1 ✝Matu mambaak mashaal makieek ikaam i nshaas mu maamp maaph lweven, mus’baan abok mbel ane Pasak. 2 Bakum i batwootsh ba Ntshièm akol bayeeph mikieetsh bambaak besaswoot mbok adiaak Yish, ek bambaak’i butet bu bât.

3 Ngwoon sataan amayiing’l a ntem mu Yudaas, ambaak i diin di Isakaliot, motsh ambaak aphiing a bieentsh ishieeng baphey. 4 Yudaas amatow ikaamieswoot bakum ba batwootsh ba Ntshièm akol babek ba Ntuum ikaam iwok’s i baan mbok elaan alièm’l Yish. 5 Kawok baan nshaas, ambis akun kawook’s baan ikaam imweek phas. 6 Yudaas kayim’saan, atetsh to itaang ikun, katetshaan aswoot mbok alièm’l Yish a busweem abol baan aaph mbè bât bakim kayeeph’dj.

7 Lasu la nshaas mu maamp maaph i lweven, lanaaph’dj baan adiaak phaang a Pasak, kayeem’l luun. 8 Yish katomaan Petelo akol Yoon ane: "Yaakanyeeny bwetalos bishim bi Pasak ikaam idia."

9 Bamamuul ane: "Usamuk mbè tienodj akwey?"

10 Kabakal’laan ane: "El’bwiin ayiingil a bol, busakasak’l i nuung asheetsh mbieen a maas. Bunaph anyeeny shaang a mbûl elaan aying’l, 11 bulwoos anyeeny kum a mbûl ngo: ‘Ntaang’dj esawuul ane, mbûl a bieentshambaang yil miim adia iliees i Pasak i bieentsh bieem ikwey?’ 12 Ngwoon, el’kabulak indodj inen a dik yaalodj i biket bikim; ntshiin imbet yil’bwiin alodj mwooy makim."

13 Kieen baan, katobaan ataan mbok mintshiin ambaak Yish abalwoos, ngwoon kaneph baan alodj bishim bi Pasak.

14 Itaang anyeem’liin, Yish kashim’kaan a meens i batom baan. 15 Kamotsh kabalwoosaan ane: "Namawok nyiing adiayiin a ngon iliees iku a bos bu mbè kanataadj amon maphetsh mbi! 16 Ngwoon, ndes’bushaak’s mbè ane, kandel akas adia iliees iku mbi shaang lasu leliy bunyim bu Ntshièm."

17 A mbis akun katolaan ikoph, kakasaan lakeeng abol Ntshièm esatwoot ane: "Tolanyeeny ikoph iku kaph’sanyeeny a nkimwiin. 18 Ikaam’i mbè, ndes’bushaak’s, kandel anyow kamotsh mân ma ndwoom i nviny mbi shaang eliy bunyim bu Ntshièm."

19 A mbis akun katolaan diaamp; kakasaan lakeeng abol ntshièm, amabakaph’s a biaas esatwoot ane: "Aku latok lieem lanèy baan idik diin. Kelanyeeny ngwoon ikaam inkan’l." 20 ✝Aman baan adia, kakelaan mbok mintshiin, katolaan ikoph esatwoot ane: "Ikoph iku yin kôt ayeemayeem a makel mieem manswooph idik diin.

21 ✝"Ek, lieenanyeeny, mwoot esampwok’s buphis tesabokiaan lo indiy imotsh a meens ayè! 22 Ikakaam, Mwân a Mwoot awakawa mbok mintshiin a bulodj bu Ntshièm, ek maphetsh key ikaam i mwoot amamwok’s buphis!"

23 Bieentsh baan katetsh baan adiwuus ane, nyeeny akus elakel dweey diku.

24 ✝Bieentsh baan katetsh baan adiwuus a ngon ikaam iyeeph mbè, nyeeny aphiing a baan e mwoot anen. 25 ✝Yish kabalwoosaan ane: "Bakum i bât ba shin itaang bantom’sk bât dweey i ngon ibaan, akol ba bedi bukum a dik di baan besamuk bamababok mbel ane ‘Bât basek.’ 26 ✝Kabiabusek mbè bwiin bwaal ngo mbi. Ek, mwoot emuna nuung anen aal muna mwa ilieeng, kamotsh wey esakom aal muna muna ngun. 27 ✝ Ek es’bwiin alieen, nyeeny nuung anen? Ka wey aku ashik a meense? Ek miin, andieengiin nde muna muna ngun.

