1 Yish kakwekaan bieentsh isheeng baphey, kabayekaan bonon’l akol bukum bu bieeng mieen mikim mibey kamotsh ikaam ibow maal. 2 Kabatomaan ikaam ishaang’l lashaang lasek la bunyim bu Ntshièm kamotsh bambo maal, 3 ✝kabalwoosaan ane: "Kabutol’k iket mbè imotsh ikaam i lieen mbi: aal’k mbè phaang, mbè saph, mbè diaamp, mbè phalaang mbi, kabwaal’k i nguum iphey mbi. 4 Imbet ikim yil’baan abunyey, twoosanyeeny a mbûl akun mintshiin suk el’bwiin atow a imbet ikun; 5 imbet ikim yil’baan abel mbok bunyey, butow anyeeny a bol bukun, bukumanyeeny muus mu mateem miin, elaal muna ying’t ikaam i maphetsh mabaan."

6 Bieentsh kieen baan a mal makim, bieshaang’l nswoos musek kamotsh biebow bambaak i maal a imbet ikim imbaak baan yesheem.

7 ✝Nguph’lanoph Helood a nuung mu Ngaleel amwookaan nswoos mukun, lakeny kanèl luun, ikaam i mbè ibiek’dj bambaak besatwoot ane Yoon Mubatiis amabuum to iwa. 8 Ibiek’dj bambaak besatwoot ane Eliy ntshaan ansol, ibiek’dj kamotsh ane motsh aphiing bangaang ba kaany amabuum to iwa. 9 Ek Helood katwootaan ane: "Miim namaabat’l Yoon ntshwey. Iphontshi, nyeeny esakel mwooy makus mes’miim awok?" Katetshaan aswoot mbokamon Yish.

10 Bantom ishieeng baphey amwiy baan ikadj, katetsh baan abos Yish ntshik mu mwooy makim mambaak baan bakel. Yish kabalaataan a yik’l akolakol i nuung mu Betsayid. 11 Twoong a bât amwokiin, kanaph baan. Yish kabanyeyaan, kabalwosaan dweey di Bunyim bu Ntshièm, kamotsh kabowaan ba bambaak i nyiing ibow.

12 A mataang ma ikwok’l, bieentsh ishieeng baphey kasem’s baan akol a Yish besanwoos ane: "Tom bât baku bakim, ikaam bieen a mangaan i mandiy mel akolakol ikaam iswoot imbet itwoos akol bi bidia, ikaam tel a imbet yaaph bât."

13 Ek Yish kabalwoosaan ane: "Bayeekanyeeny bwinamieet biket bidia!"

Kankal’l baan ane: "Tedi i maamp mataan akol swey iphey bukal. Walwoong mbè ane tieswoom bi bidia ikaam i bât bakime?" 14 (Imbabaak andaan, baluung phot sen’l itaan.)

Yish kalwoosaan bieentsh baan ane: "Bashikanyeeny a makweek ma bât masataan masataan."

15 Bieentsh baan kakel baan ngwoon, i bât kashim’k baan, 16 Yish katolaan maamp makun mataan akol swey iphey kasheen’laan miish a dik, kakasaan lakeeng abol Ntshièm. Ngwoon, kabishik’laan biteny, kayeekaan bieentsh baan ikaam ikaph’s twoong a bât. 17 Mwoot nkim kadiawaan phot a ntshaliaan. Bieentsh kakweek’baan bishaas bi maamp a makwoom ishieeng maphey bimbaak biashaal.

18 Lasu liek’dj, Yish ambaak esalwoom Ntshièm anamieet a isek i bieentsh baan. Kabawuulaan ane: "Bât besatwoot mbony idik dieem?"

19 ✝Kankal’l baan ane: "Ibiek’dj besatwoot ane: "U Yoon Mubatiis", ba bamotsh ane: "U Eliy, babamotsh kamotsh ane u motsh a ndieeng bangaang ba kaany ambuum." 20 ✝ Yish kabawuulaan ane: "I bwiin akey busatwoot ane nde nyeeny?"

