1 Yesu amemisa mbwasimela lonkinɛ: «Mbokosimela nyo sɔlɔ, bamɔɔ banto waanɛ bale anɛ phaasane mbwa otamboka koo mɛna ekeleka e Kanamombe* manda la nkulu».

2 Biina besamalo paa, Yesu akemeli Pɛtɛlɛ la Yakɔbɔ la Yɔani, auleli la bako eliko la bɔɔkɔ botale, eiki bako amɛlɛ. Engo Yesu aengoli yiima otamboka laako. 3 Bisenda bende biandi biɛlɔ pɛ. Koo onto e wooni lalikuli ɔnɛ aɛja ŋango. 4 Kako nkango, bango Baeki* baɛni Eliya la Musa baombɔlaki la Yesu. 5,6 Pɛtɛlɛ la baina lande phaiki la ja nɔnda aliko baiki la bɔɔma. Laango Pɛtɛlɛ aosimeli Yesu: «Weekisi, kolende bɔlɔti toyale anɛ. Tophike balɔmbɛ basato: Lilɔmbɛ limɔɔ jabɛ, linkinɛ ja Musa la linkinɛ ja Eliya».

7 Pa ango, loonge lɔmɔɔ laandi la mbwalipha la joi limɔɔ like mbokama: «Ɔnɛ kole Bɔna ami alanga lemi, owooke nyo ndako»!

8 Kako nkango, bango baeki* balendi lonkinɛ, kinaki koo mɛna banto, Yesu nɛmɛlɛ wiiki la bako.

9 Ango akitelaki bako bɔɔkɔ, Yesu aasimbi: «Batalɔndake la onto bingo biɛni bako, nende ango lemi Bɔna a Onto lakondo tondwa».

10 Baeki* bakɔwi koo nɔnda ekambwa, kinaki, bake bataumbolana asamba bako: «Atalange nɔnda nke aliko la ntondwa»?

11 Lonkinɛ baeki* ba Yesu ba wuumboli: «Aliko laanke baekisi ba Isaliya* balɔndi nte kasana Eliya aande obii?» 12 Yesu abauchisa: «Eliya akonwanda obi aliko la mbucha lalikuli wiisaliya. Kinaki aliko laanke lɔɔsi lataimɛya lonkinɛ nte Bɔna a Onto akondoba toakola ike la bakondo weelɔlela? 13 Lemi mbokosimela nyo: Eliya* ombosila manda, kinaki banto baɔkɛɛ ŋango balangi bako, solo la ŋango balɔndi Lɔɔsi Lɔɛlɔ aliko lande».

14 Ango Yesu la baeki* bande basato aimaki bako e bɔɔkɔ, baiyisa mɛ la baeki* ba Yesu bankinɛ batikali, batani bango baeki* bankinɛ batikali, bambo lɛngama la boloi bɔmɔɔ bɔnɛnɛ baanto aliko baiki bata amoyana la Baekisi ba Isaliya*. 15 Ango bango banto baɛni Yesus, basebalali bako lalikuli, la bachwe loango mbɔwɛɛbɛya.

16 Yesu aumboli baeki* bande: «Nke ataamoyana nyo laanɛ banto?» 17 Kinaki bonto ɔmɔɔ asamba boloi abuchisa: «Weekisi, nkwɛlisa bɔna ami, aliko ombo luana la bosombo ɔmɔɔ bobe, la bongo bosombo bombo okicha eluma. 18 Bosombo bata okemela kaama lalikuli, atabooke anyɔi, bɔna atapase lɔfulɔ woonywa. Lonkinɛ nkɛkɛtanya bainyo, la bionge nsenetala. La, lɔmbi ele baeki* babɛ baite bongo bosombo, kinaki koo mbɔsɔna»!

19 Yesu aasimeli: «Nyo banto ba lɛlɔ apha nyo la lokani! Biina benga, lonkinɛ beyala lemi lanyo? Eleko enga lonkinɛ esana lemi nkɔɛmba nyo? Oweela nyo ongo bɔna»!

20 Bawɛɛlisa, ango bosombo aɛni Yesu, oke mbɔɔ sɔkyasɔkya bɔna lankulu; la mbɔɔkwɛɛya e lɔmɔtu, oke mbeleŋanambeleŋana la mpasa lɔfulɔ woonya.

21 Yesu aumboli isɛnde la bɔna: «Ndeka biina inga bimbo wiiyela binɛ?» La isɛnde auchisa: «Manja wɔɔkɛnda bande. 22 La kila wiina ɔnɛ bosombo, mbo wookaka wiiya la wiiloko mona nte aojake. Iya alanga otookele ŋandi la waande ntokakola»!

23 Yesu awuuchisa: «Aliko laanke ombo lɔnda nyo nte iya aɔsɔna, lalikuli besana ele ongo ole la lokani.» 24 Kako nkango, Isɛnde la bɔna aokomi: «Mbwimeya, kinaki omamole lokani lami lokokyame».

