1 Ena ŋango Besako Belɔti be Yesu Kilisito, Bɔna a Kanamombe bemoanja. 2 Ŋango waandikami kako e libuku ja wɛɛni* Isaya:

«Kanamombe alɔndi, lakondo toma botomi ami wɛɛni Isaya akotangolele.

Aliko akolɔngɔsɔlɛlɛ mboka*.»

3 «Bonto ɔmɔɔ ole woosowe* ombɔlɔnda la joi linɛnɛ nte:

‹Lɔngɔsɔlɛla nyo Bɔkɔta mboka.

Sɛngɔla nyo kaama kaeta ndako*›».

4 Kako nkango Yɔani oso mbatisa apaseli woosowe ba wooni ba Yudeya. Aiki nde atasimela banto nte: «Engola bolengo banyo la mbatisama nyo la Kanamombe akondo ko sokolela nyo njambi yanyo.» 5 Banto lalikuli ba wooni ba Yudeya la banto ba bɔsɛngɛ ba Yɛlusalɛma baandaki boleka ba Yɔani. Bango banto balɔmbi ŋandi aliko la njambi yaɔ la ndako mbwa batisa otema ba losi ba Yɔlɔdani.

6 Yɔani alɔti bisenda bisɔnami la lɔɔwa la nyama ɛmɔɔ etaelelama Ngamiya. La ndɔta bɔya ba lɔɔwa e joombo jande la lilɛ jande jaiki nde mpande la obwe. 7 Alɔndaki la banto nte: «Ɔnɛ ataande ɔkɔngɔ lami ndako kole la nkulu lindeka lemi, phalaɔsɔna koonga minama nɛmɔla nkɔli ya toposo tande. 8 Lemi, nende latakobatisa nyo wiiloko, kinaki, ndako, akondo kobatisa nyo la Lɔkɛngɛ-Lɔɛlɔ».Yɔani oso mbatisa ataekya banto aliko la Yesu manda

9 Weengo eleko, Yesu aimi e wooni ba Nasaleti la e bɔsɛngɛ ba Galilaya. La Yɔani oke mboo batisa otema ba losi ba Yɔlɔdani. 10 Ango Yesu aimi ndako e losi, kako nkango aɛni loola lomboliphwa, la Lɔkɛngɛ-Lɔɛɛlɔ oke nkitela aliko lande phoke elenga ɛmɔɔ. 11 La otema ba loola, joi limɔɔ like mbokama like nɔnda nte: «Wɛɛ, kole Bɔna ami a mpame ɔnɛ alanga lemi, wɛɛ kombo nangya»!

12 Kako nkango, Lɔkɛngɛ-Lɔɛlɔ loke mbɔɔtɔla Yesu oosowe* 13 Engo oosowe okɛisa biina baomu anɛi, ole ata kekelama la Bosombo. Aiki engo la nyama ya jaa la biphongo* baiki bata olingita la mbookambela.

14 Pa mbokama ya Yɔani e munyɔlɔlɔ, Yesu achwe o wooni ba Galilaya. Aekyaki waanto Besako Belɔti be Kanamombe. 15 Alɔndi: «Eleko kembosila nkoka, la ekeleka e Kanamombe* kekende sukɛlɛ! Aliko la ingo, engola nyo belengo benyo la imeya nyo Besako Belɔti»!

16 Ango aetaki Yesu boleka ba wango ba Galilaya aɛni ba lɔwi ba phee Simo ndako la aotwa lande Andele. Baiki bata oke bɔtɛi o wango. 17 Yesu aosimeli: «Oningite, la lakondo kokɛɛ bɔlɔwi baanto.» 18 Kako nkango, bachiki bɛtɛi bɛbɔ la mboolingita.

19 Ango Yesu achwe otamboka inchɛ aɛni Yakɔbɔ la aotwa lande Yɔani, bana ba Sebedayɔ. Bango baphee baiki otema ba kyombo batalɔngɔsɔla bɛtɛi bɛɔ. 20 Kako nkango, Yesu abaeleli bachiki isɛɔ Sebedayɔ otema ba kengo kyombo la bakambi, baolingiti Yesu.

