1 Yish kalwoosaan bieentsh baan ane: "Mun budiy amabaak i mbèk biket biaan, kiy baan inwoos ane, mwoot akun esabuutsh biket biaa, 2 ntshiin, kumaan kambokaan mbel, esamuul ane: ‘Mwooy mes’miim awok besatwoot a dik diaa? Ndek mbok asween asuk biket, ikaam i mbè kulakas asuk biket bieem mbi.’ 3 Mbèk biket kadiwuusaan ane: ‘Kumieem el’kantaam’l ngun mweem. Nakwok’dj akel mbony? Abuun’l shin mbè, abieetsh ngwoon mbè, alwoom bât biket mbè, kandelayeedj mbi. 4 Mayee! Ndesayeeph mbokel miim akel! Mbè nadiim’s imbetieem, bi busek mbè bât bantshekantshey abol baan!"

5 "Katetshaan abok mun mwoot nkim mbel, bakim bambaak i mbat ikom abol kum. Kawuulaan mwoot bukoos ane: ‘Wedi mbat a mbadj key ikom abol kumieem?’ 6 Kankal’laan ane: ‘Nedi mbat a mbieen i sedj a oliiv kam iphey,’ mbèk biket kanwoosaan ane: ‘Lieen bwiik bu mbat iween iyin; twoos a shin bwaas, phuun kam.’ 7 Kawuulaan mwoot ampieen ane: ‘Ween udi mbat a mbadj keye?’ Kankal’laan ane: ‘Nedi mbat a bibweem bi shaang lasen’l lamotsh.’ Mbèk biket kanwoosaan ane: ‘Lieen bwiik bu mbat iween iyin,’ ‘phuun kam inaan.’"

8 "Iphontshi, kum kakasaan mbèk a manyaang lakeeng ikaam i manyaang maan. Bât ba shin itaang iku, bedi manyaang mabwiik a ntwoong’l a baan akol ibiek’dj, kaba mbok mintshiin i bân ba mwaany mbi."

9 Ek miim ndes’bulwoos ane: "Aal anyeeny bukidj i ben budiy bu shin itaang iku, ikaam i mbè a itaang yil’buun ashil, bek bunyey a mambûl ma baan yoyoo. 10 Mwoot aku nkim edi imuk a biket bikieek, edi imuk kamotsh a biket binen; ek mwoot aaph mbè keyi imuk a biket bikieek, kaaph i kamotsh i imuk a biket binen mbi. 11 Mbè bwaal mbè kabumbaak ayeeph mbok atwoong i budiy bu makuus bu shin, nyeeny akwook’dj buyeek budiy bukwokwook? 12 Mbè kabumbaak ayeeph mbok atwoong i budiy bukan, nyeeny akwook’dj buyeek bi bisaal ibiin?

13 ✝"Kwa muna ngun mbè motsh akwook’dj akes bakum iphey ngun mbi; ikaam, abakabak’t motsh ambel iyeek’dj. Kabukwok’dj akes phas baan’i Ntshièm ngun mbi."

14 Baphal’s bambaak amuk phas, amwook baan mwooy makun katetsh baan mbok asey Yish. 15 Yish kabalwoosaan ane: "Bwiin, bât bes’ditol muna bât basek a miish ma bât, ek Ntshièm esayeeph mitem miin. Ikaam’i mbè bis’baan amon mun bi binen, kabiaaph i ngaang a miish ma Ntshièm mbi.

16 ✝"A itaang i mikieetsh mi Moos akol mikaan mi bangaang ba Ntshièm mimashaal suka nkil mu Yoon Mubatiis. To itaang iku mikim, lashaang lasek la bunyim bu Ntshièm bamalashaang’l a bât, mwoot aku nkim ambaak esanaan ikaam iying’l a bunyim bu Ntshièm. 17 ✝Ek, bi bwool ikaam i mbè dik baan’i shin binshaam, ek kwa dweey mbè dimotsh di nkieetsh mu Moos diladiim mbi.

18 ✝"Nuung aku nkim esabel mwaam’shaan ankas atweem yeek’dj, asawoodj shaas, kamotsh nuung esatweem ngaat abieeng abol nwimiaan esawoodj shaas iyaan.

19 "Ambabaak ndiy a phas ambaak andiing mindel mi ngaang abwiik, kamotsh ambaak antwoos a mandiy ma ngaang matu makim, andia biliees bi ngaang. 20 Muna ntaan ambaak ambet abos bu mbûlaan diin diaan ambaak Lasalo. Latok laan lambaak layool i phot ibwiik. 21 Lasalo ambaak i nyiing adia biket bimbaak abwaak a meens ma ndiy. Kamotsh mboswoong imbaak imwiy alieeng photiaan.

22 "Lasu liek’dj, muna ntaan kawawaan, bantshol kanaat baan akol Abalapham. Ndiy aku kawawaan, kaney baan. 23 Ek kamonaan imweeny a katey ka yoyoo; ankat’laan miish kamonaan Abalapham baan’i Lasalo akolaan. 24 Ngwoon ndiy a phas kabokaan dweey: ‘Taat Abalapham, mpwook’s mweeng! Tom lasalo, anwim sos a nyeem mwaan a maas ikaam inkitsh inem, ikaam ndesamon imweeny a tey tuku!’

25 "Ek Abalapham kankal’laan ane: ‘Mwânieem, yiph’l mbokambaakween i budiy bubwiik a nkwootsh, ek itaang ikun Lasalo ambaak i maphetsh mabwiik. Ek alwool aku, edi nshaas ayè ngo, ek ween wamon imweeny inoon’l. 26 Kamotsh, aphaang a biitiaa, e ibèk itadj; ngwoon, ba besamukieen to wony bos a ndwoon aal’k to ndwoon bos a wony, kabakwook’dj ashaam a ibèk iku mbi.’ 27 Mun budiy kanwoosaan ane: ‘Taat, ndes’kawoong, tom lasalo a mbul a taat, 28 ndedi bân ba meey bataan, lasalo abalwoos ikaam i mbè kabiik ibaan a imbet iku imaphetsh mbi.’

29 "Ek Abalapham kankal’laan ane: ‘Bân ba nyo bedi Moos baan’i bangaang ba ntshièm, babawoom’k.’ 30 Muna budiy kanwoosaan ane: ‘Mbi taat Abalapham, kabisayeem’l mbi. Ek mbè mwoot motsh abuum to ilweem, bel’kakal’l mitem mibaan.’ 31 Ek Abalapham kanwoosaan ane: ‘Mbè bananyo kabamuk’dj awoom’k Moos baan’i bangaang ba ntshièm aal’k mbè mwoot abuum to ilweem kabel amwoom’k mbi.’"