As 10 parábolas mais importantes de Jesus

Bomanu ba Musamaliya Bɔlɔti

25 Pa bingo, weekisi ɔmɔɔ aisalia aemali, aumboli Yesu o mbowaambela lilonga: «Weekisi, nke ŋaande nte m’mba luiko la tiiti»? 26 Yesu awuuchisa nte: «Koandekamaka ŋaande otema ba isalia*? La ookaka ŋaande ango asɔmaka wɛɛ»? 27 Ongo weekisi aisaliya auchisa nte: «Yala atalange Bɔkɔta Kanamombe abɛ, o lisolo jabɛ lalikuli, o onto baɛ lalikuli, o nkulu yabɛ lalikuli, la limanya jabɛ lalikuli. La, yala atalange a mamana labɛ wɛɛnte wiilangaka wɛɛmɛlɛ*». 28 E kantunda Yesu aosimeli: «Ombuucha bɔlɔti! Bingo nde biyala wɛɛ atakee, aliko obaa luiko».

29 Kinaki ongo weekisi a Isaliya* olangi mbwiɛnya njala boso sɔlɔ, aumboli Yesu:«La amamana lami ko nani»? 30 Yesu awuuchisa.

«Bonto ɔmɔɔ wiiki atakitela mima ɛ Yɛlusalɛma nchwa e Yeliko. Aiki ndako e mboka, okwɛɛ waakasa ba bakumoli. Bango baokumoli bikambwa bende la mboophoma, baochiki ombolala mɛ la mbwa».

31 Kopaseli Weeta atei ɔmɔɔ aetaki weengo mboka, awɛɛni, aeti boleka bonkinɛ, achwe lande. 32 Mulawi* ɔmɔɔ lande aiye ango. Awɛɛni ndako onngo onto, lande aeti boleka bonkinɛ, achwe lande.

33 «Pa kopaseli Musamaliya ɔmɔɔ aiki ɔlɔkɛndɔ. Aiye ndako ango aiki ongo onto, la ndako awɛɛni ongo onto, la awɛɛnɛli ŋandi».

34 Aosukameli, awiingi ingo mpota yande la mbowiila difai la bauta la mbwiilɛma. Awuulisa aliko la mpunda ende, la aɔtɔli e lulu laaŋɛni nte aiŋame*. 35 Lɔi ende, opasisha dinali iphee yaakuti, ɔɔyisa ongo ɔmɛlɛ lulu laaŋɛni, aosimeli: Inga ɔnɛ onto bɔlɔti, la ango autola lemi, bakuti bapasha wɛɛ ya liko lakondo kɔngɛla o mbutola.

36 Ango Yesu aumboli ongo weekisi a Isaliya* nte: «Asamba banɛ basato, nani ɔmwɛnamwa njala amamana la ɔnɛ akwɛɛ waakasa baakumoli»? 37 Ongo weekisi a Isalia* auchisa Yesu nte: «Ongo awɛɛnɛli ŋandi».

Yesu aosimeli nte: «Chwaka, labɛ oyale atakɛɛ ŋango».

4 «Bonto ɔmɔɔ asamba nyo ayalake la bɛkɔkɔ miya ɛmɔɔ, ɔmɔɔ asamba beko bolimelake, aɔsɔna nkɛɛ nkee? Mbɔ akondo chika beni baomu libwa la libwa kaama ka lilɛ jaɔ, la nchwa mona ongo alimeli, nende eba ndako! 5 Iya awɛɛnake, akondo wɛɛmba waapheka, akondo yala ataisɛkɛya. 6 Aiyake kande, akondoelela biseka bende la ba mamani lande la mbwasimela nte: ‹Isɛkɛya nyo kaama kamɔɔ lami! Aliko mbooba bongo bɔkɔkɔ bami balimeli›. 7 Sɔlɔ mbokosimela nyo nte, ko ŋango Kanamombe oyalaka la libɛla ike, eleko boso njambi ɔmɔɔ asokolake njambi yande. Lingo libɛla jande liyalaka linɛnɛ ndeka banto baomu libwa la libwa banɛ bale phaaone lonkinɛ mimeya».

Bomponjo alimeli la mɛnamwa

11 Yesu ɔlɔndi lonkinɛ nte: Kaiki bonto ɔmɔɔ aiki la bana bande baphee baampame. 12 Ongo ampɔu asimeli isɛnde nte: Phapha, ompaa yami eteni ya ntikɔ weesanga bɛɛ. Isɛnde aaphakeli bako lalikuli baphee besanga bende.

