबसे मै तोरिक छावा कना लायकके नै हुइतुँ। महिन्हे तोरिक ज्यालादारी कामदारनमेसे एकथो हस मानके धारले।’"

छोरके गैलक छावा फिर्ता हुइना

20 "तब् उ देशहे छोरके ऊ अपन बाबक थेन फिर्ता जाइक लग निकरगिल। और ऊ दूरे रहलमे ओकर बाबई उहिहे देख्के सोग लग्लिस। और ऊ अपन छावक ओहोँर दौरल। और ऊ उहिहे उँक्वार भर पकरलेहल, और उहिहे खोब चुम्मा खैलस। 21 छावा उहिहे कहल, ‘बाबा मै परमेश्वरके विरोधमे और तोरिक नजरमे पाप करल बतुँ। और मै तोरिक छावा कना लायकके नै हुइतुँ।’ 22 पर बाबा भर अपन कामदारनहे कहल, ‘झत्तेहेँ एकदम मजा लुग्गा नानके यिहिहे घलादेऊ। और यकर हाँथेक अंग्रीमे अंग्थी, और गोरामे जुत्ता घलादेऊ। 23 और बरवार जिता मारो, और हम्रे खाई और खुशियाली मनाई। 24 काकरेकी यी असिन रहे मानो कि मोरिक छावा मुगिल रहे, और आब जित्ती होगिल बा। यी हेरागिल रहे, और आब यी मिलगिल।’ तब् ओइने खुशियाली मनाई लग्लाँ।"

बरका छावक गुनासो

25 "तब्बेहेँ ओकर बरका छावा खेट्वामे काम करतेहे। और जब ऊ खेट्वामेसे घुमके घरे आइतेहे, तब घरक लग्गे पुगल ते ऊ नाचगान कर्लक आवाज सुन्लस। 26 तब ऊ एकथो कामदारहे अपन थेन बलाके पुँछल, ‘यी का हुइता?’ 27 उ कामदार उहिहे कहल, ‘अप्निक भैया घरे फिर्ता आगिल बताँ। और अप्निक बाबा बरवार जिता मारके खुशियाली मनाइतताँ। काकरेकी हुँकार छावा मजै और स्वस्थ घुमके आइल हुँकिन्हे मिल्लिन।’ 28 यी सुनके ऊ रिसेलेके चुरचुर होगिल, और घरक भित्तर नै जाइतेहे। तबेकमारे ओकर बाबा घरेमसे बाहेर अइलिस, और उहिहे घरक भित्तर लैजाइक लग बिन्ती करे लागल। 29 पर ऊ अपन बाबाहे कहल, ‘हेर, अतरा सालसे मै तोरिक सेवा करतुँ और जबफेन तोरिक कहल बात मन्ती रनु। तभुन फेन तैँ महिन्हे मोरिक संघरियनके संग आनन्द मनाइक लग कबु फेन छेग्रिक एकथो पठ्वा तक नै देले। 30 पर जब तोरिक यी छावा जे तोरिक सारा सम्पति वेश्यनकेमे उराके आइल बा ते तैँ ओकर लग जिता मारदेले बते।’ 31 तब् ऊ उहिहे कहल, ‘हेर, मोरिक छावा, तैँ ते सदादिन मोरिके संग बते, और मोरिक ज्या जत्रा बा उ तोरिके हो। 32 पर आब हम्रिहिन्हे खुशी हुइना और खुशियाली मनैना जरुरी बा। काकरेकी यी असिन रहे मानो कि तोरिक भैया मुगिल रहे, और आब जित्ती होगिल बा। यी हेरागिल रहे, और आब यी मिलगिल बा।’"

बहुमूल्य मोती

45 येशू कलाँ, "फेनदोस्रे स्वर्गक राज मजा हिरामोती खोजुइया एकथो व्यापारी हस हो। 46 ऊ एकथो बहुमूल्य मोती भेटाइल, ते ऊ जाके अपन थेन रहल सक्कु चिज बेँचके उ मोतीहे किनलेहत।"

