1 Wiina ba libɛla ba bitumbula koo bosunga, eelelamaki Pasaka*, iiki kembo sukama. 2 Bɛkɔta be Baeta atei* la baekisi ba isaliya baonaki mboka e njakya Yesu. Kinaki balawi banto.

3 Laango, Bosombo aingeleli Yuda aelelamaki Esikaliyɔte. Ongo Yuda aiki ɔmɔɔ a bango bakendi joomu laaphee ba Yesu. 4 Ɔnɛ Yuda achwe, mɔmbɔla la baiyolo ba baeta atei, kaama kamɔɔ la baiyolo ba bachungi ba lulu la Kanamombe*, nte aokane la bako aliko la bolengo baɔsɔna ndako mbwaphakela Yesu. 5 La bako baisekiisa baokani la ndako la mboolakela nte bakondo wɔɔya bakuti. 6 Yuda aimiisa, la aanjisa mona eleko ɛlɔti e ndako mphaka Yesu ele banto phaaeye.

7 Laango, luina la bitumbula koo bosunga laiye. Longo luina ko, kasani nchinja bɔnkɛta baɔkɔkɔ ɔ libɛla ja Pasaka*. 8 Laango Yesu aatomi Pɛtɛlɛ la Yɔani, aasimeli nte: «Chwaka nyo lɔkɔ lɔngɔsɔlɛ lilɛ ja Pasaka*». 9 La bako bawuumboli: «Alanga tolambe lingo lilɛ ende»? 10 La ndako nte: «Oka nyo: Eleko eiya nyo ɔɔsɛngɛ, akondo saŋana nyo la mpame ɔmɔɔ ataɛmbɛ mboka e iloko. Lingita nyo ndako nende otema ba lulu laingela ndako. 11 La akondosimela nyo ɔmɛlɛ longo lulu nte: ‹Weekisi omuumbula nte ende ele kiumba ketaleela ndako lilɛ ja Pasaka* kaama kamɔɔ la baeki* bande›. 12 La ndako akondo kɔɛnya nyo kiumba kɛ Gɔlɔfya kɛlɔngɔsɔlami bɔlɔti. Engo ke lamba nyo lilɛ ja Pasaka». 13 Laango, bango baeki bachwe, batani bikambwa lalikuli solo ŋango aasimeli Yesu. Balɔngɔsɔli lilɛ ja Pasaka.

14 Eleko ekoki kako, Yesu ayali ndɛ lilɛ la bakɛndi* bande. 15 Aasimeli nte: «Nangi ike ndɛ linɛ lilɛ ja Pasaka kaama kamɔɔ lanyo, otamboka la ntumbyama yami. 16 Aliko, mbokosimela nyo nte, phandɛɛki lonkinɛ lilɛ ja Pasaka* koonga inchɛ nende luina lolɛɛki lemi lingo ja nkoka weekeleka e Kanamombe*».

17 Pa akemeli ephophele ɛ difai, la nsakoya Kanamombe, la nɔnda nte: «Pɔkɛla nyo ɛnɛ ephophele, phaka nyo asamba nyo. 18 Aliko, mbokosimela nyo, phanywaaki lonkinɛ difai koongo inchɛ, nende ango aiyaki ekeleka e Kanamombe».

19 Pa Yesu aɔsi kitumbula, pa nsakoya Kanamombe, akekeloli la mbɔya baeki bande. Alɔndi nte: «Binɛ ko bionge bɛmi bimbophakema aliko la nyo. Yala nyo atakɛɛ ŋaanɛ o linkanya».

20 Okee ŋango akɔ oephophele pa ndɛ, Yesu okemeli ephophele la nɔnda nte: «Enɛ ephophele kelende lilaka ja kasende ja Kanamombe mbetela bekila bemi bɛnɛ bembosuwa aliko lanyo.

21 «Kinaki, ɛna nyo! Bonto ɔnɛ amphaka katale lemi lande kaama kamɔɔ. 22 Sɔlɔ, lemi Bɔna a Onto lakondo ibweela lami ningitana la ŋango balɔndi Kanamombe. Kinaki ŋandi ele ongo amphaka». 23 Laango baeki baanjisa mumbolana nte nani asamba bako aɔsɔna nkɛɛ bongo bosao. Yesu ɔmbɔlɛ lilɛ ja Pasaka kaama kamɔɔ la bakɛndi bande

24 Pa asamba baeki ba Yesu kapaseli toamo nte nani ole waiyolo aliko la onkinɛ. 25 Yesu aasimeli nte: Asamba banto bale phaeye Kanamombe baiyolo baɔ baakonjaka nde onkulu. La baso nomba aliko la bako baiyelelaki ''Balɔti''. 26 Kinaki nyo koyalake nyo atakɛɛ ŋango. Bonto ole waiyolo ndeka onkinɛ, asana njala wɛɛnte ndako kole mpɔu. La ataemalela bankinɛ, asana njala wɛɛnte bokambi abɔ. 27 Anɛ, nani ole waiyolo ndeka wiina lande asamba banɛ baphee? Ko ongo atayale atale aɔ ongo ataopakolela? Mbɔ ongo atayale atale! Kinaki koonga ŋaanɛ lemi nende asamba nyo wɛɛnte atakokambela nyo.

