1 Yish, ayool tô i Mween Musek, ambaak esitwey to Yodan, mween mumanaat a imbet yaaph bât, 2 imbet inkieek’dj baan abol sak’tieem a phaang matu masa maney. Kambaakadia iket matu makun mbi, ambis matu makun, kawokaan ntshal.

3 Sak’tieem kanwoosaan ane: "Mbè u Mwân a Ntshièm, lwoos mbôk aku iphil diaamp."

4 ✝Yish kankal’laan ane: "Bamaphuun ane: ‘Mwoot kelaal i mwoony ikaam i diaamp mbi.’"

5 Sak’tieem amanaat a ngèl a dik, kanakaan makum makim ma shin a maan itaang intshiin. 6 Sak’tieem kanwosaan ane: "Nayekayeek bunoon’l buku bukim i buum bu makum maku." "Ikaam makum maku makim bamampieek imaan, nakwok’dj mayeek mwoot nkim es’miim amuk. 7 Ek mbè untuk, budiy buku bukim bulaal ibwaa."

8 ✝Yish kankal’laan ane: "Bamaphuun ane: ‘Tuk Kum Ntshièmaa, kamotsh nkes anamieet ngun!’"

9 Sak’tieem kanaataan suk a Yelushalem, kanshikaan a dik di ntwoon mu Ntuum, kanwosaan ane: "Mbè u Mwân a Ntshièm, dibok a shin, 10 ✝Ikaam i mbè bamaphuun ane: ‘Ntshièm atokatom bantshol baan idik diaa, ikaam ibak.’ 11 ✝Kamotsh ane: ‘Basukasuk a mio mibaan, ikaam i mbè iteemiaa kayibal’k a mbôk mbi.’"

12 ✝Yish kankal’laan ane: "Bamaphuun ane: ‘Kukwook’dj akieek Kum Ntshièmaa mbi.’"

13 A mbis mbè amaans mbok akieek Yish a mbok mikim, sak’tieem katowaan akolaan ikaam inkieek itaang yek’dj imotsh.

14 Yish kakalaan a Ngaleel i bunoon’l bu Mween Musek. Katetsh baan atwoot nswoos mwaan a minuung mikun mikim. 15 Yish katetshaan ashaang’l lashaang a mambûl mabaan makim ma Ntshièm mesbaan abok mbel ane shinangoong, bât bakim bambaak besasem’l dweey diaan.

16 Yish kieenaan a Nasalet, imbet imbaakaan anaang. Lasu lakit la ben a Yuud lesbaan abok Nsambel ane Nsabat kayiing’laan a shinangoong a mbok ambaak ikeleliaan. Kakataan ikaam ibal nkaan mu Ntshièm 17 kamweek baan nkaan mubol ngaang a Ntshièm Yeshay. Kamubot’laan kamonaan iteny i nkaan impuun baan ane:

18 ✝ "Mween mu Kum mul a dik dieem,

ikaam i mbè aan amaansol kamotsh ankol sediaan ikaam inkes ngun mwaan, kamotsh alwoos bena ntaan nswoos musek.

Aan amantom ikaam ishaang’l bât bel a mwaat

kamotsh ikaam i bât baaph i miish bamony;

Aphaans kamotsh bât bel akat maphetsh

19 ikaam ishaang’s bât lashaang la ntshi mu mbè ane

Kum, el’kalak mweeng mwaan."

20 Yish kadiphaan nkaan, kamuyeekaan muna ngun, kashim’kaan a shin. Bakim bambaak a mbûl a Ntshièm kanieen baan bakim miish, 21 katetshaan balwoos ane: "Alwool dweey diku diphuun’dj baan dimwok bwiin diayeem’l."

22 Bât bakim bamatwoot busek bu Yish, besakaml ikaam i mwooy ma mweeng matwoodj a muny mwaan, kadiwuus baan ane: "Ntshaan mwân abol Yosef, mbè?"

23 Yish katwootaan ane: "Dikwook, bumbokambok’s nkwoon ane: ‘Ween ngaangabuk, dibo weenamieet.’ Kamotsh bundwokandwool ane: ‘Tamawok mwooy makim mankelween a Kapeenum, yeedj mwooy makun makim a ndey, a bol bwiin. 24 ✝Kamotsh katwootaan ane: "Ikakaam, ndes’bulwoos ane, kwa ngaang a Ntshièm mbè motsh anyeedj baan a bol bu baan mbi.

