1 Lasu liek’dj, Yish ambaak esalwoom Ntshièm a imbet yeek’dj. Amaans’diaan mbok alwoom Ntshièm, motsh a ndieeng a bieentsh baan kamuulaan ane: "Kum, talwoong’s mbok alwoom Ntshièm, mbokanwoong’s Yoon bieentsh baan."

2 Yish kabakal’laan ane: "Es’bwiin alwoom Ntshièm, twootanyeeny ane:

Taatiin el a dik,

diin diaa diaal i phaam;

bunyim bwaa bwiy. Mweeng mwaa mwaal mbok mintshiin amukween mbè bikeph’t a shin baan’i dik.

3 Watayeek bishim bidia bi matu makim.

4 Utawok’s mweeng

mbok mintshiin es’biit awok’s babamatakes bweph.

Kamotsh kutalieem’k mbè takel bweph mbi, ek taphaans a bweph.’"

5 Yish kabalwoosaan kamotsh ane: "Mbè motsh a ndieengiin aal i nkidiaan, yeen andieeng butu a bol bwaan ikaam inwoos ane: ‘Mbèyieem, ndes’kalwoom ngaas i maamp maset. 6 Ikaam i mbè nedi nkidieem amatwool a bol bweem, ek kanday iket i nyey i yin mbi!’ 7 Ek mbè biaal mbè mbèyaan ankal’l a ngat’a mbûl ane: "Lieem’l ampetsh! Namaman adiph ikwiik, bân bieem i miim tabetsh; kanakwok’dj awuum ikaam iyek maamp mbi.’ 8 Ndes’bulwoos dwey dikwook, mbè kawuum’dj a shin ikaam imweek, ikaam i mbèyaan, awukawuum amamweek iliees isaan alwoom ikaam i mbè esabombok latwoot labwiik.

9 "Ek miim ndes’bulwoos mbè, lwoom anyeeny babuyekabuyek; swoot anyeeny bumokamon; kumanyeeny ikwiik babudikabudiph’l.

10 Ikaam mbè mwoot aku nkim esalwoom bes’kamweek, mwoot esaswoot es’kamon, wey esakum ikwiik bes’kandiph’s. 11 Mbè mwoot motsh andieengiin aal ishaan a bân, akwok’dj ayeek mwânaan ntshwa mbè esanwoom sweye? 12 Kamotsh amwekamweek kot mbè esanwoom ikele? 13 Bwiin bât babey, busayeeph mbokayeek bân biin biket bisek. Ek Taat el a dik elabel mbok buyeek mween musek abol ba besanwoom mbony!"

14 Lasu liek’dj Yish ambaak abieeng mween mubey mumbaak mwayis mwoot kil. Atwoodj mween mubey, mwoot katetshaan mbokatwoot. I twoong a bât katetshiin mbok akam’l, 15 ✝ek bât bieek’dj bakieek aphiing a baan, katwoot baan ane: "Bik a ngon ibol Belsebul, Kum a mieen mibey, esaan abieeng mieen mibey."

16 ✝Ibiek’dj, kaswoot baan mbok ankotsh ilwoong, besamuul ikaam i mbè abalak ying’t isalak ane bukum bwaan bu bu Ntshièm. 17 Ek Yish ambaak esayeeph lakeny labaan; kabalwoosaan ane: "Mbè bunyim bwaal ituum bunamieet, kabulieen a bos mbi, mbè bât ba ilwootsh imotsh baal a masey, ilwootsh ikawa. 18 Mbè sak’tieem aal’i bushaang’dj anamieet bukum bwaan bukwok’dieen a bos mbony? Ndesatwoot ngwoon ikaam i mbè bumatwoot ane kandesabieeng mieen mibey i bunoon’l bu Belsebul. 19 Yiin mbè ndesabieeng mieen mibey i bunoon’l bu Belsebul, nyeeny esayeek bieentsh biin bunoon’l bu bieeng mieen mibey? Bieentsh biin banamieet besalak mbè buk a ibwaak!

20 Ek mbè ndesabieeng mieen mibey a bunoon’l bu Ntshièm, mbok a mbè ane bunyim bu Ntshièm bwatwool suk a phingiin.

21 Mbè nuung anoon’l aal biket bikim bi ituum, esaan abak mbûlaan, budiy bwaan bukim bu bwabak busek. 22 Ek mbè nuungieek’dj anek bunoon’l, anaph ituum, ambol, antam’l bingom bisaan atshik ntem, akakaph’s biket bikun bintolaan.

23 ✝ Mwoot aaph mbè kaapheem, nshaang’dieem; wey aaph mbè kesakweekieem mbi, es’katshaak’dj.

24 "Esatow mween mubey a latok la mwoot, mus’kakal a mandiy maaph bât, munswoot indiy itwoos, ek mbè kamumwoony indiy itwoos mbi, mul’katwoot munamieet ane: ‘Ndel’kakal a mbuliem, kotsh akun ambaak miim.’ 25 El’muun ikadj, muntotaan mbûl yawoom, yalodj busek. 26 A mbis akun, munswoot mieen miek’dj mimotsh shaam’l mianekaan bunoon’l; mimwiy imbet imotsh a mbûl mimwishim’k. Mom a mom, mwoot akun aneph aphil ambey alek matetetsh maan."

27 Itaang imbaak Yish aatwoot ngwoon, ngaat antshak katwootaan angon aphiing a twoong a bât esatwoot ane: "Nshaas mwaal’i ngaat ambaak abotween, kamotsh ambaak anyoom’s mabieel!"

28 Ek Yish kankal’laan ane: "Nshaas mubwiik mudi bât besawom’k dweey disatwoot Ntshièm, kamotsh bamamatshik a bikelel bibaan!"

