प्रकाश 10

स्वर्गदूत और छालक छोटमोट चिट्ठिक मुट्ठा

1 तब मै एकथो आकुर बल्गर स्वर्गदूतहे स्वर्गमेसे उतरत देख्नु, जेकर चारु ओहोँर बद्रिलेके घेरल रहिस। एकथो इन्द्र धनुस ओकर मुन्टक चारु ओहोँर घेरल रहिस। ओकर मुहार सूर्य हस चम्किस, और ओकर गोरा आगीक खम्भा हस रहिस। 2 ओकर दाहिन गोरा समुन्दरमे धारगिलिस, और बाउँ गोरा आँरितिर जमिनमे धारगिलिस। ओकर हाँथेम एकथो छालक छोटमोट चिट्ठी रहिस, जोन खुलल रहे। 3 उ स्वर्गदूत जोरसे चिल्लाइल, और ओकर आवाज सिंहक गर्जल हस रहिस। जब उ चिल्लाइल ते सातथो तेज आवाज उहिहे जवाफ देलिस, जोन आवाज बद्रि गर्जल हस रहे। 4 जब गर्जलक सातु आवाज आके सेकल ते मै लिखक लग तयार रहुँ। पर तब्बेहेँ मै स्वर्गमेसे अइलक असिन आवाज सुन्नु, "जोन बात गर्जलमेसे आइल, उ बातहे ना लिख, यिहिहे गोप्यमे धार।" 5 तब जोन स्वर्गदूतहे मै समुन्दर और जमिनमे ठरह्याइल देखल रहुँ; ऊ अपन दाहिन हाँथ कसम खाइक लग आकाश ओहोँर उठाइल। 6 तब सदासर्वदा जित्ति रहुइया, और स्वर्ग, पृथ्वी, समुन्दर और ओम्ने रहल सक्कु चिज बनुइयक कसम खाके असिके कहल, "आब कौनो फेन चिजके लग आकुर प्रतिक्षा करे नै परी। आब उ सक्कु पूरा होजिहीँ।" 7 पर जब सतौँ स्वर्गदूत अपन तुरही फुँके लागी, तब परमेश्वर तुरुन्ते अपन काम करहीँ। ऊ अपन गोप्य योजना पूरा करहीँ, जसिके ऊ अपन सेबकहुँक्रिहिन्हे और अगमवक्तनके थेन घोषणा कर्ले रहिँत। 8 तब मै फेनदोस्रे वहे आवाज सुन्नु, जे स्वर्गमेसे महिन्से बात बत्वाइल रहे। वहे आवाज महिन्हे कहल, "जा, उ छालक छोटमोट चिट्ठी लैले। जोन चिट्ठी उ स्वर्गदूतके हाँथेम खुलल बा, जे समुन्दर और ओकर आँरितिरके जमिनमे अपन गोरा धारके ठरह्याइल बा।" 9 तब मै उ स्वर्गदूतके थेन जाके कनु, "यी छालक छोटमोट चिट्ठी महिन्हे दैदे।" और ऊ महिन्हे कहल, "ले, यिहिहे खाले; यकर स्वाद सहद हस मीठ बतिस। पर पाछे यकर तितौँससे तोरिक पेट बठाई।" 10 तबेकमारे मै उ छालक छोटमोट चिट्ठी लैलेनु, जोन चिट्ठी स्वर्गदूत पकर्ले रहे, और उहिहे मै खालेनु। और जात्तिकमे यकर स्वाद सहद हस मीठ रहिस। पर जब यिहिहे लिल्नु ते मोरिक पेट बठाई लागल। 11 तब ऊ महिन्हे असिके कहल, "तैँ अलग-अलग समूहहे, और सक्कु जातिक मनैनहे, अलग-अलग भाषा बोलुइया मनैनहे और रज्वनहे एकचो आकुर फेनदोस्रे बता, जोन बात बताइक लग परमेश्वर तुहिहे कले बताँ।"