1 Luina lɔmɔɔ, Yesu aiki e lulu la Kanamombe*. Engo aiki ataekya banto Besako Belɔti. Kako nkango, baiyolo ba Baeta atei* la Baekisi ba Isaliya*, la Bekongo Beayuda bapaseli. 2 Bawuumboli Yesu nte: «Otosimele atakɛɛ besao bɛnɛ o luusa la nani? La nani akɔyisa nkulu ya mbwiikɛɛ»? 3 Yesu abauchisa nte: «Lami lakondo kuumbola nyo bosao bɔmɔɔ. Onsimele nyo: 4 Nkulu ya Yɔani mbatisa banto, yaimi ele Kanamombe aɔ waanto»?

5 Ango bango baanjisa nsimelana nte: «Towuuchiyake nte yaimi nde ele Kanamombe, ndako akondo tuumbola nte: ‹Aliko laanke koo mbowiimeya nyo›? 6 Lonkinɛ towuucheyake nte yaimi nde waanto, ango banto lalikuli bale anɛ bakondo tojaka la babwɛ. Aliko bako lalikuli baeya nte Yɔani wiikinde wɛɛni* a Kanamombe». 7 Ango, bawuuchisa nte: «Ingo nkulu ya Yaoni, phataeye yaimi ende». 8 Yesu landako abauchisa nte: «Koonga lemi phalata kosimela nyo latakɛɛ binɛ o nkulu nke».

9 Pa, Yesu abaokeli banto lonkinɛ bomanu bɔnɛ nte: «Bonto ɔmɔɔ achee ebeli ende e misabibu*. Aphaki o baoni bamɔɔ, nte bayale batawɔɔya eteni ɛmɔɔ ɛ lilɛ eleko eyala bako batauke. Pa achwe o wooni ba bɔɔ eleko etale. 10 Eleko e baukelo e koki, ɔnɛ onto atomi bokambi ande ele bango baoni, nte bawɔya yande eteni o lingo lilɛ ja uki bako. Kinaki, bango baoni baphomi, la mbowiita bakasa phololo. 11 Ongo boso ebeli atomi lonkinɛ, onkinɛ bokambi. La ndako baophomi, la mbootolatola, la mbowiita bakasa phololo. 12 Atomi lonkinɛ bokambi a asato. Ongo landako, bawootaisa, la mbowooka anja la ebeli. 13 Ango ɔmɛlɛ ebeli ayiumboli nte: ‹Lakɛɛ ŋaande anɛ? Lakondo toma anɛ bɔna ami bolangemi, kamɔti ndako bakondo wiimeya›. 14 Kinaki eleko ɛ wɛɛni bango baoni, balɔnjani asamba bako nte: ‹Mbɔ ɔnɛ kole mpɛnɛ a ɛnɛ ebeli! Toojake aliko tuichikalele la keko›. 15 Pa, bawooki anja la engo ebeli, la baojaki».

Laango Yesu aumboli bango banto nte: «Anɛ bango baoni, ɔmɛlɛ ebeli akɛɛ la bako ŋaande? 16 Akondo iya la mbwajaka la mbɔya bankinɛ baoni engo ebeli». Aoki banto bengo besao, balɔndi nte: «Besao wɛɛnte bɛnɛ betatuiyelake koonga inchɛ»!

17 Kinaki Yesu aalendi, la mbwasimela nte:

«Lɔnɛ Lɔɔsi Lɔɛlɔ lole la maana nke?

‹Libwɛ linɛ jakilami laaphiki,

jako like libwɛ ja bɔnsɛsɛ*›!

18 Laango bonto lalikuli akwaa aliko la lingo libwɛ, okelwaki bitenibiteni,

la ongo akwɛɛla jako jakondo ɔsɔpasɔpa». 19 Baekisi ba isaliya* la baiyolo ba Baeta atei* baeyi nte Yesu apasisha bongo bomanu aliko la bakɔ. Ko baonaki bako mbookemela kako nkango, ila too balawaki nde banto. 20 Bango baiyolo baanjisa mbowoona Yesu. Batomi banto banɛ baikee njala balɔti otamboka ba Kanamombe, aliko bawuumbole besao be mbo waambela lilonga. Bakee ŋango aliko baoni mboophaka waakasa ba baiyolo ba wooni.

21 Bango banto baosimeli nte: «Weekisi, iso taeya nte ɔlɔndaka la mbekya besao be sɔlɔ. Lonkinɛ taeya nte phasɔnaka banto, kinaki weekyaka banto mboka ɛ sɔlɔ e nangya Kanamombe. 22 Anɛ, otosimele iya Isaliya yaso yataluusiya, ngɛla kɔdi ele kaisaliya* aɔ jɛ»!

