1 Yesu mpasa weengo kaama la mbutola e wooni engo eoli ndako; Baeki bande bake mbootindeya. 2 Wiina ba Sabato*, aiki ata ekya e Basaŋanelo Baayuda. Banto ike bawookaki la nsebalala la nɔnda: «Ende ebai ndako binɛ lalikuli. Nani ɔwɔɔyisa linɛ limanya la nkulu ya nkɛɛ binɛ bintɔmpɔ? 3 Ɔnɛ hapha musɛlɛmala, bɔna a Maliya, boolo ande la Yakɔbɔ la Yɔsɛ la Yuda la Simo? La batamba ande phaasɛlɛlaka laso anɛ»? Aliko la ingo koo mbo wiimeya Yesu. 4 Laango, Yesu aasimeli: «Wɛɛni* oyalaka la bokuchu kaama lalikuli, kinaki apha la bokuchu ɔɔsɛngɛ bootami ndako la ele jootwa jande la baotwa lande».

5 Ango Yesu koo nkɛɛ lonkinɛ ɛntɔmpɔ ɛmɔɔ, kinaki la mbaphya bakasa waakonu bamɔɔ la mbo baikya.

6 La Yesu asebalali aliko la mpheka mbo wiimeya ya bango banto.

Pa ingo Yesu achwe wɛɛsɛngɛ lalikuli be mɛmɛ ataekya banto. 7 Aelili baeki* bande joomu la aphee la mboatoma bapheebaphee. Abaɔyisa nkulu ya mbita basombo babe. 8,9 La aapholoti waa toi la nɔnda: «Kɔɔsake nyo ekambwa ɛmɔɔ ɛ lɔkɛndɔ, ila ntanda: lophata ao besanga e mufuko ao esenda ɛnkinɛ, kinaki emba nyo botumbo la tomposo.»

10 Yesu aasimeli lonkinɛ: «Ango akwɛbɛya nyo bako kaama kamɔɔ, yala nyo e lulu longo nende ango apasaki nyo ango kaama. 11 Lonkinɛ iya bonto ba osɛngɛ ɔmɔɔ akilake mbwa ɛbɛya ao nkooka nyo, pasa nyo ango. Kinaki e mpasa ango, kokola nyo juutu*, bekokemeli nyo weekolo enyo. Ingo yakondo yala lilako kaɔ.» 12 Bango Baeki bachwe bata ekya banto lalikuli aliko baengole belengo bɛɔ la mpasa woobe baɔ. 13 Baphaphi mbita basombo babe ike la mbikya bakɔnu ike la mbwa kila bauta.

14 Weengo biina, Bɔkɔta Elode aoki batalɔndɛ aliko la Yesu, aliko besako bende biiki bimbo balaŋana kaama lalikuli. Bamɔɔ balɔndi: «Yɔani oso mbatisa ombo tondwa, nkɛko ole ndako la nkulu ya nkɛɛ bintɔmpɔ.» 15 Kinaki bankinɛ balondaki: «Ɔnɛ olende Eliya.» Bankinɛ lɔnkinɛ balɔndaki: «Olende wɛɛni, solo la bankinɛ Baɛni batango.» 16 Ango aoki Ɛlɔdɛ bingo lalikuli alɔndi: «Ɔnɛ olende Yɔani oso mbatisa! La ɔteni bɔtɛ, kinaki ombo tondwa»!

17 Aliko Elode aiki ombosila mpasha isaliya ya nkemela la mbɔɔlɛma Yɔani minyɔlɔlɔ, la mbo wooka e munyɔlɔlɔ. Okeisa bingo aliko Yɔani aosimbi atasɔngake Elodiya, waanja a waankunɛ ande Filipi. 18 Yɔani aiki ataosimela Ɛlɔdɛ: «Isaliya yaso imbolɔnda nte: phakasane bonto mbɔsa waaja a aotwa labɛ!» 19 Lonkinɛ, Elodiya okichisa nkɛlɛ e lisolo jande aliko la Yɔani la aoni mboojakya, kinaki koo mbɔsɔna, 20 Aliko, Elode alawaki Yɔani. Aliko aeyaki nte olende bonto ɔmɔɔ a sɔlɔ ele Kanamombe la Lɔɛlɔ. Aliko la ingo aiki ata okenge Yɔani. Ango aoki ndako mbekya ya Yɔani, aiki la libɛla, koo nga ŋango aiki kako kata ɔlɛngya bɔtɛ. 21 Laango, wɛɛsɛ ɔmɔɔ bɔlɔti weenamwe ele Elodiya wiina ba libɛla ya mbotama ya Elode. Aeleli Bɛkɔta benkinɛ la Bɛkɔta be akɔlɔbɔi la Bɛkɔta bɛɛsɛngɛ be Galilaya.

22 Baiki wiingo libɛla, Bophoko ba Elodiya aingeli otema ba kyumba la manja nkɛnya, la nkɛnya yande; ike nangya Elode la banɛ baelelami. Elode aosimeli lonkinɛ ongo baphoko: «Ɔnɔmbɛ lemi engo lalikuli e langa wɛɛ la, lakondo kɔya.» 23 Lonkinɛ aosimeli: «Lalikuli e nɔmba wɛɛ lakondo kɔya. Mbokolapela koonga yaati ya ekeleka yami.» 24 Bophoko mpasa la nchwa ele nyɛŋɛnde: aliko la nɔmba lilako: «Nke ɛ lɔmba lemi?» La ndako obuuchisa: «Lɔmba bɔtɛ o too ba Yɔani oso mbatisa.» 25 Kako nkango ongo Bophoko autoli loango ele Elode la mboosimela: «Mbolanga kako nkaanɛ ompaa bɔtɛ ba Yɔani oso mbatisa e lɔphɛphɛ!» 26 Bɔkɔta aoki ingo aomali nkɛlɛ; kinaki koo nanga mbesanya lonkinɛ, aliko olapi ndako otamboka baaso mbelelama. 27 Kako nkango otomi ɔmɔɔ aa kɔlɔbɔi bande la isaliya ya mbela bɔtɛ ba Yɔani oso mbatisa. Ɔkɔlɔbɔi ochwe e lulu la munyɔlɔlɔ la ntena bɔtɛ ba Yɔani. 28 Lonkinɛ ombweela bɔtɛ e lɔphɛphɛ la mbɔwɔya bophoko, la ongo oke mbɔya nyɛŋɛnde.

