1 सिंहासनमे बैठल रहुइयक दाहिन हाँथेम दुनु पँजार ओहोँर लिखल एकथो छालक चिट्ठीक मुट्ठा मै देख्नु, जेम्ने सातथो मोहर लगाके बन्द करगिल रहे। 2 तब एकथो बल्गर स्वर्गदूतहे बरवार आवाजसे असिक कती रहल मै देख्नु, "यी चिट्ठीक सील टुरना और यिहिहे खोल्ना योग्यक के बा?" 3 पर स्वर्गमे, और पृथ्वीमे और पृथ्वीक तरे यी छालक चिट्ठीमे लिखल बात खोलके पह्रे सेकुइया केऊ नै रहे। 4 तब केऊ फेन उ छालक चिट्ठीमे लिखल बात पह्रे सेकुइया नै भेटागिलक कारण मै खोब रुइनु। 5 तब चौबीसथो अगुवनमेसे एक जाने महिन्हे कलाँ, "ना रोऊ। हेरो, जिहिहे यहूदक कुलके सिंह कहिजाइत। दाऊद रज्वक सन्तान शैतानहे जित्ले बताँ! और ऊ छालक चिट्ठीक सातथो सील टुरना और उहिहे खोल्ना योग्यक बताँ।"

6 तबे मै सिंहासनके पंजरे एकथो पठ्वाहे चारथो जित्ती प्राणी और चौबीसथो अगुवनके बिच्चेम ठरह्याइल देख्नु। पठ्वक शरीरमे पहिलेक मर्लक बलिदानके चिन्हा रहिन। पर फेनदोस्रे जित्ती होगिल बा कहिके जनाइतेहे। हुँकार सातथो सीङ और सातथो आँखी रहिन, जोन सारा पृथ्वीमे पठागिलक परमेश्वरके सातथो आत्मा हुइँत।

7 पठ्वा आघे आके सिंहासनमे बैठुइयक दाहिन हाँथेमेसे उ छालक चिट्ठी लेलाँ। 8 जब ऊ यी छालक चिट्ठी लेलाँ। तब उ चारु जित्ती प्राणी और चौबीसै अगुवन पठ्वक आघे घोपत्या होके हुँकार आराधना करलाँ। प्रत्येक अगुवन वीणा और सोनक खोरिया पकरलाँ। खोरिया धूपलेके भरल रहे, जे परमेश्वरके सेवा करुइयनके प्राथनाहे जनाइत। 9 ओइने पठ्वक बारेमे यी गीत गाइतताँ, जे येशू ख्रीष्ट हुइँत :

"अप्नि यी चिट्ठीक सील टुरना,

और यिहिहे खोल्ना योग्यक बती।

काकरेकी अप्नि मुवागिल रही।

और अप्नि अपन मुलक खुनसे परमेश्वरके लग हर कुल, हर भाषा, हर मनै और हर जातिनमेसे मनैनहे मोल चुकाके किन्ली।

10 अप्नि ओइन्हे राजा बनैली, अप्नि ओइन्हे पुजारी बनैली, जेने हमार प्रभु परमेश्वरके आराधनक काम करक लग बलागिल बताँ।

और पृथ्वीमे ओइने शासन करहीँ।"

11 मै फेनदोस्रे हेर्नु, और अनगिन्ति स्वर्गदूतनके आवाज सुन्नु। और ओइने सिंहासनके चारु ओहोँर ठरह्याइल रहिँत। चौबीसथो अगुवन और चारथो जित्ती प्राणीन भर ओइन्के आँजरपाँजर रहिँत।

12 ओइने महा जोरसे चिल्लाके असिक कलाँ,

"मुवागिलक पठ्वा प्रशंसा करना लायकके बताँ।

हुँकार अधिकार बरवार बतिन।

हुँकार बुद्धि गहिँर बतिन।

ऊ बहुत शक्तिशाली बताँ, और जात्तिकमे ऊ धनी बताँ।

आऊ, हम्रे हुँकार आदर, महिमा और प्रशंसा करी।"

13 तब स्वर्गमे, पृथ्वीमे, पृथ्वीक तरे, समुन्दर और वहाँ रहल सक्कु प्राणीनहे मै असिक गैती रहल सुन्नु,

"हम्रे सिंहासनमे बैठल मनैयक प्रशंसा करी।

आऊ, हम्रे पठ्वक प्रशंसा करी।

हम्रे हुँकिन्हे रोट्दिन आदर देखाई।

और हुँकिन्हे सदादिन महिमा करी।

काकरेकी ऊ सक्कुहुनसे शक्तिशाली बताँ।"

14 तब उ चारु जित्ती प्राणीन कलाँ, "आमेन! (यकर मतलब हुइत, अस्तेहेँ होए।)" तब उ अगुवन मुन्टा लिहुरैलाँ, और परमेश्वरके आराधना करलाँ।