1 Ɔkɔngɔ laango, Yesu alɛngi wɛɛsɛngɛ bɛnɛnɛ bɛnɛnɛ la besali, ataekya banto besako belɔti be ekeleka e Kanamombe*. Bakɛndi* bande joomu la aphee baotindisa. 2 Lonkinɛ wiiki la bainto banɛ ba pasisha ndako Basombo babe la bankinɛ abaikisa biale. Asaamba banɛ bainto kwiiki: Malia, ɔnɛ aelelamaki Malia Anamagadala. Ɔnɛ Malia, Yesu aopasisha basombo babe esambaele. 3 La Yɔana, waaja a Kusa. Ɔnɛ Kusa kaemalelaki besanga bɛ Elɔde. Kwiki ŋango akɔ Susana, la bankinɛ bainto ike. Banɛ bainto, bako nde bapashaki besanga bɛɔ aliko la mamola Yesu la baeki bande.

4 Banto ike baiki bataime o kila ɔsɛngɛ la mbwisaŋanya kaama kaiki Yesu. Yesu aapasisha bomanu bɔnɛ nte: 5 «Wooni ɔmɔɔ achwe mona boopho weebeli ende. Ango aiki ndako ataone boopho bande, bimuka bimɔɔ bɛkwɛɛ mpamba la mboka. Banto bainyeki la mpulu bailee. 6 Inkinɛ ya kwɛɛ waabwɛ. Amɛni yako, yaomi aliko ya pheki iloko ɔ lɔmɔtu. 7 Inkinɛ ya kwɛɛli asamba baumba. Bango baumba bamɛni kaama kamɔɔ la yako, yaiphiki. 8 Kinaki binkinɛ bimuka bɛkwɛɛli ɛ lɔmɔtu lɔlɔti. Ya mɛni la mbota bimuka miya miya». Yesu asili ndako nɔnda bingo, alɔndi nte: «Boso batoi ba mboka aoke»!

9 Baeki* ba Yesu ba wuumboli maana ba bongo bomanu. 10 Lande abauchisa: Nyo, ɔmbɔɔyama nyo wɛɛsɛ ba mbeya besao biisami weekeleka e Kanamombe*. Kinaki bankinɛ baɔ basana njala lataasimela weemanu, aliko

Bayale batalende, kinaki phaaɛni.

Bayale bataoke, kinaki bata eyake*.

11 Lonkinɛ Yesu alɔndi nte maana ba bongo bomanu ko bɔnɛ: Bimuka ko besao ba Kanamombe*. 12 Bimuka bɛkwɛɛ e mboka, bi mbwɛɛlama la banto banɛ baokaka besao be Kanamombe*. Pa bosombo o mbwiiya mpasha waasolo baɔ, aliko bataimeyake la nkakolama. 13 La bimuka binɛ bikwɛɛ waabwɛ, bimbɔɛlama la banto banɛ balembokaka besao be Kanamombe* la mimeya la libɛla. Kinaki bongo bosao phaabaka bejo waasolo baɔ. Bayalaka bataimeya weeleko too, la eleko e kekelama bako, bambosanjiya longo lakani laɔ. 14 La binkinɛ bimuka bikwɛɛ o baumba, bimboɛlama la banto baokaka besao be Kanamombe*. Kinaki liphikamaka waasolo baɔ aliko la besao ntipha la ntipha, la nombo la nanga besao be wooni. O ŋaanɛ phayaote bimuka. 15 La bimuka binɛ bikwɛɛ ɔ lɔmɔtu lɔlɔti, beko bitaɛlama la banto baokaka besao be Kanamombe* la lisolo lilɔti la ja tayali. Bako bachikalaka baimei la mbota bimuka.

16 Lonkinɛ Yesu a lɔndi nte: Koo bonto o toolaka litala la nkukumya la ephaka aɔ aliko la likicha entina la likenge. Kinaki, olikichaka ɔ lɔkɔphɔ, aliko kila onto aingela otema aɛni ekowa. 17 Lalikuli eisami, kekondo isolama phololo. La lalikuli ɛ kɛɛma e yuungu yakondo eyama phololo.

