1 Bokuchu Tɛɔfilɔ, kolende la banto bankinɛ ba kekeli mandika aliko la besao bengo bepaseli asamba iso. Aliko la nkekemya besao be Kanamombe. 2 Baandeki bengo besao wɛɛnte ŋango batosimeli bango baɛni manja katango la bango baɔyami bolemo ba mbekya bosao ba Kanamombe. 3 La lemi, la chichi, la laeyi bɔlɔti nte bolemo ba Yesu, manja katango nende lɛlɔ. Ko bingo bimo ntoma lemi nkwandekele Bɔkɔta Theofilo. 4 Mbokuandekela aliko landalange weeye sɔlɔ e besao beekisa wɛɛ.

5 Eleko iiki Elɔde Bɔkɔta ba Yudeya, kwiki bonto ɔmɔɔ aelelamaki Sakaliya. Ɔnɛ Sakaliya, aiki ɔmɔɔ asamba boloi ba baeta atei* ba Abiya. Waajande aiki ataelelama Elisabeti, a jooti ja Aluni. Ɔnɛ Aluni wiiki nde weeta atei* otango asamba Isilaeli.

6 Sakaliya la Elisabeti bako baphee baiki solo otamboka ba Kanamombe. Baiki batalingita bɔlɔti Isaliya* lalikuli ya Bɔkɔta. Lankɛɛ ŋango batalɔndama kako. 7 Kinaki, bataika la bɔna. Aliko Elisabeti aiki nde ekomba. La bako aphee baiki bake bekongo.

8 Wiina ɔmɔɔ, Sakaliya aiki atakee bolemo bande ba weeta atei* e lulu la Kanamombe, aliko kwiki nde loso lande la nkamba o boloi baɔ. 9 Ŋango o ningitana la Isaliya* ya Baeta atei*, Sakaliya kasɔnami ɔ nkɛɛ esiko, wɛɛnte ŋango baiki Isaliya* yaɔ, mingela e lulu la Kanamombe aliko la ntumba ichwa.* 10 Weengo eleko Sakaliya aiki atachumbe ichwa boloi bɔnɛnɛ baa Kilisito* baiki batalɔmbɛ anja ango achumbaki bako ichwa.

11 Pa, ephongo* ɛmɔɔ ɛ Bɔkɔta apaseli Sakaliya otema ba lulu la Kanamombe. Aemalaki o likasa ja loome ja Alɔtalɛ*, ango achumbaki bako ichwa.

12 Ango aɛni Sakaliya ephongo*, aitwe la ndawa ike. 13 Kinaki, ongo ephongo* aosimeli: «Sakaliya, kɔlawake, aliko Kanamombe ombooka malɔmbi baɛ. Waajabɛ Elisabeti akondo kootela bɔna ɔmɔɔ ɔnɛ aŋunyeya wɛɛ Yɔani. 14 Akondo yala la libɛla linɛnɛ la banto ike bakondo wɛɛbɛya o mbotama yande. 15 Ongo bɔna akondo yala bonto bɔnɛnɛ otamboka ba Bɔkɔta. Phanywaki difai aɔ baana lalikuli*. Akondo ojamaka Lɔkɛngɛ Lɔɛlɔ manja oloko o likundu ja nyɛŋɛnde.

16 «Akondo baucha ba Isilaeli ike ele Bɔkɔta Kanamombe abɔ*. 17 Akonoanda wɛɛnte bɔkwɛɛ ba Kanamombe. La mɛnyama la nkulu ya Lɔkɛngɛ wɛɛnte wɛɛni* Eliya. Akondo uŋanya baoti la bana baɔ. Akondo engola basolo ba bale phaaimeya Kanamombe*, aliko baba nkulu ya mbeya besao wɛɛnte banto bale balɔti otamboka ba Kanamombe. Ŋaanɛ akondo o kicheya Bɔkɔta banto ba mbɔwɛɛbɛya».

18 Kinaki, Sakaliya aumboli ongo ephongo* nte: «Nkee ɛmɛnya nte, bengo bosao betalɔndɛ wɛɛ belende sɔlɔ? Aliko lemi la waajami tokende bekongo». 19 La ephongo* awuuchisa: «Lemi ko Gabilieli, lemi koemalaka otamboka ba Kanamombe. Omontoma kabɛ nte nkosimele bɛnɛ Besako Belɔti. 20 Kinaki, bɛnɛ besao bekokyamaki weeleko be kichisa Kanamombe. Anɛ aliko wɛɛ koo mimeya akondo yala eluma. Phɔlɔndaki lonkinɛ nende ango akokyamaki bengo besao».

21 Weengo eleko, banto bakongaki Sakaliya ango anja ba sebalali aliko la nembela ike otema ba lulu la Kanamombe*. 22 Apasi Sakaliya anja, koo mbɔsɔna nɔnda. Ompita ntoo kaanjisa ndako nɔnda la banto aliko wiiki oke eluma. Ango bakanyaki nte ɔmbɔlala lilɔ otema ba lulu ba Kanamombe*.

