As 10 parábolas mais importantes de Jesus

Nkwoon mu muna Samaliy a mweeng

25 ✝Nyeeph mikieetsh kieenaan ikaam ikieek Yish. Kamuulaan ane: "Ntaang’dj", "nakwok’dj akel mbony ikaam namon mwoony mu yoyoo?"

26 Yish kamuulaan ane: "Bampuun mbony mikieetsh? Usawok mbony esween abal?"

27 ✝Mwoot kakal’laan ane: " ‘Muk Kum Ntshièmaa i ntem mwaa mukim, i ngoniaa ikim, i bwoot bwaa bukim, i bwaany bwaa bukim,’ kamotsh: ‘Umuk mwanyo mbok mintshiin esween dimuk.’"

28 ✝Yish kankal’laan esanwoos ane: "Wakal’l busek. Kel ngwoon, ul’kaal i mwoony mu yoyoo."

29 Ek nyeeph mikieetsh ambaak i nyiing atwoph’l. Ngwoon, kawuulaan Yish ane: "Mwanameey nyeeny?"

30 Yish kankal’laan ane: "Mwoot ambakikum to Yelushalem bos a Yeliko. Ambaakaan a mbok, kanaph baan ituum abol biphaang’t, kansok’l baan mindel, kambol baan busudj, kieen baan, kaneph baan anieem’l a shin akolakol iwa. 31 Phwetieek’dj, ntwootsh a Ntshièm kashamaan ambok akun mintshiin. Amonaan mwoot akun anèm’l, kashamaan a nkol mu mbok, kieenaan lieen laan. 32 Mbok mintshiin, muna Lewi antwoolaan a indiy ikun, kamonaan mwoot akun, kashamaan a nkol mu mbok kieenaan. 33 ✝Ek mun a Samaliy, ambaak a lieen, katwoolaan akol mwoot akun. Amaan amon, mweeng kangaat muun. 34 Kasem’saan akolakol, kankolaan sedj baan’i maan a phot, kabakaan phot ikun. A mbis akun kanyeengaan adik di kameel, kanaataan bos a mbûl a bieentshambaang, katolaan budit’l bu ibo yaan. 35 Aphieen akun, kateyaan phas iphey i ngaang, kayeekaan mun a mbûl, esanwoos ane: ‘Tol budit’l bwaan,’ ‘el’miim ikadj, nayekayeek ikim ilween atey idik diaan.’"

36 Ngwoon, Yish kawuulaan nyeeph mikieetsh ane: "A lakeny laa, a ndieeng bât baku baset, nyeeny ambaak akol a mwoot aku ayaat abol biphaang’t?"

37 Nyeeph mikieetsh kankal’laan ane: "Wey akun amankes busek."

Yish kanwoosaan ane: "Yaak, i ween ukel mbok mintshiin."

4 "Mbè mwoot motsh a ndieengiin aal i phangiaan kam, mbè motsh adiim, kakwook’dj alieem’l iku imotsh kamadiph i idiph ikaam yeswoot motsh aku adiim shaang elaan amone? 5 Itaang ilaan amon, edi nshaas mubwiik. Ansheetsh phaangaan a manyak 6 ankal a bol bwaan, ambis akun ambok bambèy baan mbel akol ba bel akolaan, amabalwoos ane: ‘Taalanyeeny i nshaas, ikaam ndamon phaangieem ambaak adiim!’ 7 Mbok mintshiin, ndes’bulwoos mbè, nshaas mubwiik mul’kaal a dik ikaam i mwoot motsh ambey asakal’l ntem mwaan, a ntshwey mu bât kamadiph i idiph baaph mbè kabesamuk akal’l ntem mbi.