18 Aliko la ingo, ayeka nyo la besao betaoke nyo! Aliko ongo ole la ekambwa, kɔɔyamaka enkinɛ. Kinaki, ongo ole apha la ekambwa ko kumolamaka koonga engo ketakanya ndako nte ole la keko.

19 Luina lɔmɔɔ, lele la baotwa la Yesu baɔkɛndɛli. Kinaki koo mbɔsɔna mboosukamela aliko la wiike baanto. 20 Baosimeli Yesu bengo besako nte: «Nyɛŋɛbɛ la baotwa labɛ balende aanja, bandalange nkɔɛna». 21 Kinaki Yesu asimeli banto nte: «Nyɛŋɛmi la baotwa lami ko bango baokaka bosao ba Kanamombe la nkemela».

22 Luina lɔmɔɔ, Yesu auleli ɛ Kyɔmbɔ la baeki bande, aasimeli nte: «Tosaphwe wango nende boleka bonkinɛ». La bachwe.

23 Aiki bako batakɛndɛ, Yesu aoki ilɔ, alali. Kako nkango Ɛtɛmbɔ eolo keanjisa ndupha iloko la wango. Iloko yaanjisa mingela ɔ Kyɔmbɔ, baiki o libweelo. 24 Baeki* bachwe memola Yesu, la mboosimela: «Weekisi! Weekisi! Tombobwa»!

Yesu aemwe, la mpangwela ike longo lɔphɛphɔ la ɛtɛmbɔ, la bɛkɔwi la kaiki bii nɛnɛ. 25 Pa Yesu aumboli baeki bande nte: «Lokani lanyo lole ende»? Kinaki bako ba sebalali la ndawa la nsimelana: «Ɔnɛ ole nani, nende lɔphɛphɔ la ɛtɛmbɔ lota wooke»?

26 Ɔkɔngɔ laango, Yesu la baeki bande basaphwe wango, baemali o wooni ba Wagelasi boleka bɔnkinɛ ba wooni ba Galilaya. 27 Yesu aiki atakitela ɔ kyɔmbɔ, bonto ɔmɔɔ a ongo ɔsɛngɛ aandi sukɛlɛ la ndako. Ɔnɛ onto wiiki la basombo babe. Biina ike, ongo koo ndɔtaka lonkinɛ bisenda, kinaki ayalaki too o baombo. 28 Aɛni ndako Yesu, aiyoki anyɔi otamboka lande alɔndi la joi linɛnɛ: «Wɛɛ, Yesu Bɔna a Kanamombe* ole eliko lalikuli, atamone laanke? Mbokoseya ko ntumbyake»! 29 Ɔlɔndi ŋango aliko Yesu wiiki atasimela ongo bosombo bobe aopase. Ongo bosombo bobe wiiki etaokemela ɔnɛ onto biina lalikuli. Lonkinɛ koonga banto baɔlɛmi bekolo la bakasa la minyɔlɔlɔ o mboochunga, kinaki wiiki ataitena tena too. Lonkinɛ ongo bosombo bobe wiiki atawɛɛmbɛ eiki koo anto.

30 La Yesu awuumboli: «Lokombo labɛ nani»? Aliko wiiki ombokemelama la basombo babe ike. 31 Bango basombo basɛi Yesu ataatɔlake e liphuku litale.

32 Kaama kango kaiki la boloi bɔnɛnɛ ba nsombo yaiki yatale weekondi. Bango basombo babe baosɛi ike Yesu abaɔya luusa la mingela wiingo nsombo. La Yesu abaɔyisa luusa. 33 Aliko la ingo, bango basombo babe bapasi ele ongo onto, la baingeli wiingo nsombo. La bakiteli e wango la nkilimwa la ninda.

