1 Aiki Yesu e lulu la Kanamombe alɛngisa baiso waanto lalikuli, aɛni bolengo bapashaki baso nombo mpato* weephaka. 2 Aɛni lonkinɛ wainto bobwele boola atapasha tofalanga tophee weengo ephaka. 3 Ango Yesu alɔndi nte: «Mbokosimela nyo sɔlɔ, ɔnɛ wainto bobwele boola ndako kombopasha mpato* ike ndeka banto lalikuli. 4 Aliko, bankinɛ lalikuli bambopasha mpato ele koofaida kaɔ. Kinaki, ɔnɛ wainto boola, ndako ombopasha lalikuli biiki ndako la beko o mbika».

5 Banto bamɔɔ baiki bata ɔmbɔla aliko la lulu la Kanamombe la Yelusalema. Baiki batalɔndɛ nte lombophikama bɔlɔti la babwɛ balɔti, la bikambwa binkinɛ bɛ nangya bɛnɛ bapashaki banto mpato ele Kanamombe. Kinaki Yeu ɔlɔndi nte: 6 «Binɛ lalikuli bitaɛni nyo, kakondo yala luina lɔnɛ koonga libwɛ limɔɔ phajachikalaki aliko la linkinɛ, ekambwa lalikuli kekondo phanjolama*».

7 Laango bango banto bawuumboli Yesu nte: «Weekisi, besao bɛnɛ betapasela eleko nke? La imbali nke ya ɛnya nte beona mpasela»?

8 Yesu abauchisa: «Ayeka nyo, ko limbamake nyo! Aliko banto ike bakonoanda o lokombo lami. Bakondo yala batalɔndɛ nte bako ko Kilisito*. La n'nɔnda nte eleko kembo sukama. Kinaki koalingitake nyo! 9 Eleko eyala nyo banto batalɔndɛ aliko la lisɛ la aliko la bolupho, kolawake nyo. Aliko kasana bingo lalikuli biiye obi. Kinaki eleko engo kantunda kakondo yala kataiye jɛ».

10 Pa Yesu aasimeli nte: «Banto bakondo jakana la banto bankinɛ. La Bɔkɔta akondo jakana la Bɔkɔta bonkinɛ. 11 Lɔsɔkɔ lɔnɛnɛ lakondo yala e wooni lalikuli. Kakondo yala botala la eeta o kaama ike. La e loola kakondo pasela imbali ya nsebalala la nsisa banto.

12 «Kinaki otamboka la bingo lalikuli mpasela, bakondo akemela la mbwatumbya. Bakondo atɔla nsamba o Basaŋanelo, la mbobaoka ɔ munyɔlɔlɔ. Lonkinɛ bakondo atɔla otamboka ba bɛkɔta la baiyolo ba beoni aliko la lokombo lami. 13 O longo lokombo, ko layala nyo atalɔndɛ binɛ bitaeye nyo aliko lami. 14 Anɛ, esana nyo mbeya nkɛɛnɛ: Koyalake nyo ataitumbya otamboka ba eleko nte asamba nyo nke. 15 Aliko lemi Lɛɛmɛlɛ ka kɔɔya nyo besao be limanya bɛnɛ beyala nyo atalɔndɛ, nende eleko eyala bitamba benyo phɛɔsɔna n' kojakanya nyo aɔ mbucha. 16 Koonga baoti banyo, la belunga benyo, la biseka benyo, la bako bakondo kopasha nyo otamboka la baiyolo. La bamɔɔ banyo bakondo amolela ntumbyama ya mbwa. 17 Banto lalikuli bakondo konina nyo aliko lami. 18 Kinaki, koonga ŋaanɛ, koo nende libo limɔɔ ja bɛtɛ benyo bɛɔsɔna nimela. 19 Yalaka nyo la lokani, aliko weengo mboka kɛ ɔsɔna nyo n'kakola luiko lanyo».

