1 Weengo eleko, boloi bɔmɔɔ bɔnɛnɛ bosaŋani lonkinɛ. Ŋango wiiki bako koo lilɛ ja ndɛ, Yesu aeleli baeki bande la mbwasimela: 2 «Mwɛnɛla banɛ banto ŋandi, aliko bakɛndi lami biina esato la koo lonkinɛ lilɛ ja ndɛ. 3 Iya mbwa tomake kaɔ koo ndɛ bakondo ena e mboka, aliko la botala, aliko ike asamba bako baimi bɔɔ.» 4 Baeki bande bauchisa: «Ende ebaema ekambwa ɛndesha banɛ banto, anɛ aleiso oosowe?» 5 Yesu abaumboli: «Ole nyo la bitumbula binga?» Bauchisa «Esamnbaele».

6 Laango Yesu aɔyisa banto luusa la njala anyɔi. Lonkinɛ ombo kemela bengo bitumbula esambaele, oke nsakoya Kanamombe. Lonkinɛ aeteni la abaɔyisa baeki bande o mbwaphakela bako lalikuli. Ŋango nde baiki kako. 7 Baiki lonkinɛ la tose tɔnchɛ. Yesu o sakoisa Kanamombe lonkinɛ aliko la ingo nse la nɔnda o baeki bande ba phakele lonkinɛ banto. 8 Kila onto ale o jiimbi jande. Baeki bakɔngi biphaka esambaele fua, la biteni bechikali. 9 Laango kaiki nde ilango banto elefu inɛi.

Lonkinɛ Yesu aalaki, 10 Kako nkango Yesu auleli e kyombo la baeki bande la achwe e booni ba Dalamanuta.

11 Bafalisayɔ baiyisa la manja toamo la Yesu aliko la mbowaambela lilonga. Baɔlɔmbi aɛnya imbali ɛmɔɔ e ɛtɔmpɔ ɛmɛnya iya nkulu yande yaimi ele Kanamombe. 12 Yesu aomali, asebalali la nɔnda ike: «Aliko laanke banto ba lɛlɔ batalɔmbɛ imbali ya bɛtɔmpɔ? Mbokosimela nyo kolende sɔlɔ: Koo imbali ya ɛna nyo»!

13 Lonkinɛ Yesu aachiki, la auleli e Kyombo la nsaphwa boleka bɔnkinɛ ba eliya.

14 Baeki bande baopheli nkemela bitumbula bɛ lɔkɛndɔ, baiki nde la bɔmɔɔ opholi o kyombo. 15 Yesu aasimeli lonkinɛ: «Ayeka! Wiilende nyo la isɔŋanya ya Mafalisayɔ la ya Elɔde».

16 Baeki baiki o toamo asamba bako: «Ɔlɔndi ŋango aliko bataika la bitumbula».

17 Yesu aeyi bingo baiki ako batalɔndɛ, aliko la ingo aasimeli: «Aliko laanke eta amoyana nyo nte apha nyo la bitumbula? Otaoke nyo lonkinɛ? Otaeye nyo? Basolo banyo balokonde baolo? 18 Olende nyo la baiso la phaɛni nyo? Olende nyo la baatoi la phaoke nyo?

«Pha kanya nyo lonkinɛ 19 nte ango ateni lemi bitumbula bitano aliko la ndesha baanto ɛlɛfu itano? Biphaka inga biojisa nyo la bingo biteni bi kongi nyo» Bauchisa: «Joomu la iphee.» 20 Obaumboli lonkinɛ: «Ango ateni lemi bitumbula esambaele aliko la mphaka o waanto ɛlɛfu inɛi, biphaka binga biojisa nyo la bitɛni bekongi nyo?» Bauchisa «Esambaele» 21 Laango Yesu obaumboli: «Otaeyaka nyo»?

22 Ango Yesu la baeki bande baiyisa ɔɔsɛngɛ ba Bɛtɛsaida, banto baelisa bontongo ɔmɔɔ ele Yesu la mboosɛya aokobole. 23 Yesu akemeli ongo bontongo o likasa, la mbɔɔtɔla aanja ba ɔsɛngɛ. Lonkinɛ, oochweli chweli lɔsɔi o baisɔ, la mboo kicheya bakasa la owuumboli: «Ɔmwɛna ekambwa ɛmɔɔ?» 24 Bontongo asakoli baisɔ la nɔnda: «Mwɛna banto, kinaki mbobaɛna wɛɛnte bete beta kɛndɛ.» 25 Yesu akichisa lonkinɛ bakasa aliko la baisɔ ba ongo onto; la ongo onto aiki, la mɛna bikambwa lailkuli phololo. 26 Laango Yesu aosimeli achu lande elulu, la: «Kuutolake lonkinɛ ɔɔsɛngɛ».

27 Pa ango, Yesu la baeki* bande ba pasi ango kaama. Bachwe ɔɔsɛngɛ bole sukɛlɛ la bɔsɛngɛ ba Kaisaliya Filipi. Ango baiki e mboka, Yesu aumboli o baeki bande: «Banto batalɔndɛ nte lemi n'nde nani?» 28 Bawuuchisa: «Bamɔɔ balɔndi nte olende Yɔani oso mbatisa, bankinɛ nte olende Eliya, bankinɛ lonkinɛ olende ɔmɔɔ a Baɛni».

29 Yesu obaumboli lonkinɛ: «La nyo atalɔndɛ nyo nte lemi n'nde nani?» Pɛtɛlɛ awuuchisa: «Wɛɛ kole Yesu Kilisito*.» 30 Laango Yesu aalaki la membeleya nte batalɔndake la onto bengo besako.

31 Pa Yesu ombwikicha ataekya baeki* bande: «Lemi Bɔna a Onto, kasana m'mba toakola ike; bekongo be Bayuda la bɛkɔta be baeta atei la baeikisi ba isaliya bakondo nkila. Lonkinɛ bakondo njakya, kinaki luina la isato ntondwaki.» 32 Yesu aasimeli baeki bande ingo lalikuli phololo.

Aliko la ingo, Pɛtɛlɛ oweeleli wiimongya la manja mboophangwela atalɔndake ŋango. 33 Kinaki Yesu atulwe la nenda baeki bande*. Aphangweli Pɛtɛlɛ la mboosimela: «Wɛɛ bosombo pasa o baisɔ bami. Aliko bingo bitalɔndɛ wɛɛ, pheetaime ele Kanamombe kinaki ele banto.»

34 Lonkinɛ Yesu aeleli boloi la baeki* bande la mbwasimela: «Iya ɔmɔɔ alangake liningita, asanjiya mbwikanya nɛmɛlɛ aɛmbɛ balemba bande la aningite. 35 Aliko ɔnɛ atalange mbikya luiko lande nɛmɛlɛ akondo limeya. Kinaki ɔnɛ alimɛya luiko lande aliko lami la aliko la besao be Kanamombe ndako akondo baaka lonkinɛ. 36 Onde, kole la bekulu kulu nke onto mba bikambwa be wooni lalikuli, la nimeya luiko lande? 37 Ao bonto aɔsɔna mpasha nke aliko la nsomba luiko lande?

38 «Eya nyo nte banto ba lɛlɔ banto ba njambi la lonkinɛ phaa lange Kanamombe. Aliko la ingo iya onto ole la nsɔni aliko lami la besao bemi otamboka ba anto, la lemi Bɔna a Onto ŋango ako njalaki la nsɔni la ndako, ango autolaki lemi la bephongo bɛɛlɔ ookuchu ba isɛmi».