1 Mpendu fuɔ, Bɛkɔta be baeta atei* basaŋani o yuungu la Bekongo Beayuda*, la Baikisi ba Isaliya* ko nɔnda mbalasa nɛnɛ Laayuda, baɔlɛmi Yesu la mbɔɔtɔla ele Pilato.

2 Baiyisa ele Pilato, la awuumboli Yesu: «Wɛɛ kole Bɔkɔta Baayuda*?» Yesu ombo wuucheya: «Wɛɛ kombo lɔnda»!

3 Bɛkɔta be baeta atei* baositaki Yesu weesao ike. 4 Pilato awuumboli lonkinɛ Yesu: «Onde, Phaucheya ekambwa wiinɛ lalikuli bimbo kositaka bako?» 5 Kinaki, Yesu koo mbuwucheya ekambwa, laango Pilato o sebalali.

6 Kila eleko ja libɛla ja Pasaka, Pilato aiki la bolengo e nɛmɔlɛla banto bolɛmi o munyɔlɔlɔ ɔnɛ asɔna bako. 7 La kaiki etamba ɛmɔɔ aelelamaki Balaba, aiki atalɛmama o munyɔlɔlɔ la bankinɛ bajaki, aliko ba jaki onto ango bakiisa bako boyongo ba ɔsɛngɛ.

8 Boloi baanto bachweli Pilato baosimeli: «Otokɛɛlɛ iso lonkinɛ ŋango botokɛɛlaka wɛɛ!» 9 Pilato abaumboli: «Atalange nyo nte nkɔlɛmɔlɛle nyo Bɔkɔta Baayuda*?» 10 Alɔndi ŋango, aliko aeyi bɔlɔti, Bɛkɔta be baeta atei* baophaki Yesu aliko la bomanda.

11 Kinaki bango Bɛkɔta be baeta atei* ba tomi banto baɔlɔmbɛ Pilato aalɛmɔlɛlɛ Balaba.

12 Pilato obaumboli lonkinɛ: «Alanga nyo nkɛɛ ŋaande la ɔnɛ onto ataelela nyo Bɔkɔta ba Mayaudi?» 13 Banto lalikuli baokomi lonkinɛ: «Lɛma nyo ndako waalemba»!

14 Pilato obaumboli lonkinɛ: «Ɔmbɔ kɛɛ bobe nke»? Kinaki baphaphi mbokoma la nkulu: «Lɛma nyo ndako waalemba!» 15 Pilato aliko la nangya banto aalɛmɔlɛli Balaba. Apasisha luusa baophome Yesu bephapho, pa, aopasisha Yesu baɔlɛmɛ waalemba.

16 Pa ango, Bakɔlɔbɔi baɛlisa Yesu e kiwanja, ke Bɔkɔta ba wooni. Baeleli boloi baɔ lalikuli. 17 Aliko la mboweelolela Yesu, bake mbɔɔlɔcha esenda e nkola* la mbɔta enkaka e baumba, la mbɔɔlɔcha wɔɔtɛ. 18 Ango baanjisa mbɔwɛɛbɛya la nɔnda: «Ɔmbwɛ wɛɛ Bɔkɔta Baayuda!» 19 Bambo ophoma litɛtɛ aliko la bɔtɛ la mboochweela lɔsɔi. Bambo kɔma balwe aliko la mbo wiinamela nende e lɔmɔtu otamboka lande. 20 Ango basili bako mboweelolela, baopasisha engo esenda e nkola, la mbɔɔlɔcha lonkinɛ bisenda bende. Lonkinɛ, bapasi la ndako anja, aliko la mbowuuleya waalemba.

21 Ango aiki bako e mboka basaŋani la bonto ɔmɔɔ aelelamaki Simoni bonto ba wooni ba Kilɛni, aiki isɛnde la Alekisande la Lufu wiiki ataime wiibeli. Bakɔlɔbɔi bake mbookaka aɛmbɛ balenba ba Yesu. 22 Pa, batɔli Yesu kaama kataelelama Gologota, ko nɔnda «Kaama ka ɛpɔkɔsɔ.» 23 La bawɔɔyisa difai beluanyi bako la manɛmanɛ*. Kinaki Yesu akili nywa. 24 Pa, bawuulisa waalemba. Baphaki esenda ende o nkɛɛ esiko aliko la mbeya nani aɛmba yaati. 25 Kaiki nde saa e isato e mpendu ango awuulisa bako waalemba. 26 Bango Bakɔlɔbɔi baandiki wiiteni e lɔbaɔ besao bingo betiki Yesu achu waalemba. Bengo besao belɔndi nte: «Bɔkɔta Baayuda».

