1 Yesu aokeli baeki* bande bɔnɛ bomanu nte: Kaiki boso nombo ɔmɔɔ aiki la bochungi a besanga bende. Banto basitaki ongo bochungi ele Bɔkɔta ande nte olende atakambya basenga bende bobe. 2 Ongo boso nombo aweeleli, aosimeli nte: Banto batalɔndɛ nke aliko labɛ? Ŋaanɛ onkeele isabu ya besanga bɛmi, aliko phata byemalela lonkinɛ.

3 «Ongo bochungi aiyumboli nte: ‹Bɔkɔta ataone limbita o bolemo, nkɛɛ ŋaande? Ncha phalataɔsɔna, la nɔmba nɔmba ŋango akɔ kakondo mbela nsɔni. 4 Ole, laeya bɛkɛɛ lemi, aliko eleko embita bako wɔɔnɛ bolemo, banto bayale batambɛbɛya o mbulu yabɔ.› 5 Ango, aelelaki baso ningo ya Bɔkɔta ami, ɔmɔɔ ɔmɔɔ. Aumboli ongo otango nte: ‹Ole la ningo ŋaande ya Bɔkɔta ami›? 6 Ndako abuuchisa nte: ‹Nende la ningo ya ŋongolo miya ɛmɔɔ ya bauta›. Ongo bochungi aosimeli nte: ‹Yala anɛ loango, ɔsa kalatasi la oandike ŋongolo baomu batano›. 7 Pa aumboli onkinɛ nte: ‹Labɛ ole la ningo e ŋaande›? Ndako abuuchisa: ‹N'nende la ningo ya mefuko miya ɛmɔɔ ya buunga ba ngano›. Ongo bochungi aosimeli nte: ‹Ɔsa kalatasi, andeka baomu ɛnaanɛi›». 8 «Laango, ongo boso besanga akangi ongo bochungi abaanya aliko la limanya jande. Aliko banto ba ɔnɛ wooni bakɛɛka besao bɛɔ asamba bako la limanya ndeka banto ba ekowa».

9 Landako Yesu aasimeli nte: «Lami mbokosimela nyo yala nyo ataikeela biseka la besanga be lolimbo be bɔnɛ wooni! Aliko weeleko pheketayale lonkinɛ, Kanamombe akondo baɛbɛya e loola. 10 Bonto atakicheyama lokani wiikambwa ichɛ, ko ambookicheya lokani ŋango akɔ wiikambwa binɛnɛ. La ole la baanya wiikambwa inchɛ, mbɔ olende too baanya wiikambwa binɛnɛ. 11 Anɛ, iya nyo apha nyo banto ba n'kicheyama lokani o nchunga besanga be lolimbo ba bɔnɛ wooni, nani aɔsɔna nkokiicheya nyo lokani o nchungabesanga be sɔlɔ? 12 La iya nyo phaɔsɔni nyo mɛnamwa baimisi o besanga beankinɛ, nani aɔsɔna nkɔya nyo besanga bele bepha benyo?

13 «Koo bokambi aɔsɔna nkambela Bɛkɔta bephee. Aliko kasana anine ɔmɔɔ la nanga onkinɛ. Aɔ akondo yala wiimisi ele ɔmɔɔ la mbekola onkinɛ. Phaɔsɔna nyo nkambela Kanamombe la nkambela besanga mala ɛmɔɔ».

14 Eleko eoki Bafalisayo* ingo lalikuli, baanjisa mbɔla Yesu, aliko baiki batalange bakuti. 15 Ango Yesu aasimeli nte: «Nyo olangaka mbwikɛɛ bɔlɔti waanto. Kinaki Kanamombe weeyaka bingo bile waasolo banyo. Aliko bikambwa binɛ biɛnaka banto njala bilɔti ike, Kanamombe wiininaka ike. 16 Isaliya* ya Musa la Lɔɔsi la baɛni*, ko binɛ biiki banto batalingita mbiya nende o biina be Yɔani oso mbatisa. Mima bengo biina, ko Besako Belɔti beekeleka be Kanamombe* bele betaekyama too. La kila onto atakee nkulu yande lalikuli nte aingeli weengo ekeleka. 17 Kinaki koonga ŋaanɛ, loola la wooni bekondoeta koo tosoya. Kinaki, Isaliya* ya Kanamombe* phayatapashema koonga isili imɔɔ.

18 «Bonto lalikuli ɔnɛ aita waajande la nsɔnga onkinɛ, aeye nte ombokɛɛ litola. La bonto lalikuli a sɔnga wainto ɔnɛ aitami la bome ande, la ndako ombokɛɛ litola».

19 Yesu aoki lonkinɛ bɔnɛ bomanu nte: «Kaiki la bonto ɔmɔɔ boso nombo. Ɔnɛ boso nombo aiki atalɔtɛ bisenda bilɔti ike lonkinɛ be lisɔmbi joolo. Lonkinɛ aiki atakee libɛla kila luina. 20 Otamboka ba lulu la ongo boso nombo, kaiki katayale boola ɔmɔɔ aelelamaki Lasalo. Ongo Lasalo aiki omboola la mpota bionge lalikuli. 21 Aiki ataone ndɛ tompusi takwaaki mima ɛ mɛsa ɛ ongo boso nombo. La mbwa ŋango akɔ yaiki ya taande nɔmɔta mpota yande!

22 «Luina lɔmɔɔ, Lasalo abwe, biphongo baɔtɔli sukɛlɛ la Ibulaimu. Pa bingo, boso nombo landako abwe, la baokunja. 23 Engo waabwe atumbyami ike wiiya. Aulisa baiso, aɛni Ibulaimu bɔɔ; la aɛni Lasalo ole sukɛlɛ lande. 24 Ongo boso nombo alɔndi nte: ‹Haa phapha Ibulaimu, ɔmɛnɛlɛ ŋandi! Otome Lasalo aile nsɔli e lophita lande wiiloko, ankwɛɛya limpɔmpɔ limɔɔ ja iloko aɔja lolemu lami, aliko mɔɛna tosoya ike wiinɛ iya›.

25 «Kinaki, Ibulaimu abuuchisa nte: ‹Bɔna ami! Kanya wiiki la libɛla ike o luiko labɛ. Kinaki Lasalo abae twakola. Anɛ lɛlɔ olende asamba libɛla, labɛ atatumbyama. 26 Lonkinɛ, asamba iso lanyo kolende liphuku linɛnɛ ike. Wiingo, bango bale ɛnɛ ele iso, phaaɔsɔna nchwa engo ele nyo. Lonkinɛ bango bale engo ele nyo phaɔsɔna manda ɛnɛ ele iso.› 27 Ongo boso nombo alɔndi nte: ‹Phapha, mbɔkɔlɔmba ootome achu e bolunga baso, 28 aliko nende la baotwa lami batano, achu mbwalaka lilako nte bataandake ntumbyama ɛnɛ ele tosoya.› 29 Kinaki Ibulaimu aosimeli nte: ‹Baotwa labɛ balende la Lɔɔsi la Musa la Baɛni*. Bayale batabaoke bolengo batalɔndama kako›! 30 Kinaki ongo boso nombo alɔndi nte: ‹Kapha ŋango phapha Ibulaimu bingo pheekoke. Ila iya bonto atondwake mima waabwe la mbwaachweela, baɔsɔna mimeya›. 31 Kinaki Ibulaimu ɔlɔndi nte: ‹Iya bango baotwa labɛ phaɔsɔni mboka ŋango Lɔɔsi la Musa la labaɛni* latalɔndɛ, phaɔsɔna mboka koongo bonto otondwa mima waabwe›».