1 Pa, bako lalikuli, baiki o boloi ba mbalasa e Bayuda* bataemala, la batɔli Yesu otamboka la Pilato. 2 Baanjisa mboositaka la nɔnda nte: «Totani ɔnɛ onto ataangola banto ba ekanga eso nte bataamolana la baiyolo nte batangɛlake kɔdi ele kaisaliya*. Lonkinɛ ole ataiyɛmbɛ nte ndako ko Kilisito* Bɔkɔta».

3 Pilato aumboli Yesu nte: «Wɛɛ kole Bɔkɔta Baayuda»? La ndako nte: «Wɛɛ kɔmbɔlɔnda»! 4 Ango Pilato aasimeli baiyolo ba Baeta atei* la boloi baanto nte: «Lemi phalaɛni bomongo bɔmɔɔ yataɛnya nte ɔnɛ onto asambisame».

5 Kinaki bango banto ba kekemeisa nɔnda nte: «Besao bɛnɛ betaekya ɔnɛ onto, ataangola banto bɛtɛ nte baamolane la baiyolo ba wooni lalikuli ba Yudeya. Aanjisa Galilaya, ndako nkɔɔnɛ ombo luiyeya nende anɛ».

6 Pilato aoki ndako bingo, aumboli banto nte: «Onde, ɔnɛ bonto olende boso Galilaya»? 7 Bawuuchisa nte: «Sɔlɔ, olende boso Galilaya». Ɛlɔdɛ kuiki atakonja wooni ba Galilaya. Weengo biina wiiki nde ɛ Yɛlusalɛma. Ango ko Pilato aotomeli Yesu.

8 Elɔde aisɛkiisa ike ɔ mɛna Yesu. Mima biina ike aiki atalange mbɔwɛɛna, aliko aiki ataoke banto batalɔndɛ aliko lande. Lonkinɛ olangi mɛna Yesu atakɛɛ bintɔmpɔ. 9 Aumboli Yesu besao ike, kinaki Yesu koo, mbowuucheya bosao lalikuli. 10 Ango, waiyolo ba Baeta atei* la baekisi ba isaliya* baiki ango, baiki batalɔndɛ la mpɛɛ ike. 11 Elɔde la bakɔlɔbɔi bande, bawɔɔli Yesu la mbo weelolela. Baɔlɔchisa esenda ɛlɔti, pa bawuuchisa ele Pilato. 12 Otamboka, Elɔde la Pilato baiki nde bitamba. Kinaki mima longo luina batulwe bake biseka.

13 Laango, Pilato asaŋanyisa boiyolo ba Baeta atei la bekongo Beayuda kaama kamɔɔ la banto. 14 Aasimeli nte: «Omombela nyo ɔnɛ onto atalɔndɛ nyo nte ataphengola banto la mamolana la baiyolo. Anɛ, mbowuumbola aliko la bengo besao otamboka lanyo. Kinaki lemi phalaɛni bomongo koonga bɔmɔɔ bɔnɛ basana ndako atumbyame. 15 Koonga Ɛlɔdɛ landako koo mbooba la bobe lalikuli, aliko laingo ko mbochika ndako ambucheye lande. Ɔnɛ onto koo bomongo nende bɔmɔɔ bɔnɛ basana nte ajakeme. 16 O ŋaanɛ lakondo luusiya aphomame bephapho, pa lakondo osanjiya». 17 [Kila libɛla ja Pasaka, Pilato aiki atalɛmɔlɛla banto bɔlɛmami ɔmɔɔ mima ɛ munyɔlɔlɔ].

18 Kinaki, banto lalikuli baokomi mala ɛmɔɔ la ndɔnda nte: «Jakya ɔnɛ onto la ɔtɔlɛmɔlɛlɛ Balaba»! 19 Ɔnɛ Balaba wiiki ɔ munyɔlɔlɔ aliko okiisa bolupho ɔɔsɛngɛ la mamoyana la baiyolo Baalɔma. Lonkinɛ ajaki onto.

20 Pilato wiiki o mona nte asanjiya Yesu. Ango aɔmbɔli lonkinɛ banto. 21 Kinaki bako baphomi lonkinɛ tooloolo la joi linɛnɛ nte: «Ookicha waalemba! Ookicha waalemba»! 22 Pilato alɔndi lonkinɛ mala e isato nte: «Ɔmbɔkɛɛ bobe nkee? Lemi phalaɛni bobe lalikuli bɔmbɔ kɛɛ ndako nte ajakeme. Wiingo, lakondo ophomya bephapho, pa lakondo osanjiya».

23 Kinaki banto baphaphi mphoma tooloolo nte Yesu atumbyame. Mbokoma yaɔ iiki ike ndeka. La baoyi baɔ baleki. 24 Laango, Pilato akɛɛli bango banto ŋango balangi bako. 25 Pa aalɛmɔli ongo Balaba, la ndako ko bonto aamolanaki la Bɛkɔta Bealɔma la njaka onto. Ango Pilato abaɔyisa boloi baanto Yesu baokeele ŋango balangi bako.

26 Bakɔlɔbɔi baɔtɔli Yesu kaama ka mbootumbya, basaŋani la bonto ɔmɔɔ aelelamaki Simo aimaki weebeli. La ɔnɛ Simo aiki boso Kulɛnɛ. Baokemeli, la mbɔwɛɛmbya balemba ba Yesu o nkulu. Achwe atalingita Yesu.