फरिसी दलके मनैया और कर उठुइयक दृष्टान्त

9 अपन बारेम किल सोँचुइयन और अपनहे धर्मी मनुइया और दोसुर जहनहे हेल्हा करुइयनहे येशू यी दृष्टान्त सुनैलाँ: 10 "दुईथो मनै प्राथना करे मन्दिरमे गैलाँ। एकथो फरिसी दलके मनैया और दोसुर भर कर उठुइया रहे। 11 फरिसी दलके मनैया ठरह्याके अपन मनमने असिक प्राथना करल, ‘हे परमेश्वर, मै अप्निहे धन्यवाद देहतुँ, मै औरे मनैन हस खराब काम करुइया, अन्यायी, व्यभिचारी या यहे कर उठुइयक हस फेन नै हुइतुँ। 12 मै हप्तक दुईचो उपवास बैठ्थुँ। मै अपन भेटैलक सक्कु चिजके दशांश अप्निहे देथुँ।’ 13 पर कर उठुइया भर दूरे ठरह्याके स्वर्ग ओहोँर हेरना फेन हिम्मत बिना कर्ले दुखि होके असिक कती अपन छाती ठठाइल, ‘हे परमेश्वर, मै एकथो पापी हुइतुँ। मोरिक उप्पर दया करो, और महिन्हे माफ करदेऊ।’ 14 मै तुहुरिन्हे कहतुँ, असिके कहुइया फरिसी नै रहे। पर कर उठुइया मनैया रहे, जे परमेश्वरके आघे सही ठहरागिल। काकरेकी हरेक जे अपनहे भारी मानी, उहिहे छुटी कराजाई। और जे अपनहे छुटी मानी, उहिहे भारी बनाजाई।"

सोनक सिक्कक दृष्टान्त

14 फेनदोस्रे येशू कलाँ, "परमेश्वरके राज उ मलिक्वक जसिन हो, जे महा दूर परदेश जाइबेर अपन नोकरहुँक्रिहिनहे बलाके अपन धन-सम्पति ओइन्के योग्यता अनुसार ओइन्हे जिम्मा दैदेहल। 15 एकथोहे पाँचथो सोनक सिक्का, दोसुरहे दुईथो सोनक सिक्का और तेसरहे एकथो सोनक सिक्का देके ऊ चलगिलस। 16 तब् पाँचथो सोनक सिक्का भेटुइया जुरतेहेँ जाके उहिहे व्यापारमे लगाके आकुर पाँचथो सोनक सिक्का कमादारल। 17 ओस्तेहेँके दुईथो सोनक सिक्का भेटुइया फेन आकुर दुईथो सोनक सिक्का कमालेहल। 18 पर एकथो सोनक सिक्का भेटुइया भर जाके धर्ती कोरके अपन मलिक्वक धन नुकादेहल। 19 बहुत्ते दिन पाछे उ नोकरहुँक्रिहिनके मलिक्वा आइल, और ऊ ओइन्हे यी पता लगाइक लग अपन थेन बलाइल कि ओइने ओकर धनहे का कर्ले बताँ। 20 तब् पाँचथो सोनक सिक्का भेटुइया नोकर आकुर पाँचथो सोनक सिक्का नानके आघे आके असिक कहल, ‘हे मलिक्वा, अप्नि महिन्हे पाँचथो सोनक सिक्कक जिम्मा देहल रही। हेरी, मै आकुर पाँचथो सोनक सिक्का कमाइल बतुँ।’ 21 मलिक्वा उहिहे कहल, ‘स्याबास, मजा और विश्वासी नोकर! तैँ थोरचे बातमे विश्वासयोग्य हुइले, आब मै तुहिहे बहुत्ते बातके जिम्मा देहम। तैँ अपन मलिक्वक खुशीमे शामिल होजा।’ 22 दुईथो सोनक सिक्का भेटुइया फेन आके कहल, ‘हे मलिक्वा, अप्नि महिन्हे दुईथो सोनक सिक्का देहल रही। हेरी, मै आकुर दुईथो सोनक सिक्का कमाइल बतुँ।’ 23 ओकर मलिक्वा उहिहे कहल, ‘स्याबास, मजा और विश्वासी नोकर, तैँ थोरचे धनहे सम्हारे सेक्ले, आब मै तुहिहे बहुत्ते धनके जिम्मा देहम। तैँ अपन मलिक्वक खुशीमे शामिल होजा।’ 24 एकथो सोनक सिक्का भेटुइया फेन आके कहल, ‘हे मलिक्वा, नै बुइल खेट्वामेसे कट्ना और नै अँराइल ठाउँमेसे बित्रुइया अप्नि कठोर मनैया हुइती कना महिन्हे पता रहे। 25 तबेकमारे मै डरागिनु, और जाके अप्निक सोनक सिक्का मै धर्तीमे नुकादेनु। हेरी, यी अप्निक सोनक सिक्का लैली।’ 26 ओकर मलिक्वा उहिहे जवाफ देहल, ‘ए दुष्ट, अल्छि नोकर, नै बुइल ठाउँमे कत्थुँ। और नै अँराइल ठाउँमेसे बिटोर्थुँ कहिके तैँ जानल रहिस कलेसे, 27 तैँ मोरिक धनहे कर्जा लगानी करे परना रहे। और आके मै मोरिक धन ब्याजसुन्धा फिर्ता भेटैतुँ।’ 28 तब मलिक्वा दोसुर नोकरहुँक्रिहिन्हे कहल, ‘ओकर थेनसे उ सोनक सिक्का छिनो, और जेकर थेन दशथो सोनक सिक्का बतिस, उहिहे दैदेऊ।’ 29 काकरेकी जिहिहे फेन मोरिक शिक्षा बुझ्ना चाहना बा, परमेश्वर उहिहे आकुर धेउर ज्ञान दिहीँ। काकरेकी जेकर थेन बा, उहिहे देजाई। पर जे मोरिक शिक्षा बुझ्ना धेउर चाहा नै करत, ते परमेश्वर उहिसे उ ज्ञानहे फेन दूर लैजिहीँ, जोन ओकर थेन थोरचे बतिस। 30 उ बिनाकामक नोकरहे भर नरकके अंधारमे फेँकादेऊ, जहाँ मनै रुइहीँ और कष्टमे दाँत किचकिचैहीँ।"

