1 Mbeta biina inchɛ, Yesu aiyisa lonkinɛ ɔɔsɛngɛ ba Kapelenaumu. Ango aoki banto nte ole e lulu, 2 Ike asamba bako baandi mingela otema ba longo lulu, nende ŋango bapheki kaama ka njala e lokuke. Bango banto lalikuli Yesu abaekyaki Besako be Kanamombe.

3 Weengo eleko, banto banɛi bawɛɛlisa Yesu bonto ɔmɔɔ a nɛngɛla. 4 Kinaki aliko la boloi, kotaika la namuna e mbowiyeya ka Yesu. Laango, batɛmɔli nsambe e lulu*. Mbɛlama laango aiki Yesu atayale. Bakichisaki likenge ingo ja lalelaki boso nɛngɛla. 5 Yesu aɛni lokani laɔ, laango ɔlɔndi la oso nɛngɛla: «Bɔna ami, njambi yabɛ imbosokolama».

6 Otema ba longo lulu kaiki nde Baekisi bamɔɔ ba Isaliya*. Baanjisa mbwiumbola waasolo baɔ. 7 «Aliko laanke ɔnɛ onto atalɔndɛ ŋaanɛ? Atatole Kanamombe! Nani aɔsɔna nsokola njambi ya onto, Kanamombe nɛmɛlɛ!» 8 Ango aei Yesu nte batakanya ŋango waasolo baɔ, aasimeli: «Aliko laanke bitakanya nyo waasolo banyo? 9 Ekambwa nke embosaliya, o nɔnda ele boso nɛngɛla: ‹Njambi yabɛ imbɔ sokolama› ao bɔlɔti nɔnda ‹Emala-wɛɛ, ɔsa likenge jabɛ la ɔkɛndɛ?› 10 Eeh bɔlɔti oka binɛ, Lemi Bɔna a Onto kole la nkulu ya nsokola njambi o wooni».

Laango Yesu ɔlɔndi la ongo aiki ombo lɛngɛla: 11 «Mbokosimela: Emala wɛɛ, kemela likenge jabɛ la utola kabɛ»!

12 Kako nkango, lonkinɛ bako lalikuli baolendaki, bonto omweemala, okemeli likenge jande la nchwa kande.

Ba sebalali bako lalikuli. Bakuchaki Kanamombe la nɔnda: «Totaenaka jɛ be ŋaanɛ»!

13 Pa ango, Yesu achwe lonkinɛ wɔɔkɔngɛ ba eliya ba Galilaya. Boloi lalikuli boolingiti la aanjisa mbo ba ekya. 14 Ango aiki ndako e lɔkɛndɔ, aɛni bonto ɔmɔɔ aelelamaki Lawi,* Lawi ko ongo bata weelela lonkinɛ Matayɔ, bɔna a Alufe. Ongo Lawi aiki atayale kaama kandipisa kodi. Yesu aosimeli: «Oningite lemi»! Kako nkango Lawi aemali la aolingiti.

15 Pa ingo, Yesu achwe ndɛ e lulu la Lawi. La e longo lulu kaiki nde baso ndipisa kodi ike la baso njambi balɛɛki la Yesu kaama kamɔɔ la baeki* bande, aliko banto ike ba ongo bolengo baolingitaki. 16 Ango Baekisi ba Isaliya* la boloi Baafalisayɔ*, baɛni atale la baso njambi la baso ndipisa kodi laango baumboli baeki* bande: «Aliko laanke weekisi anyo atale le baso ndipisa kodi la baso njambi?» 17 Ango aoki Yesu ingo, aasimeli: «Kapha banɛ balɔti bale la mposa e muŋanga, kinaki bakonu! Phamandi, mona balɔti otamboka ba Kanamombe, kinaki baso njambi».

18 Wiina ɔmɔɔ, baeki* ba Yɔani boso mbatisa la Bafalisayɔ baiki e malɔmbi ba kɛɛmaki koo ndɛ. Laango, banto baandi mumbola Yesu: Aliko laanke baeki ba Yɔani la ba Falisayɔ batakɛɛ malɔmbi koo ndɛ, kinaki banɛ baɛ phaata kɛɛ? 19 Yesu aasimeli: «Atakanya nyo nte baelelami ba libela baɔsɔna nkila ndɛ ango bɔsɔngi ole laako? Jɛɛ! Iya bɔsɔngi ole laako phaaɔsɔna nkila ndɛ. 20 Kinaki eleko eandaki ongo bɔsɔngi akondo sakolama; luina longo, baanjaki malɔmbi ba nkila lilɛ.

21 «Koo onto ɔsɔnaka yaati ya esenda e kasende aliko la engo etango. Iya ŋango, ingo yaati ya esenda ekasende kekondo ata engo yaati ya esenda etango laango kaama ka mbatema kakondo nɔna lonkinɛ.

22 «Lonkinɛ, koo onto okichaka difai otema ba lophata la lɔɔwa* Bayuda baiki batalɔngɔsɔla lophata la lɔɔwa. Otema ba longo lophata bakichaki iloko la babɛlɛ la difai la bauta. Longo lophata laiki nde lataulanga kinaki ango aiki lako pa nkongola loke nkulu laango phalaɔsɔna lonkinɛ mbulanga. Aliko iya bambokɛɛ ŋango, difai ja kasende ja ɔsɔna mbata longo lophata la lɔɔwa. Laango longo lophata, la ingo difai ja kasende yakondo nfutana. Kinaki, bakichaka wiina lalikuli difai ja kasende otema ba lophata la lɔɔwa la kasende»!

23 Wiina lɔmɔɔ la Sabato* Yesu la baeki* bande batenyanyisa bibeli. Baeki bande ele bako bayaleli mpolola betuwa be ngano. 24 Laango Bafalisayɔ balɔndi la Yesu: «Lenda aliko laanke baeki* babɛ batakɛɛ binɛ bile Isaliya* yaso phayalange nkɛɛ wiina la Sabato*?» 25 Yesu abauchisa: «Otasɔmɛ nyo ingo akɛisa Bɔkɔta Daudi ango aiki ndako la mposa la aiki la botala, ndako la baso kande? 26 Aingeli e lulu la Kanamombe*. Weeleko ba Bɔkɔta Daudi, lulu la Kanamombe laiki nde lota phikama e Yɛlusalɛma okemeli kitumbula kengo ke pasisa banto e mpato ele Kanamombe alee, lonkinɛ aɔyisa bango banto bitumbula, laango bingo bitumbula Baeta atei ba Kanamombe bako atoo basani ndɛ*. Akɛisa ŋango ango Abiatali aiki weeta atei* ɔnɛnɛ ba Kanamombe.» 27 Yesu aasimeli lonkinɛ: «Luina la Sabato* la kɛɛmi aliko la onto, kinaki bonto atakɛɛma aliko la Sabato*. 28 Ɛna aliko la ingo lemi Bɔna a Onto kole ɔmɛlɛ Sabato*».