Petelo kankal’laan ane: "Ween u Kilist abol Nsthièm."

21 Yish kabakinyaan bieentsh baan angon ane, kabulwoos’k mwoot mbi. 22 A mbis akun, katwootaan kamotsh ane: "Mwân a Mwoot amokamon bimweeny bibwiik, bakom’l, batwootsh banen akol bayeeph mikieetsh bambekambel; bandiakandiaak, ek lasu lanseet abukabuum to iwa."

23 ✝A mbis akun kalwoosaan bât bakim ane: "Tak mwoot edi nyiing andaph, adiwaphiim anamieet, asheetsh ntey mu kek lasu laku lakim indeph. 24 ✝ Ikaam i mbè, mwoot aku nkim esamuk aphaans mwoony mwaan el’ka mudim’s, ek mwoot akun esamuk adim’s mwoony mwaan idik dieem, el’kamuphaans. 25 Bilayaas mwoot ka yey mbè ayeem’l anamieet a nkwootsh muku, ek aneph adim’s mwoony mu yoyoo, bil angaas ka yey? 26 Mbè mwoot ampwook busony i mwooy mieem, Mwân a Mwoot amwokamwook busony, itaang ilanyiy a buum bwaan, akol buum bu Ishanaan aal’k bu bantshol ba ikin. 27 Ikakaam ndes’bulwoos, bakieek bel aphiingiin ayè, kabelawa a bos bu mbè kabamwoony bunyim bu Ntshièm mbi."

28 ✝A mbis matu inaan mbè Yish aman atwoot ngwoon, katolaan Petelo, Yoon akol Shaak, kieenaan ibaan a nkwootsh ikaam ilwoom Ntshièm. 29 Itaang isaanalwoom Ntshièm, bos bwaan kakaph’dj buun, i mindel miaan kangaamiin yeem misababadj. 30 Itaang intshiin, bât baphey katetsh baan atwoot i Yish andaan. Bât baku ambaak Moos akol Eliy, 31 Bambaak basol a buum. Katetsh baan atwoot i Yish ikaam i lieen akol mwooy manaph’dj ankeph’s a Yelushalem, ikaam iyeedj mwooy maphuun’dj baan idik diaan. 32 Petelo akol bambèy baan kabet baan ntweeng munoon’l; ek amuum baan, kamon baan buum bu Yish akol bât baphey bambaakiaan. 33 Itaang imbaak bât baku banam’s i Yish, Petelo kalwosaan Yish ane: "Ntang’dj, bibusek mbè taal ayè! Taphik mituum miset; motsh imwaa, motsh mubol Moos, imweek’dj mubol Eliy." (Ek Petelo kambaak esayeeph bimbaakaan atwoot mbi.)

34 Itaang ibaakaan atwoot ngwoon, isheem kasoliin, kabadiphiin. Bieentsh kawok baan butet amwoony baan mbok ambaak isheem ikun yabadiph. 35 ✝Dweey katow diin a isheem ane: "Aku Mwânieem ansol miim. Mwoom’k anyeeny!"

36 Amwok baan dweey diku, kamon baan Yish anamieet. Bieentsh kashaal baan phol, a matu makun kabalwoos mwoot mbè motsh dweey dimwoony baan mbi.

37 Lasu lakun lamotsh, Yish akol bieentsh baset kakum baan to nkwootsh. Twoong a bât kiyiin imoons i Yish. 38 Aphiing a bât andwoon mwoot kabolaan nwool ane, "Ntaang’dj, ndes’kawoong ikaam i mbè uyaas mwânieem a nuung ntshiin motsh! 39 Mween mubey kangaat muun, itaang intshiin kabolaan nwool, mumanyiing angon, antey laphul a muny; mumampetsh, kamusanieem’l bwaas mbi! 40 Namalwoom bieentsh baa ikaam ibieeng mween muku, ek kabayeedj mbi. 41 Yish katwootaan ane: "Bwiin bu bât ba nkil muku mubey baaph i yim’s! Suk itaang key yil miin ashaaliin? Mataang mbadj key kamotsh mel miim atol budit’l bwiin? Yalaatsh mwânaa ayè."