20 Yesu alɔndi lonkinɛ nte: «Eleko ɛɛna nyo bɔsɛngɛ ba Yɛlusalɛma bombɔlɛŋama la Bakɔlɔbɔi, ango aeya nyo nte eleko kembwiya ɛnɛ bɔsɛngɛ bɔnɛ bakondo phanjolama. 21 Laango, bango bayala e Yudeya balawa ɛ bɛɔkɔ. La bayala ɔɔsɛngɛ ba Yɛlusalɛma bapase otema, la bayala wiileme batautolake lonkinɛ ɔɔsɛngɛ.

22 «Aliko, bengo biina bekondo yala biina bɛnɛ be tumbya Kanamombe banto, aliko lalikuli beandekami ɔ Lɔɔsi Lɔɛlɔ bikokyame*. 23 Longo luina lakondo yala ŋandi o bainto bayala laakundu, la banɛ bayala batalɔmya! Aliko o wooni kakondo yala tosoya ike, la Kanamombe akondoɛnya n'kangi yande waanɛ banto. 24 Banto bamɔɔ bakondo jakema la bempanga, la bankinɛ bakondo tɔlama o beoni bɛnkinɛ lalikuli. La bɔsɛngɛ ba Yɛslusalɛma bakondo nyɛkama la banto bankinɛ, mbiya eleko e bako mpasa».

25 Yesu amemeisa nɔnda nte: «Imbali yakondoɛnamwa e yaani, la ŋɔndɔ, la tɔɔtɔ. La ɔnɛ o wooni banto bakondo yala o libweelo la bakondo kemelama la wɔɔma, aliko la lɔphɛphɔ la bolupho ba ɛtɛmbɔ e wango. 26 Banto bakondoyala batatene nkai aliko la wɔɔma, o n'konga besao bɛnɛ beiya e wooni. Aliko lalikuli bile la nkulu e wooni bekondo tɛkyama. 27 Pa, bakondoɛna ŋango baanda lemi Bɔna a Onto asamba loonge la nkulu la bokuchu bɔnɛnɛ. 28 Eleko eanja bengo besao mɛnamwa, emala nyo la minola bɛtɛ. Aliko eleko e n'kakolama yanyo kembwiya».

29 Ɔɔkɔngɔ laango, Yesu aokeli banto bɔnɛ bomanu nte: Lenda nyo bɔnɛ bote ba mutini la bete bɛnkinɛ lalikuli. 30 Eleko ɛɛnaka nyo ntiti yataanja ntɔngɔla, weeyaka nyo nte eleko e mbula kembo sukama. 31 Ŋango akɔ, wɛɛnake nyo besao bɛnɛ bemwanja mbiya, eya nyo nte ekeleka e Kanamombe* kembosukama. 32 Sɔlɔ, mbokosimela nyo nte, bengo besao bekondo koka la banto lalikuli bɛ bɛnɛ biina batabu jɛ. 33 Loola la wooni bekondo eta, kinaki besao bemi pheetaete koonga inchɛ.

34 Yesu alɔndi lonkinɛ nte: «Ayeka nyo! Basolo banyo batayalelake too ndɛɛ la nywa, la maŋanga aliko la luiko lanyo. Iya jɛ, longo luina la mbutola ya Kilisito* lakondo kuiyela nyo o mbitwa, 35 bolengo bo phambwaka lilonga. Aliko longo luina, lakondoiyela banto lalikuli ba wooni o mbitwa. 36 Ayeka nyo, la yala nyo atalɔmbɛ Kanamombe eleko lalikuli. Ɔkeeke nyo ŋaanɛ obaa nyo nkulu ya mpengwa bengo besao lalikuli biiyaki, la memala otamboka lami lemi Bɔna a Onto».

37 Eleko engo, Yesu wiiki ataseke e lulu la Kanamombe ataekya banto. Kinaki la ocho wiiki atachu ndala ɔ bɔɔkɔ ba Miseituni. 38 La mpendu banto baiki batachu e lulu la Kanamombe aliko bawooke.