1 Luina lɔmɔɔ Yesu wiiki kaama kamɔɔ atalɔmbɛ Kanamombe*. Asili ndako nɔmba ɔmɔɔ a baeki bande aosimeli: «Bɔkɔta, otoekya nɔmba ŋango Yɔani oso mbatisa weekisa baeki bande».

2 Yesu aasimeli: Ɔ nɔmba yanyo yala nyo atalɔndɛ:

Phapha!

Lokombo labɛ lokuchame!

Bokuchu babɛ boande!

3 Oyale atatɔya lilɛ jaso ja kila luina.

4 Oyale atatosokolele njambi yaso,

aliko la iso tosokolelaka lalikuli batokeeli bobe;

la koyalake atatochike tuingele asamba mayalibu. 

5 Lonkinɛ Yesu aasimeli baeki bande nte: «Tɔlɔndɛ obi: Iya ɔmɔɔ anyo ole la keseka kende, achwe kande atiya ya ocho, la mbosimela: ‹Keseka, ɔnsɔmbya bitumbula bisato, 6 aliko keseka kɛmi ɔmɔɔ omombiela kami ole ɔlɔkɛndɔ la lemi lapha la ekambwa ɛ mbɔwɔya›. 7 Iya ongo, ole otema ba lulu awuucheyake nte: ‹Ko maŋangyake! Mbosila ndipha lɔkukɛ. Lemi la bana ami tombosila ndala. Phalaɔsɔna memwa la nkɔɔya bitumbula›! 8 Sɔlɔ mbokosimela nyo nte: Koonga phaemwe mbɔwɔya aliko ndako ole keseka kende, kinaki, akondo emwa mbɔwɔya lalikuli e langa ndako, aliko la ongo onto membeleya mbɔɔlɔmba.

9 «La lemi mbokosimela nyo: Yalanyo atalɔmbɛ aliko ɔɔyame nyo; yala nyo ataphome ɛ lɔkukɛ aliko olipholame nyo. 10 Aliko bonto lalikuli ɔlɔmbaka ndako kɔɔyamaka, la ɔnɛ oonaka ndako ko baaka, la ɔnɛ ophomaka ɛ lɔkukɛ ndako ko lipholamaka. 11 Nani asamba nyo ole bɔna ande aɔlɔmbake nse, awɔɔya ndwa? 12 La iya bɔna aɔlɔmbake bokele, akondo wɔɔya nkoto? 13 Nyo banto babe, ataeye nyo mbɔya bana banyo bikambwa bilɔti, la isɛnyo ole e loola akondo kɔɔya nyo Lɔkɛngɛ Lɔɛlɔ bango bataɔlɔmbɛ».

14 Luina lɔmɔɔ Yesu wiiki ataite bosombo bobe iiki itaokicha bonto ɔmɔɔ eluma. Eleko eopasi ongo osombo, kako nkango aanjisa nɔnda. La boloi baanto baiki ango ba sebalali. 15 Kinaki bamɔɔ asamba bango banto baanjisa nɔnda: «Olende ataite basombo o nkulu ya Belisebuli, waiyolo aasombo». 16 Bankinɛ, bawuuchisa, baɔlɔmbi aakeele ɛntɔmpɔ ɛmɔɔ ɔ mɛnya nte wiimi ele Kanamombe*.

17 Kinaki Yesu, weeyi limanya jaɔ, aasimeli: «Ekeleka lalikuli etajakana banto bamɔɔ la bankinɛ phekeɔsɔna nseka. La banto ba bolunga bɔmɔɔ baso njala la bolupho asamba bako, kantunda ba balaŋane. 18 Anɛ iya bosombo lande aiphakake o njakanya ekeleka ende keemala ŋaande? Mbokosimela nyo ingo aliko nyo ɔlɔndi nyo nte landaite basombo o nkulu ya Belisebuli. 19 Iya lataite basombo o nkulu ya Belisebuli, bana banyo bale bataite o nkulu ya nani? Aliko la ingo, bako nde baɛnya nte apha nyo la isaliya. 20 Kinaki lemi, iya o nkulu ya Kanamombe* yataite lemi basombo, aliko la ingo eya nyo nte ekeleka e Kanamombe* kembo sila mbiya kanyo.

