1 Ango Yesu la baeki bande ba saphwaki eliya e Galilaya. Baiye o wooni ba Gelaseni. 2 Yesu apasi e Kyombo, kako nkango, bonto ɔmɔɔ aimaki weebeli e baombo la manda mboosaŋanya. Ongo bonto aiki la basombo babe. 3 La wiiki atayale atei ba baombo. Koo onto ɔnɛ asana mbookemela la mbɔɔlɛma koonga la munyɔlɔlɔ bɔmɔɔ; 4 Aliko kila wiina banto baɔlɛmaki mbolo wee kolo la minyɔlɔlɔ waakasa, atenaki minyɔlɔlɔ la nkelola ingo mbolo. Koo bonto aiki la nkulu ya mbɔɔlɛmbya. 5 Ongo bonto aaŋangaki bocho la yaani, o baombo la bɛɔkɔ, la ata okoma la mbwi yɔtaya nɛmɛlɛ la abwɛ. 6 Ango aɛni ndako Yesu bɔɔ; achwe loango, nkɔma balwe otamboka lande, 7 La aokomi la nkulu: «Yesu atalange nke, Bɔna a Onto ole eliko bɔɔ? Mbokolɔmba elokombo, la Kanamombe, konduwanyake!» 8 Ongo bonto alɔndi ingo aliko Yesu aosimelaki: «Bosombo bobe pasa ele ɔnɛ bonto!» 9 Pa Yesu auumboli ongo bonto: «Lokombo labɛ nani?» Auchisa: «Lokombo lami ike»,* legion ko nɔnda ike, aliko tolende ike. 10 La ongo a memeyaki nseya Yesu ataitake basombo babe anja la bongo booni.

11 Ango kaama kaiki nde boloi bɔmɔɔ ba nsombo balɛɛki sukɛlɛ la bokondi ɔmɔɔ. 12 Basombo bachwaki la maɔmbi baɔ ele Yesu: «Ototome o nsombo, ɔtɔya loosa tuingele kaɔ!» 13 Yesu abaɔyisa loosa. La bango basombo babe bapasi ele ongo bonto la baingeli wiingo nsombo. Boloi lalikuli baiyoki e eliya la babwe. Baiki ilango elefu iphee. Boloi ba nsombo bombolinda weeliya 14 Pa bango banto baiki batachunge nsombo bachwe ntɔla besako e wooni la bɛsɛngɛ baandi mɛna bingo beeti. 15 Baiyisa mɛ la Yesu la mɛna bonto aiki la wiike baasombo babe: aiki atasɛlɛla atalɔtɛ bisenda la aiki la limanya jande lilɔti. Ɔmɛna bingo bake mbaema la wɔɔma. 16 Banɛ baɛni bikambwa lalikuli bieti engo, baasimeli banɛ baandi okongo bingo beiyisa ongo onto aiki laasombo aliko la ingo nsombo. 17 Laango baiki batasɛya Yesu: «Apase e wooni baɔ»! 18 La ango aiki Yesu ataulela e kyombo, ongo bonto aiki, aɔlɔmbi Yesu: «Nchu laɛ.» 19 Kinaki, Yesu koo mbo wiimeya, kinaki aosimeli: «Utola kabɛ oolunga babɛ, la oasimele binɛ lalikuli Bɔkɔta okiisa aliko labɛ la ŋango ombo kookela ndako ŋandi.» 20 Lonkinɛ ongo onto achwe la manja mbalaŋanya besao o booni ba Dekapoli*. Bingo lalikuli bikɛɛ Yesu aliko la ndako; la bango lalikuli baoki basebalali.

21 Pa Yesu asaphwe lonkinɛ la kyombo boleka bonkinɛ ba eliya ba Galilaya. Ango aiki boloi bɔmɔɔ bɔnɛnɛ baanto baɔlɛngi. Laango aiki wɔɔkɔngɛ ba eliya. 22 Laango Bɔkɔta ɔmɔɔ Baasaŋanelo Beayuda, aelelami Yailɔ aiye. Aɛni Yesu, aiyoki weekolo bende. 23 La aosɛi la membeleya la nɔnda: «Bophoko ami, okende sukɛlɛ la mbwa, aka mbɔlɔmbɛla aliko aike la ayale o luiko»!

24 Laango Yesu achwe la ndako. Bongo boloi boolingiti Yesu la mboo phika boleka lalikuli.

25 Woongo boloi kaiki wainto ɔmɔɔ aiki la waale ba mpasa bekila bilongi joomu laiphee. 26 Ongo wainto aɛni toakola ike. Baingi ike ba wiingi koo mbika. La osusisha besanga bende lalikuli. Kinaki, ingo koo nkɛɛ ekambwa. Ila kɔweenyisa nde tosoya ike. 27 Aiki ata oke banto batalɔndɛ aliko la Yesu. Achwe lonkinɛ oo loi, ɔɔkɔngɔ ba Yesu la nkoola esenda ende. 28 La ailɔndɛlaki nɛmɛlɛ: "Iya nkoolake koonga bisenda bende, lakondo ika.'' 29 Kako nkango, bekila bende bike ntena, la aitani ombwika. 30 Kako nkango, Yesu aeyi nte nkulu yande imbokitela. Autoli asamba boloi la aumboli: «Nani onkooli esenda emi?» 31 Baeki bande bawuuchisa: «Wɛɛ ɔmwɛna nte boloi bombo kophika boleka lalikuli, la ataumbola lonkinɛ nte nani omonkoola?» 32 Kinaki Yesu olendi asamba boloi aliko aeye, nani ookoli. 33 Ongo wainto ɔsɔki la wɔɔma aliko oeyi ingo iwiyisa; aandi lonkinɛ mbwi yoka weekolo be Yesu la mboosimela sɔlɔ. 34 Yesu oosimeli: «Bophoko ami, lokani labe lombo kuikya. Chwaka bii la waale babɛ bombwika!» 35 Wiiki atasile nɔnda, banto baandi mina e lulu la Yailo la mboo simela: Hooo! Bophoko baɛ ombosila mbwa; kooluphanyake lonkinɛ Bɔkɔta. 36 Kinaki Yesu aoki ingo joi koo nanga. La nɔnda la Yailo: «Koyalake la wɔɔma, Imeya ntoo.» 37 Koomimeya koonga bonto ɔmɔɔ aolingite engo echwe ndako, ila Pɛtɛlɛ la Yakɔbɔ la Yɔani aotwe la Yakɔbɔ.

38 Baiyisa ele Yailo, Yesu atani bolupho ike aliko banto baiki batalele la mbokoma. 39 Oke mingela otema ba lulu la nɔnda: «Aliko laanke bilelo la bolupho? Bɔna atabu, kinaki andalale».

40 Kinaki baɔɔli Yesu, apasisa banto lalikuli anja, la aingeli e lulu engo eiki bojo ba bɔna la baeki bande basato, la isɛnde la nyɛŋende la bɔna. 41 Yesu akemeli bɔna o likasa la nɔnda; Talita kum ko nɔnda: «Bophoko mbokosimela emala!» 42 Kako nkango, Bophoko weemali la nkɛnda nɛmɛlɛ. Wiiki nde la bilongi joomu la iphee. Ango aɛni banto lalikuli bingo basebalali. 43 Kinaki Yesu aasimbi nte bonto ataeyake, lonkinɛ aasimeli ɔya nyo ndako lilɛ ale.