23 Eleko esili Sakaliya biina bende be nkamba o lulu la Kanamombe, autoli kande. 24 Pa biina inchɛ, waajande Elisabɛti aɛmbi likundu. Ajiisisha otema ba lulu weeleko ɛ ŋɔndɔ itano. Wiiki oke atalɔndɛ nte: 25 «Lenda nyo bilɔti bimonkeela Bɔkɔta! Omo mpasha nsɔni ya njala ekomba otamboka baanto lalikuli».

26 Eleko ekokisa likundu ja Elisabeti ŋɔndɔ isamalo, Kanamombe atomi ephongo* Gabilieli nchwa ɔɔsɛngɛ ba Nasalɛti, o wooni ba Galilaya, 27 ele bophoko ɔmɔɔ eliphe aelelamaki Maliya. Ɔnɛ bophoko aiki atalakema la bomponjo ɔmɔɔ aelelamaki Yɔsɛfu, aiki e jooti ja Bɔkɔta Daudi. 28 Ongo ephongo* aochweli la mboosimela: «Ɔmbwɛ Maliya! Wiisɛkɛyɛ aliko Bɔkɔta ɔmbɔ kɔya wɛɛsɛ ike, lonkinɛ olende kaama kamɔɔ labɛ».

29 Aoki Maliya bengo besako aluani ike. Aanjisa mbwiumbola nte: «Inɛ mbɛbɛyama ya ephongo yatalange nɔnda nke»? Ephongo asimeli Maliya nte akondoota Yesu 30 Kinaki Ephongo* aosimeli nte: «Oka! Ko lawake Maliya, aliko Kanamombe ɔmbɔ kɔɔya wɛɛsɛ. 31 Akɔnɔɛmba likundu, akondo ota bɔna a mpame, la akondo oŋunyɛya lokombo lande Yesu. 32 Akondoyala waiyolo lonkinɛ akondo elelama Bɔna a Kanamombe ole eliko. Bɔkɔta Kanamombe nɛmɛlɛ akondo wɔɔya Bɔkɔta ba nkende Daudi. 33 Akondo lomba tiiti jooti ja Isilaeli, la Bɔkɔta bande phaatayale la kantunda».

34 Maliya aumboli ephongo* nte: «Onde bɛnɛ besao bɛɔsɔna nkɛɛma namuna nke la lemi ntaeye ba mpame»? 35 Ephongo* lande aosimeli nte: «Lɔkɛngɛ Lɔɛlɔ lakondo kokitelela, la nkulu ya Kanamombe ole e loola yakondo kolipha wɛɛnte elenge lenge. Bingo nde bechika bɔna aotama akondo yala Lɔɛlɔ la mbelelama Bɔna a Kanamombe. 36 Oka! Aotwa labɛ Elisabeti olende la likundu ja ŋɔndɔ isamalo, ya bɔna a mpame, ɔnɛ ole bokongo lonkinɛ ekomba. 37 Aliko, koo ekambwa ele phekesane ele Kanamombe». 38 Ango Maliya ɔlɔndi: «Lemi nende bokambi a Bɔkɔta, kokɛɛmɛ ŋango bɔmbɔ lɔnda wɛɛ». Pa ephongo* achwe lande.

39 Pa biina inchɛ, Maliya achwe lɔango nende ɔɔsɛngɛ bɔmɔɔ ba bɛɔkɔ ba booni ba Yudea. 40 Aiye ndako engo, aingeli e lulu la Sakaliya aɛbɛisa Elisabɛti. 41 Ango aoki Elisabɛti m'mbɛbɛyama ya Maliya, bɔna aiki e likundu jande oke ntɛka ntɛka. Elisabɛti aojami la Lɔkɛngɛ Lɔɛlɔ. 42 Aokomi la nɔnda nte, omboba wɛɛsɛ ndeka bainto lalikuli, la bɔna aota wɛɛ ombo chwelama bochwako. 43 Lemi ko nani ɔnɛ a nkɛndɛla nyɛŋɛnde la Bɔkɔta? 44 Aliko, ango a m'mbɛbɛisa wɛɛ, bɔna ole o likundu jami ombotɛka ike la libɛla. 45 Alombele wɛɛ aliko wiimisa nte bingo bikosimeli Bɔkɔta bekondo kokyama too!

46 La ndako Maliya alɔndi:

«Lisolo jami jata kucha Bɔkɔta ike,

47 lonkinɛ jata isɛkɛya la Kanamombe ike ole Bokakoli ami.

48 Aliko, o nendi lemi bokambi ande ole lapha ekambwa.

Kolende sɔlɔ, manja lɛlɔ banto lalikuli bakondo yala batambelelaka bonto a sɔlɔ,

49 aliko, Kanamombe ɔmɛlɛ nkulu, ɔmɔ nkeela bikambwa binɛnɛ.