25 Yesu mɛna boloi baanto manda mɛ laako; laango, aphangweli bosombo bobe la mboosimela: «Wɛɛ bosombo eluma la epokoto: Pasa ele ɔnɛ bɔna la kuutolake lonkinɛ jɛ ele ndako»! 26 Bongo bosombo aokomi, la nsɔkya bɔna la nkulu, la mpasa. Ongo bɔna wɛɛnamwi wɛɛnte bojo, banto ike baanjisa nɔnda nte: «Ombo bwa». 27 Kinaki Yesu aokemeli o likasa, oke mbowemaya la bɔna aemali.

28 Ango Yesu autoli e lulu la baeki* bande baiki bako amɛlɛ la ndako, ba wuumboli: «Aliko laanke totaɔsɔna mbita ongo bosombo?» 29 La Yesu abauchisa: «Mbo nɔmba ntoo ya ɔsɔna mbita ongo bolengo ba osombo».

30 Yesu la baeki* bande ba pasi ango la nsaphwa e booni ba Galilaya. Kinaki Yesu koo nanga banto baeye engo eiki bako, 31 aliko aiki ataekya baeki* bande la nɔnda: «Lemi Bɔna a Onto lakondo phakemaka waakasa baanto, banɛ bako ndo njaka; kinaki, o biina isato, lakondo tondwa.» 32 Kinaki, baeki* bande koo mbeya bengo besao, la baiki la wɔɔma ombo wuumbola.

33 Yesu la baeki* bande baiyisa ɔɔsɛngɛ ba Kapɛlɛmaumu. Ango aiki ndako e lulu, Yesu aumboli baeki* bande: «Nke eamoyanaki nyo e mboka?» 34 Kinaki bakowi, aliko, e mboka, baiki bata amoyana asamba bako aliko la mbeya nani ole waiyolo asamba bako.

35 Laango Yesu oyali anyɔi, aeleli baeki* bande joomu laaphee la mbwasimela: «Iya ɔmɔɔ alangake njala otamboka, aɔsɔna mbwikicha a kantunda baako lalikuli la bokambi baako lalikuli».

36 Lonkinɛ akemeli yana ya likɛnda la mbookicha asamba bako; awemalisa la mbokombesanya waakasa bande la mbwasimela: 37 «Ɔnɛ aɛbɛya bɔna ɔmɔɔ phoke ɔnɛ elokombo lami, ɔmɔ mbɛbɛya lemi nɛmɛlɛ; la ɔnɛ ambɛbɛya lemi, pha mbɛbisa lemi otoo, kinaki ombo ɛbɛya ɔnɛ antomi».

38 Yɔani asimeli Yesu: «Weekisi, tɔɛni bonto ɔmɔɔ aitaki basombo babe, e lokombo labɛ, kinaki taoni mboosimba, aliko apha wooloi baso».

39 Kinaki Yesu obauchisa: «Ko simbake nyo lonkinɛ, aliko koo onto aɔsɔna nkɛɛ ɛntɔmpɔ ɛmɔɔ o lokombo lami, la phaɔsɔna lonkinɛ nɔnda bobe aliko lami. 40 Aliko ɔnɛ ole apha etamba eso, ko nɔnda ole nde boleka baso. 41 Mbokosimela nyo sɔlɔ, ɔnɛ akɔyaka bokoyo bɔmɔɔ ba iloko aliko ole nyo ele Kilisito*, Kanamombe* akondo ɔngɛla.

42 «Ɔnɛ akwɛya e njambi ɔmɔɔ waanɛ bana bambo mimeya lemi, kasana bɔlɔti ele ndako baɔlɛmɛ libwɛ limɔɔ linɛnɛ e nkingo la mbowooka otema ba wango.

43 «Iya likasa jabe limbo kokwɛɛya e njambi tena jako; bɔlɔti ele wɛɛ mingela e luiko la likasa limɔɔ kuliko nkombelela bakasa bako baphee la nchwa wiiya, wiiya ile phayalime. 44 Engo, bɛnsɔ bɛtale bionge bile pheebwaki, la iya ile phayalimaki jɛ. 45 La iya lokolo labɛ lombo kokwɛɛya e njambi, tena lako; aliko kasana bɔlɔti ele wɛɛ mingela e luiko la lokolo lɔmɔɔ kuliko nkombelela bekolo beko bephee la nphupholama wiiya. 46 Engo, bɛnsɔ betale bionge bile pheebwaki la iya ile phayalime jɛ. 47 Lonkinɛ, iya lisɔ jabɛ limbo kokwɛɛya e njambi, phikola jako; aliko kasana bɔlɔti e wɛɛ mingela weekeleka e Kanamombe* la lisɔ limɔɔ kuliko nkombelela baiso bako baphee la nphupholama wiiya. 48 Engo, bɛnsɔ betale bionge bile pheebwaki la iya, la iya ile phayalime jɛ.

49 «Aliko, kila onto akondo etelaka e toakola taiya ango akondo yala phoke lɛɛphɔ lɔmɛlɛ*.

50 «Lɛɛpho loyalaka nde ekambwa ɛmɔɔ ɛlɔti; kinaki iya lolimeyake lɔɛja lande, ŋaande aɔsɔna nyo mbucha lɔɛja? Yala nyo la lɛɛphɔ ele nyo amɛlɛ la oyale nyo bii bamɔɔ la bankinɛ».