1 ✝A itaang ikun, makweek ma bât babwiik mambaak mayol a indiy imotsh besadinyak’s a mateem. Yish katetshaan alwoos bieentsh baan ane: "Buyeeph anyeeny, kabuyim’skanyeeny lweven la Baphal’s lusaphil lanyaany. 2 ✝Kwa iket yaswaam yaaph mbè kayilatow a baph’l mbi, aal’k iku ikim il a busweem bayekayeeph. 3 Ntshiin mbè, iku ikim is’bwiin atwoot a mwim’l bel’ka iwok a baph’l, kamotsh iku ikim is’bwiin aluung’s a i to a ngat a mbok ilak, bel’ka itwoot a ngon a ibaantsh.

4 "Ndes’bulwoos, bwiin bakidj bieem: kabutshiin’k bisadiaak latok mbi, ambis akun, kabisakel dweey mbè dimotsh mbi. 5 Ek ndek bulak wey mbè bukwook’dj atshiin: tshiin anyeeny mwoot edi bukum budiaak kamotsh buphul a imbet imaphetsh ma yoyoo. Ikakaam, ndes’bulwoos mbè, ntshaan mbè butshiin!

6 "Kabakwook’dj akaph mashaphodj mataan a dik di phas ipheye? Buyeeph anyeeny, Ntshièm kesawa iket mbè imotsh phiim mbi. 7 Aal’k phu i ntshwey mwaa iyabal ikim. Kabutshiin’k mbi: budi ngaang yalek mashaphodj mabwiik!

8 Ndes’bulwoos ane: "Mwoot aku nkim elatieen diin dieem aphiing a bât, Mwân a Mwoot antiekantieen a bos bu bantshol ba Ntshièm. 9 Ek mbè mwoot anton a bos bu bât ane, kesantsheeph, Mwân a Mwoot antokanton iyaan a bos bu bantshol ba Ntshièm.

10 ✝ "Wey aku nkim esatwoot bweph bos a Mwân a Mwoot bamwokamwook’s mweeng; ek wey akun esatwoon Mween Musek kabel a mwook’s mweeng mbi.

11 ✝ "Itaang yil’baan abulaat a bos bu bât ikaam ibulum’s a shinangoong, aal’k a bos bu bayeeph ba mikieetsh baan’i bakum banen, kabwaal’k i butet ikaam iswoot mwooy mel’bwiin aluum’l mbi, aal’k mwooy mel bwiin atwoot mbi. 12 Ikaam Mween Musek mul’kabulwoong’s itaang ikun intshiin mbok el’bwiin atwoot."

13 Mwoot aphiing twoong a bât kalwoosaan Yish ane: "Ntaang’dj, lwoos mwânameey takaph’shaan budiy bwiit bu lakit butaswoos’dj taatiit."

14 Yish kankal’laan ane: "Mbèyeem, nyeeny amantshik muna kom’liin ikaam ishaam’l malaang miin, aal’k ikaam ikaph’s budiy bwiin?" 15 A mbis akun, kalwoosaan bakim ane: "Buyeeph! Bwaalanyeeny i bwaany a bos bu budiy, ikaam i mbè mwoot kaaph i mwoony a dik di budiy mbi, aal’k mbè aal ndiy anen."

16 Yish kababok’saan kamotsh nkwoon ane: "Ndiy yeek’dj ambaak i ngwoon, imbaak isatwoos biket bibwiik bisek. 17 Kabokaan lakeny es’diwuus anamieet ane: ‘Kanday i imbet ikweek biket bieem biku bikim mbi. Ndel akel mbony? 18 Katwootaan kamotsh ane, lieenanyeeny mbokel’miim akel: ‘Ndel abwoong’l madik mieem makim, ndel aphik madik malek mango bunen, nanyoos shaang akol biket bieek’dj. 19 A mbis akun, naneph dilwoos minamieet ane: ntem mweem, udi biket bibwiik ikaam mitshi mibwiik; kit a shin, dia, nyo kamotsh aal i nshaas a nkwootsh!’

