प्रकाश 8

सतौँ मोहर और सोनक धूपदानी

1 जब पठ्वा सतौँ मोहर खोलल, तब लगभग आधा घण्टासम स्वर्गमे रहुइया सक्कु जाने शान्त होगिलाँ। 2 परमेश्वरके आघे ठरहुइया सातथो स्वर्गदूतनहे मै देख्नु। ओइन्हे सातथो तुरही देगिलिन। 3 वहाँसे दोसुर एकथो स्वर्गदूत आइल, और वेदीक लग्गे ठरह्यागिल। ओकर थेन सोनक धूपदानी रहिस। उ स्वर्गदूत धूप बारक लग सोनक धूपदानी लेले रहे। और परमेश्वरके सक्कु पवित्र मनैनके प्राथनक संगसंगे उहिहे बहुत्ते धूप फेन देगिलिस। तब ऊ धूप और मनैनके प्राथना परमेश्वरके सिंहासनके आघे सोनक वेदीमे बारल। 4 स्वर्गदूतके बर्लक धूपके धूवाँ पवित्र मनैनके प्राथनक संग परमेश्वरके आघे पुगल। 5 तब स्वर्गदूत सोनक धूपदानी लेहल, और ओम्ने वेदीमेसे बर्ती रहल अंग्था भरके पृथ्वीमे अख्न्यादेहल। तब बिज्ली चम्कल, बद्री थर्कलक आवाज आइल और भुइँचाल आइल।

6 और उ सत्यो स्वर्गदूत जेनके थेन सातथो तुरही रहिन्, ओइने उ तुरही फुँकक् लग तयार होगिलाँ।

सुरुक तुरही

7 सुरुक स्वर्गदूत अपन तुरही फुँकल, तुरुन्ते पठरापानी बर्षल, और खुन मिलल आगी पृथ्वीमे बर्षल। यकर कारण पृथ्वीक एक तिहाई भाग जरगिल। रुख्वनके एक तिहाई भाग और सक्कु हरियर घाँस जरगिलाँ।

दोसुर तुरही

8 दोसुर स्वर्गदूत अपन तुरही फुँकल, और आगीलेके जर्तीरहल एकथो बरवार पहाड़ हस देखैना चिज समुन्दरमे गिरल। और समुन्दरके एक तिहाई भाग खुनमे बदलगिल। 9 यकर कारणसे समुन्दरमे रना एक तिहाई प्राणी मुगिलाँ। यकर कारण समुन्दरमे रहल एक तिहाई पानी जहाज फेन नाश होगिलाँ।

तेसर तुरही

10 तेसर स्वर्गदूत अपन तुरही फुँकल, और आकाशमेसे बर्ती रहल आगीक जोँजा हस एकथो बरवार तोरैयाँ गिरल। यकर कारण लदियनके एक तिहाई भागमे और पानीक मुहानमे गिरल। 11 उ तोरैयक नाउँ "ऐरेलु*8:11 ऐरेलु ऐरेलु एकथो बोँटके नाउँ हो और यम्नेमेसे निकर्लक स्वाद महा तीत रथिस।" हो। और ओकर कारण पानीक एक तिहाई भाग तीत होगिल। और पानी तीत हुइलक कारण बहुत्ते मनै मुगिलाँ।

चौथा तुरही

12 चौथा स्वर्गदूत अपन तुरही फुँकल। और सूर्यक एक तिहाई भागके उप्पर प्रहार करगिलस। और जोन्ह्यँक एक तिहाई भागके उप्पर और तोरैयँक एक तिहाई भागके उप्पर फेन कुछु ठक्कर खाइल। यकर कारण दिनके एक तिहाई समयसम सूर्य, जोन्ह्याँ और तोरैयँन अंधार होगिलाँ।

13 तब मै हेर्नु, और मै आकाशमे एकथो चिल्हरियाहे उप्पर उरत देख्नु। और उहिहे मै असिके कहिके चिल्लाइत सुन्नु, "पृथ्वीमे रहुइया दुष्ट मनैनहे परमेश्वर दण्ड दिहीँ। काकरेकी जब फुँक्ना बाँकी रहल तीनथो स्वर्गदूतनके ओइन्हे देगिलक तुरही फुक्हीँ ते संसारमे सक्कु मनैनकेमे अइना विपत एकदम डरलग्तिक रही!"