25 ✝Kamotsh, ndes’bulwoos dikwook ane, ambabaak baat bel a bweel babwiik a Isaleel a itaang i Eliy, mbul kayimbaak anow andieeng mitshi miset akol ngwôn ishaam’l mbi, ntshaal ibwiik imaying’l a shin mikim. 26 ✝Ek kabatom Eliy abol ngaat a bweel aku nkim mbi, ek katomaan Eliy abol ngaat a bweel motsh ambaak ambis buseph bu Nazalet, a Salepta a shin a Sidoon. 27 ✝Ambabaak bena badj babwiik a Isaleel a itaang i ngaang a Ntshièm Elish; ek kayimbaak mbè mwoot motsh a ndieeng a baan awok’dj busek mbi, Naman anamieet mun a Suliy ntshaan awok’dj busek."

28 Bât bakim a mbûl a Ntshièm kawok baan kaph, awok’dj baan mwooy maku. 29 Kakat baan a shin, kabieeng baan Yish a bol, kieen baaniaan a dik di nkwootsh a imbet iphik’dj baan bol Nasalet ikaam inyuk’l a ibèk, 30 ek kashamaan a ndieeng a baan, kieenaan.

31 Lasu liek’dj, Yish kakumaan bos a Kapenum, a nuung mu Ngaleel, katetshaan ashaang’l lashaang lasu lakit la ben a Yuud les’baan abok mbel ane Nsabat abol bât bakim. 32 ✝Bât bambaak besakam’l mbok ambaakaan esashaang’l lashaang, ikaam ambaak esatwoot i bukum. 33 A mbûl a Ntshièm, ambabaak mwoot i mween mu mubey. Katetshaan atwoot dweey dinoon’l ane: 34 "Ayee! Yish muna Nazalet wes’taswoos dweey key? Ween umwiy ikaam itadiaak mbè mbony? Ndesayeeph mbok e ween: u mwoot ikin abol Ntshièm!"

35 Yish kaphaang’saan mween mubey buluung ane: "Bak muny, tow a ngat a mwoot aku!" Ngwoon, mween mubey kambwees muun a shin a miish ma bât bakim, katomuun a ngataan aaph anèm’s.

36 Bât bakim kakam’l baan, kadiwuus baan ane: "Aku dweey key! Mwoot aku edi bunoon’l i mangon butom’s mieen mibey dweey mintow!" 37 Nswoos mwaan mumanyeen a mandodj makim ma yaas ikun.

38 Yish katowaan a shinangoong, kieenaan abol Simoon. Bô bu ngaat bu Simoon bumbaak i latok tey lanoon’l, kalwoom baan Yish ikaam imbo. 39 Ngwoon, Yish kaphuum’laan a dik diaan i dweey dinoon’l, kabieengaan bwaal, kashil buun, bô bwaan kawokaan busek, kakataan itaang intshiin a shin, katetshaan bakes ngun.

40 Amwing’l itaang, bât bakim bambaak’i maal mabwik maasek’s kiy baan ibaan abol Yish. Ambaak anyeeng mwoot nkim mio, kawok baan busek. 41 Mieen mibey mimatow abol babieel babwiik misiebwek minwool ane: "U mwân a Ntshièm!"

Ek Yish ambaak es’miphang’s i dweey dinoon’l, es’mikiny mbè ane kamitwoot’k mbi, ikaam i mbè mimbaak misayeeph ane ntshaan Kilist.

42 Apheen akun kosangiees, Yish katowaan a bol, kieenaan a imbet yaaph bât. Twoong a bât katetshiin a nswoot; antwool baan akolaan, kanaph baan amwing ikaam i mbè katwook akol a baan mbi. 43 Ek Yish kabalwoosaan ane: "Ndedi dweey dishaang’l lashaang lasek la bunyim bu Ntshièm abol bât a mal mieek’dj kamotsh, ntshiin akun amantom Ntshièm."

44 Kienaan yeshaang’l lashaang a shinangoong i Yudey.