1 Luina lɔmɔɔ, Bangɛjisi ba kɔdi la baso njambi bankinɛ basukameli Yesu nte bawooke. 2 Bafalisayɔ* la Baekisi ba Isaliya* aɛni bako ŋango, baanjisa nɔnda bobe nte: «Ɔnɛ bonto ole ataɛbɛya banto babe la njala atale la bako»!

3 Ango Yesu abaokeli bomanu bɔnɛ nte: 4 «Bonto ɔmɔɔ asamba nyo ayalake la bɛkɔkɔ miya ɛmɔɔ, ɔmɔɔ asamba beko bolimelake, aɔsɔna nkɛɛ nkee? Mbɔ akondo chika beni baomu libwa la libwa kaama ka lilɛ jaɔ, la nchwa mona ongo alimeli, nende eba ndako! 5 Iya awɛɛnake, akondo wɛɛmba waapheka, akondo yala ataisɛkɛya. 6 Aiyake kande, akondoelela biseka bende la ba mamani lande la mbwasimela nte: ‹Isɛkɛya nyo kaama kamɔɔ lami! Aliko mbooba bongo bɔkɔkɔ bami balimeli›. 7 Sɔlɔ mbokosimela nyo nte, ko ŋango Kanamombe oyalaka la libɛla ike, eleko boso njambi ɔmɔɔ asokolake njambi yande. Lingo libɛla jande liyalaka linɛnɛ ndeka banto baomu libwa la libwa banɛ bale phaaone lonkinɛ mimeya».

8 Yesu amemeisa nɔnda nte: «Oka nyo lonkinɛ: Onde, iya wainto ɔmɔɔ ole la falanga ya kichɛlɛ joomu, lofalanga lɔmɔɔ lolimelake, akɛɛ ŋaande? Mbɔ aɔsɔna ntoola litala, la mɔmba lulu, la mona ike nende elobaa ndako! 9 Iya alobaake, akondoelela biseka bende la bamamani lande la nɔnda nte: ‹Isɛkɛya nyo kaama kamɔɔ lami, aliko mbooba lofalanga lami lalimeli›. 10 Mbokosimela nyo nte, ko ŋango biphongo* be Kanamombe* baisɛkɛyaka eleko bonto ɔmɔɔ otoo a njambi a sanjiake njambi yande».

11 Yesu ɔlɔndi lonkinɛ nte: Kaiki bonto ɔmɔɔ aiki la bana bande baphee baampame. 12 Ongo ampɔu asimeli isɛnde nte: Phapha, ompaa yami eteni ya ntikɔ weesanga bɛɛ. Isɛnde aaphakeli bako lalikuli baphee besanga bende.

13 Ɔkɔngɔ la biina inchɛ, ongo ampɔu asɔmbisa engo ntikɔ ende lalikuli, la achwe la falanga yande o wooni ba bɔɔ. Aiye ndako engo, asili besanga bende e mboka mbe. 14 Asili ndako nfuta besanga bende lalikuli, botala bɔnɛnɛ bapaseli woongo wooni. Aiye nende o mpeka lilɛ ja ndɛ. 15 Wiingo, achwe nkambela bonto ɔmɔɔ a wongo wooni. Ongo onto aɔtɔmi wiibeli nte akombelele nsombo yande. 16 Ongo bomponjo wiiki atalange ale koonga o lilɛ jaiki nsombo yatale, kinaki kotaika bonto abɔɔyaki.

17 Wiingo, aanjisa mbwi lɔndɛla o lisolo jande nte: Ndaka! Bakambi ba Isɛmi lalikuli bandakanya la lilɛ, kinaki lemi latabu ɛnɛ la botala! 18 Lakondo utola ele isɛmi la lakondoosimela nte: «Phapha, mbɔkɛɛ njambi otamboka ba Kanamombe la otamboka baɛɛ ŋango akɔ. 19 Phalasane mbelelama lonkinɛ bɔna abɛ. Onkee anɛ wɛɛntɛ ɔmɔɔ a bakambi baɛ!

20 «Laango, ongo bomponjo aanjisa lɔkɛndɔ la mbutola ele isɛnde. Aiki ndako oloko bɔɔ ichɛɛ la lulu, isɛnde awɛɛni la mbowɛɛnɛla ŋandi ike. Achwe loango nchwa mbɔwɛɛbɛya la mbɔ wɔɔmba bakango.Bomponjo a limeli ɔmbɔɛbɛyama la Isɛnde 21 Ongo bomponjo ande aosimeli nte: ‹Phapha, mbɔkɛɛ njambi otamboka ba Kanamombe, la otamboka baɛ ŋango akɔ. Wiingo, phalasane mbelelama lonkinɛ bɔna abɛ›. 22 Kinaki isɛnde asimeli bakambi bande nte: ‹Loango! Ela nyo bisenda bilɔti ɔɔlɔchɛ nyo beko. Lɔcha nyo ndako lonkinɛ lɔpɛtɛ o lophita, la tomposo weekolo. 23 Elanyo la chinja nyo bɔnkɛta ba ŋɔmbɛ ɛntama; tole o libɛla la tuisɛkɛya! 24 Aliko ɔnɛ bɔna ami, wiiki nde pa mbwa, kinaki ombotondwa. Wiiki nde ombosila nimela, kinaki anɛ ɔmwɛnamwa lonkinɛ.› Baanjisa libɛla.

25 «Weengo eleko ongo booloande la ongo bomponjo aiki nde oloko weebeli. Autoli ndako, mbiya sukɛlɛ la bopaselo ba lulu, aoki bɛkɛlwa la ŋɔma. 26 Aeleli ɔmɔɔ a bakambi, awuumboli nte: ‹Kole nkee engo wɔɔsɛngɛ›? 27 Ongo bokambi awuuchisa nte: ‹Waankunɛ abɛ kombuutola, la Isɛbɛ ombo ochinjela bɔnkɛta ba ŋɔmbɛ entama, aliko bɔna ande ombwiya ole e luiko›.

28 «Ongo bɔna a weembe, kako nkango aoli la nkɛlɛ, nende ekili ndako mingela e lulu. Isɛnde apasi aanja la mbooseya aingele. 29 Kinaki ndako awuuchisa Isɛnde nte: ‹Oka! Bilongi ike binɛ bimbo kokambela lemi, ntakilaka nkɛɛ lalikuli bilɔndaka wɛɛ. Kinaki, koonga ŋaanɛ otampaaka koonga yana ya mboli nte n'ndɛ libɛla la biseka bemi. 30 Kinaki, ŋaanɛ bɔna abɛ asili besanga bɛbɛ lalikuli weesao bebe ombwiiya, ombo ochinjela bɔnkɛta ba ŋɔmbɛ entama!›

31 «Isɛnde lande awuuchisa nte: ‹Haa bɔna ami! Wɛɛ koyalaka lami biina lalikuli anɛ, la lalikuli bile lemi la beko bilende ɛbɛ too. 32 Mbɔ kosani tole libɛla la twisɛkɛyɛ! Aliko ɔnɛ waankunɛ abɛ wiikinde pa mbwa, kinaki ombotondwa. Wiiki nde ombolimela, kinaki ɔmwɛnamwa›».