1 Pa ingo, Yesu aiki lonkinɛ atabaekya ɔɔkɔngɛ ba eliya ba Galilaya. Boloi bɔnɛnɛ baanto baandi mbɔɔlɛnga la aingeli otema ba kyombo la nsɛlɛla. La Kyombo kiiki e wango la banto baiki e ŋondi sukɛlɛ la iloko. 2 Yesu abaekyaki bikambwa ike weemanu.

Weengo bemanu aasimelaki: 3 «Oka nyo! Luina lɔmɔɔ, bonto ɔmɔɔ achwe weebeli mwaŋela boopho. 4 Ango aiki ndako ata mwaŋela boopho, binkinɛ bimuka bekwaaki o mpamba la mboka: mpulu yaandi la mpikola lalikuli. 5 Binkinɛ bimuka bikwaaki e lɔmɔtu laabwɛ lɔnɛ laiki la lɔmɔtu inchɛ. Mbeta eleko inchɛ bimuka bemeni, kako nkango aliko lɔmɔtu lotaiki ike. 6 Kinaki ango a kangi yaani, ya tumbi bana baete lalikuli: yaomi aliko lɔmɔtu laiki inchɛ. 7 Binkinɛ bimuka bekwaaki o baumba. Ango bango baumba baanjisa mbola, be phiki la koo mbota lonkinɛ mbuka. 8 Kinaki, inkinɛ mbuka bekwaaki e lɔmɔtu lɔlɔti; bingo bimuka bɛmɛni bɛooli la bɛoti mɛjɛmbɛ ike binkinɛ bɛoti baomi asatoasato binkinɛ baomu asamaloasamalo la binkinɛ miyamiya.» 9 Pa Yesu ombo lɔnda: «Oka nyo bɔlɔti, ɔnɛ ole la batoi ba mboka aoke»!

10 Ango Yesu aiki nɛmɛlɛ opholi, baeta atei la baeki bande joomu laaphee la bango ba ɔlɛngaki bawuumboli nte aasimele maana ba bengo bemanu.

11 Yesu abauchisa: Nyo, abaɛyi nyo yuungu ya ekeleka* e Kanamombe; kinaki bankinɛ baokaki too batalɔndɛ weemanu, 12 Aliko,

«Bale la baiso kinaki phaɛɛni,

bale laatoi phaaoke,

iya jɛ, baandaki ele Kanamombe

la Kanamombe akondo basokolelaki*»!

13 Lonkinɛ Yesu ɔlɔndi la banto: «Phata oke nyo bɔnɛ bobanu? Namuna nke eoka nyo bɛnɛ benkinɛ bemanu? 14 Bimuka bingo booni a oni bilende besao be Kanamombe. 15 Bimuka bekwaki mpamba la mboka bita elama la bango baokaki besao, kinaki bosombo mbiya la mpasha waasolo abɔ. 16 La bingo bikwaaki e lɔmɔtu laabwɛ bale bata elama la bango bata oke besao be Kanamombe la makola la nsaki. 17 Kinaki, bepha la bejo. Beta kemela nde biina besali. La ango aanda toakola ao njakema aliko la besako be Kanamombe, bakondo tata loango lokani laɔ. 18 Bimuka bingo bikwee o baumba bile bita elama la banto bata oke besao be Kanamombe. 19 Kinaki, toakola ta wooni, la nombo la nanga ya kila namuna yatabaingela, aliko la ingo yataphike besao la phayaote ekambwa. 20 La ingo bɛkwɛɛ e lɔmɔtu lɔlɔti yata elama la banto bata oke besao, la mimeya yataote bimuka. Bimɔɔ bita ote baomu asatoasato, la baniknɛ baomu basamalobasamalo la baniknɛ miyamiya».

