1 Otamboka ba biina bephee, be libɛla be Pasaka* la libɛla be bitumbula koo bosunga buiye, Bɛkɔta be baeta atei* la Baekisi ba Isaliya* baoni mboka e nkemela Yesu la mbishamambishama aliko la mboojaka. 2 Kinaki, balɔndaki nte: «Phakasane mbookemela e libɛla. Iya ŋango, banto bakondo ela bolupho».

3 Yesu aiki e Betaniya, e lulu la Simoni boso nsuli. Ango aiki ndako atale, wainto ɔmɔɔ aiye, la lintumpa ya lɔngɔsɔlami la libwɛ ja alubati. Wiingo lintupa kwiki bauta ba lisɔmbi joolo. Bango bauta baiki batalɔngɔsɔlama la bolowa ba ote yata elelama Nalato, lonkinɛ, phayaiki yataluana la inkinɛ ekambwa. Pa, ongo wainto omboliphola linchumpa la nsuulela yesu bauta wɔɔtɛ. 4 Laango banto bamɔɔ waango baiki ango ba omali nkɛlɛ, batalɔnjana asamba bako: «Aliko laanke etaphute ndako bauta ba limbala ŋaanɛ? 5 Baɔsɔna nsombya bango bauta e lisɔmbi ja dinali miya isato* la bengo besanga mpakela baso boola!» E kantunda baphangweli ongo wainto.

6 Kinaki, Yesu obaumboli: «Aliko laanke etaaŋangya nyo ɔnɛ wainto? Tika nyo ndako! Ingo imbokɛɛ ndako aliko lami ilende ekambwa lilɔti.» 7 Aliko ole nyo la baso boola luina lalikuli. La aɔsɔna nyo mbwamamola weeleko elangaki nyo. Kinaki lemi, phanjalaki la nyo biina lalikuli. 8 Onɛ wainto okɛɛ ingo isani ndako nkɛɛ. Okichisa bauta ba limbala aliko la bionge bɛmi: «Otangoli nkicha aliko la nkunjama yami. 9 Mbokosimela nyo, kolende sɔlɔ: kaama lalikuli bakondolɔndaka besao be Kanamombe* o boona, bakondo ɔmbɔlaka inɛ bimbo kɛɛ ɔnɛ wainto la wiinɛ bakondo okanyaka».

10 Yuda Isikaliyɔtɛ, ɔmɔɔ a baeki* joomu la aphee ba Yesu, ochwe ele Bɛkɔta be baeta atei*. Aliko la mbwaphakela Yesu. 11 Bɛkɔta be baeta atei* baoki ingo, baiki la libɛla, baɔlakeli mbɔwɔya besanga. Yuda Isikaliyɔtɛ aanjisa mona eleko ɛlɔti ɛɔsɔna ndako mbwaphakela Yesu.

12 Wiina otango ba libɛla ba bitumbula koo bosunga biiyaki. Ko luina longo lojakaka bako bɔna ɔkɔkɔ ba ndɛ e Pasaka*. Baeki ba Yesu baumboli: «Ende elanga wɛɛ tokolɔngɔsɔlɛlɛ lilɛ ja Pasaka»?

13 Yesu otomi baphee ba Baeki* bande la mbwasimela: «Chwaka nyo ɔɔsɛngɛ, engo akondotana nyo bonto ɔmɔɔ ataɛmbɛ mpoke e iloko. Lingita nyo ndako», 14 nende e lulu laingela ndako. La simela nyo ɔmɛlɛ lulu: «Weekisi ombolɔnda kaama nke kele kyumba kende keleela ndako libɛla ja Pasaka* la Baeki* bande»? 15 La ndako akondo baɛnya kyumba kɛnɛnɛ e Gɔlɔfa, kesili nɔngɔsɔlama aliko laso. Ango kalɔngɔsɔla iso lilɛ ja Pasaka*. 16 Baeki* bapasi la nchwa wɔɔsɛngɛ. Batani bikambwa lalikuli bimbo lɔngɔsɔlama ŋango Yesu oasimeli la bake manja nɔngɔsɔla lilɛ ja Pasaka*.