20 Ek Ntshièm kanwoosaan ane: "Yeeny ibey! Butu bulwool bel’kalwoom mwoony mwaa. Ngwoon, biket biaa bishaal inyeeny?’"

21 Yish kamomaan ane: "Ntshiin mom mu mwoot edi budiy bubwiik bu anamieet, ek a miish ma Ntshièm kaaph i budiy mbi."

22 A mbis akun, Yish kalwoosaan bieentsh baan ane: "Ntshiin es’miim abulwoos mbè: kabusuum’s lakeny idik di mwoony mwiin ikaam i biket bidia, aal’k idik di latok liin ikaam i mindel midiing mbi. 23 Ikaam mbè mwoony mudi ngaang mwalek biket bidia, kamotsh latok ledi ngaang lalek mindel midiing. 24 Lienanyeeny mayophaang: kamesawoon iket idia, kamesatwoos iket mbi, kamaaph i budik mbi, aal’k indiy ishwey iket mbi. Ek Nsthièm esamadiees! Bwiin budi ngaang yalek phul! 25 Nyeeny a ndieengiin a maphetsh maan akol mwooy manoon’l, akwook’dj amanyeeng matu mieek’dj a mwoony mwaan ikaam i lakeny lesaan abok? 26 Mbè kabwaaph i bwaany bukel iket ikieek, busasuum’s lakeny idik di matu maku manshaal ikaam i yey? 27 ✝Lieen anyeeny mbok esamen bisam bi mangwoon: kabisakel ngun mbi, kabisatwoong mindel mbi. Ek, ndesabushaak’s mbè aal’k kum Solomoon i budiy bwaan bukim bumbakaan i buun, kadiing mindel misek mun isam mbè imotsh mbi. 28 Ngwoon, mbè Ntshièm esadiing itieet ngo, isaal akat a ngwoon alwool, a phieen bamayituum tey, akwook’dj anyieens abuding mbony, bu bât ba yim’s ikieek!

29 "Kabusuum’s lakeny idik di iket idia baan’i iket inyo mbi. 30 (Ikaam i mbè bakedj a mwooy mabey ba nkwootsh muku baan besabok lakeny ngwoon matu makim.) Ek bwiin, Ishiin esayeeph mbè budi nyiing a biin. 31 Ek swotanyeeny a bukoos bunyim bu Ntshièm, biku bimotsh bis’bwiin aswoot, Ntshièm el’kabuyeek i biin.

32 "Kwal’k i butet mbi, ween twoong a phaang mikieek! Ikaam mbè Ishiin alwoong mbok buyeek Bunyim bu dik. 33 Kaphanyeeny biket biin, buyekanyeeny ben ntaan phas ikun. Aalanyeeny i phas yaaph mbè kayisawoontsh mbi, kwekanyeeny madiy a dik maaph mbè kamanshil’k mbi, bieem kabakwok’dj asem’s akol a maan, aal’k sen’l kayikwok’dj idia mbi. 34 Ikaam’i mbè, imbet ikun i budiy bwaa, ntshiin imbet i ntem mwaa kamotsh.

35 ✝ "Diinganyeeny mindel mi ngun, bwaal akolakol i mbwoon yatieem, 36 ✝ aalanyeeny muna ben a ngun besakwoong’l ntang’dj mubaan suk itaang ilaanikadj to bulaatsh, ikaam indiph’s ikwiik a itaang ilaan atwool. 37 Bwees bwaal i ben a ngun bakun bel’baan atotaan basweeng abol kum abaan, itaang ilaan atwool! Ikakaam ndes’bushak’s mbè: ayakayaas ben a ngun belaal akolakol itaang ilaan atwool, amabayeek indiy isek, ikaam bakes ngun. 38 Bwees bwaal abol ben a ngun bakun basweeng, mbè kum yikadj a ndieeng butu aal’k a ndekandek a butu, el’kato bataan basweeng! 39 ✝Busayeeph bwiinamieet, tshik mbè kum a mbûl es’kayeeph itaang iliy mweem, el’kashaal asweeng, kelaliem’l mweem ikaam mbè alus’l ibieen mbi. 40 Aalanyeeny busweeng i bwiin, ikaam mbè Mwân a Mwoot el’kiy muna mweem a itaang yaaph mbè kabusayeeph mbi."