42 Itaang insem’s mwân akol Yish, mween mumakas ambwees a shin kamotsh kanyiing muun angon. Ek Yish kaphaang’saan mween mubey, kabowaan mwân, kamwekaan ishanaan. 43 Bakim kakam’l baan bunoon’l bu Nthièm.

Mbok aku mbè mwoot nkim ambakakam’l mwooy mambaak Yish akel, ek aan kalwoosaan bieentsh baan ane: 44 "Bakanyeeny busek mwooy mes’miim bulwoos iphontshi ane: "Mwân a Mwoot bekanièm’l a mio mi bât." 45 Ek baan kambabaakawok mbok ambakaan balwoos mbi, dweey diku dimbaak diakaan a mpwok’l a baan, kamotsh bambaak i butet bumuul dweey dikun.

46 ✝Bieentsh baan katetsh baan adiwuus banamieet ane, ikaam iyeeph ane nyeeny anek bakim aphiing a baan. 47 Yish kayephaan lakeny labaan. Katolaan mwân, kantshikaan akolaan, 48 ✝A mbis akun Yish kabalwosaan ane: "Mwoot elanyey mwân aku i imuk a diin dieem, amantshey miim, mwoot elantshey miim, anyey wey amantom. Ikaam’i mbè, mwa ilieeng aphiingiin bakim, ntshaan nuung anen."

49 Yoon kalwoosaan Yish ane: "Ntaang’dj tamamon mwoot esabieeng mieen mibey a diin diaa, tamanaph ankiny, ikaam i mbè kaaph a ikweekiit mbi."

50 Ek Yish kankal’laan ane: "Kabunkiny’k mbi, ikaam i mbè mwoot mbè kaaphiin i bushaang’dj, ek a yaashiin."

51 Itaang anaph’dj abaan Yish a dik antwoliin akolakol. Kabokaan lakeny lieen bos a Yelushalem. 52 Katomaan ben mikieetsh a bos bwaan. Ben mikieetsh katieel baan, kayiing’l baan a bol bu motsh bu Samaliy ikaam inos indiy ibet. 53 Ek bena bol kabel baan mbok anyey ikaam ambaak esieyeentsh bos a Yelushalem. 54 ✝Ek itaang inyeeph bieentsh baan ngwoos, Yoon i Shaak, kalwoos baan Yish ane: "Kum, wamuk mbè ane tatom dweey katey kakum to dik kabatuum nkim mubaane?"

55 Ek Yish kakaph’diaan bos a baan, kabaphaang’saan. 56 Iphontshi Yish i bieentsh kieen baan bos a bol bweek’dj.

57 Ambaak baan a mbok, mwoot kiyaan ilwoos Yish ane: "Ndalakalaph imbet ikim ilwenieen." 58 Yish kankal’laan ane: "Mingieeng midi mabweel mamiin, i phul i dik idi mayaantsh mayiin, ek Mwân a Mwoot kaaph i indiy itwoos mbi."

59 Kalwoosaan mwoot yeek’dj ane: "Iya windeph."

Ek mwoot akun kankal’laan ane: "Kum, nkwoong namanieley taat."

60 Yish kankal’laan ane: "Lieem’l midju midiley minamieet; ek ween yaak weshaang’l lashaang la bunyim bu Ntshièm."

61 ✝Mwoot yek’dj katwotaan ane: "Kum, nalakalaph, ek yim’s mbè ane ndieles’l i ilwootsheem."

62 Yish kanwosaan ane: "Mwoot esatetsh abuun’l shin, ankas alieen kamotsh a mbis, kaaph i ngaang mbè mimotsh a Bunyim bu Ntshièm mbi."