धनी मनैया और लाजरस

19 येशू कलाँ, "एकथो धनी मनैया रहे, जे गजब महिँगा और मजा लुग्गा घाले, और रोट्दिन मिठसे फेन मीठ खाना खाए। 20 ओकर घरक दवारमे लाजरस नाउँक एकथो गरीब मनैयाहे मनै नानके बैठादिँत। जेकर शरीर खत्रैखतरासे भरल रहिस। 21 उ धनी मनैयक खाइबेरिक फेँक्लक डुट्ठा-कुट्ठा खाके लाजरस अपन पेट भर्ना इच्छा करे। यकर बाहेक कुक्कुर फेन आके ओकर खतरा चाटदिँत। 22 अन्तिममे गरीब मनैया मुगिल, और स्वर्गदूतनके उहिहे लैजाके अब्राहामके थेन रहक लग लैगिलाँ। उ धनी मनैया फेन मुगिलस और दफ्नागिल। 23 नरकमे सहे नै सेक्ना दुःख भोगेबेर ऊ उप्पर हेरल, और दूर अब्राहामहे और ओकर थेन लाजरसहे देखल। 24 तब् ऊ चिल्लाके कहल, ‘ए अब्राहाम बाबा, मोरिकमे दया करके लाजरसहे पठादे ताकि ऊ अपन अङग्रिक टिप्पा पानीमे भिजाके मोरिक जीभहे शित्तर पारदेहे। काकरेकी मै यी आगिक दुःखसे तर्पतुँ।’ 25 पर अब्राहाम कहल, ‘ए छावा, याद कर, तैँ अपन जीवन कालमे मजै-मजा चिज भेटैले, और ओस्तेके लाजरसहे खराबे खराब चिज मिल्लिस। पर आब यहाँ यी आराममे बा, और तैँ दुःख भेटाइते।’ 26 यी सक्कु बात बाहेक यहाँसे तोरिक थेन उपार जाई खोजुइयन जाई ना सेकिँत, और वहाँसे यहाँ हमार थेन आई खोजुइयन फेन इपार आई ना सेकिँत कहिके हमार और तुहुरिन्के बिच्चेम एकथो महा गहिँर गंज्री बा। 27 ऊ कहल ‘ए अब्राहाम बाबा, मै तुहिहे बिन्ती करतुँ, तैँ लाजरसहे मोरिक बाबक घरेम पठादे। 28 काकरेकी मोरिक पाँचथो भैयन बताँ, और मै चहथुँ कि ऊ वहाँ जाए, और मोरिक भैयनहे चेतावनी देहे। कहुँ असिन ना होजाए कि ओइने फेन यी दुखेदुःख रहल ठाउँमे आजाँइत।’ 29 पर अब्राहाम कहल, ‘ओइन्हे चेतावनी देहक लग मोशक नियम कानुन और परमेश्वरके अगमवक्तनके लिखल लेख बतिन। ओइने उहिहे सुने परना हो, और ओकर पालन करे परना हो।’ 30 पर ऊ कहल, ‘नाई, बाबा अब्राहाम, पर यदि मुवलमेसे कौनो एकजाने ओइन्के थेन जाई, और ओइन्हे चेतावनी दि कलेसे ओइने अपन मन बदलके पाप करना छोरदिहीँ।’ 31 अब्राहाम उहिहे कहल, ‘जब ओइने मोशा और परमेश्वरके अगमवक्तनके आज्ञा नै मन्थाँ कलेसे मुअलमेसे केऊ जित्ती होगिल कलेसे फेन ओइने ओकर विश्वास नै करहीँ।’"