28 "Bwiin, bumashal akolieem a ndieeng maphetsh mieem; 29 ntshiin, mbok akun mbè Taat amampieek bunyim bwaan, i miin ndel’kabuyeek ibuun. 30 ✝Ngwoon a bunyim bweem budiakadia, bunyokanyow kamotsh bushikashim’k a buum bweem ikaam ikom malwootsh ishieeng maphey ma Isaleel.

31 Yish kalwoosaan Simoon ane: "Simoon, Simoon! Waal i bwaany! Sak’tieem amabulwoom nkimwiin ikaam i mbè abuso muna baan bansow shaang. 32 Ek miim, nalwoom’s Ntshièm, ikaam i mbè kudiim’sk yim’siaa mbi. Kamotsh lasu lelween ikadj a miim, neeng bân biin, baal i bunoon’l."

33 Petelo kanwoos ane: "Kum, ndel akolakol ikaamieniaa a ngat a mwaat kamotsh namwa yaa!"

34 Yish kankal’laan ane: "Petelo, ndes’kalwoos dikwook mbè ane, alwool aku, a bos bu mbè kok kataadj abek mbi, ween untokaton phweet iset ane kandesanyeeph mbi."

35 ✝Yish kalwoosaan bieentsh baan kamotsh ane: "Ambaak miim ndabutom bos a ngun aaph abuyeek mbè phas akol saph aal’k masabaat, bumanyeens i iket mbè imotsh?"

Kakal’l baan ane: "Katanyeen iket mbè imotsh mbi."

36 Ntshiin kabalwoosaan ane: "Ek iphontshi, mbè mwoot aal i phas, ayitol, mbok mintshiin i wey edi saph; mwoot aaph i ngoph’dj, akaph ndel mwaan, aswoom ngoph’dj motsh. 37 ✝Ikaam’i mbè bamaaphuun ane: ‘Bamantol muna motsh aphiing biphaang’t,’ bi busek mbè dweey diku diyeem’l idik dieem. Ikaam’i mbè mwooy makim maphuun’dj baan idik dieem mel’kayeem’l."

38 Bieentsh kanwoos baan ane: "Kum! Ngoph’dj iphey kayingo!"

Kabakal’laan ane: "Diashil!"

39 Yish katowaan a bol, kieenaan bos a Nkwootsh mu Oliiv mbok ambaak ikeleliaan. Bieentsh baan kieen baaniaan. 40 Antwool baan a indiy iku, kabalwoosaan ane: "Lwoom anyeeny Ntshièm ikaam i mbè kabubwak’k a bilwoong mbi."

41 Kanephaan atow akol a baan, kieenaan itaan ikieek, kabolaan mayoong’dj a shin. 42 Katwootaan ane: "Taat," "mbè usamuk, ntiees ikoph iku i maphetsh. Ek, kel a imukiaa, kabiaal’k a imukieem mbi." 43 Ntshiin akun ntshol a to dik kasolaan ikaam ineeng ntem. 44 Amabomon maphetsh mabwiik, Yish kalwoomaan kamotsh Ntshièm a ngon. Yaangiaan kakaph’diin muna manyaang ma makel mesaswooph a shin.

45 A mbis mbè amanalwoom Ntshièm, kakataan a shin kieenaan akol a bieentsh baan. Katowaan bataan babetsh, balèy i maang. 46 Kabawuulaan ane: "Busabet ikaam i yey? Kat anyeeny a shin bulwoom Ntshièm, ikaam i mbè kabubwak’k a bilwoong bi lakieek mbi."

