1 Eleko Yesu aiye ndako ɔɔsɛngɛ ba Yeliko, aiki atalange mbeta. 2 Woongo ɔsɛngɛ kaiki la bonto ɔmɔɔ aelelamaki Sakayo. Ɔnɛ Sakayo aiki waiyolo baangɛjisi ba kɔdi, lonkinɛ aiki boso nombo. 3 Aonaki mɛna Yesu iya ole nani. Kinaki aliko wiiki wuumbe, koo mbɔsɔna mbɔwɛɛna aliko la wiike baanto. 4 Aliko laingo, atangoli loango, auleli eliko ja bote nte aɛni Yesu, aliko ango kasani Yesu mbetela. 5 Laango Yesu aiye ndako ango kaama, alendi eliko la mboosimela Sakayo nte: «Sakayo, kitela loango, aliko lɛlɔ landalange ndala e lulu labɛ*».Sakayo ombuulela eliko nte aɛni Yesu

6 Sakayo akiteli loango, la aɛbɛisa Yesu la libɛla linɛnɛ. 7 Banto banɛ baɛni ŋango, baanjisa baniŋina la nɔndante: «Habaaa! Ombochwa ndala ele bonto oso njambi».

8 Kinaki, Sakayo aɛmali otamboka ba Yesu la mboosimela nte: «Hɛɛ Bɔkɔta oka! Lemi lakondo ɔya beola eteni beesanga bemi. La iya langɛjisa bonto besanga ike mbeta, lakondo wuucheya mala inɛi». 9 Yesu ɔlɔndi nte: «Lɛlɔ nkakolama imbwiiya ɔ lɔnɛ lulu, o ŋaanɛ ɔnɛ ŋango akɔ olende a jooti ja Ibulaimu». 10 Aliko lemi Bɔna a Onto laandi mona la nkakola banɛ balimeli.

11 Banto baiki baloko bataoke besao be Yesu wiiki ndako atalɔndɛ. Ango asukameli ndako bɔsɛngɛ ba Yɛlusalɛma, banto bakanyaki nte ekeleka e Kanamombe* kemoona mbiya kako nkango weengo eleko. Ango Yesu abaɔyisa bɔnɛ bomanu nte: 12 Kaiki la bonto ɔmɔɔ a bolunga ba bɔkɔta. Ɔnɛ onto akee lɔkɛndɔ nchwa o wooni ba bɔɔ nte akichame Bɔkɔta, la pa autole nomba o wooni bande. 13 Kinaki, otamboka la nchwa, aeleli banto joomu asamba bakambi bande. Aaphakeli lofalanga lɔmɔɔ lɔmɔɔ ja mbolo* aasimeli: Chulusa nyo layako nende ango autola lemi. 14 Kinaki, banto ba wooni bande baiki bata o nine. Wiingo baotomeli banto bachu nɔnda nte phaalange aakonja.

15 «Koonga ŋango, okichisami njala bɔkɔta. La autoli e wooni bande. Aiye ndako, aeleli bango bakambi bande joomu. Aliko olangi aeye kila onto obae bekulukulu ŋaande». 16 Bokambi otango aandi, alɔndi nte: «Bɔkɔta, bekulukulu be bae lemi o longo lofalanga kolonde inkinɛ joomu». 17 La ndako Bɔkɔta ande ɔlɔndi nte: «Olende mpame! Wɛɛ olende bokambi bɔlɔti! Aliko wiiki la lokani wiikambwa inchɛ, mbokokicha anɛ waiyolo wɛɛsɛngɛ joomu». 18 Bokambi a iphee la ndako aandi, la nɔnda nte: Bɔkɔta, bekulukulu be bae lemi o longo lofalanga lɔmɔɔ la mpiisa wɛɛ, ilende inkinɛ itano. 19 La Bɔkɔta ande aosimeli nte: Lawɛɛ mbokokicha njala bɔkɔta a bɛsɛngɛ be tano.

20 Pa bokambi onkinɛ aandi, alɔndi nte: «Haa Bɔkɔta, ɔsa lofalanga labɛ, la luisisa bɔlɔti wiimbala ya esenda. 21 Lakolawi ike, aliko wɛɛ oyalaka nde mpame a nkulu. Wɛɛ, ɔɔsaka bile bepha bɛɛ, lonkinɛ wuukaka bile wɛɛ koo mona. 22 Bɔkɔta ande aosimeli nte: ‹Wɛɛ olende bokambi bobe! Lakondo kotumbya mbetela bingo bile ɛ ntina la lolemu labɛ. Weeyi nte lemi njalaka mpame a nkulu, la mbɔsaka bile bepha bemi, la mbukaka bile lemi koo mona. 23 Anɛ aliko laanke, koo nkicha besanga bemi o bokombe? Mbɔ ombutola yami, ntondo tana imbokokeyama›! 24 Pa ongo Bɔkɔta asimeli bango baiki ango nte: ‹Ɔnɛ bokambi, kumula nyo ndako bengo besanga, ɔya nyo ongo obae bekulukulu mala joomu›. 25 La bako baosimeli nte: ‹Weekisi, mbɔ ongo ombosila njala la falanga joomu›! 26 Ndako awuuchisa nte: ‹Mbokosimela nyo nte bonto ole la ekambwa, ko ongo ɔɔyamaka kɛnkinɛ. Kinaki, ongo ole apha la ekambwa, o kumolamaka koonga ingo inchɛ ile ndako la keko›. 27 Lonkinme ongo Bɔkɔta ɔlɔndi nte: ‹Bitamba bemi, bango baiki koo nangaka nte m'baakonja, obaela nyo anɛ, la oajake nyo anɛ lataɛni›».