41 Ngwoon Petelo kawuulaan Yish ane: "Nkwoon muku us’tabok’s biitamieet mbè mu mu bât bakime?"

42 Kum kankal’laan ane: "muna ngun a manyaang baan’i muna ngun a bwaany nyeeny? Wey akun es’baan asol abol kumaan ikaam ibak mbûlaan, amweek ibiek’dj iteny ibaan i bi bidia a bos bu itaang. 43 Bwees bwaal i muna ngun el’baan ato taan esakel ngun mwaan elikadj kumaan a bol bwaan! 44 Ikakaam ndes’kabushak’s ane: kumaan amwekamweek budit’l bu biket biaan bikim. 45 Ek mbè muna ngun atwoot ane: "Kumieem aman su ikaamiy, atetsh abol ben a ngun baku bamotsh, baluung i baat, andia, kamotsh anyo angwa maan, 46 ngwoon kum el’kiy lasu laaph mbè muna ngun kambak’dj ayeeph mbi, a itaang i mbè kasayeeph mbi; amambieeng kamotsh amamweek ikaph i ben a ngun baaph i mbak’tsh.

47 "Muna ngun esayeeph mbokesamuk kumaan, mbè kesakel mbokesalwoong kum, abokabodj mikaph mibwiik. 48 Ek, muna ngun akun aaph mbè kesayeeph mbok esamuk kumaan, ankel mbokaaph mbè kumaan kesalwoong mbi. Abokabodj mikaph mikieek. Balwokalwoom bibwiik abol wey amweek baan bibwiik, kamotsh babokabolwoom a ngon bibwiik abol wey amweek baan bibwiik bialek’s.

49 "Namwiy ikaam inem tey a shin a maan kamotsh ndesaswoot mbè, namon tey tanam’t! 50 ✝ Ek ndel’kaal i dweey ditaam’l, ek phweet mbadj key is’biin aman su ikaamiyeem’l! 51 Busabok lakeny ane ndiidj ilaatsh nkit’l a shin a maane? Mbi, ek namwiy ikaam ibunam’l. 52 Atetsh to lwool aku, mbûl a bât bataan yil’kabaantsh, bât baset kabelawok’s i baphey mbi, kamotsh baphey kabelawok’s i baset mbi. 53 ✝Taat kelawok’s i mwânaan a nuung kamotsh mwân a nuung kelawok’s i ishanaan mbi, inaan kelawok’s i mwânaan a ngaat, kamotsh mwân a ngaat kelawok’s i inanaan, bô kelawok’s i mwam’s a mwânaan a nuung, mwam’s a mwân a nuung kelawok’s i bô bwaan bu ngaat mbi."

54 Yish kalwosaan twoong a bât ane: "Es’bwiin amon isheem i mbul yakat to makit’l ma itaang, busatwoot itaang ikun intshiin ane, mbul el’kanow, bisakeph’t ngwoon. 55 Esaphuuph muung muto makit’l ma itaang, busatwoot ane, mwaany mu bunoon’l, bisakeph’t ngwoon. 56 Ben a lanyaany! Budi lakeny lawok mwooy ma dik baan’i ma ma shin; ngwoon, kabusawook mbokesashaam mwooy ma nkil mulwool idik di yey?

57 "Kabusaswoot bwinamieet mwooy makel idik di yey? 58 A itaang ilwenieen i nshaang’diaa a bos bu bakom’l, kel bwaany bu mbè buwok’siaan a mbok, mbè bukal nshaang’diaa el’kalaat a bos bu bakom’l, mwoot aku el’katshik a mio mi baphuluus, bamaphul a mwaat. 59 Ndesalwoos mbè ane kulatow to ndwoon mbè kulieedj mbat akun suk laphas lakieek mbi."