13 Ɔkɔngɔ la biina inchɛ, ongo ampɔu asɔmbisa engo ntikɔ ende lalikuli, la achwe la falanga yande o wooni ba bɔɔ. Aiye ndako engo, asili besanga bende e mboka mbe. 14 Asili ndako nfuta besanga bende lalikuli, botala bɔnɛnɛ bapaseli woongo wooni. Aiye nende o mpeka lilɛ ja ndɛ. 15 Wiingo, achwe nkambela bonto ɔmɔɔ a wongo wooni. Ongo onto aɔtɔmi wiibeli nte akombelele nsombo yande. 16 Ongo bomponjo wiiki atalange ale koonga o lilɛ jaiki nsombo yatale, kinaki kotaika bonto abɔɔyaki.

17 Wiingo, aanjisa mbwi lɔndɛla o lisolo jande nte: Ndaka! Bakambi ba Isɛmi lalikuli bandakanya la lilɛ, kinaki lemi latabu ɛnɛ la botala! 18 Lakondo utola ele isɛmi la lakondoosimela nte: «Phapha, mbɔkɛɛ njambi otamboka ba Kanamombe la otamboka baɛɛ ŋango akɔ. 19 Phalasane mbelelama lonkinɛ bɔna abɛ. Onkee anɛ wɛɛntɛ ɔmɔɔ a bakambi baɛ!

20 «Laango, ongo bomponjo aanjisa lɔkɛndɔ la mbutola ele isɛnde. Aiki ndako oloko bɔɔ ichɛɛ la lulu, isɛnde awɛɛni la mbowɛɛnɛla ŋandi ike. Achwe loango nchwa mbɔwɛɛbɛya la mbɔ wɔɔmba bakango. 21 Ongo bomponjo ande aosimeli nte: ‹Phapha, mbɔkɛɛ njambi otamboka ba Kanamombe, la otamboka baɛ ŋango akɔ. Wiingo, phalasane mbelelama lonkinɛ bɔna abɛ›. 22 Kinaki isɛnde asimeli bakambi bande nte: ‹Loango! Ela nyo bisenda bilɔti ɔɔlɔchɛ nyo beko. Lɔcha nyo ndako lonkinɛ lɔpɛtɛ o lophita, la tomposo weekolo. 23 Elanyo la chinja nyo bɔnkɛta ba ŋɔmbɛ ɛntama; tole o libɛla la tuisɛkɛya! 24 Aliko ɔnɛ bɔna ami, wiiki nde pa mbwa, kinaki ombotondwa. Wiiki nde ombosila nimela, kinaki anɛ ɔmwɛnamwa lonkinɛ.› Baanjisa libɛla.

25 «Weengo eleko ongo booloande la ongo bomponjo aiki nde oloko weebeli. Autoli ndako, mbiya sukɛlɛ la bopaselo ba lulu, aoki bɛkɛlwa la ŋɔma. 26 Aeleli ɔmɔɔ a bakambi, awuumboli nte: ‹Kole nkee engo wɔɔsɛngɛ›? 27 Ongo bokambi awuuchisa nte: ‹Waankunɛ abɛ kombuutola, la Isɛbɛ ombo ochinjela bɔnkɛta ba ŋɔmbɛ entama, aliko bɔna ande ombwiya ole e luiko›.

28 «Ongo bɔna a weembe, kako nkango aoli la nkɛlɛ, nende ekili ndako mingela e lulu. Isɛnde apasi aanja la mbooseya aingele. 29 Kinaki ndako awuuchisa Isɛnde nte: ‹Oka! Bilongi ike binɛ bimbo kokambela lemi, ntakilaka nkɛɛ lalikuli bilɔndaka wɛɛ. Kinaki, koonga ŋaanɛ otampaaka koonga yana ya mboli nte n’ndɛ libɛla la biseka bemi. 30 Kinaki, ŋaanɛ bɔna abɛ asili besanga bɛbɛ lalikuli weesao bebe ombwiiya, ombo ochinjela bɔnkɛta ba ŋɔmbɛ entama!›

31 «Isɛnde lande awuuchisa nte: ‹Haa bɔna ami! Wɛɛ koyalaka lami biina lalikuli anɛ, la lalikuli bile lemi la beko bilende ɛbɛ too. 32 Mbɔ kosani tole libɛla la twisɛkɛyɛ! Aliko ɔnɛ waankunɛ abɛ wiikinde pa mbwa, kinaki ombotondwa. Wiiki nde ombolimela, kinaki ɔmwɛnamwa›».

