1 Luina lɔmɔɔ la Sabato*, Yesu achwe ndɛ lilɛ e lulu la waiyolo ɔmɔɔ a Bafalisayɔ*. La banto baiki o longo lulu baolendaki ike nte baɛni nke ɛkɛɛ ndako. 2 Otamboka lande Yesu, kaiki bonto ɔmɔɔ aiki la waale ba mbulanga bionge. 3 Yesu abaumboli Baekisi ba Isaliya* la Bafalisayɔ* nte: «Isaliya* yaso iluusiyaka aɔ isimbaka mbikya bonto luina la Sabato*». 4 Kinaki, baikɔwɛli bii. Yesu akooli ongo bɔkɔnu, awiikisa, la aosimeli achu lande. 5 Pa, Yesu abaumboli nte: «Nani asamba nyo ole bɔna ande aɔ ŋɔmbɛ ende kekwake o lifuku ja iloko luina la Sabato* apheke nchwa luango nkepasha otema koonga lole luina la Sabato*». 6 Kinaki bako koombɔsɔna mbowuucheya.

7 Yesu aɛni ŋango banto baelelami bataisɔnɛla kaama ka otamboka. Laango abaɔyisa linɛ lilako: 8 «Iya bonto ɔmɔɔ akoelelake o libɛla, koonake njala kaama ka otamboka. Aliko kaɔsɔna manda bonto ɔnkinɛ aelelami a bokuchu nkoleka. 9 La ɔnɛ akoleka aiyake, ongo akoeleli nyo aphee aɔsɔna nkosimela nte: ‹Chikela ɔnɛ onto kaama›. Ango akondooka nsɔni ya nchwa njala weeje ɛ ɔkɔngɔ. 10 Kinaki weelelamake, chwaka lokoyale weeje ɛ ɔkɔngɔ. Ango, ongo akoeleli aiyake aɔsɔna nkosimela nte: ‹Keseka kɛmi, aka lokoyale otamboka›. Ango, akondoba bokuchu otamboka baanto lalikuli batale wɛɛ labako. 11 Aliko, lalikuli aiyuleaka, akondo kicheyamaka. Kinaki bonto lalikuli wiikicheyaka akondo uleyamaka».

12 Pa Yesu asimeli ongo awɛɛleli nte: «Eleko ɛ ɔyana wɛɛ lilɛ ja libɛla liyale ja yaani aɔ ja likɔlɔ, koyalake ataelela too biseka bɛbɛ, aɔ baotwa labɛ aɔ baoti baɛ aɔ ba mamani labɛ baso nombo. Aliko atakɛɛ wɛɛ ŋango, bako ŋango akɔ bakondo koelela ndɛ kaɔ ɔ ngɛla bingo biakeeli wɛɛ. 13 Kinaki, ɔkɛɛkɛ libɛla, yala ataelela beola, baso nɛngɛla, la bitumbe la bentongo. 14 Ango, akondo chweelama bochwako, aliko bango banto bapha la ekuucheya bako. Kinaki Kanamombe* akando kɔngɛla eleko etondwaki baso nkɛɛ bɔlɔti».

15 Bonto ɔmɔɔ asamba bango balɛɛki kaama kamɔɔ la Yesu aoki ndako bingo aosimeli nte: «Alombele ongo alɛɛ lilɛ weekeleka e Kanamombe*»!

16 Yesu awuuchisa mbetela bongo bomanu nte: «Bonto ɔmɔɔ akee libɛla linɛnɛ, la aeleli banto ike. 17 Akoki kako eleko ɛ ndɛ, atomi bokambi ande asimele baelelami nte: ‹Aka nyo anɛ, aliko bikambwa lalikuli bikende solo›. 18 Kinaki, bako lalikuli kila ɔmɔɔ aanjisa nɔnda bomongo boosimbaki ataiyake. Otango aosimeli nte: ‹Mbosomba ebeli emi, la kasana nchu n'nenda; mbɔanɛ kasana nchu nkombelela. Mbokoseya ɔmɛnɛlɛ ŋandi.› 19 Onkinɛ alɔndi: ‹Mbosomba ŋɔmbɛ joomu *ya ncha bibeli. Anɛ mbochwa mbwakekela m'mɛni iya yaɔsɔna nkamba. Mbokoseya ɔmɛnɛlɛ ŋandi›. 20 La onkinɛ lande nte: ‹Mbɔsɔnga anɛ kasende too. Wiingo, phalaɔsɔna mbiya›.