21 Pa ango Yesu la baeki bande bachwaki wɔɔsɛngɛ ba Kapelenaumu. La wiina ba iyinga*, Yesu aingeli otema Baasaŋanelo Beayuda, la aanjisa mbekya banto besako be Kanamombe. 22 Bango baiki waasaŋanelo*, ba sebalali aliko ingo ilɔndaki ndako yaiki la nkulu ndeka nkulu ya Baekisi baɔ ba Isaliya. 23 Atanemwe otema Baasanganelo baɔ* bonto ɔmɔɔ aiki la bosombo bobe. Kako nkango aokomi: 24 «Kole nke asamba iso la wɛɛ, Yesu a Nasaleti? Waandi nde aliko la ntojaka? Latakoeye Bɔlɔti! Wɛɛ olende Lɔɛlɔ ɔnɛ atomi Kanamombe»!

25 Yesu aopangweli la nkulu ongo bosombo la nɔnda: «Kɔwa wɛɛ, la pasa ele ɔnɛ onto.» 26 La ongo bosombo bobe opasi ongo bonto la mbɔɔtɛkya la nkulu la mpasa ataokoma.

27 Bako lalikuli baiki ango basebalali ike la baiumbolaki asamba bako: «Nke inɛ? Inɛ ikende inkinɛ mbekya ya kasende ile nkulu! Aliko atalɔndɛ la nkulu! La atapasa isaliya waasombo babe bata wooke!» 28 Kako nkango besako be balaŋani o wooni lalikuli ba Galilaya.

29 Pa ingo Yesu opasi e Basaŋanelo* Baayuda, achwaki la Yakɔbɔ la Yɔani bachwe e lulu la Simo la Andele. 30 Baiyisa ango, batani bokilo ande la Simo atalale e likenge, la waale ba empoma; la basimelaki Yesu bongo bosao. 31 Laango, Yesu ochwe boleka ande, la mbookemela e likasa la mboweemaya. Kako nkango empoma ke opasi. Lonkinɛ, aikichisa ataalambela lilɛ ja ndɛ.

32 Ango aiki kako likɔlɔ, banto bawɛɛlisa bakɔnu lalikuli la baso basombo. 33 La banto lalikuli ba bɔsɛngɛ ba saŋani e lokuke la lulu. 34 Yesu aikisa banto ike banɛ baiki la biale ike be ntipha la ntipha. Aiti lonkinɛ basombo ike; la koo nanga bango basombo balɔndɛ, aliko ba weeyaki.

35 Mpendu fuɔ, Yesu aemwe, la apasi nchwa kaama kamɔɔ ka bɔɔ, nɔmba nɛmɛlɛ. 36 Pa ango, Simoni la baina lande bachwe mbo woona; 37 Ango awɛɛni bako, baosimeli: «Bɔkɔta, banto lalikuli batakoone»!

38 Laango Yesu abauchisa: «Tochu, wɛɛsɛngɛ bele sukɛlɛ, aliko la mbekya lonkinɛ Besako be Kanamombe waanto bale anɛ, aliko la bingo biandeli lemi.» 39 La Yesu alɛngi la bɛsɛngɛ lalikuli be Galilaya la mbekya banto otema Baasaŋanelo Baayuda la mbita basombo waanto.

40 Luina lɔmɔɔ boso nsuli ɔmɔɔ aandi ele Yesu nkɔma balwe otamboka lande la mbooseya: «Iya olangake, aɔsɔna limbikya!» 41 Yesu awookeli ŋandi. Aosemboleli likasa, la mbookoola la mboosimela: «La langa wiike.» 42 Kako nkango, nsuli ke sili la aiki. 43 Kinaki, Yesu aopasisa la mbo wɔya lilako la mboosimela: 44 «Yala nyo bii kolɔndake ekambwa ele onto! Kinaki, chwaka loko iɛnyɛ ele weeta atei* la mpasha mpato* ɔmɛnya nte ombwika, solo la isaliya* ba Musa.»* Iya bonto ombwika aiki nde atachu mbwiiyɛnya ele baeta atei nte ombo sila mbika. Aiki atakɛɛ ŋango aliko la nangema la banto lalikuli. Ɔsɔmɛ: Balawi 13.45-46; 14.1-32.

45 Kinaki, ongo onto achwe la manja nɔnda kaama la likuli. Aliko la ingo, Yesu koo mingela lonkinɛ phololo ɔɔsɛngɛ. Ayalaki bɔɔ la anto la nsɛlɛla nɛmɛlɛ. Koonga ŋango, banto baandaki kande boleka lalikuli.