28 Nyo okinyisa nyo njala lami asamba mayalibu bami. 29 Wiinɛ mbɔkɔya nyo ekeleka wɛɛnte ŋango bompiisa isɛmi. 30 Wiingo, akondɔlɛ nyo la nywa kaama kamɔɔ lami weekeleka e Kanamombe. Lonkinɛ nyo nde bayala wiijee be ekeleka, o ntumbya bikanga joomu la biphee be Isilaeli.

31 Yesu aosimeli Simo Pɛtɛlɛ nte: «Simo, Simo! Oka! Bosombo ɔmbɔɔyama luusa la mbwaphophola wɛɛnte bophopholaka bako ngano, aliko aakekele. 32 Kinaki lemi nkɔlɔmbɛli aliko lokani labɛ kami lotalimelake. La eleko e mbutolela wɛɛ, ila baotwa labɛ nkulu ya lisolo».

33 Landako Pɛtɛlɛ awuuchisa nte: «Bɔkɔta, lemi nende tayali o nchwa labɛ e munyɔlɔlɔ, koonga mbwa kaama kamɔɔ labɛ».

34 Yesu la ndako nte: «Pɛtɛlɛ, mbokosimela nte, lɛlɔ otamboka la nkɔkɔ mbeka, akondo yala ombosila lintata mala isato nte phambeye».

35 Pa, Yesu abaumboli baeki bande nte: «Eleko ekotomi nyo lemi koo bakuti, aɔ mɔfukɔ aɔ tomposo, kole la ekambwa epheki nyo»? La bako nte: «Jɛ»!

36 Ango Yesu aasimeli nte: «Kinaki anɛ, ɔnɛ ole la lofalanga alɔɔsi, ole la mɔfukɔ aɛmbɛ. La ole apha la lokula, asombya esenda ende aliko alosombe. 37 Aliko mbokosimela nyo, kasana bɛnɛ besao bembiyele, bile njalaka bitaandekama ɔ Lɔɔsi Lɔɛlɔ nte: ‹Aajemi kaama kamɔɔ la bakumoli*›. Aliko besao be linenda lemi, bilende sukɛlɛ la mbiya e kantunda».

38 Baeki bande baosimeli nte: «Bɔkɔta, anɛ tolende la bempanga bephee». La ndako nte: «Bengo besao besilele ango»!

39 Yesu apasi ango kaama, auleli ɛ bɔɔkɔ ba Miseituni wɛɛnte ŋango baiki nsao ende. Baeki bande baolingiti. 40 Aiye ndako ango kaama, aasimeli baeki bande nte: «Lɔmba nyo, Kanamombe, aliko otakoake nyo asamba mayalibu».

41 Pa, aaŋani bɔɔ inchɛ la bako, ootale ba onto mboka libwɛ. Akɔmi balwe aanjisa nɔmba Kanamombe nte: 42 «Phapha, olangake ɛnɛ ephophele e ntumbyama, ɔkɛtɔlɛ bɔɔ lami! Koonga ŋaanɛ, kotayalake wɛɛnte ŋango balanga lami, kinaki belanga wɛɛ ko biyale».

43 [Pa ephongo ɛmɔɔ aimeli e loola aopaseli aliko awɔɔya nkulu. 44 Yesu wiiki o ŋandi ike, amemeisa nɔmba Kanamombe la lonkendo ike. Bianga biiki betaopase biiki bike wɛɛnte bampɔpɔ baekila, biiki betakwa anyɔi].

45 Asili ndako nɔmba, aemali la mbutola kaama kachiki ndako baeki* bande. Aatani bambo lala, aliko la ŋandi. 46 Aasimeli nte: «Aliko laanke embolala nyo? Emwa nyo ɔlɔmbɛ nyo, Kanamombe koandake nyo mingela o mayalibu».

47 Yesu wiiki oloko atalɔndɛ, kapaseli boloi baanto. Yuda, ɔmɔɔ asamba bakɛndi joomu laaphee ba Yesu kaiki otamboka baɔ. Asukami sukɛlɛ la Yesu nte awɔɔmbɛ bakango. 48 Kinaki Yesu awuumboli nte: «Yuda! Olimomba bakango komomphaka wɛɛ lemi Bɔna a Kanamombe»?