17 Kwiki nde likɔlɔ. Yesu aiyisa bolili la Baeki* bande joomu laaphee. 18 Aiki bako batale, Yesu aasimeli: «Sɔlɔ mbo kosimela nyo, ɔmɔɔ anyo atale lami akondo mphaka».

19 Baeki* bande ba sebalali la mbo wuumbola ɔmɔɔɔmɔɔ: «Ŋaande! Ilende lemi?» 20 Yesu aasimeli: «Ɔmɔɔ asamba nyo joomu laaphe, atale lami ɛ lɔphɛphɛ lɔmɔɔ. 21 Lemi Bɔna a Onto lakondo jakema ŋango Lɔɔsi Lɔɛlɔ lombo lɔnda: Ŋandi! Ele ongo onto, aɔsɔna limphaka. Kwiki nde bɔlɔchi phatootama»!

22 E ndɛɛ, Yesu ombo kemela kitumbula. Ombo lɔmba Kanamombe*, Oke ntena kengo kitumbula la ophakeli Baeki* bande la nɔnda: «Kemela nyo binɛ bilende bionge bɛmi.» 23 Lonkinɛ, okemeli bokoyo ba difai. Ombo sakoya Kanamombe*, la mbɔ ba ɔya Baeki* bande la banywe bako lalikuli. 24 Yesu aasimeli: «Bɛnɛ belende bekila bɛmi, bekila be mboloko* asamba Kanamombe* la banto. Bembo suuama aliko la boloi ba banto.» 25 Yesu aasimeli: «Phanywaaki lonkinɛ difai* nende ango anywaki lemi difai* bekasende weekeleka e Kanamombe*».

26 Pa ango, Yesu la Baeki* bande basili memba bɛkɛlwa ba nkucha Kanamombe*, bapasi, la mbulela o bɔɔkɔ ba Miseituni.*

27 Yesu aasimeli Baeki* bande: «Akondo mbalaŋana nyo lalikuli. Aliko Lɔɔsi Lɔɛlɔ lɔmbɔlɔnda nte:

«Lakondo jaka bochungi.

La bekɔkɔ bekondo balaŋana*».

28 «Kinaki, koonga ŋango, ango atondwa lemi, lakondo kotangolela nyo wɔɔsɛngɛ ba Galilaya.» 29 Pɛtɛlɛ aosimeli: «Koonga bankinɛ lalikuli bakondo kobalaŋana, kinaki lemi, phankochikaki koonga inchɛ»!

30 Yesu aosimeli: «Mbokosimela sɔlɔ: bocho ba lɛlɔ, otamboka ba nkɔkɔ mbeka mala iphee, wɛɛ, akondo yala ombosila lintata mala isatɔ».

31 Kinaki, Pɛtɛlɛ akekemali la nɔnda: «Iya kasana mbwa olili labɛɛ mwimeya.» La Baeki* lalikuli balɔndi ŋango ako.

32 Pa, Yesu la Baeki* bande baiyi kaama kata elelama Getesemani, aasimeli: «Yala nyo anɛ lemi mbochwa nɔmba.» 33 Pa, okemeli Pɛtɛlɛ la Yakɔbɔ la Yɔani, oke nɛmba bionge la mboka wɔɔma, 34 La aasimeli: «Lisolo jami ilende la nkangi sukɛlɛ la mbwa. Yala nyo anɛ, ko lalake nyo».

35 Pa ango, Yesu achwe otamboka inchɛ. Okomi balwe anyɔi la nɔmba ele Kanamombe* mbowaaŋanya weengo eleko e toakola, iya kasana. 36 Alɔndi: «Aba, Phapha, kabɛɛ bikambwa lalikuli be sanaka. Omaŋanyele la ongo bokoyo ba toakola! Kinaki koonga ŋango, kokɛɛkɛ ɲango alanga lɛmi, kinaki ŋango elanga wɛɛ».