Bomanu ba Bafalisayɔ* la boso ngɛja Kɔdi

9 Laango Yesu aoki bomanu waango baikanyisaki njala baso sɔlɔ otamboka ba Kanamombe la njala bataelolela bankinɛ. Ango Yesu abaokeli bongo bomanu: 10 «Luina lɔmɔɔ banto baphee bachwe e lulu la Kanamombe nɔmba Kanamombe. Ɔmɔɔ aiki Mufalisayɔ*, la onkinɛ aiki bongɛjisi a kɔdi. 11 Ongo Mufalisayɔ* aemali, la nɔmba Kanamombe o lisolo jande nte: ‹Haa Kanamombe ami, mbokosakoya, aliko lemi phalayalaka wɛɛnte banto bankinɛ. Bako bayalaka nde baiyi lonkinɛ balimbi, lonkinɛ baso loseka. Lonkinɛ mbokosakoya aliko lemi lapha wɛɛnte ɔnɛ bongɛjisi a kɔdi. 12 Mala iphee ɔmpɔsɔ, nkɛɛka malɔmbi ba nkila ndɛ. Lonkinɛ mpashaka mpato ya bikambwa lalikuli bi baaka lemi›.

13 «Kinaki bongɛjisi a kɔdi ndako aemali bɔɔ, koo mbɔsɔna nende nsakola baiso bande e loola. Kinaki, wiiki too ataphome bakasa e ntolo ende la nkangi, ɔ nɔmba ŋandi nte: ‹Haa Kanamombe ami, ɔmɛnɛlɛ ŋandi lemi boso njambi›»!

14 Ango Yesu ɔlɔndi nte: «Mbokosimela nyo nte, ɔnɛ bongɛjisi a kɔdi autoli e lulu la Kanamombe ɔmbɔwɛɛna njala boso sɔlɔ otamboka lande. Kinaki, ongo Mufalisayo* ndako jɛ. Aliko kila ongo oiyuuleyaka akondo kicheyamaka. Kinaki ongo wiikicheyaka ndako, akondo uleyamaka».

Bomanu ba boso nombo la Lasalo

19 Yesu aoki lonkinɛ bɔnɛ bomanu nte: «Kaiki la bonto ɔmɔɔ boso nombo. Ɔnɛ boso nombo aiki atalɔtɛ bisenda bilɔti ike lonkinɛ be lisɔmbi joolo. Lonkinɛ aiki atakee libɛla kila luina. 20 Otamboka ba lulu la ongo boso nombo, kaiki katayale boola ɔmɔɔ aelelamaki Lasalo. Ongo Lasalo aiki omboola la mpota bionge lalikuli. 21 Aiki ataone ndɛ tompusi takwaaki mima ɛ mɛsa ɛ ongo boso nombo. La mbwa ŋango akɔ yaiki ya taande nɔmɔta mpota yande!

22 «Luina lɔmɔɔ, Lasalo abwe, biphongo baɔtɔli sukɛlɛ la Ibulaimu. Pa bingo, boso nombo landako abwe, la baokunja. 23 Engo waabwe atumbyami ike wiiya. Aulisa baiso, aɛni Ibulaimu bɔɔ; la aɛni Lasalo ole sukɛlɛ lande. 24 Ongo boso nombo alɔndi nte: ‹Haa phapha Ibulaimu, ɔmɛnɛlɛ ŋandi! Otome Lasalo aile nsɔli e lophita lande wiiloko, ankwɛɛya limpɔmpɔ limɔɔ ja iloko aɔja lolemu lami, aliko mɔɛna tosoya ike wiinɛ iya›.

25 «Kinaki, Ibulaimu abuuchisa nte: ‹Bɔna ami! Kanya wiiki la libɛla ike o luiko labɛ. Kinaki Lasalo abae twakola. Anɛ lɛlɔ olende asamba libɛla, labɛ atatumbyama. 26 Lonkinɛ, asamba iso lanyo kolende liphuku linɛnɛ ike. Wiingo, bango bale ɛnɛ ele iso, phaaɔsɔna nchwa engo ele nyo. Lonkinɛ bango bale engo ele nyo phaɔsɔna manda ɛnɛ ele iso.› 27 Ongo boso nombo alɔndi nte: ‹Phapha, mbɔkɔlɔmba ootome achu e bolunga baso, 28 aliko nende la baotwa lami batano, achu mbwalaka lilako nte bataandake ntumbyama ɛnɛ ele tosoya.› 29 Kinaki Ibulaimu aosimeli nte: ‹Baotwa labɛ balende la Lɔɔsi la Musa la Baɛni*. Bayale batabaoke bolengo batalɔndama kako›! 30 Kinaki ongo boso nombo alɔndi nte: ‹Kapha ŋango phapha Ibulaimu bingo pheekoke. Ila iya bonto atondwake mima waabwe la mbwaachweela, baɔsɔna mimeya›. 31 Kinaki Ibulaimu ɔlɔndi nte: ‹Iya bango baotwa labɛ phaɔsɔni mboka ŋango Lɔɔsi la Musa la labaɛni* latalɔndɛ, phaɔsɔna mboka koongo bonto otondwa mima waabwe›».