1 Aiye kako luina la yiinga mpendu kɛmɛlɛ, bango bainto baɛmwɛli o baombo, bale la bauta ba limbala banɛ balɔngɔsɔli bako. 2 Batani libwɛ jakichami ɔ lɔkukɛ ja jombo limbo sɛmɛyama e mpamba. 3 Baingeli e jombo, kinaki koo ntana bionge be Bɔkɔta Yesu. 4 Bengo besao beasebalali ike aiki bako baloko bata sebalala, kako nkango banto baphee balɔtaki bisenda biɛlɔ pɛɛ, baemali sukɛlɛ la bako. 5 Ango aliko la wɔɔma, bango bainto balendi anyɔi. Kinaki bango banto baasimeli nte: «Aliko laanke etaone nyo bonto ɔnɛ ole e luiko asamba babwe? 6 Apha lonkinɛ anɛ, ombosila tondwa! Kanya nyo besao bekosimeli nyo ndako eleko iiki ndako oloko Galilaya. 7 Mbɔ alɔndi nte: ‹Kasana lemi Bɔna a Onto mpakeme waakaasa baanto babe. Bakondo ntumbya waalemba, kinaki luina la isato pa mbwa yami, lakondo tondwa›».

8 Bango bainto ango bakanyisa besao bengo Yesu aasimelaki. 9 Baimi e jombo, bachwe nsimela bakɛndi joomu la ɔmɔɔ ba Yesu la bankinɛ banto bengo besako. 10 Bango bainto basimelaki bakɛndi bengo besako ko banɛ: Maliya aɔsɛngɛ ba Magadala, Yɔana la Maliya nyɛngɛnde la Yakɔbɔ, la bainto bankinɛ. 11 Kinaki Baeki bakanyisa nte bengo besako be bango bainto bile koo sikisiki, la koo mboobiimeya.

12 Kinaki Pɛtɛlɛ ndako aemali la nchwa loango e jombo. Aiye ndako engo, ainami, aɛni nsanda ntoo ɛnɛ ɛlɛngisa ako kako bionge be Yesu. Pa, autoli kande atasebalala ike aliko la besao bɛnɛ bembo kɛɛma.

13 Luina lako longo, baphee ba baeki ba Yesu, baiki batachu ɔɔsɛngɛ ɔmɔɔ baelelamaki Emau. Bongo bɔsɛngɛ baphikami o bilomɛtɛlɛ ilango joomu la ɛmɔɔ la ɔɔsɛngɛ ba Yɛlusalɛma. 14 Baiki batachu bata ɔmbɔla aliko la bengo besao lalikuli bɛkɛɛmi. 15 Aiki bako baloko bata ɔmbɔla la mumbolana, Yesu nɛmɛlɛ aapaseli, la nsambela la bako mboka. 16 Bawɛɛni, kinaki baiso baɔ baliphami bataweeyake.

17 Yesu abaumboli: «Olenyo atachu ataɔmbɔla nyo aliko laanke»? La bako baemali bii, bale la ŋandi. 18 Ɔmɔɔ abɔ aelelami Kɛlɛɔpa, awuuchisa nte: «Wɛɛmɛlɛ opholi ɛ Yɛlusalɛma kole phataeye binɛ beetami ɔnɛ wɛɛnɛ biina bephee»? 19 La ndako abauchisa nte: «Ko besao nkee»? La bako bawuuchisa: «Tataɔmbɔla aliko la besao beobae Yesu a Nasalɛti! Ɔnɛ Yesu wiiki nde wɛɛni ɔ nɛnɛ. Lonkinɛ wɛɛnyisa nkulu yande ɔ nɔnda la nkɛɛ bintɔmpɔ otamboka ba Kanamombe la otamboka baanto.

20 «Baiyolo ba Baeta atei baso la bɛkongo bɛso, baophaki aliko atumbyame mbwa. Pa baotumbisa waalemna. 21 Iso tuiki la tandakicha lokani nte ndako ka kakola Isilaeli. Kinaki, lɛlɔ ko luina la isato bengo besao bɛkɛɛmi. 22 Lonkinɛ, bainto bamɔɔ ba boloi ba kaso ba mbotosebalala. Banɛ bainto ba emweli mpendu e jombo, 23 kinaki koo ntana bionge bende. Bautoli ba baɛlisa besako nte biphongo baapaseli la mbwasimela nte Yesu olende e luiko. 24 Pa bankinɛ bamɔɔ baso bachwe e jombo, batani besao wɛɛnte ŋango bɔlɔndi bango bainto. La bako ŋango akɔ koo mɛna bionge bende».

