1 A ntshi mu ishieeng itaan mu bukum bu Tibelio; Poons Pilaat ambaak nguph’lanoph a nuung mu Yudey, Helood ambaak nguph’lanoph a Ngaleel, mwân a baan Filipooy ambaak kum a Itulaay baan’i Takonitiid, Lusania ambaak kum a Abileen, 2 Ane baan’i Kayif bambaak batwootsh banen. Dweey di Ntshièm dimanyiy abol Yoon, mwân abol Sakaliy, a imbet aaph bât. 3 Yoon katetshaan abuung a mangaan makim ma ntshal a Yodan, kabokaan mbek ane: "Kal’lanyeeny mitem miin, taam’lanyeeny, Ntshièm el’kabuwok’s mweeng."

4 ✝Mbok aphuuny’dj baan a nkaan mu mwooy ma ngaang a Ntshièm Yeshay ane:

"Dweey di mwoot esabol nwool a imbet aaph bât ane:

‘Lodianyeeny mbok abol Kum,

nkesanyeeny mioodj miasheem’t!

5 Mioph’dj mikim mil’kaal miadiph,

mikwootsh mikim akol takwootsh takim bikaal shin a shin;

Phwoot ikim ikaal ya sheem’t,

mbok mikim ibey ikaal yalodj.

6 Bât bakim bamokamon mweeng mu Ntshièm!’"

7 ✝Twoong a bât imbaak imwiy abol Yoon ikaam ibataam’s. Ambaak amabalwoos ane: "Bân ba ntshwa!" "Nyeeny amabulak mbok atshiin kaph ibol Ntshièm ilakolakol? 8 ✝Lak anyeeny bikelel bisalak mbè ane bwakal’l mitem miin, kabutwoot’k a bwinamieet ane Abalapham taatiit mbi. Ikaam ndes’bulwoos mbè ane Ntshièm akwook’dj akal’l mbôk iku imphil bân ba Abalapham! 9 ✝Ngieem yanyik akolakol ikaam ishieeng mitey to mashin: ntey mukin mwaaph mbè kamusatow ndwoom isek bekamusheeng, kamotsh bamamuphul a tey." 10 Bât kamuul baan ane: "Takwok’dj akel mbony?"

11 Kabakal’laan ane: "Wey edi nguum iphey ayeek mwoot aaph iyin motsh; mwoot edi bi bidia akel mbok mintshiin."

12 ✝Bakweek ba minaam kamotsh kiy ikaam ibataam’s, kawuul baan Yoon ane: "Ntaang’dj, i biit takwok’dj akel mbony?" 13 Kabakal’laan ane: "Kabutol’k naam mu mwoot i ntieet mwalek mu musayeem’l mbi." 14 Mayol kakas maan amuul ane: "I biit, takwok’dj akel mbony?"

Kabakal’laan ane: "Kabutaaml’k i mwoot iket i ngon mbi, kabubaang’sk mwoot dweey bukal mbi; buyim’sanyeeny ikaphiin i nshaas."

15 Bât bambaak besakwoong’l miyid miaan, mwoot nkim ambaakaphis ane Yoon ntshaan Kilist. 16 Yoon kabalwoosaan nkim mubaan ane: "Miim ndek butaam’s i maas, ek wey amandek miim a bunoon’l el’kiy, kandesayeem’l ikaam ituung’l mishing mi masabaat maan mbi. Aan ekibutaam’s i Mween Musek baan’i katey. 17 Wey asuk ikal a lo laan ikaam isheeph’l shaang. El’kakweek shaang a yaal yaan, ek atukatuum biphwoony bi shaang a katey kaaph mbè kakesanyim mbi."

18 Ntshiin, Yoon ambaak esalwoos bât nswoos musek, esieneeng mitem mibaan i mwooy miek’dj mabwiik. 19 ✝Ek Yoon ambaakaan esalak nguph’lanoph Helood bweph bwaan, ikaam i mbè ambaak atweem Helodiaas, mwaam’s a mwa inaan, kamotsh amakel mwooy miek’dj mabey mabwiik. 20 Helood amakel kamotsh mwooy miek’dj mabey malek’s, kabokaan Yoon a mwaat.

21 A mbis mbè bât bakim baman ataam’l, Yish amataam’l iyaan; ambaak Yish esalwoom Ntshièm, dik dimadiph’l, 22 ✝i Mween Musek kakum muum adik diaan, a iphwa i bwoot, muna phul imbieeng. I dweey dimakum to dik ane: "Ween u mwânieem bukwootsh; lakeny lieem lakim lela ween."

23 Yish ambaak i mitshi akolakol i maseset atetsh’diaan ngun mwaan. Bât bambaak besaphis ane, mwân a nuung abol Yosef, mbè mwân abol Heliy, 24 mwân abol Matat, mwân a nuung abol Lewu, mwân a nuung abol Meleki, mwân a nuung abol Yanay, mwân abol Yosef, 25 mwân a nuung abol Matatias, mwân abol Amoos, mwân a nuung abol Nahum, mwân a nuung abol Eseli, mwân a nuung abol Nagaay, 26 mwân a nuung abol Maat, mwân a nuung abol Matatias, mwân a nuung abol Semey, mwân a nuung abol Yosetsh, mwân a nuung abol Yoda, 27 mwân a nuung abol Yoanaan, mwân a nuung abol Lesa, mwân a nuung abol Solobabel, mwân a nuung abol Shalatieel, mwân a nuung abol Neli, 28 mwân a nuung abol Meleki, mwân a nuung abol Adiy, mwân a nuung abol Kosam, mwân a nuung abol Elamadam, mwân a nuung abol Ele, 29 mwân a nuung abol Yoses, mwân a nuung abol Elieseey, mwân a nuung abol Yolim, mwân a nuung abol Matat, mwân a nuung abol Lewu, 30 mwân a nuung abol Shimeoon, mwân a nuung abol Yudaas, mwân a nuung abol Yosef, mwân a nuung abol Yonam, mwân a nuung abol Eleyakim, 31 mwân a nuung abol Meleya, mwân a nuung abol Mena, mwân a nuung abol Matata, mwân a nuung abol Nataan, mwân a nuung abol Davidj, 32 mwân a nuung abol Yishay, mwân a nuung abol Obeday, mwân a nuung abol Boaaz, mwân a nuung abol Salamoon, mwân a nuung abol Nashoon, 33 mwân a nuung abol Aminadaab, mwân a nuung abol Admiin, mwân a nuung abol Ani, mwân a nuung abol Heseloon, mwân a nuung abol Pelees, mwân a nuung abol Yudaas, 34 mwân a nuung abol Yakob, mwân a nuung abol Isak, mwân a nuung abol Abalapham, mwân a nuung abol Tela, mwân a nuung abol Nashol, 35 mwân a nuung abol Seluug, mwân a nuung abol Lagawu, mwân a nuung abol Peleeg, mwân a nuung abol Ebe, mwân a nuung abol Shela, 36 mwân a nuung abol Kenaan, mwân a nuung abol Afashaad, mwân a nuung abol Sheem, mwân a nuung abol Now, mwân a nuung abol Lemeek, 37 mwân a nuung abol Matusheel, mwân a nuung abol Henook, mwân a nuung abol Yaleed, mwân a nuung abol Malaleel, mwân a nuung abol Kenaan, 38 mwân a nuung abol Enoosh, mwân a nuung abol Sheet, mwân a nuung abol Adaam, mwân a nuung a Ntshièm.