29 ✝Itaang imbaak twoong a bât yayool akol a Yish, Yish katetshaan mbokatwoot ane: "Ben a nkil muku bât babey; besalwoom dweey di makam’l di to dik, ek kabel amon dweey di makam’l mbè dimotsh mbi, dilaal dweey dikun dintshiin di Yonaas. 30 ✝Ngwoon, mbok mintshiin ambaak Yonaas akel dweey di makam’l ikaam ben Niniwe, i Mwân a Mwoot elaphil dweey di makam’l ikaam i nkil muku. 31 ✝ Lasu lalum’s bât, Ineem i to Sela, iyiekayeem’t a bos bu nkil muku, amabaswoong’l, ikaam i mbè amwiy to minuung mi itaan ibwiik mi shin a maan ikaam iwoom’k mwooy mayool to i bwaany bu Soloom. Kabesayeeph mbè ane iket yalek Soloom yil ayè mbi. 32 ✝ Lasu laluum’s bât, bashi Niniwe bayekayeem’t a bos bu nkil muku bamabaswoong’l, ikaam i mbè bena Niniwe bamaakal’l bikelel bibaan awok’dj baan Yonaas esashaang’l lashaang lasek. Kabesayeeph mbè ane e mwoot alek Yonaas bunen ayè!

33 ✝ "Mwoot mbè motsh kakwok’dj atieem’s mbwoon ikaam imukwiik a shin a nsheet aal’k a shin ilak mbi. Ek, bamwaak bamutshik a dik di meens, ikaam i mbè bât besaying’l bamon baph’l. 34 Diish diaa diin mbwoon a latok laa: mbè diish diaa diaal busek; latok laa lakim lek a mwaany, ek mbè diish diaa diaal i bwaal; ngwoon latok laa lakim lek a mwim’l. 35 Ek ngwoon, aal’i bwaany ikaam i mbè mwaany mwaa kamuphil’k mwim’l mbi. 36 Mbè latok laa lakim laal a mwaany, mbè kwa iteny imotsh yil’a mwim’l mbi, ngwoon, lel’kaal lakim a ndieeng a mwaany, mbok mintshiin esaal mbwoon imangaam’s."

37 Itaang imaans’dj Yish mbok atwoot, mufal’s motsh kambokaan mbel a bol bwaan ikaam idiayaan. Yish kieenaan, katwoosaan a meens ikaam idia. 38 Mufal’s kakam’laan ikaam i mbè Yish kambaak awok maas a mio a bos budia mbi. 39 Kum Yish kanwosaan ane: "Lieen mbokebwiin, bwiin bafal’s: busakut’l mbis buseph bu ikoph baan iloong, ek a ngat ayin, bubabayool to i bweem baan’i isoph. 40 Bwiin bât baaph i bwaany! Ntshièm amwaang mbis buseph, kawaang’dj kamotsh ngate? 41 Yeekanyeeny ben a ntaan biket bil a ngat makoph i maloong miin, ambis akun bikim bikaal baph’l idik diin.

42 ✝ "Ek, iteem key ibey bwiin bafal’s, ikaami mbè busayeek Ntshièm iteny ishieeng i iket imotsh i kas i maphidj; akol kas yeek’dj i sol idia kamotsh, ek kabuwaak phiim bulodj akol imuk i Ntshièm: biin binaph bwiin akel, kubulieem’l bi binshaal mbi.

43 "Iteem key ibey bwiin baphal’s, bwamuk ashim’k a maphaat ma bukum a shinangoong, kamotsh busamuk mbè babuwuum’l a mandiy makim ma bol. 44 Iteem key ibey bwiin bafal’s! Bwe muna biaan bi midju biaaph mbè kabisasol, bât kabes bimon mbi, bamanyak mateem."

45 Motsh aphiing bayeeph mikieetsh katwotaan ane: "Ntang’dj, esween atwoot ngwoos, us’katatwoon i biite!"

46 Yish kankalaan ane: "Iteem key ibey bwiin bayeeph mikieetsh! Busanyeeng madit’l a tok i bât ikaam ishieetsh, ek kabusanying nyieem mbè mu motsh ikaam ibayaas mbi. 47 Iteemiin ibey key bwiin bafal’s! Busaphik biaan bisek ikaam i bangaang badiaak’dj baan abol bamaamiin. 48 Ngwoon busalak bikelel bi bamamiin, ikaam i mbè bamadiaak bangaang bes’bwiin aphik’s biaan! 49 Ntshiin Ntshièm, a bwaany bwaan, esashaang’l ane: ‘Ndabutokabutom’s bangaang baan’i bieentsh; badiakadiaak ibiek’dj aphiing a baan, kamotsh baphekaphetsh ibiek’dj.’ 50 Ek ngwoon, bât ba nkil muku bashakashaal i budit’l bu iwa idiak’dj baan bangaang bakim to itaang iwaang’dj baan nkwootsh, 51 ✝to makel ma Abel suk iwa ibol Sakaliy, adiaak’dj baan aphaang imbet ilièm’s ilaam baan’i indiy i ikin. Ikakaam, ndes’bushaak’s mbè ane, nkil muku, mul’kashieetsh maphetsh ma iwa iku i bât bakim!

52 "Iteemiin ibey key bwiin bayeeph mikieetsh! Bwatey laphuung’dj lesadiph’l ikwiik i buyeeph, bwinamieet kabusaying’l mbi, bunkasaphetsh ba bedi nyiing aying’l!"

53 Itaang intow Yish to mbûl akun abol mufal’s, bayeeph mikieetsh baan’i bafal’s katetsh baan amwok’s kaph, biemuudj mwooy mabwiik, 54 Bambaak besankieek ikaam i mbè bamon dweey di ngaat idiin.