1 Pa ingo, Yesu aingeli lonkinɛ o lulu laa Saŋanelo Laayuda*. O longo lulu kaiki bonto ɔmɔɔ ɔnɛ aiki luambo lombo lɛngɛla. 2 Banto bango baolendaki Yesu mɛ aliko la mɛna iya aɔsɔna mbikya ongo onto luina la Sabato* aliko la mba luakwa la mboositaka.

3 La Yesu ɔlɔndi la oso nɛngɛla Luambo: «Emala wɛɛ, chwaka asamba banto.» 4 Lonkinɛ Yesu aumboli bango baiki ango otema ŋaanɛ: «Isaliya* yaso ya ɔsɔna nɔnda nkɛɛ bɔlɔti ao bobe wiina ba Sabato*? Ao njaka bonto ao mbo wiikya?» Kinaki koo nɔnda ekambwa. 5 Aliko la ingo, Yesu aalendi bako lalikuli la baiso ba nkɛlɛ, aliko la basolo baɔ baolo. Laango ɔlɔndi la oso nɛngɛla: «Sembola luambo labɛ» osemboli luambo lande la mbika kako nkango. 6 Bafalisayɔ bapasi Waasaŋanelo Beayuda* la basaŋani la jeemba ja Bɔkɔta Elode* aliko la munga yuungu ya njaka Yesu.

7 Yesu lonkinɛ, aipasisa ango la baeki* bande la bachwe ookongɛ ba eliya ba Galilaya. Boloi bɔmɔɔ baanto boolingiti. Bango banto baandi o booni ba Galilaya la bankinɛ e wooni Baayuda. 8 La bankinɛ baandi ɔɔsɛngɛ ba Yɛlusalɛma, bankinɛ e wooni ba Idume la bankinɛ wɛɛsɛngɛ bele mpamba la losi la Yɔlɔdani la bankinɛ mpamba la bɛsɛngɛ ba Tile la Sidoni. Balingitaki Yesu aliko nte baokaki mbingo bikɛɛki ndako.

9 Ango aɛni Yesu ŋango asimeli baeki* bande nte baweela kyombo aliko la boloi botaophikake. 10 Laango, aliko ataekya banto ike. Laango bango lalikuli baiki nkɔna baiki batatindana aliko bako baokoole. 11 La ango bango baiki la basombo babe, bakomaki balwe otamboka lande la mbokoma la nkulu la nɔnda: «Mbɔ wɛɛ, kole bɔna a Kanamombe!» 12 Kinaki Yesu ophangweli ike basombo batalɔndake ŋango wiiki ndako ele banto.

13 Lonkinɛ Yesu auleli eliko la bɔɔkɔ. Aeleli banto banɛ balangi ndako nɛmɛlɛ, la bachwe engo eiki ndako. 14 Ango aiyisa bako ango. Asɔni joomu laaphee asamba bako la aaŋunyisa lokombo la baeta atei*. Akɛɛ ingo aliko bayale la ndako la mbwatoma aliko la nchwa bataekya besako bɛlɔti waanto, 15 La abaɔyisa lonkinɛ nkulu ya mbita basombo babe. 16 Ɛna nkombo ya bango baeta atei* joomu la aphee: Simo (ongo Yesu auŋunyisa ndako lokombo la Pɛtɛlɛ), 17 La Yakɔbɔ la aotwa lande Yɔani, bako baphee baiki nde bana ba Sebedayɔ (lonkinɛ Yesu aaŋunyisa Bɔanɛlɛgɛsɛ, ko nɔnda ''Bana ba likongola'') 18 Asɔni lonkinɛ Andele la Filipi la Batelemi la Matayɔ la Tomasi la Yakɔbɔ bɔna a Alufe. Tadeyɔ la Simo banto ba boloi ba Elɔtɛ, 19 Asɔni lonkinɛ Yuda Esikaliyɔtɛ, ɔnɛ a phaki Yesu.

20 Pa ango Yesu autoli otema ba lulu. Boloi bɔmɔɔ bɔnɛnɛ baanto boolingiti otema ba lulu. Aliko la ingo Yesu la baeki* bande bapheki namuna ɛ ndɛ. 21 Ango aoki baotwa la Yesu ingo, bachwe mbo wɔɔsa, aliko balɔndaki: «Iyɛɛɛ ombo sema»!

22 Baekisi ba Isaliya* baandaki mima e Yɛlusalɛma balɔndaki nte: «Yesu ombo kemelama la Belisebuli*. Lonkinɛ balɔndaki nte Belisebuli olende waiyolo baa Sombo babe la Yesu ataite Basombo e lokombo lande.» 23 Laango Yesu aeleli Baekisi ba Isaliya* la aasimeli weemanu nte: «Namuna nke Bosombo aɔsɔna mbwiita? 24 Iya banto ba ekeleka ɛmɔɔ bajakanake la inkinɛ ekeleka, ingo ekeleka phɛɔsɔna nsikamela; 25 La iya banto ba jooti limɔɔ ba jakanake la linkinɛ jooti phaja sikamela lonkinɛ. 26 Iya lonkinɛ Bosombo aphakake nkulu yande imɔɔ la ajakanake la onkinɛ, nkulu yande imbo sila.

27 «Koo onto aɔsɔna mingela e lulu la onto a nkulu la mbɔsa bikambwa bende, iya ataɔlɛmɛ obi ongo onto. Kinaki pa mbɔɔlɛma, aɔsɔna mbɔsa bikambwa lalikuli bitanemwe ongo otema.

28 «Mbokosimela nyo, kolende sɔlɔ: Kanamombe phaɔsɔna nsokola baso njambi la bango bata otole. 29 Kinaki ɔnɛ atola Lɔkɛngɛ-Lɔɛlɔ Kanamombe phaosokolela jɛ, aliko njambi yande yakondo yalaka la ndako biina lalikuli. 30 Yesu aasimeli ŋango, aliko baikisi ba Isaliya* balɔndaki nte olende la Bosombo bobe».

31 Pa nyɛŋɛnde la baotwa la Yesu baandi la nsɛlɛla anja. Baiki anja batomi bonto nchwa mbo weelela. 32 E longo lulu boloi bɔnɛnɛ ba anto baiki batayale batalɛngɛ Yesu. La aasimeli: «Oka! Nyɛŋɛbɛ la baotwa labɛ balende anja bata kuumbola.» 33 Yesu awuuchisa: «Nyɛŋɛmi ko nani la baotwa lami ko ba nani?» 34 Lonkinɛ Yesu aalendi banto baiki bataɔlɛngɛ la nɔnda: «Ɛna nyo: Nyɛŋɛmi la baotwa lami ko banɛ bale anɛ. 35 E kantunda ɔnɛ akɛɛ ŋango alanga Kanamombe, ndako kole aotwa lami la botamba ami la nyɛŋɛmi».