21 «Bonto boso nkulu ayalake la lulu ya beta okombelelaka lulu lande, la besanga bende betayale bii. 22 Kinaki, iya boso nkulu mbooleka aandake mboo jakanya la aolekake, akondo okumola mbolo yande lalikuli bekicheaki ndako lokani la mphaka bikambwa lalikuli beokumoli ndako.

23 «Bonto lalikuli ole apha boleka bami, olende etamba emi. La ongo ole phamamolaka nsaŋanya, ko nɔnda obalaŋanyaka».

24 Yesu amemeisa nɔnda nte: «Bosombo bobe a pasake ele onto, ochwaka atalɛnga lɛnga kaama kale kapha laanto o momoya. Iya phabae wiilɔndɛlaka nɛmɛlɛ: ‹Lakondo utola o lulu lami eimi lemi›. 25 Autolake, akondotana longo lulu lɔmbɔɔmama la nɔngɔsɔlama bɔlɔti. 26 Laango, akondochwa mbɔsa basombo bankinɛ esambaele babe mbooleka ndako. Bako lalikuli bakondo chwa mingela o longo lulu la mbwiyalela kako. Ango, bolengo ba ongo onto bakondo yala bobe ndeka otamboka».

27 Yesu aiki ndako atalɔndɛ bengo besao, wainto ɔmɔɔ asamba bongo boloi ba anto, ookomi la nkulu ɔlɔndi: «Alombele wainto ɔnɛ akooti la nkɔlɔmya»! 28 Kinaki Yesu awuuchisa: «Baso wɛɛsɛ ko bango bataoke bosao ba Kanamombe la nkemela».

29 Boloi baanto bophaphi nkokyama, Yesu aasimeli: «Jooti linɛ, lilende libe. Kendalange ɛntɔmpɔ, kinaki, pheke ɔyama ɛntɔmpɔ lalikuli aliko la engo ɛntɔmpɔ ɛ wɛɛni Yɔna. 30 Ŋango wiiki Yɔna ɛntɔmpɔ o waanto ba Ninawe*. La ŋango akɔ lemi Bɔna a Onto lakondo yala ɛntɔmpɔ o linɛ jooti».

31 Wiina ba toakola, Bɔkɔta a wainto mima ɔɔkɔngɔ* ba wiina, otondwaki eleko ɛmɔɔ lanyo o nkositaka nyo. Aliko ndako apaseli bɔɔ ike onchwa nanga besao be limanya Bɛɔkɔta Sɔlɔmɔnɔ. Anɛ, ɔnɛ ole anɛ olende waiyolo ndeka Sɔlɔmɔnɔ. 32 Eleko engo luina la tosoya luiyaki banto ba Ninawe la bako batondwaki kaama kamɔɔ la banto ba wiina ba lɛlɔ o mbwasitaka. Aliko bako eleko eoki bako mbekya ya wɛɛni Yɔna, baimeisa. La ɛna nde lɛlɔ kole la waiyolo ndeka Yɔna!

33 Yesu ɔlɔndi lonkinɛ: «Koonto aɔsɔna ntoola litala la mbisha aɔ nkukumya la ephaka. Kinaki, okichaka aliko la lɔkɔphɔ, aliko banto baingelake otema baɛni ekowa. 34 Baisɔ ko litala ja bionge bɛbɛ; iya baiso baɛ phaakɔni bionge bɛbɛ lalikuli bekondo yala weekowa. Kinaki iya baisɔ babɛ bayalake nkɔna, la bionge bɛbɛ ŋango akɔ bekondo yala e wiilima. 35 Wiingo ayeka aliko ekowa ele otema baɛ, keta tulwake njala wiilima. 36 Anɛ iya bionge bɛbɛ lalikuli biyalake weekowa, koo kaama kamɔɔ kayala o wiilima. Bionge bɛbɛ bekondo yala weekowa e sɔlɔ. Wɛɛnte ŋango bokɔɛnyaka litala mbetela ekowa ende».