Nkwoon mu mwân adiim

11 Yish katwootaan kamotsh ane: "Ambabaak mwoot ambay i bân baan baphey ba baluung. 12 Mwân ankieek kalwoosaan ishanaan ane: ‘Taat, mpieek ikaphieem i budiy bwiit.’ Iphontshi taat kakaph’saan i bân baan baphey budiy bwaan. 13 A mbis matu makieek, wey aku ankieek kakaphaan biket biaan bikim, kieenaan i phasiaan ikaam yetwoos a bol bweek’dj bumbaak kaany. Andwoon, kabutshiaan bikim bimbaakaan i biin i bât ba ntshak. 14 A mbis a mbè aman biket bikim, ntshal ibwiik kayiing’liin a bol bukun, katetshaan amon maphetsh. 15 Kaphilaan mun ngun mu mwoot a bol bukun, ambaak esantom a mangwoon maan ikaam ibak ngul. 16 Ambaak esamuk adia iyaan ndwoom imbaak ngul india, ek mwoot mbè motsh kambaak amweek i biin mbi. 17 Ntshiin akun, katetshaan abok lakeny a bimweeny bimbaakaan amon, katwootaan ane: ‘Ben a ngun bakim babol taat besadia, basony busek, ibiek’dj binshaal, miin ndesawa i ntshal a ndey! 18 Ndekakal abol taat, namanwoos ane, taat namaakel bweph a bos bu Ntshièm akol a bos bwaa. 19 Ngwoon, kandesayeem’l kamotsh mbè umbok mbel ane mwânaa mbi. Ntshik muna nde motsh a ndieeng a ben a ngun baa.’ 20 Kakalaan abol ishanaan. Itaang imbaakaan mbè yaaph el a kaany i mbûl, ishanaan kamonaan, kashisaan, mweeng kangaat muun:

"Kieenaan mbaang ikaam inyey, kambutaan angon kamotsh kanyutaan muny. 21 Mwân kanwoosaan ane: ‘Taat, namaakel bweph a bos bu Ntshièm akol a bos bwaa, kandesayeem’l kamotsh mbè umbok mbel ane mwânaa mbi.’ 22 Ek ishanaan kalwoosaan ben a ngun baan ane: ‘Yanyeeny bwaas i ndel musek, ndiing anyeeny; mbok anyeeny ikèt a nyeem akol masabaat a mateem. 23 Yanyeeny i mwân a ngweem ansek, ndiak’s anyeenyaan; telakel dweey di nshaas! 24 Ikaam’i mbè mwânieem a nuung aku ambaak aman awa, ek kweey edi mwoony kamotsh, ambaak adiim, ek asol.’ Ngwoon, mamatetsh awok nshaas.

25 "A itaang ikun, mwân bukoos abol taat aku ambaak el ngwoon. Amwiyaan ikadj, antwoolaan akol mbûl, kawokaan ntshieem akol mamin. 26 Kabokaan mun a ngun motsh mbel, kamwuulaan ane: ‘Dweey key dinkeph’te?’ 27 Mun a ngun kankal’aan ane: ‘Mwânyo amanyikadj, ishô amandiak’s mwân a ngweem ansek, ikaam i mbè amamon mwânaan anyikadj i latok lasek.’

28 "Mwân bukoos kawokaan kaph, kabelaan mbok aying’l a mbûl. Ishanaan katowaan buseph ikaam imwoong mbè aying’l a mbûl. 29 Ek, mwân kakal’laan ishanaan ane: ‘Lieen, mitshi mialek’s mi mamiim akes ngun aaph mbè kanambel’k mikieetsh miaa mbi. Ek, kutshik ampieek mbè mwân a kam’dj ikaam nakel i miim dweey di nshaas i bakidj bieem mbi! 30 Ek mwânaa aku amwiyaan ikadj, aan aman budiy bwaa i baat ba bikelel bibey, usandiak’s mwân a ngweem ansek!’ 31 Ishaan kanwoosaan ane: ‘Mwânieem,’ ‘ween umwak ntshieem andey, biku bikim bimiim i biin ibiaa. 32 Ek tanaph kakel dweey di nshaas, tamwok nshaas, ikaam i mbè mwânyo aku ambaak aawa, ek kweey edi mwoony, ambaak adiim, ek kweey aasol.’"

Nkwoon mu mufal’s baan’i nkweek minaam

9 Bât bambakayeeph ane tesakel imuk i Ntshièm, bankas abètsh ibiek’dj, Yish kabok’saan nkwoon imweek’dj ane: 10 "Bât baphey kieen baan bos a Ntuum ikaamielwoom Ntshièm: motsh ambaak mufal’s, iyiek’dj ambaak nkweek minaam.