28 Eleko Yesu asili ndako nɔnda bengo besao, amemeisa lɔkɛndɔ lande nchwa ɛ Yɛlusalɛma, ole otamboka la banto. 29 Aiye ndako sukɛlɛ la bɔsɛngɛ ba Betefage la Beteniya, boleka ba bɔɔkɔ ba Miseituni. Atomi baeki* bande baphee la mbwasimela nte: 30 «Chwaka nyo wɔɔsɛngɛ bole otamboka lanyo. Aiya nyo kako, akondotana nyo bɔnkɛta ba mpunda ɔmbɔlɛmama, lonkinɛ ataɛmbaka bonto lalikuli. Lɛmɔla nyo ndako la ombela nyo ndako anɛ. 31 La iya onto akuumbolake nyo aliko laanke ɔmbɔ ɔlɛmɔla nyo, ucheya nyo ndako nte: ‹Bɔkɔta ɔmbɔ ɔlɔmba›».

32 Bango baeki batomami, bachwe. Batani ŋango baasimeli Yesu. 33 Aiki bako batalɛmɔla ongo bɔnkɛta ba mpunda, bokolo ande abaumboli nte: «Aliko laanke ɛmbɔlɛmɔla nyo ongo bɔnkɛta ba mpunda»? 34 La bako bawuuchisa nte: «Bɔkɔta kɔmbɔ ɔlɔmba».

35 Laango baɔtɔlɛli Yesu ongo bɔnkɛta ba mpunda. Pa baanjisa bisenda bɛɔ aliko lande, pa bawuulisa Yesu aliko lande. 36 Yesu amemeisa ndako lɔkɛndɔ, banto bachwe bataanja bisenda bɛbɔ e mboka*.

37 Yesu asukameli ndako bɔsɛngɛ ba Yɛlusalɛma, o likilikili ja bɔɔkɔ ba Miseituni, baeki bande lalikuli baandi la libɛla la manja nkucha Kanamombe la joi linɛnɛ, aliko la bintɔmpɔ lalikuli bɛɛni bako. 38 Baiki batachu batalɔndɛ:

«Achwelame bochwako Bɔkɔta ataande e lokombo la Bɔkɔta!

Bii ke yale aliko la loola,

la Kanamombe akuchame*»!

39 Laango Bafalisayɔ bamɔɔ, bango baiki woongo boloi baanto basimeli Yesu nte: «Weekisi, simba baeki baɛ»! 40 Kinaki Yesu abauchisa nte: «Mbokosimela nyo nte, banɛ bakɔwake, babwɛ ko balɔnda»!

41 Eleko Yesu asukameli ongo bɔsɛngɛ ba Yɛlusalema, aɛni ndako aoleleli. 42 Alɔndi nte: «Iya otoeya lɛlɔ besao bɛɔsɔna mbela bii! Kinaki bembwisama wɛɛnɛ eleko, phaɔsɔna m'mɛna. 43 Aliko biina betaande otamboka labɛ bitamba bɛbɛ bekondokɔlɛnga nte bakojakanya. La eleko eyala bako bataphike bakula, o mbwikenga sukɛlɛ labɛ, ango bakondo ko phika beleka lalikuli. 44 Bakondo ko kelola kelola kaama kamɔɔ la banto baɛ. Phaachikaki libwɛ aliko la linkinɛ, aliko koo mbeya eleko Kanamombe aandi ndako nko kakola».

45 Pa, Yesu aingeli e lulu la Kanamombe*, aiye ndako ongo aanjisa mbita basombisi. Aasimeli nte: 46 «Komoandekama ɔ Lɔɔsi Lɔɛlɔ nte: ‹Lulu lami lakondo yala lulu la malɔmbi›. Kinaki nyo, ombosilaka nyo mbɔlɔkɛɛ njala kaama ka baiyi mbisama*»!

47 Yesu aiki ataekya kila luina e lulu la Kanamombe. Kinaki, baiyolo ba Baeta atei*, la Baekisi* ba isaliya kaama kamɔɔ la bekongo be ɔsɛngɛ, baiki bataone bolengo ba mboojakya. 48 Kinaki koo mbɔsɔna, aliko banto lalikuli baiki batawooke la nsaki ike.