37 Pa, Yesu autoli ele bango Baeki* ba sato, aatani bambo lala. Laango aumboli Pɛtɛlɛ: «Iya onde Simo, ombo lala? Koo mba nkulu e ntikala baiso phololo, koo nga saa ɛmɔɔ? 38 Yala nyo baiso phololo la nɔmba aliko kotaingelake nyo e mayalibu. Lisolo ilende la nkulu, kinaki, bionge bilende biɔɔlu»!

39 Yesu aachiki lonkinɛ la nchwa ŋango alɔmbi ndako otamboka. 40 Autoli lonkinɛ boleka baiki Baeki* bande basato aatani lonkinɛ bambo lala. Phaaɔsɔna ntikala baiso phololo aliko baiso baɔ baiki nde bɔlito la phaaeye nke e mbo ucheya. 41 Abaandeli lonkinɛ mala e isato engo eiki Baeki* bande, aasimeli: «Oloko nyo atalale la momoya? Kombo koka! Eleko kembwiya! Lemi Bɔna a Onto mbosila phakema waakasa baaso njambi! 42 Emwa nyo, tochu! Ndaka nyo, ongo ata mphake ombo sukama»!

43 Yesu aiki atalɔndɛ, kako nkango Yuda Isikaliyɔtɛ, ɔmɔɔ a Baeki* bande joomu laaphee ombwiya. Wiiki la boloi ba anto la nkula ntale la bephapho waakasa. Bango banto batomami la Bɛkɔta be baeta atei*, la Baekisi ba Isaliya* la Bekongo Beayuda*. 44 Yuda, aiki ombosila mbɔ ba ɔya imbali. Oke mbwasimela: «Ongo aɛbɛya lemi, ko ndako! Kemela nyo ndako, la mbɔɔtɔla la ookombelele nyo bɔlɔchi!» 45 Ango aiye Yuda sukɛlɛ la Yesu, la kako nkango aɔsukameli la mboosimela: «Weekisi!» Lonkinɛ ombo okombesanya. 46 Laango bango banto baokemeli Yesu la mbɔɔlɛma. 47 Kinaki, ɔmɔɔ a Baeki* ba Yesu kako nkango apasisha lokula lande e lophopha. Oke ntena litoi ya bokambi ɔmɔɔ ba Ɔkɔta be Baeta atei*.

48 Yesu obaumboli: «Omwanda nyo linkemela la nkula la bephapho wɛɛnte baso manda nkemela bokumoli? 49 Biina lalikuli laiki la nyo e lulu la Kanamombe* la lataekya. Kinaki, koo nyo linkemela. Kinaki, imbo kɛɛma ŋango aliko lɔɔsi lɔɛlɔ lokoke.» 50 Kako nkango Baeki* ba Yesu lalikuli ba balaŋani la nchwa lɔango.

51 Kaiki la bompojo ɔmɔɔ alingitaki Yesu aiki atalɔtɛ intete ya esenda. Bango banto bakɛkɛli mbookemela, 52 Kinaki ndako aatikeli ingo intete yande ya esenda la nchwa phololo.

53 Bango banto batɔli Yesu ele Bɔkɔta be baeta atei*. Ango, Bɛkɔta lalikuli be baeta atei*, Bekongo Beayuda* la Baekisi ba Isaliya* ba saŋani. 54 Pɛtɛlɛ alingiti Yesu ole bɔɔ la aingeli o kiwanja ke lulu la Ɔkɔta be baeta atei*. Ayali kaama kamɔɔ laachungi bataoke iya.

55 Bango Bɛkɔta be baeta atei* la bankinɛ Bekongo Beayuda* lalikuli baonaki bemongo be masitaki aliko la mboo jaka. Kinaki, koo mba. 56 Banto ike ba pasisha usuula ba belimbo aliko la Yesu, kinaki, usuula bɛɔ koo mbokana.