29 Ango aoki baeki ba Yɔani bengo besako, bachwe mbɔsa bojo bande la nkunja. 30 Ango Baeta atei* bautoli ele Yesu, la baosimeli lalikuli bakiisa la mbekya. 31 Laango banto ike bachwaki la mbutola baiki ike. Yesu la baeki bande phaiki koonga la eleko e ndɛ. Aliko laingo aasimeli: «Aka nyo tochu njala kaama kamɔɔ aliko oomoye nyo inchɛ.» 32 Bachwe lonkinɛ bako amɛlɛ e Kyombo, kaama ka bii. 33 Kinaki banto ike baɛɛni la mbeya engo echwaki bako; bake nchwa lonkinɛ wɛɛsɛngɛ lalikuli be mɛmɛ la mbiya laekolo weengo kaama otamboka ba Yesu la baeki yande. 34 Ango Yesu apasi ndako e Kyombo, oke mena bongo boloi baanto; lisolo jande like mbola la ŋandi aliko laango anto, aliko ba mbelama la boloi bɔmɔɔ bɛɛkoko bole koo okolo. La oke mbwikicha ata baekya besao ike.

35 Kaiki nde likɔlɔ, baeki ba Yesu ba osimeli: «Bɔkɔta, bombo elekwa la engo kaama kolende bɔɔ. 36 Toma bango anto bachu e nkombo la bɛsɛngɛ bele mɛmɛ nsomba lilɛ!» 37 Yesu oke mbobaucheya: «Ɔya nyo bako lilɛ»! Kinaki bake mboumbola: «Atalange-wɛɛ nte to pashe miya iphee ya besanga* miya iphee: yaiki nde besanga bɛmbɔya bokambi o ŋɔndɔ esambaele. Aliko la nsomba bitumbula la mbɔ baɔya ya ndɛ»?

38 Yesu abaumboli: «Ole nyo la bitumbula binga? Chwaka nyo lokolende.» Ango aɛni bako, baosimeli nte: «Tolende la bitumbula bitano, la lonkinɛ nsɛ iphee.» 39 Laango Yesu abaɔyisa isaliya basɛlɛlɛ bako lalikuli, wee loi waalilo. 40 Banto bake n'sɛlɛla boloi ba miya ɛmɔɔ miya ɛmɔɔ la boloi ba baomu batanobatano. 41 Lonkinɛ Yesu akemeli bingo bitumbula bitano la ingo n'see iphee. Aolisa baiso eliko la nkucha Kanamombe. Oke ntena bitumbula la mbɔya baeki bande. Aliko la mphaka ele banto lalikuli. La ingo nsee iphee ophaki waanto lalikuli. 42 Banto lalikuli bale la jiimbi. 43 Ango akɔngi Baeki bingo biteni be bitumbula la be nsee ya tikali, beoli biphaka joomu la iphee. 44 Bango bampame bale bingo bitumbula baiki wiike baanto elefu itano.

45 Pa ango, Yesu atomi baeki bande bauleli e Kyombo aliko baete otamboka lande boleka ɔnkinɛ ba losi. Boleka ba wooni ba Betesaida, ango nɛmɛlɛ atikali atalake boloi. 46 Pa nsila mbwalaka, oke nchwa o bɔɔkɔ nchwa nɔmba.

47 Ango aiki likolo kengo kyombo ke baeki keiki atei ba losi. Kinaki, Yesu nɛmɛlɛ atikali ɔɔkɔngɛ ba losi. 48 Oke mena nte baeki bande baiki la tosoya ta nduwa, aliko la lɔphɛphɔ nphupha boleka baɔ; o likɛɛlɔ, Yesu oke nchwa boleka baɔ atakende eliko la iloko, la aoni mbwa tanda. 49 Ango awɛɛni baeki atakɛndɛ eliko ja iloko. Bakanyaki nte olende Boyombi la baokomi, 50 Ango bako lalikuli bawɛɛni, bake mba wɔɔma.

Kinaki, kako nkango, Yesu oke mbwasimela: «Kekemala nyo, lemi ongo, kolɔwake nyo!  51 Lonkinɛ auleli o kengo Kyombo la lɔphɛphɔ loke ntena. Baeki bake nsebalala, 52 Aliko koo mbeya maana ba bɛntɔmpɔ be bingo bitumbala: limanya jaɔ jaiki nde liloko joolo.»

53 Ango Yesu la baeki bande basili nsaphwa eliya, Bake boleka ba Gɛnɛsalɛti bake nsokya Kyombo la nɛma. 54 Apasi bako e Kyombo la, Kako nkango, banto baweeyi Yesu. 55 Laango banto bake nchwa loango e bioni lalikuli, la mboweela bakonu eliko ja bakenge baɔ, kaama lalikuli eokaki bako nte olekako. 56 La Kaama lalikuli engo echwaki Yesu, otema ba wooni la bɛsɛngɛ la bibeli. Banto ba weelaki bakonu baɔ o kaama ka anja la mbwisɛya ele Yesu baokoole koonga ɛnsɔli e esɛnda ende. Bango lalikuli baokooli babe luiko.