1 Pa Yesu mbatisama apasi e losi Yɔlɔdani, omboola la Lɔkɛngɛ Lɔɛlɔ. Ongo Lɔkɛngɛ Lɔɛlɔ awɛɛnyisa nende woosowe. 2 Engo a kekelami la Bosombo weeleko ba biina ba omu banɛi. Weengo eleko lalikuli koo ndɛɛ ekambwa, la pa bengo biina aoki botala. 3 Ango Bosombo aosimeli: «Iya sɔlɔ wɛɛ olende Bɔna a Kanamombe*, lɔnda la linɛ libwɛ litulwe kitumbula». 4 Yesu awuuchisa nte: «Komo andekama ɔ Lɔɔsi Lɔɛlɔ nte: ‹Bonto phaɔsɔna njala o luiko aliko la kitumbula ketoo›».

5 Lonkinɛ, Bosombo aosakoli Yesu kaama kaliko. Awɛɛnyisa kako nkango ekeleka lalikuli e wooni. 6 Aosimeli nte: «Lakondo kɔya nkulu lalikuli la nombo ya ɛnɛ ekeleka, la nombo ya engo ekeleka, aliko ingo lalikuli ya mpiisa bako lemi, la lemi laɔsɔna mbɔ wɔɔya ɔnɛ alanga lemi. 7 Binɛ lalikuli bekondo yala besanga bɛbɛ iya ɔnkɔmɛlake balwe.» 8 Yesu awuuchisa nte: Lɔɔsi lɔmbɔ lɔnda ŋaanɛ:

«Yala atakucha *Bɔkɔta* Kanamombe abɛ,

la mbookambela ndako nɛmɛlɛ otoo».

9 Pa, Bosombo aɔtɔli Yesu nende ɛ Yɛlusalɛma, la mbo wuuleya eliko la lulu la Kanamombe la aosimela nte: Iya wɛɛ olende sɔlɔ Bɔna a Kanamombe wiyoke anyɔi. 10 Aliko, Lɔɔsi lɔmbɔ lɔnda:

Kanamombe akondotoma biphongo bende bako kombelele.

11 La lonkinɛ,

Bakondo kɔɔsa waakasa baɔ,

kwaandake mbwitakana lokolo laɛ o libwɛ.

12 Yesu awuuchisa nte: «Lɔɔsi lɔmbɔ lɔnda nte: Koyalake atakekela Bɔkɔta Kanamombe abɛ».* 13 Bosombo pa nsila nkekela Yesu e mboka lalikuli, aochiki obi.

14 Yesu autoli e wooni ba Galilaya ole fua la nkulu ya Lɔkɛngɛ Lɔɛlɔ. La besako bende bekoki weengo bɛsɛngɛ lalikuli la bɛsɛngɛ bɛ mɛmɛ. 15 Aiki ataekya banto Waasaŋanelo* baɔ, la banto lalikuli baiki bataokange.

16 Yesu achwe e bɔsɛngɛ ba Nasalɛti, kaama kaoli ndako. La eleko eiye luina la Sabato*, aingeli e Basaŋanelo* ŋango baiki nsao ende. Aemali nte asɔmɛ Lɔɔsi Lɔɛlɔ. 17 La, abaɔyisa bɔɔmbɔ ba libuku ja wɛɛni Isaya. Akɛlɛmɔli la atani kaama kaandeki bako nte:

18 «Lɔkɛngɛ la Bɔkɔta* lole aliko lami,

Asɔni aliko la mbekya Besako Belɔti o beola,

ontomi mbobaekya balɛmami nkakolama yaɔ

la betongo baɛni,

ontomi nkakole banɛ bataɛnɛlama,

19 la mbwasimela banto nte ilongi e wɛɛsɛ ya Bɔkɔta waanto kembo iya».

20 Pa nsɔma, Yesu amuni libuku, la auchisa ele bokambi Baasaŋanelo*, ayali. Banto lalikuli baiki waango Basaŋanelo* baolendi ike. 21 Laango, Yesu aanjisa mbwasimela: «Lɔɔsi lɔnɛ laokaki nyo lombokoka lɛlɔ ele nyo batamboke». 22 Bako lalikuli ba pholotami la ndako, la basebalali la besao belɔti be lɔndaki ndako. Balɔndi: «Onde! Ɔnɛ apha bɔna a Yɔsɛfu»?