49 Baeki ba Yesu baɛni bingo bioni nkɛɛma, ba wuumboli nte: «Bɔkɔta, taɔsɔna mbwatɛmɔla temɔla la nkula»? 50 Ɔmɔɔ abɔ kako nkango ateni bokambi awaiyolo a baeta atei litoi ja loome. 51 Kinaki Yesu alɔndi nte: «Sanjiya nyo ŋango»! Akooli litoi ja ongo onto, la awiikisa.

52 Pa Yesu aasimeli baiyolo ba baeta atei, la baiyolo baachungi ba lulu la Kanamombe, la bekongo Beayuda baandi mbookemela nte: «Aliko laanke emombiyela nyo lemi la bempanga, la bephapho wɛɛnte lemi nende wiiyi»? 53 Mbiki lanyo biina lalikuli e lulu la Kanamombe la koo linkemela nyo. Kinaki, ɛnɛ ko eleko enyo, lonkinɛ ko eleko e nkulu ya wiilima.

54 Pa banto baokemeli Yesu. Baɔtɔli e lulu la baiyolo la baeta atei. Pɛtɛlɛ aiki ataolingita ɔbɔɔ.

55 Iya yaiki yatatoolama atiya ba kiwanja ke baiyolo ba baeta atei*. Pɛtɛlɛ ayali ataoke iya kaama kamɔɔ la bako. 56 Wainto ɔmɔɔ aɛni Pɛtɛlɛ atayale sukɛlɛ la iya, aɔnyɛkɛli baiso la nɔnda nte: «Ɔnɛ onto la ndako wiiki kaama kamɔɔ la Yesu». 57 Kinaki Pɛtɛlɛ atati la nɔnda nte: «Wɛɛ ɔnɛ wainto! Lemi phala eye ongo onto»!

58 Pa eleko inchɛ, bonto onkinɛ aɛni Pɛtɛlɛ, aɔsimeli nte: «Labɛ olende ɔmɔɔ abɔ»! Kinaki Pɛtɛlɛ awuuchisa nte: «Jɛ, lemi lapha ɔmɔɔ abɔ»!

59 Pa saa ɛmɔɔ mbeta, bonto onkinɛ aandi membeleya Pɛtɛlɛ nte: «Sɔlɔ ɔnɛ onto wiiki too kaama kamɔɔ la Yesu, aliko la ndako ŋango akɔ olende bonto a Galilaya». 60 Kinaki Pɛtɛlɛ awuuchisa nte: «Ee Bɔkɔta, phalaeye ataone nɔnda nke»! Kwiiki Pɛtɛlɛ oloko atalɔndɛ, kako nkango nkɔkɔ keeki. 61 La ndako Bɔkɔta atulwe la nenda Pɛtɛlɛ. Ango Pɛtɛlɛ okanyisa bingo beosimeli Bɔkɔta nte: «Lɛlɔ otamboka la nkɔkɔ mbeka, akondo yala ombosila lintata mala isato nte phambeye». 62 Ango Pɛtɛlɛ kako nkango apasi ango la manja ndela la nkangi.

63 Bango banto baiki batachunge Yesu, bawɛɛlɔlɛli la mboophoma. 64 La baoliphi baiso, la bawuumboli: «Nani atakophome? Eya, tɔɛni»! 65 Baanjisa mboosimela besao benkinɛ ike be mbootola.

66 Aiki kako mpendu, mbalasa Yaayuda la baiyolo ba baeta atei kaama kamɔɔ la baekisi ba Isaliya basaŋani. Baɛlisa Yesu otamboka ba mbalasa* ɛbɔ. 67 Bawuumboli nte: Wɛɛ ko Kilisito? Otosimele! La ndako nte: «Nkosimelake nyo, phaimeya nyo. 68 La nkuumbolake nyo bosao, phambucheya nyo. 69 Kinaki, manja anɛ, lemi Bɔna a Onto mbochwa njala boleka ba loome la Kanamombe ɔmɛlɛ nkulu».

70 Aliko la inɛ bako lalikuli bawuumboli nte: «Ko nɔnda wɛɛ ko Bɔna a Kanamombe»? Yesu abauchisa nte: «Nyo amɛlɛ bambo lɔnda sɔlɔ nte lemi ko Bɔna a Kanamombe». 71 Pa, bako balɔndi nte: «Phataeye usuula bɔnkinɛ aliko la ɔnɛ onto, aliko tombo iyookela iso amɛlɛ bingo bimbo lɔnda ndako».