47 Yish abaakaan esatwoot ngwoon, twoong a bât kiyiin, Yudaas motsh aphiing a bieentsh ishieeng baphey ambakienieentsh a bos bu baan. Kiyaan akol a Yish ikaam inyuut. 48 Ek Yish kamuulaan ane: "Yudaas, usanaph alièm’l Mwân a Mwoot i minyutsh’dj mi munye?"

49 Bât bambaak akol a Yish amwoony baan dweey dinaph’dj akeph’t, kamuul baan ane: "Kum, tabanem’s i ngoph’dj, mbè mbony?" 50 Motsh aphiing a baan kabolaan muna ngun abol kum anen, kambat’laan ito yaan i ikat.

51 Ek Yish kabalwoosaan ane: "Lieem’l anyeeny akel ngwoon, diashil." Katolaan ito i mwoot aku kambowaan.

52 Yish kawuulaan batwootsh banen akol babek ba Ntuum akol bakom’l biidj ikaam ingaat ane: "Busiy i bangoph’dj akol bishok ikaam ingaat muna nde kum a bieem mbony? 53 ✝Matu makim namwaak ntshiin a Ntuum, kabutshik answoot ikaam ingaat mbi. Ek iphontshi aku itaangiin kamotsh itaang i manoon’l ma mwim’l ikel ngun mu maan a ndieeng butu."

54 Aman baan ayaat Yish, kieen baaniaan a mbûl abol kum anen. Petelo ambaak esiebalaph a kaany. 55 Kanem baan katey a ndieeng a laan, Petelo katwoosaan aphiing a bât bambaak bashik akol a tey. 56 Ngaat muna ngun kamonaan Petelo ashik akol tey, kanieenaan pholoo, katwootaan ane: "Mwoot aku iyaan ambabaak i Yish kamotsh!"

57 Ek Petelo kantonaan, esanwoos ane: "Ngaat, kandesanyeeph mbi!"

58 A mbis itaang ikieek, mwoot iyiek’dj kamonaan, kanwoosaan ane: "I ween u motsh a ndieeng a baan!"

Ek Petelo kakal’laan mwoot akun ane: "Nuung, miim kandaaph i baan mbi!"

59 A mbis itaang imotsh, mwoot iyiek’dj kamotsh katwootaan i yintsh ikim ane: "Ikakaam, mwoot aku ambabaak i Yish, ikaam i mbè muna Ngaleel!"

60 Ek petelo kankal’laan ane: "Nuung! Kandeswook mbok esween atwoot mbi!"

A itaang intshiin, kok kabekaan. 61 Kum kakaph’diaan, kalieenaan Petelo pholoo. Itaang intshiin Petelo kakan’laan dweey dimbaak Kum anwoos ane: "A bos bu mbè kok kataadj abek alwool, ween untokanton phweet iset." 62 Petelo katowaan buseph, kalelaan a ngon.

63 Bât bambaak besabak Yish, katetsh baan ansey ishiees, bamambol mikaph. 64 Bamankaan ndel a miish, bamamuul ane: "Shak’l, nyeeny amabol?" 65 Bambaak banwool mwooy mieek’dj mabwiik ikaam intwoon mishiing.

66 Butu anyeem buun, nsel mu bakom’l, batwootsh banen akol baphuuny mikieetsh kakwoom’k baan. Kiy baan ilaatsh Yish a bos bu bakum inen. 67 Kamuul baan ane: "Talwoos, ntshween Kilist mbè mbony?"

Kabakal’laan ane: "Mbè ndabulwoos, kabul ampwim’s mbi; 68 mbè nabuwuul dweey, kabulankal’l mbi. 69 Ek atetsh to iphontshi, Mwân a Mwoot atwokatwoos a lo la ikat la bunoon’l bu Ntshièm."

70 Bakim bamaakam’l ane: "Mbok ane ween u Mwân a Ntshièm, mbè mbony?"

Kakal’laan ane: "Mbok mintshiin antwoot bwiin."

71 Ngwoon, katwoot baan kamotsh ane: "Kataaph i nyiing mbè mwoot atalwoos mbi! Biitamieet tamawok mwooy ma to muny mwaan!"