25 Ango Yesu aasimeli bango baeki nte: «Nyo banto bale bapha la limanya, basolo banyo balende bolito o mimeya loango besao lalikuli bɛnɛ bɛlɔndi baɛɛni. 26 Mbɔ kosani Kilisito* atumbyame ŋaanɛ otamboka ba mingela o bokuchu bande»! 27 Pa aasimeli besao bɛnɛ beandekami aliko lande ɔ Lɔɔsi Lɔɛlɔ. Aanjisa o mabuku ba Musa nende o mabuku ba Baɛɛni lalikuli.

28 Asukameli bako ɔɔsɛngɛ bachwelaki bako kako, Yesu akee wɛɛnte ɔnɛ aeta. 29 Kinaki baɔsɛi nte: Philiye komemeyake lonkinɛ la lɔkɛndɔ aliko wiina bawoona mbila. Aingeli e lulu la njala la bako. 30 Eleko eyali ndako ɔ ndɛ la bako, Yesu aɔsi kitumbula asakoisa Kanamombe, akekeloli, aaphakeli. 31 Ango kako nkango baiso baɔ baliphowe, baweeyi; kinaki Yesu alimeli o baiso baɔ. 32 Baanjisa nsimelana nte: «Sɔlɔ! Basolo baso baiki la libɛla eleko ɛnɛ iiki ndako atatosimela aiki la Lɔɔsi Lɔɛlɔ engo e mboka».

33 Kako nkango bango baeki* baphee baemali la mbutola ɛ Yɛlusalɛma. Batani bango bakɛndi* joomu la ɔmɔɔ la banto bankinɛ ba boloi baɔ. 34 Bango basaŋani basimeli bango baeki* baphee nte: «Sɔlɔ Bɔkɔta ombo tondwa! Koonga Simo ɔ wɛɛni»!

35 La bango baeki* baphee baasimeli baina labɔ bingo beapaseli e mboka, bolengo nke baeyi bako Yesu eleko akeloli ndako kitumbula.

36 Eleko bango baeki* baphee baiki baloko bataɔmbɔla kako nkango, Yesu apaseli asamba bako. Aasimeli nte: «Yala nyo la bii»!

37 Laango, baeki lalikuli babaemi la wɔɔma ike, aliko bakanyisa nte ba mɔɛna boyombi. 38 Kinaki Yesu abaumboli nte: «Aliko laanke embosowa nyo? Aliko laanke ole nyo la mashaka waasolo banyo? 39 Lenda nyo baambo bami la bekolo bemi, kolende lemi lɛɛmɛlɛ sɔlɔ. Ɔmbabate nyo, la wɛɛni nyo. Aliko boyombi phayalaka la benu aɔ baumba. Kinaki lemi ɔmwɛna nyo nende la beko*». 40 Pa Yesu nɔnda bingo, abaɛnyisa baambo la bekolo bende.

41 Bango baeki* baiki bata imeya jɛ, aliko la libɛla la nsebalala yaɔ. Wiingo Yesu abaumboli nte: «Olende nyo la limɔɔ lilɛ anɛ»?

42 Bawɔyisa eteni e nsee e ntumba. 43 Akɛɔsi, la alee, bako lalikuli bata wɛɛni. 44 Pa aasimeli, eleko iiki lemi kaama kamɔɔ lanyo lakosimeli nyo nte: Besao beandekami aliko lami wiisaliya ya Musa la omabuku ba baɛni la olibuku ja Sabuli kasana bekokyame lalikuli.

45 Ango Yesu, aalipholi limanya jaɔ, nte baeye Lɔɔsi Lɔɛlɔ. 46 Lonkinɛ aasimeli nte: «Komoandekama nte kasana Kilisito* atumbyame, la biina besato ɔkɔngɔ ya mbwa yande atondwa*. 47 La o lokombo lande, nde ke simela bako banto lalikuli nte batulwa la mpasa o njambi yaɔ, aliko batikelame. La bingo bianjele ɛ Yɛlusalɛma. 48 Nyo ko basuula wɛɛnɛ besao. 49 La lemi lakondo kotomela nyo ɔnɛ akolakeli nyo isɛmi. Kinaki nyo yala nyo obi ɔɔsɛngɛ ba Yɛlusalɛma nende eleko eba nyo nkulu mima e loola*».

50 Pa Yesu apasi la baeki* bande ɔɔsɛngɛ ba Yɛlusalɛma la mbwatɔla sukɛlɛ la ɔsɛngɛ ba Betaniya. Aiye bako ango, asakoli bakasa bande eliko, la aachweli bochwako. 51 Eleko iiki ndako oloko ataachwela bochwako, aachiki, la aɔsami e loola. Yesu ombochwa e loola 52 La bako ŋango akɔ baɔkuchisa. Pa bautoli ɛ Yɛlusalɛma la libɛla ike. 53 Biina lalikuli, baiki bale otema ba lulu ba Kanamombe bataokucha, Kanamombe.