1 Bafalisayɔ* la Baekisi bamɔɔ ba isaliya baandi mima e Yɛlusalɛma baɔlɛngi Yesu. 2 Baɛni nte bamɔɔ ba baeki* bande balɛɛki laakasa ba ntaka, ko nɔnda ndɛ koo mbokya bakasa baɔ, kolende bɔɔ la isaliya Yaayuda. 3 Balɔndaki ingo aliko, Bafalisayɔ la bankinɛ Bayuda lalikuli batakucha isaliya ya bankɛɔ la nɔnda nte bonto phaɔsɔna ndɛ lilɛ iya ataokya bakasa ŋango basana kako. 4 La ango baimaki wiimomba, phaale iya onto ataɔkya bakasa. La baiki la isaliya ike yaiki bako batakɛɛ phoke mbɔkya bekoyo la mboka la mpoke ya lɔngɔsɔlami la mongo. 5 Wiingo Bafalisayɔ la Bɛkɔta ba Isaliya baumboli Yesu: «Aliko laanke baeki babɛ phaalingita isaliya yaimi ele bankaa, kinaki batale lilɛ jaɔ la bakasa ba ntaka!» 6 Yesu abauchisa: Nyo balimbi! Wɛɛni Isaya aiki la Isaliya ango aekyaki ndako aliko lanyo o mandika nte:

«Banɛ banto, bata nkucha lemi wɛɛlɔmɔ bɛɔ ntoo,

kinaki basolo babɔ bayalaka nde bɔɔ lami.

7 Aliko linkucha yaɔ lemi iyalaka nde ya linsonga.

Aliko la isaliya yaɔ yataekya bako.

Ilende limanya ja anto*».

8 Yesu aasimeli lonkinɛ: «Ochikaka nyo isaliya ya Kanamombe, la ningita besao be anto».

9 Lonkinɛ aasimeli: «Olende nyo loango ntika isaliya* ya Kanamombe, aliko la ningita isaliya yanyo! 10 Kapha nte weyaka nyo ŋango balɔndaki Musa: ‹Yala nyo atakuche isɛbɛ la nyɛŋɛɛ.›* La lonkinɛ alɔndi: ''Ɔnɛ atola isɛnde aɔ nyɛŋɛnde asana mbwa*''. 11 Nyo, olɔndaka nyo nte bonto aɔsɔna nɔnda la isɛnde aɔ nyɛŋɛnde nte: ‹Engo eoni lemi nkɔya kekende Kolobani Ko nɔnda mbosila mphakela Kanamombe.›  12 Okɛɛ ŋango, oke nyo simbaka onto ataɔyake isɛnde la nyɛŋɛnde ekambwa. 13 Wiingo bolengo, ombokila nyo isaliya ya besao be Kanamombe aliko la isaliya yaankɛnyo yata ekya nyo. La atakɛɛ nyo bikambwa ike binkinɛ bile kɛlikɛli la ingo».

14 Pa ingo, Yesu weeleli lonkinɛ boloi baanto la nɔnda: «Ombo kee nyo bɔlɔti, nyo lalikuli, la weeye nyo binɛ: 15 Koo ɛnɛ eingelaka otema ba onto mima anja ekichaka bonto bobe. Kinaki ɛnɛ eimaka o onto, ekichaka bonto bobe. 16 Ole la batoi ba mboka, aoke»!

17 «Ango Yesu apasi wooloi la mingela e lulu, baeki* bande bawuumboli bɔnɛ bomanu: Batalɔnde nkee»? 18 Yesu aasimeli: «Nyo lonkinɛ phayalaka nyo la limanya? Phaoke nyo nte ɛnɛ eingelaka oonywa ba onto phekeokichaka bobe?» 19 Aliko ingo bikambwa phiingelaka o lisolo jande, kinaki biingelaka nde o likundu jande, la mpasa nchwa e nsomba. Waango baoyi, Yesu aoni nɔnda nte lilɛ lalikuli limbo sana nɛɛmwa.

20 Yesu aasimeli lonkinɛ: «Ɛnɛ ekichaka bonto obe ko ɛnɛ epasaka ka onto. 21 Aliko otema, ba lisolo ja onto, ketaime bamanya babe. La bango bamanya babe ketaotome nkɛɛ: loseka, kwiiya la njaka, 22 Nkɛɛ litola, nanga bile ele bankinɛ la toŋuna la nkɛlɛ, nimba banto, la woomputu, la omanda, nɔnda bobe ele bankinɛ, la mbwiɛmba la mpeka limanya. 23 Ingo bikambwa bibe lalikuli bipasaka nde o otema ba onto la beko beokichaka bobe».

24 Yesu apasi ango kaama la achwe boleka ba bɔsɛngɛ ba Tilo. Aingeli e lulu lɔmɔɔ, kinaki koo nanga banto baeye nte wiiki ango, kinaki phasane njala ataisama.

25 Pa ingo, wainto ɔmɔɔ, aiki la bophoko ande aiki la basombo babe, aoki ndako besako be Yesu; la aandi mbwiyoka weekolo be Yesu. 26 Ongo wainto phaiki Muyuda, kinaki aiki Mugiliki aotami ɔɔsɛngɛ ba Feniki o booni ba Siliya. Asɛi Yesu aite bosombo bobe ele bophoko ande.

27 Kinaki Yesu aosimeli: «Lɛla obi bana bale lilɛ la jiimbi; Aliko kaphabɔlɔti nkemela lilɛ ja bana la mbokela mbwa.» 28 Wainto auchisa: «Sɔlɔ, weekisi, koonga mbwa, balɛɛka bompusi bongo bokwaka ɛntina la mesa bana bakwɛyaka».

29 Laango, Yesu awuuchisa: «Aliko la ingo mbuchɛyama, aɔsɔna mbutola kaɛ: Bosombo bobe ombopasa bophoko abe».

30 Autoli ndako e lulu lande, atani bɔna ande ombosembwa e likenge: la bosombo bobe aiki ombosila mboopasa.

31 Pa ango, Yesu mima lonkinɛ e wooni ba Tilo, mbetela e Sidoniya la mbutola boleka ba Eliya e Galilaya e wooni ba Dekapoli. 32 La, ba wɛɛlisa bonto ɔmɔɔ aiki eluma la aiki la likokoma, la basɛi Yesu awapheya bakasa.

33 Laango Yesu aopasisa ooloi baanto, la nchwa lande botandi inchɛ. Aili mpita yande waatɔi ba ongo onto la mboochwela lɔsɔi e lophita lande la mbookobola e lolemu. 34 Yesu aolisa baiso eliko, alɔndi la joi linɛnɛ: «Efatako nɔnda Liphwa wɛɛ!» 35 Kako nkango, batoi baongo onto bake ndiphwa, la lolemu lande loke ndipholama la oke manja nɔnda solo. 36 Yesu oasimeli batasimelake bonto bengo besao. Kinaki ŋango aasimbaki ndako, ko ŋango baphaphaki bako nchwa batabalaŋanya besako. 37 La banto basebalali ndeka; balɔndaki: «Bingo lalikuli bitakɛɛ Yesu bilende bɔlɔti: ombwikya bimpokolo mboka, la biluma nɔnda»!