23 Yesu aasimeli: Mbweeya bɔlɔti akondo simela nyo bomanu bɔnɛ: «Wiingi, wiyiinge wɛɛmɛlɛ». Lonkinɛ akondo lɔnda nyo: «Tooki bingo lalikuli bikee wɛɛ e Kapɛlɛnaumu, wiikee beko lalikuli anɛ, ɔɔsɛngɛ abɛ». 24 Lonkinɛ alɔndi nte: Sɔlɔ, mbokosimela nyo nte, wɛɛni ɔnɛ wɛɛbɛyamaka la bokuchu wɔɔsɛngɛ baɔ. 25 Kinaki oka nyo! Sɔlɔ kaiki nde be bwele ike e wooni ba Isilaɛli weeleko e Eliya. Weengo eleko kotalwaka mbula wiilongi bisato la eteni; kaiki nde la botala ike wooni lalikuli*. 26 Koonga ŋango, Eliya koo ntomama ele obwele lalikuli, kinaki, ele obwele a Selefati ɔɔsɛngɛ ba Sidoni.

27 Lonkinɛ, o wooni ba Isilaɛli weeleko ba Elisa, kaiki nde la baso nsuli ike. Koonga ŋango kotaika bonto lalikuli aɔkyami, kinaki, Namani boso Siliya.

28 Banto lalikuli baiki waasaŋanelo* aoki bako bingo, baomali nkɛlɛ. 29 Baemali la mboo pasha anja la ɔsɛngɛ abɔ baiki bombo phikama aliko la bɔɔkɔ. La baɔtɔli e likengo ja bɔɔkɔ nte bawooke anyɔi. 30 Kinaki Yesu aeti asamba bako la nchwa.

31 Pa, Yesu achwe nende ɛ Kapɛlɛnaumu wɔɔsɛngɛ ba Galilaya, aiki ataekya banto wiina lalikuli ba Sabato*. 32 Banto basebalali aliko la nkulu yaiki ndako la yako e mbekya yande.

33 La otema Baasaŋanelo* kaiki la bonto a luani la basombo babe. Aiki ata okoma la nkulu: 34 «Nke etaone wɛɛ kaso! Wɛɛ Yesu a Nasalɛti? Omwanda ntokaka? Lakoeya wɛɛ ole nani. Wɛɛ kole Lɔɛlɔ latomami la Kanamombe»!

35 Yesu aophangweli ongo Bosombo la nɔnda: «Kɔwa wɛɛ la pasa ele ɔnɛ onto»! Ongo Bosombo awooki anyɔi otamboka baanto lalikuli, la apasi ele ndako koo mboo tumbya.

36 Banto lalikuli ba sebalali, balɔnjani asamba bako: «Bɔnɛ bolende bosao ba nsebalala, aliko o nkulu yande, ombo luusiya Basombo babe bapase, la bako bambo pasa»! 37 La besako be Yesu be balaŋani kaama lalikuli woongo ɔɔsɛngɛ.

38 Laango Yesu apasi waango Basaŋanelo*, achwe e lulu la Simo. Wainto ɔmɔɔ bokilo ande la Simo, aiki la empoma yoolo, baosimeli a wiikya. 39 La Yesu aandi, aemali sukɛlɛ lande, aphangweli engo empoma la engo empoma keotiki. Kako nkango, ongo wainto aemali la mbwakambela.

40 Aiki likɔlɔ, banto lalikuli baiki la bakɔnu baɔ, babaelisa kande, lande aaphisa bakasa ande aliko la bakɔnu la mboba ikya lalikuli. 41 Basombo babe baapasi bakɔnu ike la bachwe bataokoma la nɔnda: Wɛɛ olende Bɔna a Kanamombe*! Kinaki, Yesu aaphangweli, la koo mbɔba ɔya luusa la nɔnda, aliko baeyi nte ndako kole Kilisito*.

42 Loi ende mpendu, Yesu apasi la nchwa kaama ka nɛmɛlɛ. Boloi bɔmɔɔ baanto baiki bake bata woone. Ango, bango banto baiye kaama kaiki ndako, baoni mbookenga aliko atapasake kaɔ. 43 Kinaki, Yesu aasimeli: «Lasana mbekya besako belɔti be ekeleka be Kanamombe* wɛɛnkinɛ bɛsɛngɛ ŋango akɔ. Aliko, latomami nde aliko la bingo». 44 La, aiki oke ataekya e Basaŋanelo* ba Yudɛya.