1 ✝Lasu ilieek’dj bakweek minaam baan’i biphaang’t bibwiik kakwoom’k baan akol a Yish ikaam imwoom’k, 2 ek baphuuny mikaan baan’i bafal’s bambaak besaluung’s ane: "Mwoot aku esanyey bât babey andia i baan kamotsh!" 3 Iphonsthi, Yish kakasaan babok’s nkwoon ane:

4 "Mbè mwoot motsh a ndieengiin aal i phangiaan kam, mbè motsh adiim, kakwook’dj alieem’l iku imotsh kamadiph i idiph ikaam yeswoot motsh aku adiim shaang elaan amone? 5 Itaang ilaan amon, edi nshaas mubwiik. Ansheetsh phaangaan a manyak 6 ankal a bol bwaan, ambis akun ambok bambèy baan mbel akol ba bel akolaan, amabalwoos ane: ‘Taalanyeeny i nshaas, ikaam ndamon phaangieem ambaak adiim!’ 7 Mbok mintshiin, ndes’bulwoos mbè, nshaas mubwiik mul’kaal a dik ikaam i mwoot motsh ambey asakal’l ntem mwaan, a ntshwey mu bât kamadiph i idiph baaph mbè kabesamuk akal’l ntem mbi.

8 "Mbè key, ngaat mbè aal i phas i ngaang ishieeng, mbè adiim’s laphas lamotsh, kelatieem’s tey, amwoom mbûl antetsh aswoot busek shaang elaan lamone. 9 Itaang ilaan lamon, ambok bakidj baan mbel akol ba belaan ibaan akolakol, amabalwoos ane: ‘Taalanyeeny i nshaas, ikaam ndamon laphas lieem la ngaang lambaak ladiim!’ 10 Mbok mintshiin, ndes’bulwoos mbè, nshaas mul aphiing bantshol ba Ntshièm ikaam mwoot a mbey esaan akal’l ntem."

11 Yish katwootaan kamotsh ane: "Ambabaak mwoot ambay i bân baan baphey ba baluung. 12 Mwân ankieek kalwoosaan ishanaan ane: ‘Taat, mpieek ikaphieem i budiy bwiit.’ Iphontshi taat kakaph’saan i bân baan baphey budiy bwaan. 13 A mbis matu makieek, wey aku ankieek kakaphaan biket biaan bikim, kieenaan i phasiaan ikaam yetwoos a bol bweek’dj bumbaak kaany. Andwoon, kabutshiaan bikim bimbaakaan i biin i bât ba ntshak. 14 A mbis a mbè aman biket bikim, ntshal ibwiik kayiing’liin a bol bukun, katetshaan amon maphetsh. 15 Kaphilaan mun ngun mu mwoot a bol bukun, ambaak esantom a mangwoon maan ikaam ibak ngul. 16 Ambaak esamuk adia iyaan ndwoom imbaak ngul india, ek mwoot mbè motsh kambaak amweek i biin mbi. 17 Ntshiin akun, katetshaan abok lakeny a bimweeny bimbaakaan amon, katwootaan ane: ‘Ben a ngun bakim babol taat besadia, basony busek, ibiek’dj binshaal, miin ndesawa i ntshal a ndey! 18 Ndekakal abol taat, namanwoos ane, taat namaakel bweph a bos bu Ntshièm akol a bos bwaa. 19 Ngwoon, kandesayeem’l kamotsh mbè umbok mbel ane mwânaa mbi. Ntshik muna nde motsh a ndieeng a ben a ngun baa.’ 20 Kakalaan abol ishanaan. Itaang imbaakaan mbè yaaph el a kaany i mbûl, ishanaan kamonaan, kashisaan, mweeng kangaat muun:

"Kieenaan mbaang ikaam inyey, kambutaan angon kamotsh kanyutaan muny. 21 Mwân kanwoosaan ane: ‘Taat, namaakel bweph a bos bu Ntshièm akol a bos bwaa, kandesayeem’l kamotsh mbè umbok mbel ane mwânaa mbi.’ 22 Ek ishanaan kalwoosaan ben a ngun baan ane: ‘Yanyeeny bwaas i ndel musek, ndiing anyeeny; mbok anyeeny ikèt a nyeem akol masabaat a mateem. 23 Yanyeeny i mwân a ngweem ansek, ndiak’s anyeenyaan; telakel dweey di nshaas! 24 Ikaam’i mbè mwânieem a nuung aku ambaak aman awa, ek kweey edi mwoony kamotsh, ambaak adiim, ek asol.’ Ngwoon, mamatetsh awok nshaas.

25 "A itaang ikun, mwân bukoos abol taat aku ambaak el ngwoon. Amwiyaan ikadj, antwoolaan akol mbûl, kawokaan ntshieem akol mamin. 26 Kabokaan mun a ngun motsh mbel, kamwuulaan ane: ‘Dweey key dinkeph’te?’ 27 Mun a ngun kankal’aan ane: ‘Mwânyo amanyikadj, ishô amandiak’s mwân a ngweem ansek, ikaam i mbè amamon mwânaan anyikadj i latok lasek.’

28 "Mwân bukoos kawokaan kaph, kabelaan mbok aying’l a mbûl. Ishanaan katowaan buseph ikaam imwoong mbè aying’l a mbûl. 29 Ek, mwân kakal’laan ishanaan ane: ‘Lieen, mitshi mialek’s mi mamiim akes ngun aaph mbè kanambel’k mikieetsh miaa mbi. Ek, kutshik ampieek mbè mwân a kam’dj ikaam nakel i miim dweey di nshaas i bakidj bieem mbi! 30 Ek mwânaa aku amwiyaan ikadj, aan aman budiy bwaa i baat ba bikelel bibey, usandiak’s mwân a ngweem ansek!’ 31 Ishaan kanwoosaan ane: ‘Mwânieem,’ ‘ween umwak ntshieem andey, biku bikim bimiim i biin ibiaa. 32 Ek tanaph kakel dweey di nshaas, tamwok nshaas, ikaam i mbè mwânyo aku ambaak aawa, ek kweey edi mwoony, ambaak adiim, ek kweey aasol.’"