21 «Ongo bokambi autoli ele Bɔkɔta ande. Aosimeli bengo besao lalikuli. Ongo Bɔkɔta ande aoki ndako bingo, aomali nkɛlɛ ike. Ango aosimeli ongo bokambi ande nte: ‹Chwaka loango e mboka nɛnɛ la nsali ya ɔsɛngɛ. Weela anɛ baola, la baso nɛngɛla, la bentongo la bitumbe›. 22 Pa ongo bokambi autoli la nɔnda nte: ‹Bɔkɔta, bingo binsimeli wɛɛ nkee, mbɔ kɛɛ. Kinaki koonga ŋango koloko nde la kaama›. 23 Ongo Bɔkɔta ande ango aosimeli nte: ‹Chwaka loknkinɛ e mboka lalikuli ya bɛsɛngɛ la ya bibeli. Banto lalikuli banɛ baɛna wɛɛ, obaembeleya nte baingele kami, aliko lulu lami loole la banto. 24 Sɔlɔ mbokosimela nyo nte, koo nende ɔmɔɔ asamba bango baelelami alɛɛ o lilɛ jami›».

25 Luina lɔmɔɔ, banto ike baiki batalingita Yesu. Atulwe la aasimeli nte: 26 Ɔnɛ alanga liningita, anange ndeka isɛnde la nyɛŋɛnde la waajande la bana ande la baotwa lande, la betamba bende. Lonkinɛ anange lemi ndeka luiko lande nɛmɛlɛ. Iya jɛ phaɔsɔna njala weeki* ami. 27 Bonto ole phaɔsɔna memba balemba* bande, la linanga lemi, phaɔsɔna njala weeki* ami.

28 Eleko, ɔmɔɔ anyo atalange mpika lulu lɔnɛnɛ, kasana ayale obi, aɛni iya aɔsɔna mba besanga bɛɔsɔna ndako nkambya o nsila bongo bolemo. 29 Kinaki, iya aɔsɔnake mpika bɔnsɛnsɛ, pa aphekake nsila longo lulu, banto lalikuli bayala batalɔɛni, bakondo yala batawɔɔlɛ. 30 La n'nɔnda nte: Ɔnɛ onto aanjisa mpika lulu, kinaki komboopheka nsila.

31 «Eleko, Bɔkɔta ɔmɔɔ atalange njakana la Bɔkɔta onkinɛ, kasana ayale obi, aɛni iya mbetela nkulu ya bakɔlɔbɔi bande ɛlɛfu joomu bale lande, aɔsɔna ndeka ongo wiina lande ole la ɛlɛfu baomu aphee. 32 Aɛnake nte phaɔsɔna, aɔsɔna mbootomela besako oloko bɔɔ, nte awuumbole bolengo nke baɔsɔna ndako nkɛɛ, aliko ba baa bii asamba bako. 33 Lanyo kolende ŋaanɛ! Koo onto asamba nyo aɔsɔna njala weeki ami iya atachiki ekambwa lalikuli bile lande».

34 Yesu ɔlɔndi lonkinɛ nte: «Lɛɛphɔ loyalaka nde ekambwa ɛlɔti. Kinaki lolimeyake lɔɛja lande*, ekambwa nke esana mbila otema nte luutole njala lɔɛja? 35 Longo lɛɛphɔ, lotaika la faida lalikuli, loyale ɛ lɔmɔtu koonga ɛ liŋɛna. Balookaka anja. Boso batoi ba mboka aoke»!