1 Weengo eleko banto bamɔɔ baandi, ele Yesu la mboosimela aliko la banto ba Galilaya bango bajakisa Pilato. Aajakisa weeleko iiki bako batachinja nyama yaɔ o mpasha mpato ele Kanamombe. 2 Pa, Yesu abaumboli nte: «Atakanya nyo nte bango ba Galilaya banɛ bajakemi ŋango, baiki la njambi ike ndeka bankinɛ Bagalatiya lalikuli? 3 Jɛ! Kinaki mbokosimela nyo nte iya la nyo phaɔsɔna nyo nsokola njambi yanyo, nyo lalikuli akondo bwa nyo ŋango bobwe bako. 4 La ɔɔsɛngɛ ba Silɔwamu, lulu lɔnɛnɛ la kwɛɛli banto joomu la ɛnaanɛi la babwe. Anɛ, nyo atakanya nyo nte bako atoo nde banto baiki la njambi ndeka bankinɛ banto lalikuli ba Yɛlusalɛma? 5 Jɛ! Kinaki mbokosimela nyo nte, iya lanyo phosokoli nyo njambi yanyo, nyo lalikuli akondo tumbyama nyo wɛɛnte bako».

6 Pa, Yesu aasimeli bomanu bonkinɛ nte: «Bonto ɔmɔɔ aoni bote ba''Tini'' weebeli ende e Misabibu*. Luina lɔmɔɔ, achwe auke biuma kako, kinaki koo mba ekambwa kako. 7 Ango, asimeli bokambi* ande a engo ebeli nte: ‹Ndaka! Kokende bilongi bisato bile bongo bote bombosila nkɛɛ, kinaki phalabaaka kako ekambwa. Kɔta bako! Aliko bandafute lɔmɔtu bulɛ›. 8 Kinaki ongo bokambi* aosimeli nte: ‹Bɔkɔta, oochike lonkinɛ ɛnɛ elongi; lakondo memeya mboolingela lɔmɔtu la mboowiilela liŋɛna. 9 Kamɔti akondoota biuma weelongi etaande. Kinaki iya jɛ, ango aɔsɔna mbɔɔkɔta›».

10 Luina lɔmɔɔ la Sabato*, Yesu aiki ataekya banto Waasaŋanelo* Baayuda. 11 Waango Basaŋanelo* kaiki la wainto ɔmɔɔ aiki nkɔna. Ongo wainto aiki ɔmbɔ kɛɛ bilongi joomu la ɛnaanɛi atatumbyama la Bosombo bobe. Ongo Bosombo wiiki ombosila mboomuna bɔkɔngɔ, nende eiki ndako phaɔsɔna lonkinɛ nsembwa. 12 Eleko ɛwɛɛni Yesu, aweeleli, la mboosimela nte: «Lele! Ombwikyama waale baɛ». 13 Yesu aaphisa bakasa aliko lande. Kako nkango ongo wainto asembwe, la aanjisa nkucha Kanamombe.

14 Kinaki, waiyolo abango Basaŋanelo* Baayuda aomali ike, aliko Yesu aikisa bonto luina la Sabato*. Laango asimeli banto baiki otema nte: «Koyalaka too biina besamalo be nkamba bolemo. Anɛ, weengo biina nde kasana nyo mbiya mbikyama, kinaki kapha luina la Sabato*».

15 Kinaki Bɔkɔta awuuchisa nte: «Nyo olende banto bapha phololo! Aliko laanke luina la Sabato* kila ɔmɔɔ asamba nyo ɔ lɛmɔlaka ŋɔmbɛ ende aɔ mpunda ende mima e bokoto, la nchwa nywɛɛsha iloko! 16 Ɔnɛ wainto olende a jooti ja Ibulaimu ɔnɛ Bosombo aɔlɛmi wiilongi joomu la ɛnaanɛi. Anɛ, phakatosana alɛmɔlame luina la Sabato*»?

17 Asili Yesu nɔnda bingo, bitamba bende ba tɔti la nsɔni. Kinaki bankinɛ banto lalikuli, bako baiki bataisɛkɛya la besao lalikuli bɛɛntɔmpɔ bɛnɛ beiki ndako atakɛɛ.