57 Pa, bankinɛ asamba bako baemali, bapasisha ma usuula ba elimbo la nɔnda: 58 «Tata iyokela atalɔndɛ nte: ‹Lakondo phanjolaka lɔnɛ lulu la Kanamombe* lophikami laakasa baanto, la o biina esato lakondo phikaka lonkinɛ lole phalaphikami laakasa baanto›».

59 Kinaki, koonga ŋango, usuula baɔ koo mbokana.

60 Laango, Bɔkɔta ba baeta atei* aemali asamba bako, la aumboli Yesu: «Onde, Phauchɛya ekambwa? Wiinɛ lalikuli bitakositaki banto aliko la bɛ?» 61 Kinaki Yesu wiikɔwɛli, koo mbuchɛya ekambwa.

Lonkinɛ, ongo Bɔkɔta owuumboli: «Wɛɛ kole Kilisito*, Bɔna a Kanamombe* ɔnɛ atakucha iso?» 62 Yesu abuuchisa: «Ole, Ko lɛmi! Akondo ɛna nyo lemi Bɔna a Onto latayale boleka ba loome la Kanamombe* ɔmɛlɛ nkulu, lonkinɛ akondo mɛna nyo, lataande mima e loola asamba loonge».

63 Ango, aoki Bɔkɔta ba baeta atei* bingo aati bisɛnda bende la nɔnda: «Tapha lonkinɛ la mposa ba asuula aliko la ɔnɛ bonto! 64 Wiiyokeli nyo ŋango atatole ndako Kanamombe*. Nke etakanya nyo»?

Bako lalikuli balɔndi asana mbwa.

65 Laango, bamɔɔ waango banto baanjisa mboochwela Yesu lɔsɔi. La mboolipha esenda weelongi ende, la mboophoma nsola la mboosimela: «Lɔnda nani ombo kophoma!» La Bakɔlɔbɔi laako baokɛmɛli la mboophoma nsola.

66 Weengo eleko, Pɛtɛlɛ aiki oloko e kiwanja ke Ɔkɔta be baeta atei*. Bokambi ɔmɔɔ a wainto ba Ɔkɔta aiyisa ango aiki Pɛtɛlɛ. 67 Aɛni Pɛtɛlɛ ataoke iya aolendi la mboosimela: «La bɛ wiiki la Yesu a Nasaleti!» 68 Kinaki Pɛtɛlɛ akili la obuuchisa: «Phalaeye la phala oke ingo bitaone wɛɛ nɔnda!» Lonkinɛ, Pɛtɛlɛ apasi e kiwanja la nchwa e lɔkukɛ, kako nkango nkɔkɔ kemboeka.

69 Ongo wainto aɛni ndako lonkinɛ Pɛtɛlɛ, asimeli banto baiki ango: «Ɔnɛ bonto olende ɔmɔɔ abɔ!» 70 Kinaki, Pɛtɛlɛ atati lonkinɛ.

Mbeta inchɛ, bango baiki ango bambo lɔnda lonkinɛ ele Pɛtɛlɛ: «Sɔlɔ, olende ɔmɔɔ abɔ, aliko wɛɛ, olende bonto a wooni ba Galilaya!» 71 Kinaki, Pɛtɛlɛ aanjisa mpasha besao beolo la ndapa la nɔnda: «Lemi phalaweeye ɔnɛ onto atalɔndɛ nyo besako bende. Iya mbɔlɔnda belimbo Kanamombe* antumbya!» 72 Kako nkango, nkɔkɔ kembo eka mala e iphee. Laango Pɛtɛlɛ, ombo kanya ingo eosimeli Yesu: «Otamboka ya mbeka ya nkɔkɔ mala iphee, akondo yala ombo sila lintata mala isato.» La Pɛtɛlɛ ombo lela.