21 Lonkinɛ Yesu aasimeli: «Bonto aɔsɔna ntoola litala la nkukumya la ephaka ao nkicha entina la likenge? Jɛ! Kapha aliko la nkicha e lɔkɔphɔ weephele? 22 Ko ŋango bosao bataisama buiswaki anja luina lɔmɔɔ, la bosao bole e yuungu bakondo eyamaka aanja. 23 Ongo ole la batoi ba mboka aoke!» 24 Yesu aasimeli lonkinɛ: «Besao bɛnɛ betaoke nyo, obioke nyo bɔlɔti! Aliko bingo bitakɛɛ nyo aliko la bankinɛ Kanamombe akondo kokɛɛla nyo la mbetela ango. 25 Aliko ongo ole la ekambwa akondo ɔyama enkinɛ, kinaki ele ongo ole apha la ekambwa bakondo opasha nende engo eyala ndako la kɛko».

26 Yesu ɔmbɔ lɔnda lɔnkinɛ: «Ekeleka e Kanamombe embo elama la bonto ɔmɔɔ aoni ebeli ende. 27 Bingo bimuka bitatunde bocho la yaani, kinaki, koo mbeya ŋaande bemenaki bɛko, bengo bimuka ango alalaki ndako la memwa. 28 Eya nyo nte lɔmɔtu lɔmɛlɛ kata mɛnya bimuka: manja obi ntiti, lonkinɛ botuwa koo bimuka la kantunda bimuka wootuwa. 29 Ango ayala bimuka bimbotunda, ango ka ukaka bonto. Aliko eleko e ukaka banto kembokoka».

30 Yesu ɔmbɔ lɔnda lonkinɛ: «Ekambwa nke eelamya iso la ekeleka e Kanamombe* ao oomanu nke ɛɔsɔna iso nɔnda wiingo? 31 Ingo ekeleka ketaelama la imuka imɔɔ inchɛɛ ba Damani. Ingo imuka ilende inchɛɛ otomuka lalikuli tataone bako o wooni. 32 Kinaki pa mbwiyona, imbo mɛna la manda imuka inɛnɛ ndeka tomuka toonami woonjoko. Lonkinɛ ombo pasha bitaphe binɛnɛ ingo yaɔsɔna mpulu mpika bilumba wiilenge lenge beetaphe».

33 Lonkinɛ Yesu aekyaki banto bemanu ike be ongo olengo. Abaekyaki solo la kepimo ke mboka yaɔ. 34 Kotaika bosao baekyaki ndako koo mbila bomanu. Kinaki ango aiki ndako nɛmɛlɛ opholi la baeki* bande, aasimelaki lalikuli.

35 Likɔlɔ ja longo wiina, Yesu alɔndi la baeki* bande: «Tosaphwe boleka bonkinɛ ba eliya.» 36 Baeki* bande bachiki lonkinɛ boloi ba anto, bauleli otema ba kyombo engo eiiki Yesu otema. Binkinɛ byombo bechwaki kaama kamɔɔ la bako.

37 La ɛna lɔphɛpho lɔmɔɔ loolo laandi, ɛtɛmbɔ ke tekyaki kyombo iloko yaingelaki otema ba kyombo, nende ango aiki iloko yataole e kyombo. 38 Weengo eleko Yesu alalaki ilɔ ɔɔkɔngɔ ba kyombo, la bɔtɛ atakicha eliko la monga.

Baeki bande ba weemoli la mboosimela: «Weekisi, takondo bwa: inɛ phayata kosimela ekambwa?» 39 Yesu aemwe, aphangweli lɔphɛphɔ la nɔnda la Eliya: «Kɔwa wɛɛ!» Laango lɔphɛphɔ la kɔwi la Eliya laiki nde bii!.

40 Lonkinɛ, Yesu aumboli baeki* bande: «Aliko laanke ole nyo la wɔɔma? Hapha nyo la lokani lami?» 41 Kinaki baeki baiki la wɔɔma.

Aliko la ingo baanjisa mbuimbola asamba bako: «Bampame! Ɔnɛ onto ole nani? Ɔnɛ nende lɔphɛphɔ la iloko yata wooke»!