27 Boloi baanto baolingiti Yesu. Asamba bako kaiki bainto baiki batalelela Yesu la mbwi okaoka ike. 28 Yesu aatulweli, la mbwasimela nte: «E nyo banyɛŋɛmi ba Yɛlusalɛma! Ko ndelelake nyo lemi, kinaki lela nyo aliko lanyo amɛlɛ la aliko la bana banyo». 29 Aliko, biina betaande bɛnɛ banto balɔndaki nte: Alombele bainto bale bikomba, bapheki bana la batalɔmyaka! 30 Weengo biina,

banto bakonoanja nsimela bɛɔkɔ nte: Ɔtɔkɔɛlɛ!

La bekondi nte: *Otokunja nyo! 31 Aliko, iya bambo nkeela bɛ ŋaanɛ, lemi ole weete bote baojojo,

anɛ bakɛɛ ŋaande nyo bale wɛɛnte bete be moma?

32 Kaiki ŋango akɔ baphoka baphee banɛ baɛmami nte ba tumbyame kaama kamɔɔ la Yesu. 33 Baiye kaama kaelelamaki: «Ɛpɔkɔsɔ ɛɔtɛ». Ango ko bakɔlɔbɔi batumbisa Yesu waalemba kaama kamɔɔ la bango banto baphee babe: ɔmɔti boleka ba loome ba Yesu la onkinɛ boleka ba loali. 34 Pa Yesu alɔndi: «Phapha, waatikele aliko phaaeye bitakɛɛ bako»!

Pa, bango bakɔlɔbɔi baphakani esende e Yesu o nkɛɛ esiko. 35 Banto baiki bataemala ango batalende. La Bɛkɔta Beayuda baweeloleli la balɔndi nte: «Akakoli bankinɛ: Anɛ aikakole nɛmɛlɛ, iya ndako kole Kilisito*, bosɔnami a Kanamombe»! 36 Bakɔlɔbɔi la bako baanjisa mbooweelolela Yesu ŋango akɔ. Baochweli aliko baɔnywɛshɛ difai ja lokange. 37 La baosimeli nte: «Iya sɔlɔ wɛɛ ko Bɔkɔta Baayuda, wiikakole wɛɛmɛlɛ»!

38 La eliko la bɔtɛ ba Yesu kaiki la lɔbaɔ lɔnɛ laandeki bako aliko la lako nte: «Ɔnɛ ko Bɔkɔta Baayuda».

39 Ɔmɔɔ a bango baphoka baphee bauleyami waalemba, aanjisa ntola Yesu la nɔnda: «Kapha wɛɛ kole Kilisito anɛ, wiikakole wɛɛmɛlɛ, la otokakole la iso ŋango akɔ»! 40 Kinaki ongo onkinɛ aophangweli wiina lande la mboosimela: «Wɛɛ phalawa Kanamombe koonga ŋaanɛ bombo tumbyama wɛɛ ya libweelo kaama kamɔɔ la ɔnɛ onto? 41 Kaso iso tasana tɔnɛ toakola, aliko inɛ ko ngɛlama ya ingo bɛkɛɛki iso. Kinaki ɔnɛ onto ndako koo nkɛɛ koonga bobe bɔmɔɔ».

42 Ɔkɔngɔ la ongo liphoka nsimela wiina lande bingo, asimeli Yesu nte: «Ɛɛ Yesu! Onkanya weeleko eanda wɛɛ wɛɛnte Bɔkɔta». 43 Yesu aosimeli: «Sɔlɔ mbokosimela, lɛlɔ ɛnɛ akondo yala kaama kamɔɔ lami e Paladisɔ*».

44,45 Eleko eiki kako kembosukamela saa isamalo e yaani; yaani yatiki mpasha ekowa, wiilima baliphi wooni lalikuli nende saa libwa. La esenda eliphamaki otema ba lulu la Kanamombe keati biati biphee*.

46 Yesu aokomi la jooi linɛnɛ nte: «Phapha, mbokicha lisolo jami waakasa babɛ». Pa nsila nɔnda ŋango a kɔphɔli lisolo*.

47 Ango, waiyolo baakɔlɔbɔi Baalɔma aɛni ndako bingo lalikuli bɛkɛɛmaki, akuchisa Kanamombe nte: «Sɔlɔ ɔnɛ wiiki nde bonto a sɔlɔ».

48 Banto lalikuli baandi mɛna bengo besao bepaseli, bautoli kaɔ bataiphome o ntolo la ŋandi. 49 Biseka lalikuli be Yesu, la bango bainto baotindeyaki mima e Galilaya, baemali bɔɔ ɔ nenda bingo bitakɛɛma.

50,51 Kaiki la bonto ɔmɔɔ aelelamaki Yɔsɛfu, a ɔɔsɛngɛ ba Alimateya e wooni ba Yudeya. Ongo Yɔsɛfu wiiki bonto bɔlɔti lonkinɛ boso sɔlɔ. Wiiki atakonge ekeleka e Kanamombe kiiye. Lonkinɛ wiiki ɔmɔɔ a mbalasa nɛnɛ Yaayuda. Kinaki ndako koo mbokona la baina lande o yuungu ya njaka Yesu. 52 Laango, ongo Yɔsɛfu achwe ele Pilato nɔmba bionge be Yesu. 53 Pa aikichisa ingo bionge mima waalemba, alɛngisa sanda njɛlɔ, o beko, la aikichisa e jombo ja chimama ɔ libwɛ. O lingo libwɛ kaiki kotakunjamaka koonga bonto ɔmɔɔ. 54 Longo luina, laiki luina laitano, la Sabato* yaiki yata anje.

55 Bango bainto batindeyaki Yesu mima e Galilaya balingitaki Yɔsɛfu. Balendaki jombo la mɛna ŋango bionge bende Yesu be kunjami otema. 56 Pa, bautoli e lulu nɔngɔsɔla bauta ba limbala ba ndisa bionge be Yesu. Wiina ba Sabato*, ba umoisa ŋango balɔndami Isaliya.