1 Lasu liek’dj, Yish ambaak esalwoong’s bât kamotsh esashaang’l lashaang lasek a Ntuum. Bakum ba batwootsh akol bayeeph mikieetsh kiy baan i bakom’l akolaan 2 besamuul ane: "Tshik talwoos usakel mwooy maku i bunoon’l key? Nyeeny amayeek bunoon’l bukel ibuun mwooy maku?"

3 Yish kabakal’laan ane: "I miim ndedi dweey dibuwuul. Ndwoos anyeeny, 4 imbet key yidj mitaam’s mi Yoon, to bol Ntshièm mbè to bât?"

5 Ek katetsh baan abok keny banamieet ane: "Mbè tatwoot ane: ‘To bol Ntshièm,’ el’katawuul ane: ‘Bubeedj ayim’s mwooy ma mabulwoos’dj Yoon idik di yey?’ 6 Ek mbè tatwoot ane: ‘To bât,’ bât bakim bel’katawuph’l mbôk ikaam itadiaak, ikaam i mbè bât baku bamayim’s ane, Yoon ambaak ngaang a Ntshièm." 7 Ngwoon kaneph baan akal’l ane: "Katesayeeph imbet yidj bunoon’l bwaan mbi."

8 Yish amabakal’l ane: "I miim kandel bulwoos imbet yesiy bunoon’l bus’miim ayaat ibuun ngun mbi."

9 ✝Yish kababok’saan nkwoon ane: "Ambabaak mwoot ambaak awoon ntey mwaan mu nviny a ngwoonaan; kamulieem’saan mun a ngun, kieenaan bos a lieen la matu mabwiik. 10 A itaang ikun ndwoom, katomaan mwoot abol mun a ngun ikaam i mbè antom’s ikaph i ndwoom’i ntey mwaan. Ek mun a ngun kambolaan busudj, kankasaan mio bwaang. 11 Kum a ngwoon katomaan kamotsh mun a ngun iyek’dj, ek wey aku kambol baan busudj kamotsh, kantwoon baan mishing kamotsh kambieeng baan mio bwaang. 12 Katomaan kamotsh mwoot anseet; wey aku kanèm’s baan, kamotsh kampuul baan a buseph. 13 Mun a ngwoon kadiwuusaan ane: ‘Nakwok’dj akel mbony? Ndel kabatom’s mwânieem a nuung imuk; kat mbè bakwook’dj antshiin!’ 14 Ek ben a ngun amwoony baan mwân aku, kadilwoos baan ane: ‘Lieen anyeeny wey elashaal kum bikek a bos bu lieen. Tandiaak anyeeny, ikaam i mbè ngwoon ishaal iyiit!’ 15 Ngwoon kambieeng baan a ngwoon, kamotsh kandiaak baan."

Yish kabawuulaan ane: "Mun a ngwoon akwook’dj bakes yey?" 16 "El’kiy anamieet ikaam idiaak ben a ngun bakun, aneph ayeek ben a ngun ibiek’dj ngwoonaan."

Bât amwook baan dweey diku, katwoot baan ane: "Ntshièm kakel’k ngwoon mbi!"

17 ✝Ek Yish kabalieenaan miish, kabawulaan ane: "Dweey diku di nkaan mu Ntshièm disalak key?

‘Imèny ilieem’dj baan abol baphik ba mbûl

imaphil imèny i ngaang abwiik.’ 18 Mwoot elabwaak adik di imèny ikun ambat biteny, kamotsh mbè imèny iku ibwaak adik di mwoot, inshakanshaas’l."

19 Bayeeph mikieetsh akol batwootsh banen ba Ntshièm kaswoot baan mbok ayaat Yish a itaang intshiin, ikaam i mbè bambaak bayeeph ane nkwoon muku amababok’s baan; ek kawok baan bât butet. 20 Itaang intshiin, katetsh baan alieen Yish akolakol, katom baan bât akolaan ikaam i mbè bawok mwooy mesaan atwoot, baan bambaak bes’dikel muna bât basek. Bât baku bambaak besamuk awuul Yish dweey ikaam inkotsh, ikaam i mbè bamon bwaany bumpul a mio mi nguph’lanoph. 21 Ngwoon bât bakun kawuul baan Yish ane: "Ntaang’dj, tesayeeph ane mwooy mesween atwoot baan’i ma mesween alwoong’s me busek, kusaluum’s mwoot mbi, ek usalwoong’s mwooy makwook mesamuk Ntshièm. 22 Talwoos, nkieetsh musalwoong mbè biit alièm’s Kayis minaam mbè mbony?"