37 Yesu asili ndako nɔnda, Mufalisayɔ* ɔmɔɔ aweeleli nchwa ndɛ lilɛ kande, landako achwe, ayali la ndɛ lilɛ. 38 Ongo Mufalisayɔ* asebalali mɛna Yesu atale lilɛ koo mbɔkya bakasa.

39 Bɔkɔta Yesu aosimeli nte: «Nyo Bafalisayɔ* ɔɔkyaka nyo bekoyo la mphɛphɛ anja. Kinaki otema baasolo banyo komboola nanga la bobe. 40 Nyo balee! Ɔnɛ alɔngɔsɔli anja mbɔ ndako ka lɔngɔsɔli otema ŋango akɔ? 41 Yala nyo ataɔya baola bikambwa bile otema ba bingo bekoyo aɔ otema ba ingo m'mphɛphɛ. Aliko bikambwa lalikuli biyale bilɔti kanyo.

42 «Kinaki ŋandi ele nyo Bafalisayɔ*! Aliko opashaka nyo mpato ya balilo wɛɛnte ŋango: Binjɛlɛ la tololo la balilo bankinɛ ba ndɛ. Kinaki oophelaka nyo isaliya la lolango la Kanamombe. Ingo nde ya sana nyo nkɛɛ koo mbophela m'pasha mpato ya bingo binkinɛ lalikuli.

43 «Ŋandi ele nyo Bafalisayɔ*, aliko olangaka nyo njala kaama ka otamboka o Basaŋanelo. Lonkinɛ mbɛbɛyama la bokuchu ka banto ike. 44 Ŋandi ele nyo! Aliko oyalaka nyo wɛɛnte baombo bataisama, la banto batakɛndɛ aliko la bako phaaeye».

45 Ɔmɔɔ a baekisi ba isalia* aosimeli Yesu ŋaanɛ: «Weekisi, besao bɛbɛ bembo totola laso ŋango akɔ». 46 Yesu awuuchisa: «Lanyo baekisi ba isalia, ŋandi ele nyo; aliko ɔmɔɛmbya nyo banto belito bele phee amolama, ɛnɛ nyoamɛlɛ phasembola nyo koonga lophita o mbo waamola. 47 Ŋandi ele nyo, aliko ombophika nyo baombo ba baɛni bango bajaki bekongo benyo. 48 Wiingo ombo kekemeya nyo la mimeyana la belengo be bekongo benyo; aliko bako bajaki bango baɛni, lanyo ombophika nyo baombo baɔ. 49 Wiingo, limanya ja Kanamombe limbɔlɔnda ŋaanɛ: ‹Lakondo tɔla baɛni la baeki, kinaki bakondo ajaka bamɔɔ asamba bako, la ntumbya bankinɛ›. 50 Bopaselo bande, ko jooti linɛ jakondo tumbyama aliko la bekila be baɛni lalikuli besui manja katango ka wooni; 51 manja nsua ya bekila be Abeli nende bengo be Sakaliya ajaki bako atiya ba alɔtale la kaama kaɛlɔ. Sɔlɔ, jooti linɛ jakondo tumbyama aliko la bengo belengo.

52 «Ŋandi ele nyo baekisi ba isaliya, aliko ombwisha nyo ingo nfungola ya lɔkukɛ ya limanya; nyo amɛlɛ phuingeli nyo la ombo kenga nyo banɛ bamingela bataingelake».

53 Apasi ndako ango, bango Bafalisayɔ la Baekisi ba Isalia baanjisa mbo jakyanya la nkulu, mboophika la besao ike: 54 Aliko baokemele weesao bende.