23 Kinaki, Yesu aeyi lilonga jaɔ, aasimeli nte: 24 «Ɔmɛnya nyo lofalanga lɔmɔɔ». Pa, abaumboli nte: «Ɔlɔnɛ lofalanga, kole iima ɛ nani la lokombo la nani»? Bawuuchisa nte: «Iima la lokombo bilende be Kaisaliya*». 25 Laango Yesu aasimeli nte: «Laango yala nyo ataɔya nyo Kaisaliya* bile bende la Kanamombe bile bende». 26 Bango banto bapheki bosao ba mbookemelela kakɔ otamboka baanto. Kinaki basebalali ike la mbucheya yande, la bakɔwi.

27 Pa ŋango, Basandukayɔ* bamɔɔ baiyeli Yesu. Bako ko bakilaka nte babwe batondwaki. Baosimeli nte: 28 «Weekisi, Musa atoandekeli otema ba isaliya yaso nte, iya bonto abwake ko mbota la nchika obwele ande koo bana, kasana aotwa lande aɔsi ongo bobwele, aliko awootele bana. 29 Laango, kaiki la baotwa lande esambaele ba likundu limɔɔ. Weembe asɔngi pa abwe koo nchika bɔna. 30 Ongo a aphee apɛni ongo obwele, kinaki la ndako ŋango akɔ abwe koo mbota la ongo obwele. 31 Pa ongo a asato la ndako ŋango akɔ. Bako lalikuli esambaele, babwe koontika nende bɔna ɔmɔɔ. 32 E kantunda ongo obwele la ndako abwe. 33 Anɛ, luina lɔnɛ latondolamaki babwe, ongo obwele akondo yala waaja anani? Aliko bako lalikuli esambaele baɔsɔngi».

34 Yesu abauchisa nte: «Wɔɔnɛ wooni bampame basɔngaka la bainto ba sɔngwaka. 35 Kinaki, bango baɛna Kanamombe nte bako basana ntondolama, nte baingele weekeleka eanda phaasɔngaki aɔ nsɔngwa. 36 Phaabwaki lonkinɛ. Bakondo yalaka anɛ wɛɛnte biphongo. Bako ko bana ba Kanamombe, aliko Kanamombe ombo atondola. 37 Musa aɛnyisa phololo nte babwe batondwaki. Ingo aɔmbɔlaki aliko lande ele Lɔɔsi lande latalɔndɛ aliko boliko bɔnɛ batowaki. Ango ataelela Bɔkɔta nte: ‹Kanamombe ka Ibulaimu, Kanamombe ka Isaka, la Kanamombe ka Yakɔbɔ*›». 38 Yesu ɔlɔndi lonkinɛ nte: «Kanamombe oyalaka nde Kanamombe ka baso luiko, kinaki phayalaka Kanamombe kaabwe. Aliko bako lalikuli balende o luiko kande».

39 Baekisi ba Isaliya* balɔndi nte: «Weekisi, ɔmbɔ lɔnda bɔlɔti»! 40 Laango, koo nkekela mbowuumbula lonkinɛ besao bɛnkinɛ.

41 Yesu abaumboli banto nte: Aliko laanke ɛtalɔndɛ banto nte Kilisito olende bɔna a Daudi? 42 Daudi nɛmɛlɛ atalɔndɛ o libuku ja Sabuli nte:

Bɔkɔta Kanamombe osimeli Bɔkɔta ami nte:

«Yala e loome lami,

43 nende ekicha lemi bitamba bɛbɛ entina ya baina babɛ*».

44 «Anɛ, iya Daudi aeleli Kilisito* nte olende Bɔkɔta ande, namuna nke ɔnɛ Kilisito* aɔsɔna njala lonkinɛ bɔna a Daudi»?

45 Eleko iiki banto lalikuli batalange Yesu, aasimeli baeki bande: 46 «Ayeka nyo la Baekisi ba isaliya. Aliko, bako balangaka nkenda bambɔlɔta bisenda bitalebitale. Lonkinɛ balangaka mbɛbɛyama la okuchu kaama kaanto ike. Lonkinɛ balangaka njala wiijee be otamboka Waasaŋanelo, la kaama ka libɛla. 47 Baɔsaka o baanya bikambwa lalikuli bile la bebwele. Lonkinɛ balɔmbaka Kanamombe eleko etale, nte baenamwe balɔti otamboka baanto. Wiingo, bako batumbyamaki ike ndeka bankinɛ».