18 Pa Yesu alɔndi lonkinɛ nte: «Ekeleka e Kanamombe* kɛtaɛlamya laanke? La taɔsɔna mbɛlamya laanke? 19 Engo ekeleka kɛtaɛlamya la yuuma inchɛ ya aladali, inɛ bonto ɔmɔɔ aoni weebeli ende. Ingo yuuma ya mɛni la yaandi bote. Mpulu ba phiki bilumba bɛɔ aliko la bitaphe

20 Yesu alɔndi lonkinɛ nte: «Ekeleka e Kanamombe kɛɔsɔna mbɛlamya laanke? 21 Ɛnɛ ekeleka ketaɛlamya la bosunga bɔnɛ wainto ɔmɔɔ akemeli a luanyisa la buunga ike, nende ango bongo bosunga* baulangisa bongo bunga lalikuli».

22 Yesu amemeisa la lɔkɛndɔ lande nchwa ɛ Yɛlusalɛma. Aiki atachu ataekya banto wɛɛsɛngɛ bɛnɛnɛ la besali. 23 Bonto ɔmɔɔ awuumboli nte: «Bɔkɔta, banto inchɛ too nde bakakolamaka loi»? Yesu abuuchisa nte: 24 «Kekemala nyo o mingela ɔ lɔkukɛ losali. Aliko, mbokosimela nyo sɔlɔ nte banto ike bakondolangaka mingela otema, kinaki phaataɔsɔna.

25 «Eleko ɛnɛ eemalaki ɔmɛlɛ lulu la ndipha lɔkukɛ, nyo oyalaki nyo ataemala anja. Akonoanja nyo mbakanya lɔkukɛ la nɔnda nte: ‹Bɔkɔta, otolipholele›! Ndako akondo kuucheyaka nyo nte: ‹Phalaeye emwima nyo›! 26 Ango akonoanja nyo nɔnda nte: ‹Iso ko bango balɛɛki la nywa kaama kamɔɔ labɛ. Lonkinɛ weekyaki o mboka ya bɛɛsɛngɛ bɛso.› 27 Kinaki ndako okondo asimelaka nte: ‹Nyo phalakoeye nyo, pasa nyo bɔɔ lami, nyo lalikuli baso nkɛɛ njambi›!

28 «Ango akonɔɛna nyo Ibulaimu, la Isaka la Yakɔbɔ la Baɛni* lalikuli bale weekeleka e Kanamombe. Kinaki nyo, akondo phupholama nyo anja! Engo, akondo lela nyo la nkɛkɛta bainyo. 29 Banto baimaki oopaselo ba yaani la wiingelelo ba yaani, la otamboka la ɔkɔngɔ. Bango banto bakondoyala batale lilɛ weekeleka e Kanamombe*. 30 Oka nyo! Banto bamɔɔ banɛ bale ba kantunda, bakondo yalaka batango. La bango bale batango, bakondo yalaka ba kantunda».

31 Weengo eleko, Bafalisayɔ* bamɔɔ bachweli Yesu la mboosimela nte: «Pasa anɛ wiichwoele kaama kankinɛ, aliko Helɔde ataone nko jaka». 32 Yesu aasimeli nte: «Chwaka lokoosimele nyo ongo bɔlɛndɛ nte lɛlɔ la loi lakondo ita basombo babe la mbikya bakɔnu. La loi ende lakondo yala mbosila bolemo bami. 33 Kinaki, kasana m'membeleya la lɔkɛndɔ lami lɛlɔ, la loi la laiphee. Aliko phakasane wɛɛni* ajakeme woonkinɛ ɔsɛngɛ anja la Yɛlusalɛma».

34 «Haa nyo banto ba Yɛlusalɛma! Ojakaka nyo bɛɛni*. La banto banɛ Kanamombe akotomeli nyo, ataajake nyo o mbobaokela babwɛ. Mala ike laiki latalange nkosaŋanya nyo wɛɛnte ŋango bosaŋanyaka nkɔkɔ biasa bende waaphaphu. Kinaki nyo koo mimeya! 35 Anɛ okanyo! Lulu lanyo lakondo chikala phololo. Mbokosimela nyo sɔlɔ nte phomɛnaki nyo lonkinɛ, mbiya nende eleko ɛlɔnda nyo nte: ‹Achwelame bochwako ongo ataande e lokombo la Bɔkɔta*›».