11 "Mufal’s ambaak ayeem a dik a isek esalwoom Ntshièm ngo: ‘Maye! Ntshièmieem, ndes’kakas lakeeng ikaam i mbè kandaaph muna bât baku bakim bamwaak: bieem, bât babey akol biphaang’t. Ndesakas lakeeng kamotsh ikaam i mbè kandaaph muna nkweek minaam aku mbi. 12 Namwaak nankin biket bidia matu maphey a ndieeng labiing kamotsh ndesayeek iteny imotsh i ishieeng i biket bieem bikim bi miim ibiin.’

13 "Nkweek minaam kayem’taan kaany, kambaak ayeem’l asheen’l miish a dik mbi, ek ambaak amadibak lo a laang la tol esatwoot ane: ‘Ntshièmieem, mpwook’s mweeng, ikaam i mbè nde mwoot ambey!’ 14 ✝Yish kabalwoosaan kamotsh ane: "Ikakaam, Ntshièm amawok’s nkweek minaam mweeng, ikaam ambaak mwoot ansek a miish ma Ntshièm, kakalaan a bol bwaan. Ek Ntshièm kawok’s muphal’s mweeng mbi. Ntshiin akun, mwoot es’diwoot bankukankum’s, ek mwoot es’dikum’s bampekampet’l."

Nkwoon mu ndiy baan’i Lasalo

19 "Ambabaak ndiy a phas ambaak andiing mindel mi ngaang abwiik, kamotsh ambaak antwoos a mandiy ma ngaang matu makim, andia biliees bi ngaang. 20 Muna ntaan ambaak ambet abos bu mbûlaan diin diaan ambaak Lasalo. Latok laan lambaak layool i phot ibwiik. 21 Lasalo ambaak i nyiing adia biket bimbaak abwaak a meens ma ndiy. Kamotsh mboswoong imbaak imwiy alieeng photiaan.

22 "Lasu liek’dj, muna ntaan kawawaan, bantshol kanaat baan akol Abalapham. Ndiy aku kawawaan, kaney baan. 23 Ek kamonaan imweeny a katey ka yoyoo; ankat’laan miish kamonaan Abalapham baan’i Lasalo akolaan. 24 Ngwoon ndiy a phas kabokaan dweey: ‘Taat Abalapham, mpwook’s mweeng! Tom lasalo, anwim sos a nyeem mwaan a maas ikaam inkitsh inem, ikaam ndesamon imweeny a tey tuku!’

25 "Ek Abalapham kankal’laan ane: ‘Mwânieem, yiph’l mbokambaakween i budiy bubwiik a nkwootsh, ek itaang ikun Lasalo ambaak i maphetsh mabwiik. Ek alwool aku, edi nshaas ayè ngo, ek ween wamon imweeny inoon’l. 26 Kamotsh, aphaang a biitiaa, e ibèk itadj; ngwoon, ba besamukieen to wony bos a ndwoon aal’k to ndwoon bos a wony, kabakwook’dj ashaam a ibèk iku mbi.’ 27 Mun budiy kanwoosaan ane: ‘Taat, ndes’kawoong, tom lasalo a mbul a taat, 28 ndedi bân ba meey bataan, lasalo abalwoos ikaam i mbè kabiik ibaan a imbet iku imaphetsh mbi.’

29 "Ek Abalapham kankal’laan ane: ‘Bân ba nyo bedi Moos baan’i bangaang ba ntshièm, babawoom’k.’ 30 Muna budiy kanwoosaan ane: ‘Mbi taat Abalapham, kabisayeem’l mbi. Ek mbè mwoot motsh abuum to ilweem, bel’kakal’l mitem mibaan.’ 31 Ek Abalapham kanwoosaan ane: ‘Mbè bananyo kabamuk’dj awoom’k Moos baan’i bangaang ba ntshièm aal’k mbè mwoot abuum to ilweem kabel amwoom’k mbi.’"