27 Bawuulisa Yesu waalemba la bakumoli ba phee, ɔmɔɔ o likasa e loome la ɔnkinɛ e likasa la lɔali. 28 [Wiingo lɔɔsi lɔɛlɔ la kɔkyami ŋango baandekami: «Bawaanjisa kaama kamɔɔ la bakumoli*»].

29 Banto banɛ baetaki ango batolaki Yesu la ntɛkya bɛtɛ bɛɔ la nɔnda: «Haa! Wɛɛ wiiki atalɔndɛ nte akondo phanjola lulu la Kanamombe* la mbolopika o biina besato! 30 Nkaanɛ kitela waango alemba la wiikakole wɛɛmɛlɛ»!

31 Ŋango ako, Bɛkɔta be baeta atei* la baekisi ba Isaliya* ba weelolisa Yesu la nɔnjana asamba bako: «Akakoli bankinɛ kinaki, phaɔsɔna mbwikakola nɛmɛlɛ! 32 Iya ndako ko Masiya*, Bɔkɔta ba Isilaeli, akitele waalemba! Tɔɛni la tokicha lokani.» Koonga bango banto bauleli kaama kamɔɔ la ndako waalemba la bako baotoli.

33 La saa e isamalo nende saa e libwa wiilima baingeli wooni lalikuli. 34 La saa e libwa Yesu aokomi la nkulu: «Elɔi, Elɔi, lama sabakitani» Ko nɔnda: «Kanamomnbe ami, Kanamombe ami, aliko laanke emosanjiya wɛɛ*»?

35 Waango banto baiki ango, bamɔɔ ba wooki la nɔnda: «Oka nyo! Ombo elela Eliya»! 36 Bonto ɔmɔɔ achwe lɔango aili baambu otema ba difai ba okai, la nɛma ɛ nsɔli e litɛtɛ, lonkinɛ osemboli ele Yesu nte anywa la mboosimela: «Konga, takondo ɛna iya Eliya aanda mbookicheya waalemba»! 37 Kinaki, Yesu ookomi lonkinɛ la nkulu la nkɔphɔla lisolo.

38 Laango, esenda eiki etalɛmama e lulu la Kanamombe yaati biati biphee, manja eliko nende entina. 39 Ango Bɔkɔta baakɔlɔbɔi Baalɔma aiki ataemala otamboka ba Yesu. Ango aɛni ndako Yesu ombo kɔphɔla lisolo alɔndi: «Sɔlɔ ɔnɛ onto wiikinde bɔna a Kanamombe»!

40 Bamɔɔ bainto baiki ango la baiki batalende bɔɔ. Asamba bako, kwiki nde Maliya ana Magadala la Salɔmɛ la Maliya nyɛŋɛnde la Yakɔbɔ mpɔu la a Yɔsɛ. 41 Bango nde balingitaki Yesu la mbookambela ango aiki ndako Galilaya. Kwiki ango bainto bankinɛ ike bauleli landako e Yɛlusalɛma.

42,43 Aiki kako likɔlɔ, kapaseli mpame ɔmɔɔ aelelamaki Yɔsɛfu bonto ba wooni ba Alimatɛya. Ɔnɛ Yɔsɛfu aiki la bokuchu bɔnɛnɛ o mbalasa e Bayuda* lonkinɛ aiki ata konge manda ya ekeleka e Kanamombe. Mɛna nte longo luina laiki nde luina la nɔngɔsɔla Sabato*, Yɔsɛfu alɛmi lisolo achwe ele Pilato nɔmba bojo be Yesu aliko la nkunja. 44 Pilato asebalali mboka nte Yesu ombosila mbwa. Laango, oweeleli Bɔkɔta baakɔlɔbɔi Baaloma aliko la mbowuunbola iya ombosila nembela ambobwa ndako. 45 Pilato mbucheyama la ongo Bɔkɔta baakɔlɔbɔi nte Yesu ombosila nkɔphɔla lisolo, aɔyisa Yɔsɛfu luusa la memba bojo ba Yesu.

46 Yɔsɛfu achwe nsɔmba malɛkani. Achwe la yako, la akichisa bojo ba Yesu waalemba, oke mboolinga la sanda la oke nkicheya bojo otema ba jombo ja timami o libwɛ linɛnɛ. Lonkinɛ, oke nɛngya libwɛ linɛnɛ aliko la ndipha o lɔkukɛ la lingo jombo. 47 Laango Maliya ana Magadala la Maliya nyɛŋɛnde la Yɔsɛ, baiki bataɛni kaama kakichisa bako bojo ba Yesu.