34 Bango bachungi baɛni bingo lalikuli be paseli. Balawi wɛɛsɛngɛ la tɔsɛngɛ tɔnchɛ nsimela banto bengo besako. 35 Banto baandi mɛna bepaseli. La bako baiye kaama kaiki Yesu, batani ongo onto apashemi basombo babe, atayale weekolo be Yesu, ole ɔmbɔlɔta bisenda la ole la limanya. Bango banto balawi. 36 Bango banto baiyɛnɛli, basuudisa bingo bipaseli, ango basimeli bankinɛ bolengo baiki ongo anto akemelami la basombo babe wiikyami ndako. 37 Banto ba wooni ba Gelasi ba baemi la wɔɔma. Aliko la ingo ba lɔmbi Yesu aapasele o wooni baɔ. Yesu auleli ɔ kyɔmbɔ aliko, achu lande. 38 Ongo apashemi basombo babe, asɛi Yesu achu lande. Kinaki, Yesu koo nanga, ila aosimeli nte: 39 «Utola e lulu ɔlɔndɛ lalikuli bimbo ko keela Kanamombe*».

Ongo onto aingeli ɔɔsɛngɛ atasimela banto lalikuli beokeeli Yesu.

40 Eleko eutoli Yesu boleka onkinɛ ba wango, boloi baanto bo wɛɛbisa, aliko bako lalikuli baiki nde bataokonge. 41 Ango kwiiki waiyolo ɔmɔɔ Baasaŋanelo aelelamaki Yailo. Aiye la nkɔma balwe otamboka ba bekolo be Yesu. Asɛi Yesu ike nte aingele kande. 42 Aliko bophoko ande wiiki nkɔna ike. Wiiki bɔna ɔmɔɔ, oso bilongi joomu la biphee.

Eleko Yesu aiki atachu ka Yailo, banto baiki bata ophike beleka lalikuli. 43 La woongo oloi kwiiki wainto ɔmɔɔ aiki la waale ba mpasa bekila ilango bilongi joomu laiphee. Wiiki ombo nsusha besanga bende lalikuli o baingi, kinaki koo ɔnɛ awiikisa. 44 Ɔnɛ wainto wiiki atalingita Yesu ɔɔkɔngɔ, akooli nsɔli e esenda e Yesu. Kako nkango waale bande ba mpasa bekila bosili. 45 Yesu aumbɔli: «Nani omonkoola»? Banto lalikuli batati. Ango Pɛtɛlɛ awuumboli: «Bɔkɔta, phaɛni bɔnɛ wiike baanto bambo kolɛnga la nkophika»? 46 Kinaki Yesu ɔlɔndi: «Kolende la onto onkooli, aliko mbooka nkulu yami imbopasa». 47 Ongo wainto aɛni ndako nte omboeyama, achwe eiki Yesu atasɔkɛ la wɔɔma. Akɔmi balwe otamboka bande. Alɔndi otamboka baanto lalikuli ɛnɛ ɛɔtomi aokoole Yesu la bolengo nke mbwiki ndako kako nkango. 48 Yesu aosimeli: «Bophoko ami, lokani labɛ lombo koikya. Chwaka bii».

49 Ango aiki Yesu oloko atalɔndɛ, kwiiye bonto ɔmɔɔ aime ele wiyolo Yailo. Aosimeli: «Waiyolo, bophoko abɛ ombobwa! Ko ɛnyake lonkinɛ weekisi»! 50 Aoki Yesu bingo, asimeli Yailo: «Kolawake; imeya too, bophoko abɛ landako akondo ika».

51 Yesu aiye ndako o lulu la Yailo, koo mimeya bonto aingele kaama kamɔɔ lande, ila Pɛtɛlɛ la Yɔani la Yakɔbɔ la baoti ba ongo bophoko. 52 Banto lalikuli baiki e lotoko la batalele aliko la ongo bɔna. Kinaki Yesu aasimeli: «Kolelake nyo, aliko bɔna atabu, kinaki andalale too»! 53 La bako ba wɔɔli aliko baeyi nte ongo bɔna ombosila mbwa. 54 Kinaki Yesu akemeli ongo bophoko o likasa alɔndi: «Bɔna, emwa»! 55 La kako nkango weemwe la aemali. Yesu aasimeli ba wɔɔya bɔna lilɛ. 56 Baoti bande basebalali ike. Kinaki Yesu aasimeli batasimelake bonto besao lalikuli bingo bi kɛɛmi.