1 Ntshiees butu a lasu labiing, baat kieen baan a yaan, bielaatsh mananaans ma sol minoon’l mambaak baan balodj. 2 Antwool baan, katobaan ataan mbôk imbaak yadiph adik di yaan bamibum’dj a nkol, 3 ayiing’l baan a ngat a yaan, kabamon latok la Yish mbi. 4 Antetsh baan adiwuus banamieet, itaang intshiin kashis baan baluung baphey bading mindel misababadj bayeem a nkol. 5 Bambaak i butet a mitem, bos baphum’l a shin. Kabalwoos baan ane: "Busaswoot mwoot edi mwoony aphiing midju idik di yey? 6 ✝Kaaph ayè mbi, amabuum. Yiiph’lanyeeny mbok ambaakaan abulwoos a Ngaleel ane: 7 ‘Bi busek Mwân a Mwoot banièm’l a mio mi bakedj ba mwooy mabey, bamambak a ntey mu kek, ambuum lasu lanseet.’"

8 Baat kayiiph’l baan mwooy matwotsh’diaan, 9 katow baan to yaan kieen baan yelwoos bieentsh ishieeng imotsh akol bât biek’dj. 10 Ambaak Maliy ma Magadala, Yaan akol Maliy, inaan abol Shaak. Baat biek’dj bambaak i baan, kieen baan yelwoos batom biek’dj. 11 Ek bieentsh kaphis baan ane, mwooy mambaak atwoot baat, ambaak makuus; kamotsh kabalwoong mbi. 12 Ngwoon, Petelo kakataan mbaang bos a yaan. Ampum’laan a yaan kamonaan bishaan binameet. Kakalaan a bol bwaan esiekam’dj ikaam i mwooy makun.

13 Lasu lakun lantshiin, bieentsh baphey bambaakienyeentsh bos a Emawus, bol bumbaak akolakol mateem ishieeng imotsh ma lieen bos a Yelushaleem, 14 bambaak besietwootsh mpween mu baan idik di mwooy makeph’dj baan. 15 Itaang imbaak baan yetwootsh mwooy makun, kamotsh biebok keny, Yish anamieet kasem’saan akol a baan, kieenaan i baan; 16 bambaak besamon, ek miish mabaan kamambaak atieeng’l ikaam inyeeph mbi. 17 Yish kabawuulaan ane: "Busatwoot dweey key a ndieeng a lieen?"

Kayeem’t baan iphwa i buphol bubwiik. 18 Motsh aphiing a baan, a diin di Keleofas, kamuulaan ane: "U weenamieet a Yelushalem aaph mbè kesayeeph mwooy mankeph’t matu makuwe?"

19 Yish kabawuulaan ane: "Dweey key?" Kankal’l baan ane:

"Kusayeeph mwooy mankeph’s Yish mun a Nazaleet," "Ambaak ngaang a Ntshièm anoon’l; amabilak a bikelel baan’i mwooy maan a bos bu Ntshièm akol a bos bu bât bakim. 20 Bakum ba batwootsh biit baan’i bandwoong nsel bamanièm’l ikaam indiaak, bamambak a ntey mu kek. 21 Tambaak tesabok lakeny mbè ntshaan anaph’dj aphaans Isaleel. Ek alwool aku lasu lanseet to taan ankeph’t mwooy maku. 22 Kamotsh baat bakieek ba phingiit bamatabaans mitem. Bambaak bayeen a ntshees butu bos a yaan, 23 ek kabatotaan ndju mwaan mbi. Amwiy baan ikadj katalwoos baan ane bantshol bamasos, bamabalwoos ane Yish edi mwoony. 24 Bakieek aphiingiit amween baan bos a yaan, bamatotaan mbok amabalwoos baat bakun, ek kabamon Yish mbi."

25 Ngwoon Yish kabalwoosaan ane: "Bu bât baaph i lakeny, mitem miin mi bwool ikaam iyim’s mwooy ma mabulwoos bangaang ba Ntshièm! 26 Kabusayeeph mbè Kilist edi dweey dimon bimweeny biku a bukoos buying’l a buum bwaane?" 27 Katetshaan balwoos mwooy makim mbok mintshiin aphuun’dj baan a nkaan mu Ntshièm, atetsh to mikaan mi Moos suk mikaan mikim mi bangaang ba Ntshièm.