सोहुँक दृष्टान्त

24 येशू फेनदोस्रे ओइन्हे दोसुर दृष्टान्त सुनैलाँ: "स्वर्गक राज एकथो जिम्दरवा हस हो, जे अपन खेट्वामे मजा बिया बुइल। 25 पर जब मनै सुततिहिँत, तब् जिम्दरवक दुश्मन आइल, और गोहूँक बिच्चे-बिच्चेम सोहुँ बोके चलगिल। 26 जब बोँट निकरके ओम्ने दाना लागल, तब् सोहुँ फेन देखा परल। 27 जिम्दरवक नोकरनके आके उहिहे कलाँ, ‘का अप्नि, अपन खेट्वामे मजा बिया नै बुइल रही? वहाँ सोहुँ कहाँसे आइल?’ 28 जिम्दरवा ओइन्हे कहल, ‘कौनो एकथो दुश्मन आके सोहुँ बोदेहल बा।’ नोकरनके उहिहे पुँछ्लाँ, ‘का हम्रे जाके उ सोहुँ पनाई?’ 29 पर उ जिम्दरवा कहल, ‘नाई, ओसिक ना करो, नै ते तुहुरे सोहुँ उँखारेबेर गोहूँ फेन उँखारदेबो। 30 कटना सिजनसम दुन्हुनहे संगसंगे बाह्रे देऊ।’ काटेबेर कटुइयनहे कबुँ, ‘आघे सोहुँ उँखारके जराइक लग पुल्ला बाँधो, पर गोहूँ भर मोरिक बक्खारीमे धारो।’"

दशथो कुँवारीनके दृष्टान्त

1 तब् येशू अपन चेलनहे कलाँ, "जब मै, मनैयक छावा फिर्ता अइम, तब परमेश्वरके राज असिन रही: दुल्हन्यक दशथो कुवाँरी संघरियन अपन-अपन दिया लेके भोजाहा उत्सवमे दुल्हाहे भेँटा करे गैलाँ। 2 ओइन्मेसे पाँच जाने निर्बुद्धि और पाँच जाने बुद्धिमति रहिँत। 3 जब निर्बुद्धि कुँवारीन अपन दिया लैगिलाँ। तब् ओइने अपन संग फादिल तेल भर नै लैगिलाँ। 4 पर बुद्धिमति कुँवारीन भर अपन दियक संगसंगे फादिल तेल फेन लैगिलाँ। 5 दुल्हा जब बेर करल, तब उ सक्कु जाने निंदेलेके ओँघाई लग्लाँ, और निदागिलाँ। 6 पर आधा रातके ‘हेरो, दुल्हा आगिल, उहिहे भेँटा करे आऊ’, कना आवाज आइल। 7 तब् उ सक्कु कुवाँरीन जागगिलाँ, और अपन-अपन दिया ठीकठाक परलाँ। 8 निर्बुद्धि कुवाँरीन बुद्धिमति कुवाँरीनहे कलाँ, ‘तुहुरिन्के तेलमेसे हम्रिहिन्हे थोरचुन देऊ, काकरेकी हमार दिया ते बुते लागल।’ 9 पर बुद्धिमति कुँवारीन असिक कहिके जवाफ देलाँ, ‘हम्रिहिन और तुहुरिन्हे दुनु जहनहे पुग्ना धेउर तेल नै हुई, बेन दोकानमे जाऊ और अपन लग किनो।’ 10 जब ओइने किने गैलाँ तब् दुल्हा आपुगल, और तयार रहुइयन ओकर संग भोजाहा घरेम पैँठ्गिलाँ और दवार बन्द होगिल। 11 पाछेसे उ बाँकी कुवाँरीन फेन फिर्ता आपुग्लाँ, और रो-रोके दुल्हाहे असिक कहे लग्लाँ, ‘प्रभु, प्रभु हमार लग दवार खोलदी!’ 12 पर ऊ जवाफ देके कहल, ‘जात्तिके, मै तुहुरिन्हे कहतुँ, मै तुहुरिन्हे नै चिन्थुँ।’" 13 तब येशू कलाँ, "तबेकमारे जागल रहो। काकरेकी मोरिक फिर्ता अइना उ दिन और उ समय तुहुरे नै जानल हुइतो।"