1 यकर पाछे, मै आकाशमे एकथो आकुर चिन्हा देख्नु, जोन बहुत अचम्म लग्तिक और डरलग्तिक रहे। वहाँ सातथो स्वर्गदूत रहिँत, जेने सातथो अलग-अलग मेरिक विपत् लेले रहिँत। उ अन्तिम विपत् हुइँत। काकरेकी जब ओइने ओराजिहीँ, तब परमेश्वरके रिस ओराजिहीन। 2 तब मै कुछु चिज देख्नु, जोन समुन्दर हस देखाइतेहे। जोन चिज सिसा हस चम्कतेहे, और ओम्ने आगी फेन मिलल रहे। मै उ मनैनहे फेन देख्नु, जेने दैँतुरवासे नै हारल रहिँत। ओइने दैँतुरवक और ओकर मूर्तिक आराधना नै करल रहिँत। और ओइन्केमे दैँतुरवक नाउँक सङ्ख्यक छाप नै लगाइल रहिन। वहाँ ओइने उ समुन्दरके आँरितिर ठरह्याइल रहिँत। और ओइने सक्कु जाने विणा पक्रल रहिँत, जोन विणा ओइन्हे परमेश्वर देले रहिन। 3 ओइने परमेश्वरके दास मोशक गीत गाइतिहिँत, जोन गीत पठ्वक बारेमे बा। ओइने यी गीत गाइतिहिँत: "हे सर्वशक्तिमान प्रभु परमेश्वर, अप्निक कर्लक काम अचम्मक और महान बा। अप्नि सक्कु देशके रज्वा हुइती। अप्नि ज्या फेन कर्थी, उ काम सहि और धर्मी बा। 4 हे प्रभु, सक्कु मनै अप्निक डर मन्थाँ, और ओइने सक्कु जाने अप्निक नाउँक सम्मान करथाँ। काकरेकी अप्नि किल पवित्र परमेश्वर हुइती। हरेक जातिक मनै अप्निक थेन अइथाँ। और ओइने अप्निक आराधना करथाँ। काकरेकी अप्निक धर्मी काम सक्कुहुनहे मजासे पता बतिन।" 5 जब यी मनै गीत गैना बन्द करदेलाँ, तब मै देख्नु कि स्वर्गमे मन्दिर खुलल रहे। जोन गवाहीक तम्बू हस हो। जिहिहे हिब्रू मनै अपन संग चालीस सालसम लेले रहिँत, जब ओइने उजाड़-ठाउँमे यात्रा करतिहिँत। 6,7 तब सातथो स्वर्गदूत जेनहे सक्कुहुनसे पाछेक सातथो विपत् लेके जाई परना रहिन, ओइने उ मन्दिरमेसे बाहेर निकरलाँ। ओइने चहकार उज्जर लुग्गा घल्ले रहिँत। और ओइन्के छातीक चारु ओहोँर सोनक पट्टी फेन रहिन। तब चारथो जित्ति प्राणीनमेसे एकथो प्राणी हरेक स्वर्गदूतनहे सदादिन जित्ती रहुइया परमेश्वरके ओहोँरसे, डरलग्तिक दण्डसे भरल एकथो सोनक खोरिया देहल। 8 मन्दिर परमेश्वरके महिमा और शक्तिसे अइना धुवाँलेके भरगिल। तब् केऊ फेन मन्दिरमे जाई नै सेकल, जबसम उ सातथो विपत् नै ओरागिल, जेनहे सातथो स्वर्गदूतनके नानल रहिँत।