23 Ek mbok aku mbè Yish ambaak esayeeph lanyaany la baan, kabalwoosaan ane: 24 "Ndak anyeeny laphas lamotsh. Iphwa baan’i miin mampuun baan, bi bi nyeeny?"

Kakal’l baan ane: "Bi bibol Kayis."

25 Ngwoon Yish kabalwoosaan ane: "Yeek anyeeny Kayis ibiaan, buyeek Ntshièm ibiaan."

26 Kabamon mbok angaat a mwooy mabey mbi, a mbok ambaakaan esatwoot a bos bu bât. Ek, mikal’l miaan mimabakam’s kamotsh kashaal baan phol.

27 ✝Basadok bakieek, baan besabok miaang ane kwa mibuum’dj mi to iwa mbi, kiy baan akol a Yish, kamuul baan ane: 28 ✝"Ntaang’dj, Moos amatayeek nkieetsh muku mwaphuun ane: ‘Mbè nuung aal i mwân a baan angwa, answool ngaat aaph abot mwân, bi busek mbè mwân a baan akit ngaat akun ikaam i mbè babotiaan bân belaal a diin di mwân inaan amwa.’ 29 Ek, imbabaak baluung shaam’l ba ikuun imotsh. Mwân bukoos katweemaan ngaat, ek kawawaan aaph abot mwân. 30 Wey ampieen kakitaan ngaat a ngweel, iyaan kawawaan aaph abot mwân, 31 i wey anseet kakelaan mbok mintshiin suk wey anshaam’l, kawa baan bakim aaph abot bân. 32 Mom a mom, ngaat kawawaan iyaan. 33 Iphontshi lasu lelabuum bât to iwa, nyeeny elatol ngaat akun? Ikaam’i mbè nkim mubaan shaam’l bamanyeeph muna mwam’s a baan."

34 Yish kabakal’laan ane: "Baluung i baat ba nkil muku bes’katweem kamotsh bankas atweem’s bân ba baan, 35 ek baluung i baat belasuw makaam ikaam ibuum to iwa, ikaam itwoos a nkil mu yemayeem kabel ditweem’s mbi. 36 Kabel akas awa kamotsh mbi, baphwakaphwaans i bantshol. Belaphil bân ba Ntshièm, ikaam i mbè ababuum’s to iwa. 37 ✝Ek Moos esatwoot dikwook ane, bât baawa babukabuum to iwa. Ek a nkaan musatwoot dweey di ishuung’i tey, esabok Kum mbel ane: ‘Ntshièm abol Abalapham, Ntshièm abol Isak akol Ntshièm a Yakob.’ 38 Ntshièm ka Ntshièm a bât bawa mbi, ek Ntshièm a bât ba mwoony, ikaam i mbè idik diaan, bât bakim bedi mwoony a bos bwaan."

39 Bayeeph ibiek’dj ba mikieetsh kankal’l baan ane: "Ntaang’dj, watwoot busek!" 40 Ikaam kwa mwoot mbè motsh akieek’dj mbokamuul dweey kamotsh mbi.

41 Yish kabawuulaan ane: "Bwaany key mbè tatwoot ane Kilist mwân abol Davidj? 42 ✝Ikaam’i mbè Davidj esatwoot anamieet a nkaan mu ntshieem ane:

‘Kum amalwoos Kumieem ane:

Ya witwoos a lo lieem la ikat

43 shaang el’miim atshik baphis baa a shin mateem maa.’ 44 Davidj amambok mbel ane ‘Kum’; bwaany key mbè aan aneph aphil mwânaan?"

45 Itaang imbaak bât bakim besamwoom’k, Yish kalwoosaan bieentsh baan ane: 46 "Bwaal anyeeny i bwaany a bos bu baphuuny mikieetsh, baan besamuk abuung i ntshak itadj, kamotsh besamuk mbè bamabawuum’l i itshiiny a mandiy ma imbwoom, besamuk atwoos a mandiy mabukoos a mambûl ma Ntshièm baan’i mandiy ma bukum a itaang i nshaas; 47 bantaam’l baat bawees baluung bikim bi baan i biin, kamotsh bankel malwoom matadj ikaam i mbè babamon. Ikaam’i mwooy maku bek baluum’s i diish dinoon’l bamon imweny!"