28 Antwool baan akol bol bumbaak baan yeleph, Yish kakelaan muna mwoot akun ambaak esieyeentsh lieen laan; 29 ek kabamuk anieem’l ikaamieen mbi. Kanwoos baan ane: "Shaaliit, ikaam i mbè butu bwanyikayiil." Kayiing’laan ikaam ishaal i baan. 30 Itaang intwoosaan a meens ikaam idia i baan, katolaan diaamp, kalwoomaan Ntshièm esanshaak’s, ambis akun kadibat’laan, kabakaph’saan. 31 Miish ma baan katieeng’l maan, kanyeeph baan; ek kadiimaan a miish ma baan. 32 Katetsh baan mbok diwuus banamieet ane: "Mitem miit kamimbak’dj muna misatieem tey ambakaan talwoos dweey di Ntshièm a ndieeng a mboke?"

33 Kakat baan itaang ikun intshiin, kieen baan bos a Yelushaleem. Katobaan ataan bieentsh ishieeng i motsh bakwoom’k a imbet imotsh i bieentsh biek’dj 34 kabalwoos baan ane: "Ikakaam, Kum amabuum to iwa! Simoon amamon!"

35 A mbis akun bieentsh bakun baphey katetsh baan ababos ntshik mu mwooy mamwoony baan a ndieeng a mbok, kamotsh mbok ayeeph’dj baan Yish itaang imbakaan esabat’l diaamp.

36 Ambaak baan atwoot kamotsh, Yish anamieet kasolaan aphiing a baan es’balwoos ane: "Nkit’l mwaaliin!"

37 Mitem mibaan kabaantsh miin, kawok baan butet bubwiik, ikaam i mbè bambaak besaphis ane bamon ndju. 38 Ek aan kabalwosaan ane: "Busakam’l idik di yey? Busabok miaang mi yey a mitem miin? 39 Lieenanyeeny makas mieem akol mateem mieem: ke miime! Mpwaam’dj anyeeny, ndieentsh anyeeny! Ikaam’i mbè mween kamumwaak i latok akol ikodj mbi; ek miim ndedi biin mbok es’bwiin ambon."

40 Ambaakaan atwoot mwooy makun, ambaak es’balak makas maan i mateem maan. 41 Idim imbaak baan abel ayim’s, bambabaak i nshaas mubwiik, besakam’l, kabawuulaan ane: "Budi iket idia ayè?" 42 Kamweek baan iteny i swey yawuuph, 43 kayitolaan, kayidiawaan a miish mabaan.

44 A mbis akun kabalwosaan ane: "Namabulwoos ambaak miim aphiingiin, lienanyeeny mbok ambaak miim nabulwoos mwooy mampuuny’dj baan a mikieetsh mi Moos idik dieem, a mikaan mi bangaang ba Ntshièm akol Bantshieem, bikun bikim bidi dweey diyeem’l."

45 Ngwoon, kanephaan badiph’l lakeny ikaam i mbè bawok bimpuunydj baan a mikaan mi ikin, 46 kabalwosaan ane: "Lienanyeeny mbok ampuuny’dj baan: Kilist amokamon bimweeny, bamandiaak, ambuum to iwa lasu lanseet, 47 bashakashaang’l diin diaan a bos bu bât bakim ba shin a maan, atetsh to Yelushalem, ikaam ilwoos mwoot aku nkim mbè akal’l ntem, bamwook’s mweeng mu bweph bwaan. 48 Bu bitieen bât ba mwooy maku makim. 49 ✝Ndel’k abutom’s bimbaak Taatiem akeliin ilak. Ek bwiin shaalanyeeny a bol bu Yelushaleem shaang el’bwiin ayool tô i bunoon’l bu to dik."

50 ✝Itaang intwool baan akolakol i Betaniy, andaan kashieen’laan mio miaan a dik kabashaak’saan. 51 Itaang ikun imbakaan bashaak’s, kanamaan i baan yebaany bos a dik. 52 Ek baan, aman baan ansem’l, kakal baan bos a Yelushaleem, i nshaas mubwiik a mitem, 53 itaang iku ikim bambaak a Ntuum mu Ntshièm ikaam isem’l kamotsh ashaak’s Ntshièm.