Lokombo lande sɔlɔ lolende lɔɛlɔ.

50 Eleko la likuli akondo yala atamɛnya bɔlɔti bande o bango bale mbookuchaka.

51 Mbetela likasa jande ɔmbɔkɛɛ bikambwa binɛnɛ.

Ombobalaŋanya banto lalikuli bale la basolo ba mbwiɛmba.

52 Baso nomba, ombwakicheya,

la baɔla ombo bauleya*.

53 Banɛ baokaki botala ombo akɛɛ baso nombo kinaki,

baso nombo ombo baucha,

bakasa phololo.

54 Waandi mamola banto bande Isilaeli,

la koo mbophela mbɔwɛɛnya bɔlɔti bande,

55 wɛɛnte ŋango balakeli ndako Ibulaimu la jooti jande,

bingo belɔndi ndako la nkɛnyo tiiti».

56 Maliya oyali ele Elisabɛti ilango ŋɔndɔ isato. Pa autoli kaɔ.

57 Aiye kako eleko e Elisabɛti mbota, aoti bɔna a mpame. 58 Ba mamani lande la baotwa lande, abae bako besako nte Bɔkɔta ɔmbɔ wɛɛnɛla ŋandi ike, ba isɛkisa kaama kamɔɔ la ndako.

59 Bɔna akokisa ndako biina ɛnaanɛi la mbotama bachwe mbowiila e weembe*. Baoni mbooŋunyeya lokombo la isende, Sakaliya. 60 Kinaki, nyɛŋɛnde la ɔna aasimeli nte: «Jɛ! Akondo ŋunyeyama lokombo la Yɔani». 61 La bako baosimeli nte: «O bolunga banyo koo bonto lalikuli aiki la lɔnɛ lokombo»!

62 Wiingo, bawuumboli isɛnde la bɔna la mpita nte: «Lokombo nke lalanga wɛɛ toŋunyeya bɔna»? 63 Sakaliya aalɔmbi iteni ya lobaɔ, aandeki aliko ya yako nte: «Lokombo la bɔna ko Yɔani». Bako lalikuli basebalali. 64 Kako nkango, lɔlemu la Sakaliya lalipholami lonkinɛ, aanjisa lonkinɛ nɔnda la nsakoya Kanamombe ike. 65 Bango bamamani lande lalikuli babaemi la wɔɔma. Bengo besako be balaŋani wɛɛsɛngɛ lalikuli biiki ɔ bɛɔkɔ be Yudɛya.

66 Banto lalikuli baoki bɛnɛ besako, baiki bataiyumbola waasolo baɔ batalɔndɛ: «Ɔnɛ bɔna ombootama a yala lɛlɔ a bolengo nke»? Sɔlɔ nkulu ya Bɔkɔta iiki kaama kamɔɔ lande.

67 Sakaliya, isɛnde la bɔna, aojami la Lɔkɛngɛ Lɔɛlɔ, la manja nɔnda ŋaanɛ:

68 «Akuchame Bɔkɔta Kanamombe ka Isilaeli,

aliko, omwanda mamola banto bande la mbwakakola.

69 Ombo totomela bokakoli boso nkulu,

ombo pasela asamba jooti ja bokambi ande Daudi.

70 Ingo imbolingitana la bolengo ba lɔndaki ndako katango, mbetela baɛni* bande baɛlɔ

nte:

71 Akondototomela ongo atokakola mima waakasa be bitamba beso,

la ntopasha waakasa baanto bata tonine.

72 Wɛɛnyisa ŋandi ende waankɛso,

lonkinɛ koo mbophela lilaka* jande lɔɛlɔ.

73 Okee ŋango, ningitana la ŋango, balapeli ndako nkɛso Ibulaimu,

74 nte akondo tokakola waakasa be bitamba beso,

aliko tookambele koo wɔɔma,

75 ɔ lɔɛlɔ,

la nkɛɛ bile sɔlɔ otamboka lande,

biina lalikuli be luiko laso*.

76 Labɛ bɔna ami, bakondo yala bata koelela wɛɛni* a Kanamombe ole e loola,

aliko, wɛɛ akondo iya otamboka la Bɔkɔta mbiya,

aliko ɔɔ lɔngɔsɔlɛlɛ mboka.

77 Lonkinɛ wɛɛ kasimela banto bande nte omoanda mbwakakola,

ombwasokolela njambi yaɔ.

78 Ningitana la ŋango Kanamombe aso oyalaka la ŋandi ike,

Akondo totomela ekowa eliko wɛɛnte yaani ya mpendu inɛ ya tɔɛnya.

79 Akondo ɛnya baso njala e wiilima, la bale njala asamba elenge lenge e bojo,

aliko atoamole ningita mboka e bii».

80 Ongo bɔna aoli, la amemeisa njala waiyolo. Achwe njala oosowe* nende luina la iɛnyisa ndako waanto ba Isilaɛli.